gathering again

30 July 11 呢日妹妹又有GATHERING, 所以媽媽趕返屋企就要同妹妹裝身.

Claire: 一陣會唔會有靚仔呢...

媽媽單拖揹住囡囡入場, 嘩,真係失禮死人. 一入房就爆喊出黎, 搞到各大媽媽圍哂黎睇下邊個喊得咁有中氣. 真係叫各位大開眼界. 幾經辛苦至可以clam down 左妹妹收聲, 比佢坐車仔.

基本上成場阿囡都係喊多, 所以無得影相. 唯一可以係瞓著左同全場最大份既bb仔影相(因為有一半人都走左了, bb選擇無多), 話說呢個b仔只不過大阿囡三日咁大把. 不過望落似相差三個月咁囉.

呢日媽媽同完妹妹去完呢個gathering, 媽媽就放低妹妹係屋企, 出左街. 唔知係咪咁, 佢呢日食左兩次奶樽(都係人奶), 所以半夜又復發係咁喊醒, 好似要揾奶食咁.

31 July 11 之前個晚半夜喊醒兩次, 媽媽一心諗住呢朝可以瞓晏d啦, 點知佢又要六點幾醒, 真係火都黎. 呢日媽媽又係出街, 留左妹妹係屋企, 不過只係食一餐樽(都係人奶)但半夜依然係要喊醒. 跟住翌日又係晨早六點幾醒. 捱左兩日半夜咁起身, 阿媽好眼瞓呀.

Claire: 嘻嘻, 幫你減下肥嘛, 唔夠瞓可以減肥架媽媽.

同哥哥玩

28 July 11 Claire: 做乜我個髮型咁尖既～～個頂

29 July 11 Claire: 我想扣喉～～～ 

媽媽拎左幾次呢個PLAYMAT出黎， 妹妹都無反應， 卒之呢日曉得伸手捉住啦， 媽媽覺得係一大進步。

呢日又係阿媽一人對兩個細路既時候， 呢個時候， 媽媽最叻係玩一個GAME， 就係兩兄妹一齊玩。可以一眼關七又唔會顧此失彼冷落其中一個。

 哥哥一向聽到話同妹妹一齊玩， 就最開心。估唔到妹妹一瞓落去， 隻手又係即刻摸哥哥， 搞到哥哥係咁叫。

Isaac: 媽媽， 我又學妹妹咁～～

 兩個餅印，除左頭髮外， 媽媽睇唔出邊忽唔似。

 Isaac: 你唔好食手啦

 妹妹隻手比哥哥捉住左教玩玩具。

下午哥哥唔瞓晏覺， 又要痴實媽媽。又係時候出動兩個一齊玩既時間。不過睇佢地兩個好投入架， 一個投入教妹妹玩， 另一個投入睇住哥哥玩。妹妹仲要撓埋落仔仔手臂到TIM， 媽媽無教佢架。

