都係比奶咀了

DAY 19, 越來越成個男仔樣, 十足爸爸一副牛精樣(爸爸兒時個樣成個百厭牛王精的模樣喔).

DAY 20, 晨早五時多, 又係時候叫醒廿四小時的奶媽餵奶啦.

阿B, 做乜咁愁呀, 你仲未食飽呀? 媽媽好眼瞓啦~~~~你快D飽啦.

見到媽媽舉起相機, 阿B即刻FING 手.

仲整古做怪,

為減輕我呢個廿四小時奶媽的辛勞, 昨天終於買了個奶咀, 陪阿B瞓覺, 唔駛下下要找我做人肉奶咀, 媽媽都要休息呀BB.

Isaac識側身啦@ day 18

Day 18爸爸返工了, 媽媽和Isaac多謝爸爸請了兩周假來照顧我們喔.  為答謝爸爸照顧, Isaac今早表演側身呀, 好叻仔呀. 咁快識自己側身. 可惜爸爸上班去了, 看不到. 婆婆和Isaac洗澡時, Isaac又表演多一次側身給婆婆看. 婆婆讚你好叻呀.

Day 17 Isaac識笑了, 之前只是勉強扯起一邊嘴角奸笑一樣, DAY 17開始, 明顯見到笑容了, 不過都是喊的時間居多.

DAY 17 偷望爸爸.

可能知道爸爸翌日上班啦, Isaac唔知諗乜諗到咁苦惱~~~唔通諗緊爸爸返工後, 邊個幫我換片??

DAY 14- 16

DAY 14, 忙了一天, 忘了影相, 臨凌晨幫Isaac影返張day 14的相先.

DAY 15, 晨早又來惡仔變身. 就黎嘈到隔離屋都聽到

到十一時, 又靜返了, 變返斯文仔.

DAY 16, 大家陸續探訪, 本來還讚Isaac好乖又靚仔眼仔又大大....點知一夠鐘, 又來惡仔上身~~~原來夠鐘食奶了. 真失禮呀, 大家都看到Isaac大叫的惡樣.

Isaac甩臍帶

阿B十二朝甩左臍帶啦. 媽媽打算保留臍帶, 待阿B大個仔, 給他自己留念.

DAY 12

 Isaac唔想再食奶時, 個咀仔會嘟起, 唔比人再塞佢食奶. 好得意. 成個女仔咁.

DAY 13

 阿B扭計時間越來越長, 婆婆叫阿B做扭紋柴了.

Isaac十二朝啦

DAY 9, 開始舞手舞腳.

DAY 10

媽媽最愛看Isaac這種睡姿. 這種睡姿, 通常在晨咁早的清晨至會表演架咋.

DAY 11

惡仔本色開始了, 成日扭計. 但喊極都無眼淚的.

阿仔, 你唔好成日扭計啦~~~~呢D叫渣頸就命啦, 想反抗都唔得.

DAY 12 終於十二朝啦阿B, 今日開始有人來探你呀

Isaac: 唔, 究竟今日有邊個黎呢~~~

爸爸幫你特登著靚靚. 一陣見人啦. 忽然又扮斯文瞓覺覺.

Isaac話咁快就十二朝啦, 我仲有十八日就坐完月, 可以帶BB出街啦. 諗起就開心.

Isaac唔駛入院

出院當日, 浸會度出黃胆指數10度, 醫生說, 12度才需照燈. 建議我們待高峰期, 到母嬰院再測一次.

出世第五天

阿B成日瞓...除左半夜變左精神之外.

第六天, 母嬰測出黃胆指數220度, 醫生說要250度才可以照燈. 但這天, 面仔已經黃哂, 眼白仲好濁, 担心死媽媽.

出世第六天晨早, 好鬼誘人的睡姿姐

最鐘意舉手投降的Isaac

第六天, 眼白越來越混濁, 好似人地乙型奸炎惡化的跡象. 媽媽好担心會影響你腦部發展喔. 但爸爸堅持反對帶你到附近兒科醫生再睇....其實媽媽已經唔係好信政府既呢.

出世第七天, 又再到母嬰覆診. 因為冷氣關係, 婆婆和二少, 把你化身做荷蘭姑娘打扮...我就覺得似公主或者阿聯酋.

這次, 母嬰測出黃胆開始退, 但都有202喔. 眼白仲係好混濁. 不過醫生話唔駛入院照燈, 媽媽聽到好開心....唔知爸爸點諗呢, 因為他說, 寧願你入院, 等他有覺好瞓喎.

