食到碗半至兩碗了

29 Oct 11 Claire: 媽媽， 我仲未識爬前呀 Isaac: 唔緊要啦， 我捉住你爬啦

30 Oct 11  呢日忽然比妹妹扶住床邊企， 睇下佢自己腳仔同手仔夠唔夠力支撐自己。
 咦， 好似得喎～～～

 Claire: 嘻嘻， 唔好影到爸爸對手扶緊我呀～～

呢日媽媽煲粥仔比妹妹食， 唔知係好味吖， 定無工人咁杰撻撻， 兩餐媽媽都餵到兩碗。

31 Oct 11 呢日妹妹寧舍扭計， 下午開始爆喊不停， 唔知發生乜事， 唉。

Claire: 其實我係喊住嗲你咋嘛


Claire: 咦， 做乜影我相呀

呢日媽媽叫工人煮多少少粥， 因為妹好似食到兩碗， 點知工人唔信， 激死， 仲係話佢食一碗飽。卒之夜晚個餐真係食到一碗半。希望妹妹繼續努力。食多 D 長多 D 肉， 雖然你瞓得少（唔知長唔長到肉）

成功坐痰罐

27 Oct 11 呢日妹妹同哥哥玩， 睇佢玩得幾開心。仲開心過同媽媽玩。

 唔止妹妹開心， 連哥哥都笑哂口。一齊瞓係地墊到做體操。

28 Oct 11 呢日係哥哥學校假期， 唔駛返學。未出去同同學仔玩時， 就係屋企做好哥哥， 教妹妹玩玩具。

Isaac: 妹妹， 咁按架              Claire: 哦


 Claire: 哥哥， 你再試多次我睇吖

趁哥哥唔為意， 一個人陶醉自己玩時， 媽媽就抱妹妹入房， 比佢另一個大空間去刺激下佢爬。
 Claire: 嘩， 呢度仲大過地墊喎。

仲未識向前爬既妹妹， 滾地同爬圈就最快。速度真係快到成日要捉返佢入地墊。所以媽媽叫左爸爸WKEND 拎返袋地墊出黎， 下週一會加大妹妹個勢力範圍。

Claire: 我唏～～～咦， 好似碌唔到上去既， 無理由架。

Claire: 咁我碌另一邊啦

呢日， 媽媽發現妹妹識向後爬， 雖然速度好慢。不過亦都係一種跡象好快會向前爬架啦。其實都唔知關唔關媽媽呢兩日同佢特訓有關， 無計， 七個月仲未識爬， 聽人講話可能大個左會影響手眼協調等等能力。所以而家一有時間， 都會捉住妹妹對腳， 協助佢同比意識佢究竟爬係點既感覺。等妹妹FEEL 下。

呢日係第二日坐痰罐。媽媽成功左， 係裡邊屙左POO POO， 不過媽媽掛住捉實YOUNG既能力十足既妹妹， 唔記得影低就比工人沖左去了。

 呢個LOOK真係好似爸爸細個既時候呀。～～～同場加插媽媽對又老又粗既手。唉， 歲月催人殘。

醫生訓話

24 Oct 11 妹妹最開心唔係開餐, 而係見到哥哥, 一見哥哥就會笑. 唔通真係年紀相若, BB都識分?所以寧舍鐘意同哥哥玩?


仲成日對哥哥摸手摸腳. Isaac: 唔好摸我對眼眼呀~~~

25 Oct 11 瞓醒覺擰轉頭望下邊個黎左呢?

26 Oct 11 Claire: 嘻嘻, 呢塊係乜黎架?

Claire: 等我聞下先

Claire: 好似無味咁既?

Claire: 久違既腳趾, 我好掛住你.

如果阿囡食粥食奶好似食腳趾咁就好囉, 睇下, 手指腳趾一齊食至滿足.

呢朝同妹妹出去睇醫生, 因為流鼻涕左成個星期, 食左成個星期葯都無好過....流足一周. 呢兩日仲好似惡化, 所以帶佢去睇另一個醫生, 卒之就比醫生係咁訓話, 話媽媽點湊第二個架, 餵葯都唔識. 飲水都唔識~~~~~ 嘩, 唔關我事架醫生. 哥哥真係聽話好多嘛, 由細到大, 食葯無扭計, 幾苦都肯食, 而家兩歲半, 苦茶都飲哂成碗, 至多飲完話好難飲. 邊似妹妹咁, 呢頭入口個頭bu返哂出黎. 仲要連水都唔肯飲一啖. 搞到食固體後, 便便都差左好多. 咀仔一掂到feel到又要進食(其實係飲水)都標哂反抗. 好惡搞. 點算好呀阿囡. 湯你又唔肯飲.莫非你真係傳說中既keep fit, 由陀住你keep fit 到出世之後, 家下食固體都要keep, 莫非怕飲水都會肥?

食左葯攰到難得瞓既大晏覺. 媽媽都難得可以有得抖下.

鬼馬的一天.

23 Oct 11 阿妹呢日心情梗係好好, 表情都多過平時.

Claire: 哈哈, 我真係好開心呀? 因為我食到兩餐粥仔嘛


Claire: 不過我仲係好懷念食腳趾既滋味.

Claire: 我喔~~~~

Claire: 媽咪, 請你食吖

Claire: 嘻嘻, 你做乜唔食喎

Claire: 點解咁好味既腳趾, 媽咪都唔吼既

Claire: 咦~~~原來浪起對腳都好過癮架喎.

