奬勵雪糕的一餐

4 Sep 15 話說暑假尾聲時，同Isaac 行去VCITY食野，Isaac 見到張好吸引既雪糕POSTER，話想去食⋯⋯媽咪就話佢識得拼POSTER最大個行英文字，咁咪同佢去食囉。二話不說，Isaac 好努力咁利用佢學過既PHONICS黎拼讀。吖，估唔到佢又拼到喎⋯⋯抵奬既。

所以，呢日趁小學仲係返半天時，放學我地一齊去食⋯⋯不過，原來LUNCH SET好好好好貴架⋯⋯貴到媽媽索性唔食，哈哈哈。Isaac 係咁問媽媽，做乜唔叫野食⋯⋯妹妹係咁話，做乜唔食野⋯⋯不過，要叫埋個碟奬勵既雪糕，呢餐真係貴到不可接受，所以，媽媽話自己唔肚餓⋯⋯其實係好想食埋一份⋯⋯哈哈，原來母愛係咁偉大。

飯後，仲叫左LUNCH SET 加五蚊既MOVENPICK雪糕比Isaac 食。

就係呢兩兄妹囉⋯⋯就係呢碟超貴既雪糕囉⋯⋯搞到媽媽淨坐一餐。不過，睇見呢兩兄妹，好明顯呢趟都值得既。明明影相，四隻眼睛依然望住碟雪糕⋯⋯碟雪糕有無咁吸引呀？

返到家又準備換衫出街，有人居然諗住用BACKPACK 勾住頂帽，咁就唔駛除帽時要自己收。咁都比佢諗到，真係夠抵死！！

小一了

1 Sep 15 開學日，Isaac 正式成為保記一份子了。之前一連串叩門接獲收生電話，一切都好似發夢咁。如真如假，到呢日一切都確實好多了。不過有人三年幼稚園習慣左校服配白波鞋，呢日返小學，Isaac 都好慣性拎對白鞋著。直到媽媽等校車時，先留意到佢著錯鞋。不過媽媽都無理了，反正錯一次，以後實會小心⋯⋯反而爸爸知道後，責怪媽媽搞錯左。不過唔錯過，又點會成長呀⋯⋯從此，Isaac 就變成小學生了，希望佢能夠比心機讀書，並好好享受六年既小學生涯。

新生適應日。第二日

28 Aug 15 呢日又係新生適應日。岩岩升做小學雞，上堂仲係一舊雲。全靠媽媽收風，先知今日要著運動服，否則Isaac 一句都無提過。上課室了，當時既Isaac，仲會同媽媽打招呼架⋯⋯而家？啋我都傻，唉，真係仔大仔世界。

Isaac: 我就黎放學，等埋我呀⋯⋯

放學了，一堆家長一齊等放學。不過媽媽一個都唔認得⋯⋯Isaac 木無表情⋯⋯因為咀巴痛囉。

睇下，成日都整起個咀。生痱兹都有排好啦。

放左學，玩完跳繩，趁仲係暑假，我地又走去公園玩下。次次經開爬蟲館，最吸引除左個館外，仲有呢堆戶外既爬蟲模型。

Isaac: 我型唔型呀⋯⋯

估唔到，兩個月暑假咁就過了。過多兩日，Isaac 會正式成為小學生，究竟小學生活適應成點？真係引頸以待。

我上小學了。新生適應日

27 Aug 15 等左咁耐，終於等到呢日了。猶記得當年參觀小學開放日，Isaac 就被呢間學校既機械人製作班吸引，當時仲係K3既佢，自己決定選讀呢間小學。可惜電腦攪珠只能派往另一間唔係心儀既小學。媽媽真係心力交瘁，不停諗方法，寫信打電話周圍問人，叩門都叩了唔少間，幸好，最後呢間心儀小學打電話黎話收我地，爸爸仲以為係玩弄電話，唔係好信⋯⋯唔信唔信，到註冊買書日，又真係見到Isaac 個名在LIST架喎⋯⋯好似夢一場咁⋯⋯⋯疑幻疑真，直到呢日，Isaac 正式開始適應班，媽媽睇住佢入去排隊上課室⋯⋯一切都變得真實了。實在感恩。

第一天上學，就爛咀巴。笑得幾咁勉強。

妹妹都一齊送哥哥返學，仲叫哥哥加油。其實妹妹真係好錫Isaac. 