Isaac: 你做乜係咁捉實我呀？

 Isaac: 等我呵下你啦妹妹。     Claire: 得左。

又反常

25 July 11 因為阿囡呢日實在太惡搞， 發左成日癲咁喊， 唔知係咪食左輪狀關係。忽然變返初生咁， 日喊夜喊乜都喊， 所以阿媽索性要搞攰妹妹， 等佢快D瞓啦唔該。要佢攰就係要反轉佢

Claire: 媽媽， 乜你對我好不滿咩下？

26 July 11 仲未回復返正常既阿囡， 依然係好扭

Claire: 媽媽， 邊個叫你而家全職湊我姐， 我梗要扭多D啦

呢張相勁囉， 阿媽覺得阿妹好似比人分開左四肢咁， 好搞笑

 影個時都無為意對腳岔開哂。

Claire: 唔好影我食手啦

阿囡又係好扭計， 媽媽迫住對住佢無得同仔仔玩， 唯有叫仔仔一齊同妹妹玩算。兩隻手仔拖埋，阿妹隻手即刻唔見左。

雖然妹妹唔識講野， 但從佢雙眼， 媽媽深信妹妹係好鐘意Isaac的。因為每次Isaac 出現， 阿囡都會好開心咁望住哥哥架。

做阿哥的都好呵護妹妹

 Isaac: 你快D瞓啦， 我要同媽媽出去玩架。

27 July 11 嘩， 呢朝慘囉， 五點喊驚咁，搞左成個鐘都唔瞓， 仲忽然笑哂口對住媽媽。抱到瞓著左啦， 點知一陣又喊醒。。。。。七點幾至再入睡， 卒之媽媽頂唔順又攰得滯瞓過籠， 呢日食奶時間亂哂， 又係揾媽媽黎搞。

 雖然晨早五點醒左， 但之後瞓返呢， 阿囡又好似開始回復返好少少。仲浪對腳去個床既TOYS到， 十足當年既Isaac咁

 Claire: 哈哈， 乜我似哥哥咩？

蓮藕手

23 July 11 Claire: Hello, 我叫Claire 呀， 等我SHOW下我對蓮藕先

Claire: 之後就自由了， 鐘意點擰都得

Claire: 喂， 唔好影啦， 破壞我斯文形象呀

呢日唔知做乜， 媽媽全職後， 妹妹DAY 1 已經好聽話一覺瞓到八點幾， 點知呢， 呢晚凌晨五點喊醒。唉

24 July 11 自從個日比工人五花大縛後， 媽媽發覺妹妹就愛上比人綁住瞓。一綁呢，的確係快D入睡， 因為無得再食手仔吖嘛， 迫佢定定地咁瞓

 Claire: 工人， 你放返我出黎啦， 我瞓醒啦， 你睇我幾精神

呢日傍晚要去食輪狀， 未食之前仲係好活躍咁係床玩

Claire: 我唏。。。FING返對腳去左邊先。媽媽， 我做緊減肥體操呀

Claire: 咦， 我對腳唔見左既？？？

本來呢篇諗唔到叫乜名， 但忽然比媽媽驚覺原來妹妹對手有三截架啦， 雖然比起其它同齡BB佢算係超細碼。不過媽媽都好開心架啦， 忽然見到有蓮藕手係個囡身上出現喎， 哈哈哈。

扮淑女

21 July 11 Claire: 朝早又係扮斯文氹下媽媽先

真係唔好比妹妹呃倒， 因為唔駛五分鐘， 阿囡會反轉張床。

Claire: 咦。。。。比人影到我想扮幪面超人TIM．

Claire: 咁遮住應該上唔到鏡啦掛

玩完紗巾走去玩食衫。

Claire: 媽媽話我唔夠淑女， 所以即幫我換件公主衫喎， 咁我唯有斯文～～～一分鐘咁多啦

Claire: 媽媽， 魔爪送比你

22 July 11  Claire: 我呢副LOOK似唔似人地撥頭髮咁呀？

Claire: 好，扮完淑女， 又係真情流露既時候

 點解媽媽要POST呢張相？ 因為個枕頭明明係瞓緊， 媽媽見証住阿囡點扯甩個枕頭 ＋分屍左墊住個塊布 ＝ 左邊手執布 ＋ 右邊FING甩左既枕頭。媽媽仲睇到扯個一刻， 枕頭係COVER左係妹妹塊臉到， 點知佢好快手就FING走左， 媽媽拎相機都唔夠佢快手。真係睇到眼都突埋。

媽媽全職後， 每餵完奶， 都會趴轉妹妹， 除左等佢頸骨同腰骨好D外，其次係要等佢快D攰快D攰， 咁就可以好快瞓返同瞓得好D了。

Claire: 我都估到你咁諗啦

最後加返張扮淑女既樣先。

全職湊

19 July 11 呢日媽媽第一日全職了。可以全天候陪住仔仔囡囡一齊成長。呢日開始， 媽媽每次餵奶最大心願係餵到阿囡肥肥白白， 追返之前落後左既磅數返黎就好了。

Claire: 等我諗下諗下， 食唔食到咁多奶先

 Claire: 媽媽， 我呢個POSE夠唔夠嗲呀？

 Claire: 做乜要人坐低呀？

 呢頭扮嗲個頭又變左男仔頭咁YOUNG 行哂張床。

20 July 11 一出世就玩吹波波既阿囡， 到而家都仲成日吹波。都唔知係有心定無意。

Claire: 咁我遮住塊臉你咪睇唔到我吹波波囉

媽媽睇少陣都唔得，忽然入返房做乜阿囡你搞到咁架下。。。。。

 Claire: 咁我拎返走張巾囉。

 Claire: 唔駛驚啦媽媽。

媽媽諗住試下妹妹手仔拎唔拎到野， 隨手塞左隻鴨鴨比佢， 下場係乜？

 

就係送左入口囉

三個半月既妹妹， 腰骨好左好多LU。可以趴好耐都得， 條腰仲要撐得好高下