出世第八天啦, 好熟悉的睡姿.

你在媽媽肚裡, 和剛出世影的血淋淋相, 都是這個模樣呀.

唉, 這幾天, 媽媽累透了, 原來餵人奶好透支架, 真係未生過bb, 都唔知自己有咁大既母愛. 這幾天, 為了要餵人奶, 媽媽平均只能小睡半小時, 頂多是在爭取爸爸半夜餵奶粉的時間, 睡一個多小時. 不過, 因為你不習慣用奶瓶, 加上半夜要起床餵奶, 爸爸今天已經提出, 要媽媽放棄餵人奶了.

哼, 不過為了你日後的健康和抵抗力, 媽媽會誓死向全人奶進發的. 現在媽媽好努力, 找尋半夜餵人奶的方案, 和餵人奶的時間了, 希望能餵到你健健康康啦.

出院後的折騰

昨天和Isaac出院了.

臨出院的樣子(出世第三天)

看著媽媽, 眼仔碌碌喔.

回到家, 以為一切平靜

(出世第四天).....

新任爸爸和媽媽回到家, 已經忙個不停, 還以為Isaac好聽話, 可以好像在醫院裡, 不會哭啦.

怎料, 當我和二少, 忙到凌晨十二時, 以為喝埋碗補湯就可以瞓啦....阿B開始黎料了.

喊呀喊, 喊個不停, 換片又喊 (大少爺脾氣, 不鐘意人家搞擾他....不過唔搞你, 又點幫你換片呀). 賴屎又喊....喊完了...又夠鐘食奶. 食完奶又唔瞓, 又喊.....

搞到我和二少, 昨天(應該說今天清晨才對)凌晨五時多才能入睡.

Isaac喔, 希望你聽聽話話啦, 今天不要再狂哭五小時了.

Isaac 出世過程

一句到尾~~~~好後悔無催生呀

四月十日, 早上六時多已經定時一個鐘痛三十秒. 若果不是八時多見紅, 我都不會那麼快入院.

見紅後, 馬上沖涼洗頭, 仲同二少食埋早餐, 至坐的士去浸會醫院.

娘親還緊張的說, 不要去浸會了, 因為見紅就好快生得......要去屯門醫院啦. 趕唔切去浸會啦.

去到浸會, 陣痛無左了~~~~醫生問婆仔, 要否催生呀....婆仔好想順其自然, 毅然拒絕催生.

又沒有繼續見紅喎....哎呀, 已經有少少後悔, 那麼早入去喔....因為要收多一日住院費 + 醫生費.

謝謝二少肯比婆仔住三人房, 正喔~~~~我當住酒店一樣, 因為到今天出院, 才有人check in 入來同一間房, 即是五日四夜, 我都是獨佔一間三人房.

仲笑得出～～

早上十一時四十分, 駁機聽BB心跳.

中午十二時廿五分, 開始恢復陣痛了, 每次三十秒. 穩定的, 每隔半小時來料一次.

這個階段, 我還可以如常談話, 食野.

下午三時, 姑娘CHECK 度數, 原來子宮頸一度都未開, 唉, 好失望呀, 咁要痛到點, 至開到一度呢. 姑娘還說, BB個頭仲好高呀...叫婆仔再行多點, 地心吸力等BB快D落黎.

下午四時, 陣痛變為每十分鐘一次, 每次三十秒.

晚上七時四十三分, 陣痛變為每五分鐘一次, 每次三十秒. 後腰也開始隨著陣痛一起痛, 即是前後夾功, 當步行時, 要烏低身按摩後腰. 好辛苦.

還以為BB可以趕住這天的凌晨之前出世, 那麼, 我就不用多付一天住院費嘛. 怎料, 姑娘晚上十時, 探子宮頸時, 又說~~~~ 一度都沒有. 好失望呀.....咁究竟怎樣才有一度呀.....姑娘還打口形叫二少回家休息吧, 因為以婆仔進度, 應該有排都未生得.

唉, 姑娘說, 雖然陣痛密了, 不過還未漫延至整個肚腹, 這種每五分鐘痛三十秒的痛楚, 依然只限於下腹位置. 姑娘說, 要痛到整個肚都硬到一塊板的樣子, 就可以真正計算陣痛時間了......聽完個下, 真係好失望呀, 索性唔計時啦, 計足一日, 竟然是流料....還要等多久呢. 二少走後, 一於由得陣痛纏身, 去找周公也.