Isaac: 我都好錫阿妹架⋯⋯
Claire: 咦⋯⋯夾住我條頸，我抖唔到氣呀⋯⋯

 一年級生，分班排隊上課室⋯⋯嘩，顯得Isaac 好似好高咁，不過佢好明顯唔係最高個位囉。

睇下，後面位男同學高Isaac 少少，又後面隊都有兩位同Isaac 一樣高。

呢日媽咪聽講座，妹妹就被安排去睇電視，講座後，就接埋Isaac 放學，一齊食LUNCH。咁開心既日子，當然食佢最鐘意既火車路軌LUNCH啦⋯⋯不過兩兄妹各自一個兒童餐⋯⋯跟住兩兄妹都食唔哂。結果係比媽媽哦足半餐，哈哈哈。做媽咪真係好長氣呀⋯⋯

傻兄妹玩HIDE ＆ SEEK

26 Aug 15 傍晚無乜節目，見兩兄妹悶悶地，媽媽就話玩佢地最鐘意既屋企遊戲 －－HIDE ＆ SEEK。每次玩親，兩兄妹都異常興奮。

不過，次次都係兩兄妹爭住做捉人個位。睇下呢個奸妹，摸兩摸就放棄，仲要嗲下你咁，頂佢唔順（按此）。

之後，就好似傻妹上身咁，自己係度傻笑喎。乜真係咁好笑咩⋯⋯（點此）。

次次玩HIDE ＆ SEEK，Isaac 都最鐘意匿埋係枱底。可能阿妹都估到，所以就出現咁既搞笑畫面（點此）。

TOY STORY留倩影

26 Aug 15 呢日跳繩之後無乜搞作，媽媽見暑假呢個TOY STORY就黎擺完，就索性帶兩兄妹去影下相。由TOY STORY展期開始，次次經過，Isaac 都話想入去影相⋯⋯媽媽一直話少人D先。見呢日平日，唔算多人，我地又得閒，就入去影下啦。

Claire: 嘻嘻，我高過三眼仔⋯⋯

Isaac: 我一早高過啦⋯⋯

Isaac: 我個POSE 似唔似三眼仔呀？

Claire: 睇我幾高⋯⋯

Isaac: 唓，你撐高自己咋嘛⋯⋯點會同我一樣高姐⋯⋯

Claire: 影快D啦，我對手好攰呀⋯⋯

最後一次賣旗

26 Aug 15 呢日又係賣旗日，Isaac 例牌參加，呢年係最後一年，朋友仔好似買少見少，唔係好多人參加，可能撞正佢地小一適應日掛。最後一次，就出發前影張相留念吧。呢日之後，大家都各散東西了。

雖然口口聲聲話掛住同學，不過呢日碰面，Isaac 都無野講咁，好含蓄。

呢年係Isaac 最後一次以學生身份賣旗，亦都係第一次同妹妹一齊參加，咁梗係都要同阿妹影返張相先啦。因為影完後，Isaac 就同妹妹分開兩邊去賣旗了。

辛苦左一朝，終於夠鐘交旗袋了。成程賣旗，Isaac 成日嘈話要痴住同學一齊企，之後係人地個個都係分開企，因為大家係落力賣嘛，唔係玩⋯⋯唔知Isaac 幾時至明呢。

Claire：哼，你就好，可以有媽咪陪你一齊賣⋯⋯

體操彈床花絮

24 Aug 15 又係體操彈床時間，呢堂都差唔多到尾聲，過多個星期就返學了。睇下課堂既尾聲，Isaac 有乜玩⋯⋯其實都無乜特別，最特別只係呢個由彈床上面自己打翻斗落地（按此觀看）。

至於Claire 妹妹，一向都話佢大膽，次次玩體操，對住木馬無有怕，何況今堂做D超易既彈跳，即刻跑去做比你睇（按此）。

除左木馬，Claire 係熱身方面，動作都純熟左好多，好似呢個不停咁趴低彈跳，妹妹就好似做得好快手咁。（點此）


玩左成個暑假，最後睇下Claire 彈床又跳成點先（點此）。雖然動作唔算好粹熟，不過以佢身型同年紀黎講，都算係咁了。繼續努力呀。Claire 之後都會斷斷續續玩體操的，希望佢有朝一日，動作可以做得更加靚啦。

