一家貓頭鷹: Isaac 1 歲半至 3 歲

顯示具有 Isaac 1 歲半至 3 歲 標籤的文章。顯示所有文章

2014年11月16日星期日

參觀保良局馮李佩瑤小學

14 Sep 14 每年九月，都係準小一生好忙既日子，因為父母要四出頻撲去睇小學。呢日我地都唔例外，特登搭車去到山卡那睇保良局馮李佩瑤小學參觀，呢間學校係千禧校舍，好大好靚。我地睇完都心郁郁試下搏一搏。

最特別係呢間學校有觀星會，可惜無家長一齊入去睇星。不過小朋友就可以上天台玩水火箭。

(按此觀看Isaac 試射水火箭片段）

（按此觀看Claire 試射水火箭片段）

玩下玩下，其實我地玩左好多間課室攤位，爸爸比較過兩間保記，覺得呢間老師專業D，無圍埋吹水，認真處理開放日，令人有好感。

玩左好耐，我地好肚餓了，臨走，Isaac 不停提我地要去整旦糕裝飾。好新奇呀，呢D材料可以用黎做勞作唧出黎。媽媽真係大鄉里。

一臉認真既Isaac ，希望佢真係可以入到呢間小學啦。

同場加插兩兄妹既温馨成長照。攝於 15 Sep 14, 同年半前既樣差好遠，不過都一樣咁相親相愛。希望佢地大個都係咁就好了。

2014年5月16日星期五

可愛囡囡

小朋友講野有時真係好天真無邪，好可愛。好似Claire 咁，曾經有一次瞓係張床，好用力咁呼吸，攪到肚腩仔又上又落，想點？原來係想生仔呀。跟住好辛苦呼吸之後，好唔開心咁講：我生唔到BB既？？？

媽媽係隔離聽到，真係唔知可以點比反應佢。究竟邊個教佢要瞓係度生仔架，哈哈哈。

又有時候， Claire 會拎住個BB公仔，扮係餵佢飲奶奶。奶奶係邊？咪就係佢自己餵人奶囉。好好笑呀。真係好可愛。

呢朝，媽媽瞓醒，見到Claire 做乜好少可咁“LAU 舊”，無啦啦有個衣夾夾住個手袋。一問之下， Claire 好理所當然咁答媽媽：我驚KITTY會飛走左吖嘛。

嘩卡卡，唔通佢以為掠衫要夾衣夾，跟住所有野都會飛走？

可愛的Claire，有時玩起上黎，真係表情多多，超搞笑。好似呢日同佢去玩千秋，正正經經笑緊既。

忽然間做D古怪表情引你。真係有時唔出聲，都可以冧死人。

Claire: 哈哈，你比我冧死左未呀？

三歲既Claire，動作越來越好。越來越多計仔氹人歡心。不過媽媽希望你可以長多點肉，唔好好似媽媽咁，瘦到得棚骨，咁就好了。

2012年5月18日星期五

9 Apr 12 話說阿仔仲未滿三歲, 仲係兩歲幾時, 見學校師姐師兄自組玩學警童心, 好似幾好玩咁. 一時興起, 即幫阿仔報名. 真係膽粗粗, 因為同班無同學仔參加, 個個都話怕小朋友唔肯自己入去玩喎, 講到媽咪都有少少後悔TI.

好在當日, ISAAC都無令媽媽失望, 都有入去玩...不過係好眼瞓咁.

睇返個日, 其實未換衫, 仲係岩岩落車時, 一臉雀躍架.

Isaac: 唏, 等我打下你先~~

Isaac: 我叉腰仲型過佢喎

Isaac: 警察姐姐, 你叫乜名呀?

Isaac: 等我都擺返個POSE正經同警察影相先

影到咁上梗, 要換衫入去玩了. 不過呢套衫, 仲未係全套架, 媽媽就覺得軍裝警套制服型D. 呢套交通警麻麻地.

人太多, 想企個好位影正面都難. 下次真係要早到步慢慢影

趕頭趕命, 終於攝到少少位影家庭照了. 爸爸不在場, 所以無得影.

Isaac: 我無眼睇, 咁多人....

媽媽好失策呀, 都係呢個原因, 拖到而家至補寫返個警察post. 因為媽媽掛住教新工人幫妹妹換片同開餐. miss左isaac出黎的一幕, miss 哂 Isaac 同阿sir同埋影團體照的一幕. 等媽媽仲企係到等....等到最後一班都出哂....再問下工作人員, 原來阿仔個班, 係第一班出黎....唉, 媽咪聽到, 真係好想喊. 好唔開心呀, 返去問其它同校家長, 又拎唔到合照. 算了, 唯有下次叫工人等埋仔仔出黎, 至搞妹妹.