四月十一日-----即是二少走後的那個半夜啦. 大約二時, 婆仔開始無得睡了. 因為姑娘說, 要整個肚硬到一塊板咁, 至開始黎料. 所以, 婆仔都費事計時啦. 但半夜二時開始, 是痛到入心入肺. 已經痛到, 要兩呼兩吸, 搏命咁呼吸才能勉強頂到. 好N次, 我想CALL姑娘來, 請求止痛針, 好讓我瞓番一覺, 明天瞓醒再搏過. 不過, 當想到這刻個肚都還未到一塊板咁硬---意味明天還要痛, 無理由咁快打針架, 打針對BB始終唔好嘛~~~於是乎, 又死頂. 不過已經去到雙腳典床典席的MOMENT了.

就這樣, 捱到半夜五時三十八分, 姑娘又來探度數, 子宮頸又是一度都未開. 聽到的這刻, 真係好灰好灰, 忽然間已經無哂動力去捱陣痛. 我開始在想, 為什麼要生仔呀, 點解生仔咁辛苦呀~~~已經痛到成晚瞓唔到, 仲要痛到典床典席, 原來都是未開子宮頸~~~~開刀的念頭開始出現了. 不過, 又怕娘親反對開刀....這刻, 簡直是精神折磨. 我記得, 去到這刻, 我開始發SMS給朋友和二少告知這個連一度都未開的惡夢.....因為連說話的力氣也沒有, 唯有在陣痛之間, 趕緊發SMS.

早上來臨了, 不知捱到幾時, 忽然間, 看到娘親和二少出現~~~好像都九時多. 我連說話的力氣都沒有, 因為收縮的痛楚 + 後腰的YU痛, 簡直是前後夾功. 不過, 二少夾硬要婆仔落地行.....其實, 那條走廊, 我不知停了多少次, 像一個垂死的病人, 挨住牆身 + 扶住扶手 + 搏哂老命抖大氣 (還清醒, 記得要兩呼兩吸) + 雙手不斷捉著二少要大力大力按摩後腰. 其實, 去到這個MOMENT, 陣痛對我來說, 肚腹依然未硬, 不過, 後腰的酸痛, 簡直令人想死.

又不知過了多少時間, 忽然有嬸嬸要求婆仔入待產房了~~~當然, 我知道是醫生終於要婆仔決定: 催生還是開刀.

四月十一日, 早上十時三十分, 入待產房的一刻, 好想去尿尿呀, 又未食早餐, 典算呀, 無力生仔架喎.....不過嬸嬸姑娘連醫生, 都不接受婆仔請求~~~讓我吃點東西. 醫生摸摸婆仔下腹, 說其實你都無尿尿去, 只是BB壓住姐. 然後, 醫生探度數~~~YEAH, 終於開了兩度了. 簡直又喜又怒....好不容易有兩度了....不過, 要捱著後腰的痛 + 下腹的陣痛才兩度, 好難捱姐.

醫生又問婆仔, 要催生還是要開刀, 還是要繼續痛, 等子宮頸自己再開....

唉, 好難答的問題. 催生就痛得厲害好多, 不過不担保又要痛到什麼時候....醫生這樣說.

長痛不如短痛了....反正捱了一晚陣痛, 無理由這個時候開刀那麼笨嘛.

這刻, 我好清醒好決絕的說, 催生我一定要聞笑氣喔, 你快點比笑氣我聞啦. 還要打止痛針.

接著, 醫生篤穿了胎水. 好像賴尿一樣, 好多暖暖的水流出來了.

跟住就賴野了, 未吊催生葯, 已經痛得想死....不停拿笑氣來聞....老實說, 陣痛對我來說, 還是後腰的YU痛大過下腹的痛楚.

早上十一時三十分, 被嬸嬸推去產房. 臨進去的一刻, 婆仔還可以笑住問嬸嬸, 比返個笑氣我聞呀.....還比阿嬸寸, 你仲醒過阿嬸. 証明你無野啦, 一陣先聞.

入到產房, 完全是兩回事.

十級痛楚開始來料. 甫上病床, 已經好緊張周圍望笑氣係邊.....發覺陣痛又來時...噢, 好在笑氣剛到.