和睦兩兄妹

22 Aug 15 呢日唔駛去跳繩，媽媽就同兩兄妹去下公園。呢個BB千秋，只有妹妹可以FIT到坐入去。做哥哥既，只可以推下妹妹。不過睇住佢兩個，一個願推，一個ENJOY，做媽媽看在眼裡，真係倍感安慰。

Isaac: 媽咪，睇下，我推到阿妹好高呀⋯⋯

Claire: 嘩⋯⋯好快呀⋯⋯

各自玩

20 Aug 15 呢日暑期，基本上我地都係HEA住過，玩下彈床玩下跳繩咁又一DAY。再唔係就留係屋企各自玩玩具。睇下呢朝，兩個寶貝各自玩，自成一角。

最搞笑係叫媽媽摺紙船，原來係比佢地既玩具坐。

Claire: 乖乖呀，我帶你去旅行呀。

 其實當各自玩又好似一齊玩既時候，應該係最平和安靜既時刻。哈哈哈，起碼唔會打交先。

如果呢兩兄妹，成日都可以咁安靜，各自玩唔打交，咁就好了。

踩冰去也

19 Aug 15 呢日媽媽要去剥智慧齒，無人照顧兩個小朋友，爸爸就請假帶佢地去蹓冰去。時間趕急，佢地唯有要急速食M記。

Claire: 其實我地好鐘意食M記架⋯⋯我淨係想食薯條架咋。
Isaac: 嘻⋯⋯我鐘意食佢個芝旦包⋯⋯

 食飽飽，趕住去踩冰也。好明顯呢兩個小朋友既運動細胞都好過媽媽。真係厲害。

體操彈床節錄

17 Aug 15 又係時候上體操彈床班，呢日錄到Isaac 動作純熟咁做彈床動作 －坐轉跪趴分腿抱膝，真係睇到媽媽眼前為之一震。佩服佩服！（按片）

至於體操方面，Isaac 呢堂好少可咁大膽，自己彈跳去前方既單槓。果然玩左成個暑假，玩到熟哂，膽都大埋。（點我）

之前Isaac 成日都怕輸既引體上升，牛高馬大既佢，次次都鬼咁快落返黎。呢次都好似唔例外。真係睇唔出佢對手臂咁無力喎⋯⋯（點我）

甩牙記

14 Aug 15 呢幾日，Isaac 都好愁苦，因為佢有一隻牙鬆左，想甩想甩但又唔甩咁。呢晚，Isaac 無啦啦坐係到喊。真係嚇親。想知點解？（按此去片）

呢幾日爸爸唔係香港，Isaac 好決絕咁叫媽媽幫佢扯甩隻牙。不過媽媽都好驚呀⋯⋯都係等幾日，爸爸返黎先啦。嘻嘻。

15 Aug 15 係時候要清下野，講既，就係收藏呢叠超厚既愛心勞作。係Isaac 由K1 開始，日日係學校整比媽咪既畫同勞作。以前，日日放學，都會好開心咁比媽咪睇佢勞作或者畫，然後送比媽咪。真係好令人窩心。

18 Aug 15 呢日，正當媽咪同妹妹沖涼時，忽然哥哥大叫⋯⋯原來，係佢自己整甩左隻牙呀。嘩，終於甩第一隻牙了。開心得佢吖，仲懶得戚話唔痛。唔知邊個之前痛到想喊想喊呢。

巡例都要影下隻牙位。不過影埋Isaac 爆拆既臉頰TIM。

唔好以為甩左就唔驚，之後個D牙，都係生左恒齒先，攪到有一隻乳齒要去牙醫剝，明明打左麻醉針，但醫生話根太長，唔可以一扯就得，最後要慢慢擰，擰到Isaac 流哂眼水係度喊，為左呢D牙仔，Isaac 唔知最後會喊幾多次，先可以換哂成棚乳齒呢。

撲厘厘

14 Aug 15 上完跳繩堂返屋企，無乜野好玩，媽媽就提出玩撲厘厘。一講玩呢個，兩兄妹不知幾咁興奮。不過，捉人永遠無媽咪份，因為兩兄妹都好怕被人捉。媽咪厘埋一邊裝佢地捉，又係另一番樂趣。

先睇Claire 妹妹幾老實咁周圍摸先。（去片一）   （去片二）

跟住到哥哥捉我地，睇下係咪一樣咁老實周圍摸先。（按此去片）

由細到大，媽咪都鐘意同佢兩兄妹玩撲厘厘，真係玩極都唔厭。

暑假遊濕地

13 Aug 15 呢日無節目又唔駛去跳繩，媽媽就帶兩兄妹去濕地放下電。咁岩遇著濕地有小型環保攤位，兩兄妺見份禮品幾得意，又走去玩一份，點知仲比負責人影埋相⋯⋯但禮品就無。玩完不知幾咁失望。

明明早前同Claire 黎玩，Claire 可以上樹屋，開心到不得了。點不知，呢日重遊濕地，卻因高度問題，唔可以上最刺激既樹屋玩。卒之，有人勁憂愁

Claire: 我明明咁高，點解淨係可以玩BB區呀⋯⋯

Claire: 唉～～真係好想喊呀⋯⋯

Claire: 我好嬲架啦，你唔好再影我呀⋯⋯

 不過，媽咪都係要影佢喎，仲錄埋衰妹發脾氣想打人既惡樣TIM。（按此）

幸好，Claire 有個錫佢既哥哥，哥哥終於肯落黎BB區陪Claire 了。

Claire: 我咪同你講左，唔好再影囉⋯⋯

點解會有人咁玩滑梯架⋯⋯真係睇見都覺得膝頭痛。

Claire: 嘩，乜哥哥你唔識企既咩？你睇我，我都無跌。

大舊哥哥，玩呢個滑梯，真係格格不入咁。哈哈。

咦，後邊好似仲有人喎。

睇下衰妹笑得幾咁甜，頭先發脾氣既憤怒無哂LU。多得哥哥陪佢咋。

之後，我地出左去揾怕醜草。

咦，連哥哥都好認真咁揾緊怕羞草喎。

石屎森林長大既小朋友，難得見到大自然，真係好好奇咁研究。

最後，玩完公園，Isaac 又話要係門口影返張3D相⋯⋯其實次次都要影呢個佈景，悶唔悶？

Claire: 唉，我都唔想影架，係哥哥捉住我⋯⋯