24 Sep 16 呢日，係Isaac 第一次參加跳繩比賽。媽媽好開心，因為，Isaac 終於肯試下玩跳繩比賽，測試下自己既水準。晨咁早，我地就出發去到上水，睇見人地呢班好齊好落力咁練跳繩，媽媽都為之震懾。暗暗地在心裡記下佢地呢TEAM人既學會名稱⋯⋯
媽媽都係第一次出席呢種場合，眼見各運動員好認真咁跳，耳聽不停響的跳繩聲，真係好壯觀呀。
有個小朋友居然話唔識綁鞋帶，要教練同佢綁。就係咁，比人偷影左。
首先比賽項目，係三十秒單車步。之前好努力咁係屋企樓下練， 練到連爸爸都話要佢放棄比賽（幾無體育精神）。好在，媽媽堅持比Isaac 出場，雖然真係無奬拎，但，連Isaac 自己都好驚訝，居然跳出這個數字喔。平時係屋企都跳唔到呢！（
按此）
努力既結果。排名十三。不過，能夠30秒跳到45下，真係超出佢平時表現了。
 |
| Isaac: 我要撐住呀⋯⋯好攰呀～～ |
之後，就係講體能耐力既三分鐘速度跳了。每次係屋企練呢個三分鐘，Isaac 都一定跳到掟繩，大喊以後唔再玩跳繩、三年級唔再參加跳繩、下次唔會再比賽⋯⋯等等。吖，練習係辛苦，但跳完呢三分鐘，Isaac 勁開心囉。好有成功感咁同媽媽講，佢跳到二百幾下呀。真係好叻呀，呢次比賽，Isaac 發揮左自己的小宇宙。所以，媽媽反對爸爸話退賽呢個決定，係明智架，唔比賽，又點知自己可以捱到呢！三分鐘跳二百幾下，一樣排名十三，不過媽媽已經覺得Isaac 好叻了。佢真係盡左力了。（
比賽片段按此）
比賽完速度跳，又到LUNCH時間。因為要備賽，呢班運動員，只能係體育館捱飯盒，睇見真陰公⋯⋯不過，原來同場好多唔同TEAM既人都係咁。乜，運動員生活就係咁架？
 |
| Isaac: 媽咪，你食左飯未呀？ |
唔好坐地下食咁無陰公囉，始終年紀最小係佢，熱辣辣飯盒邊拎得咁成熟。媽媽一見側邊有位子，就叫Isaac 坐返去凳食。都叫做無咁高難度吖嘛。食飽飽，又要等下一場比賽。
下午，就係個人花式時間了。Isaac 一個人上場，好鬼緊張，鬼咩，原來成排評判坐係度望住你一個跳咋。跳完哂，個教練話首背景歌好好聽，但Isaac 個樣就好難睇⋯⋯因為太驚了，LA 埋哂塊面。好在，Isaac 都叫順利完成。最後，得第四名。第一次，算係咁啦。（
比賽片段）。
NICKY SIR和佢既學生們，都唔係全部讀Isaac 同一間小學的。
好明顯，Isaac 係被迫入去影合照。張張都木口木面。
好努力咁跳哂三場，等結果的同時，我地蛇左去隔離間遊戲室玩。
連Isaac 幼稚園同學都一齊玩， 加埋妹妹，三個好開心⋯⋯可惜，後黎比教練發現，要死死氣返入比賽場地⋯⋯無得輕鬆玩一陣。
入左場，妹妹無野做，兩個妹妹就走埋一齊，自己係側邊玩下跳繩。
 |
| Claire: 嘩哈哈，家如姐姐好搞笑呀⋯⋯撓住左自己隻腳喎。 |
呢兩位妹妹，都係睇住自己姐姐哥哥跳繩睇到熟，所以，佢兩個走埋一齊，都好合拍咁各自練繩。唔知出年既學校跳繩隊，佢兩個有無份一齊玩呢？
因為媽媽趕住要上飛機，所以，趕住帶Isaac 離場，無等到結果⋯⋯原來，後黎教練通知，Isaac 係下午個場既個人花式賽中，拎到第四名。真係驚喜呀⋯⋯當然，Isaac 梗係怨媽媽早左走啦。下次啦，下次會等埋結果先走架啦。繼續努力喔。