可惜, 在產房內, 連聞笑氣都不行啦. 我感到痛楚有增無減, 還要前後夾功, 迫著我一定要側身, 讓出背脊給二少大力大力按摩. 他稍為無力一點, 都會被我大力的捉著他的手, 迫他大力按, 沒法子, 那種後腰的YU痛, 是會令人想死的. 姑娘還幫婆仔打了止痛針....但我覺得是沒效的.

中午十二時四十五分. 姑娘說, 已經開到八度啦....去到呢個MOMENT, 我已經控制唔到自己, 每次陣痛, 都不期然在喉嚨發出痛楚的嗚咽聲(當然我知道叫出來會嘥氣, 所以無叫到, 但都CONTROL唔到, 發出嗚咽的聲音). 其實都知好嘥力呀, 發聲的話, 不過去到呢個痛楚, 真是不能自控. 按二少說, 呢個MOMENT的陣痛, 是每一分鐘就痛一分鐘. 所以, 當他在駁機看到陣痛指數又來時, 就會幫婆仔倒數時間~~~安慰婆仔. 其實那刻, 我好想問, 點解痛一分鐘咁耐架. 不過又是痛到出不到聲.

子宮開到八度, 醫生來了. 醫生和助產士, 要婆仔屙屎啦, 用力屙啦. 雙手還要像什麼抽水一樣, 往自己方向拉....唉, 講這麼多, 我覺得我那刻, 基本上已達至: 接收緩慢的程度. 試了一兩次, 都被助產士說, 錯了方向呀.

唉, 真是無力啦, 連早餐都沒吃, 整晚又沒睡.

屙到連眼水都標出來. BB頭仔都是未出. 醫生不知重覆了多少次: 見到頭髮啦, 你用力屙啦, 爭少少呀~~~~~但重覆了好多次囉.

再唔係就說, 你用錯力呀, 你都唔係屙....

忽然, 聽到身旁的助產士說, BB心跳跌到六十幾....

醫生說: 你快點用力屙啦, 焗親佢架啦, 佢係呢個位好耐啦, 你再屙唔出, 要吸佢出黎啦.

我就心想, 算啦, 放棄屙啦, 我真係屙唔出, 吸出來算了. 無謂搞到阿B心跳再低.

於是和醫生說, 我無力屙呀......

醫生便把阿B吸出來.

舒服哂~~~~即使阿B頭仔徧大, 但出來那刻, 痛是痛....但已經不能和方才的陣痛比較.

Isaac, 就是這樣, 來到這個世界了. 如果有人把婆仔由四月十日早上的一刻拍下記錄片, 直至Isaac出世, 我想, 這套記錄片, 應該列入不人道的戲劇.

不過, 現在回想起來, 其實原來陣痛都不是太難頂姐......如果後腰沒有YU痛, 就會更好.

我要把整個過程記下來, 好讓Isaac長大後, 曉得媽媽是如何捱著痛楚, 把他生下來.

出世第二天

好開心見到媽咪呀~~~

媽咪, 我好攰呀...

咁快食完奶奶啦??

其實我想再食耐D呀媽咪.....

Isaac 的第一天

因為生產完後, 不知要忍口多久, 所以昨天享用了一頓豐富午餐.

最後經過了30多小時的大小劇痛, Issac終於出世啦.

 

但是同阿乜水一樣, 打完場大仗, 所以好攰, 要搵周生談心, 要過幾日先同大家再見面啦.

我入院啦.

四月九日, 私家預產期. 阿B無動靜.

四月十日, 淩晨又眼光光等天光. 到六時, 發覺肚臍下方扯住痛. 和平日假宮縮的痛法不同. 維持約三十秒.

七時, 又來一次肚臍下方痛, 維持又是三十秒.

跟住八時, 又三十秒.

八時半, 又三十秒.

二少好興奮, 馬上梳洗仲要帶埋CON, GEL 個靚頭, 話要同阿B影相.

到我起床去洗手間, 發覺見紅了....噢, 馬上沖涼洗頭.

現在要去醫院了, 希望阿B快點出世, 不要媽媽痛好耐吧.

 

最後一次產檢???

BB, 今天醫生說, 你頭圍岩周數. 可惜腳仔身形都是徧小兩周呀....你是男仔喔, 媽媽不想你當矮仔呀.

還有, 你要趕著今晚好出世了.....否則, 下周媽媽催生的話, 你差不多七磅半, 醫生說有機會需要臨時動手術啦. 到時就是雙重痛楚.