Claire: 哈哈, 真係好得意呀.

Claire: 媽咪, 你又試下吖

Claire: 點解媽咪又唔試架~~~

都唔知係咁岩定係阿囡燥左, 自從食到兩餐固體粥仔後, 阿囡半夜一定會醒架, 仲要醒親都為時一個鐘. 辛苦死媽媽. 好在媽媽唔駛返工, 朝早仲可以攤床攤到七點幾咋, 唔係真係殘死人. 不過晚晚咁搞, 媽媽真係火到上心口了. 囡囡呀, 你仔細已經難湊, 難得你食到兩餐粥, 你唔好又比惡功課媽媽做啦. 希望之後可以一覺瞓天光啦. 究竟有乜方法可試呢? 而家媽媽每日都試唔同方法, 睇下邊個方法可以令到囡囡瞓到天光的.

守得雲開

20 Oct 11 經過兩週既坐特訓, 呢日囡囡終於坐到好直. 原來坐直真係要比佢多點學習坐至得架喎, 呢個第二任媽媽真係唔知. 睇黎真係唔係好岩湊細路, 係湊過囡囡至知咁多野.


阿囡坐直仲不特止, 仲要伸哂兩隻手仔出去玩野至滿足.

Claire: 媽咪, 我叻唔叻呀?

Claire: 不過做人要謙虛D好, 開心都唔好咁揚, 等我擰歪面笑先~~~

21 Oct 11 百厭星又對準梳化黎研究. 明明有個健力架係後邊佢唔玩, 徧係要爬去玩梳化.

Claire: 哥哥, 你係度玩乜呀?     Isaac: 我係度玩緊同學仔送比我既貼紙囉.

Claire: 乜野叫貼紙呀?

22 Oct 11 趴係床睇電視.

呢日係第二晚, 阿囡六點幾個餐都可以食到一碗bb細碗既杰撻撻粥仔了. 為左避免又飽到嘔, 呢餐之後, 媽媽唔等到九點幾都唔會再餵人奶. 妹妹肯食到兩餐粥仔, 媽媽真開心. 好阿Q咁諗, 可能媽媽唔夠奶, 所以囡囡兩個鐘就肚餓, 肯食得哂成碗粥. 爸爸就話妹妹應已適應固體食物, 所以肯食囉.

點都好啦, 總之肯食到兩餐固體就最HAPPY. 至少摸索到囡囡開餐時間先. 明天充滿希望呀~~~~

飽到嘔

17 Oct 11 呢隻百厭星， 一日到黑都要反身， 又唔見佢爬前， 淨係識爬到氹氹轉。


18 Oct 11 媽媽漏左講一樣野， 就係半歲既妹妹， 出左牙仔了。一隻露左出黎另一隻仲標緊， 搞到妹妹有時會做呢個表情， 條脷仔頂返門牙仔， 可能諗緊點解有舊野係前邊既？？？

Claire: 媽媽， 你見唔見到呀？ 好似有野頂住咁呀


不過影相就影唔到牙仔。

19 Oct 11 呢晚媽媽想繼續試下兩餐固體， 因為未捉到妹妹肚餓時間， 所以六點幾餵左半碗仔粟米旦黃蓉（已經無加粥了）後， 八點九諗住再食下奶等妹妹瞓覺啦。點知食食下， 妹妹忽然發爛渣標住咁喊～～～然後， 一大PEI 粟米蓉嘔左落奶媽身上， 諗起都核突呀， 明明食緊人奶架嘛， 忽然吐左一PEI野出黎， 媽媽情急智生， 即轉位置等妹妹繼續嘔～～～於是乎妹妹全身都係嘔吐物。唉， 好泥HEA， 媽媽身上一大PEI 嘔吐物， 但為左要善後左妹妹先， 唯有忍住污糟既感覺，無理自己， 就抱妹妹入廁所由頭沖到落尾。真係陰公豬囉。 唔通妹妹你咁細， 皆因你個胃仔細過人？ 定係真係要一日一餐固體等你消化叻左至再轉兩餐呢？

半歲生日會 - 最終回

16 Oct 11 呢日同妹妹出去灣仔參加半歲生日會. 係巴士瞓到隻豬咁既妹妹, 平時係屋企唔見佢瞓咁耐, 坐巴士比媽媽攬住就瞓足成個鐘.


瞓飽飽見人, 不過無儀態, 係都要擘大脾坐.

 

甫開始就抽到奬, 一向無抽奬運既媽媽居然中奬~~~細奬咁大把, 都唔知好嬲定好笑

 Claire: 媽咪, 呢兩包糊仔可能岩我食喎.

成個會場, 媽咪最鐘意係米奇公仔, 因為影完相仲有返一張即印既照片比媽咪留念架.

全女班....  Claire: 你唔好喊啦...

呢次生日會, 有三個旦糕咁多, 不過實在人多, 係咁擠上去影相, 都無可能影到一張單人照架啦. 加上係婆婆拎機, 無得要求咁多.

媽咪: 妹妹, 你望下相機先啦...

呢日張banner有妹妹份, 就係大寫 H 隔離個張相仔啦. 特登抱埋妹妹過去影.

 Claire: 發生乜事呀????

臨走又同下未瞓覺既b女影返張先~~~吖, 點解個個媽咪都要痴住囡囡個頭仔既呢

回程, 妹妹又瞓到隻豬咁. 如果妹妹平時係屋企都係咁就好囉.瞓多d至會長肉架嘛.