呢張就係, 工作人員知悉媽媽漏左 ISAAC 後, 先至發現原來仲有一個小朋友係未走....唉, 乜咁都有. 如果媽咪唔問, 咁係咪佢地會留低左 Isaac 呢

可能心情不佳, 見其它小朋友都有媽咪爸爸接, 而自己又等左好耐, 仲要一個人咁等...所以阿仔開始發脾氣, 加上又眼瞓, 點都唔肯著返呢套制服影相. 要媽咪氹左好耐, 至肯拎哂所以野包括戴返帽黎影相咋.

媽咪: 笑下啦 Isaac: 我笑唔出呀

下次報左名玩救火員, 希望下次有爸爸在場, 唔駛咁泥hea, 可以多d 時間影相.

2012年3月30日星期五

挑皮哥哥

又係時候追返阿仔的舊POST.

繼之前扮唔同動物引媽媽發笑外, 阿仔之前仲係屋企扮青蛙, 同埋飛機, 真係好搞笑, 唔知佢係邊度學返黎.

再放多個踩單車VIDEO先, 其實之前識踩架啦, 不過呢日媽媽至得手錄影記低.

準備踏入三歲既阿仔, 越來越曳. 叫佢唔好掂佢徧要掂住唔放. 總之要佢向東佢就徧向西. 激死人. 媽媽真係要諗下點教你至得了. 希望你唔好越來越反叛, 大個睇返你細個既成長記錄, 其實你本來係一個好聽話的小朋友黎架.

2012年3月21日星期三

好攰遊迪迪尼

19 Mar 12 呢日屋企制水一天，媽媽索性帶兩兄妹去迪迪尼。呢排拐子佬新聞唱到周街都係，所以未出門，爸爸千叮萬囑叫Isaac小心，如果比陌生人抱左，要大叫，仲要保護埋妹妹唔好比人抱走。Isaac 聽到，就話要帶劍劍出街，趕走壞人。

不過一入到樂園，邊仲記得拎劍吖，把劍好快放左入阿媽個袋到。跟住走去爬黎爬去。

排排下又忽然熊抱妹妹。

嘩，排左成個幾鐘，阿仔乜都值啦下嘛，MINNIE 錫錫喎。阿仔係為左MINNIE至要排隊影相咋。

Isaac: 米奇，你唔好拖我啦，我淨係想拖MINNIE咋

米奇：成功拖到

影完相，走去玩木馬，玩完木馬又嘈話要玩小飛象，好在有姑婆陪佢玩姐，否則媽媽都唔知點抱妹妹上去。因為計人頭只可限兩個人頭玩一架咋。睇阿仔咁HAPPY，媽媽就知無揾錯人陪仔仔玩了。

玩完姑婆仲話要抱住Isaac 影相，嘩，阿仔你好重姐，難為姑婆要抱起你黎影相

其實一入迪迪尼，阿仔又係好眼瞓，成日無啦啦失控發脾氣，仲話要坐火車返屋企瞓覺，講得出呢句真係好眼瞓囉。不過咁早返屋企，又係無水。所以我地無理阿仔，繼續玩維尼熊。點知個閘唔聽話，媽媽掛住影相未上車，架閘就話要關了。不過眼瞓的阿仔依然一舊木咁，無動於衷。

雖則眼瞓，不過對某D野依然有反應架，睇呢張相都估到九成啦～～

就係有人挨住張椅，媽媽好奇怪，問佢乜事，原來阿仔話：好驚呀～～～

玩完小小世界食支雪糕，阿仔叫做有返少少精神。跟住又嘈住要話杯杯車車。

Isaac: 嘻嘻，有得渣車車

Isaac: 好搞笑呀～～～隻杯識郁架喎

行去睇巡遊途中，比阿仔遇到吹泡泡，嘩，又精神返哂

之後磨下磨下，又坐下的士，我地就啟程返屋企了。媽媽返到屋企，攰到呢～～～原來一個人帶哂兩兄妹既野出街，係好攰架。仲要煮埋晚飯佢兩隻食，真係攰到無人有。

不過阿仔都好攰，都唔明做乜既，最近呢兩次同佢去迪迪，去到佢都失控要瞓覺，莫非阿仔你對迪迪無興趣？！

不過，經過今次，日後帶住兩個出街玩，都唔係問題了。