今天, 看到你的臉還沒有對著媽媽的背脊, 唉, 醫生說, 你再不轉過背後, 媽媽生產時,不會太順利的. 不過, 透過屏幕, 我又看到你那張十足爸爸的厚咀唇.......呵呵.

6WD 6D          0.96CM

10WD 1D        3.16CM

12WD 5D        6.39CM 威院醫生說八成是仔.

14WD 5D        8.91CM, 重四安士. 私家醫生說見到咕咕, 是仔

20WD 1 D      十二安士. 醫生說太大了, 不能再度長度.

24WD             一磅八安士.

27WD 5D       兩磅六安士.

31WK 5D       三磅十三安士.

33WK 5D       四磅七安士.

34WK 6D       四磅十二安士.

35WK 5D       五磅四安士.

36WK 5D       五磅九安士.

37WK 6D       五磅十三安士.

39WK 0D       六磅十一安士.

39WK  6D      七磅四安士.

39周 / 40 周???

按傳統數算日子方法, 今天BB應該剛滿39周.

 

如果按第一次照U/S來看, BB後天就滿40周了.

 

不過, 到今天, 都沒有任何動靜呢.

 

昨晚, 還很活躍地手舞足動, 刮著我的肚皮超過大半小時. 我懷疑是BB知道爸爸不高興BB還不肯出世. 所以, 昨天爸爸的手放在媽媽的肚時, BB前所未有地, 像用手指刮著媽媽的肚臍, 上下上下地刮, 媽媽真的FEEL 到是手指的物體呢, 還問爸爸說: "你刮我肚臍呀?"

 

原來是BB你百厭, 逗爸爸高興嗎? BB你刮個不停外, 還不停在肚裡打翻斗轉身, 像是表演給爸爸看喔. 你好些日子沒有這樣活躍了, 爸爸不知多高興....雖然口裡還在埋怨你久久不肯出來作他的玩伴.

 

BB, 如果你乖乖的捱過明天. 媽媽就大功告成啦, 因為明天是媽媽上班的LAST DAY. 過了明天, 你再出世的話, 也不成問題呢. 不過, 就不要再待久了, 否則媽媽可能要開刀, 讓醫生把你拿出來喔.

泰好味

早幾天, 和二少去了一間, 友人說不錯但價錢加價加得好厲害的地踎鋪頭吃泰國菜.

兩個人散步, 差不多走了半小時路程, 終於找到不起眼的小店.

兩個人, 點了個旦包海鮮炒飯.

裡面的海鮮, 都是魷魚和蝦,蟹柳而已.

二少點的豬頸肉炒韮菜花. 吃不出泰國味呢.

我們去吃泰國菜, 必點的炸蝦餅.

不過, 論份量, 好像少了喔, 要42元呢. 雖然味道挺不錯的. 不過, 對比屯門小曼谷, 質量差很遠呢.

還有二少習慣點的釀雞翼. 可惜二少以為釀料是元朗另一間隠居泰菜

的造法: 有粉絲等等....所以二少有點失望.

迫二少點的芒果白雪冰, 二少說也不懂欣賞喎, 激死.

總的而言, 這店味道是不錯的. 不過, 我和二少, 都知道有比它更好味和更便宜的隠蔽地道泰菜小店. 所以呢, 這間二少友人推篤的泰好味, 應該沒有下次唷.

五穀豐收 @ 佐敦

昨天去產檢, 本來打算吃澳洲牛奶公司做 lunch. 不過, 在診所樓下, 見到有間新開張的餐廳. 個名叫"五穀豐收", 幾特別, 走去望望. 原來是健康的餐廳, 吃五穀飯或菜飯. 還有冬蔭公湯面.

於是拉二少一起試試.

個人認為不錯喔. 五穀飯真是五穀...不是象徵式少少穀物混進白飯就算.

有二少喜愛的金菇肥牛卷. 原來套餐是有滑豆腐的, 真的好滑呀....好像吃豆花一樣.

有粟米班塊.

其實我懷疑是杏花樓的廚房過來這裡開店. 因為套餐都是杏花樓那些菜飯/五穀飯配主菜, 再加糖水的. 當然, 這裡價錢比杏花樓就便宜囉.

二人還點了蘿蔔糕. 端上枱是幾香的. 不會太粉. 好像有點自家製的感覺. 當然, 我就覺得蘿蔔味不太濃. 不過 14元兩大塊, 還想要求什麼呢.