我歲半了

 

1 Oct 12 Claire 終於歲半了. 真係養得有汗有淚, 由係咁喊不停到而家成日引人笑的笑口棗, 人講乜佢講乜. 學人最快. 由之前好怕哥哥掂佢, 唔比哥哥拖的妹妹, 到而家出街, 都要大叫"喂"....要哥哥拖住行(都唔知學邊個, 而家叫媽咪都係叫阿喂, 好在呢兩日又好返, 識叫媽媽做媽咪咋)

識講好多野的妹妹, 不過都係限兩個字架咋, 好似講牛肉, 係呀, 知呀, 好呀. POO POO, 我, 哥哥等等等等. 總之只要你講一次佢聽, 妹妹有心聽, 都會即刻講返一次你聽. 滿足下你大人既需要.

歲半既妹妹, 超有性格, 著件衫呢, 有五成機會, 佢會幫你西選過既, 如果唔靚加本小姐心情不佳, 就會拒絕同你著. 好似呢件彩色背心咁, 本來係著一件超薄長外套, 點知妹妹發脾氣, 唔肯著. 但一拎呢件比佢睇, 話佢知靚靚呀, 妹妹就望一望.....咦, 係喎, 靚野喎.....至肯就範比你同佢著. 真係無佢符. 同佢沖涼, 妹妹又要自己摷衫摷埋一份.
Claire: 我而家仲鐘意同哥哥玩跳舞

Claire: 影得我好睇D喎.

呢日我地其實約左婆婆姨姨等人, 一齊去BBQ. 雖然妹妹岩岩呢日無燒, 不過念在一個係屋企咁悶, 媽媽索性帶埋妹妹去熱鬧下.  Claire: 好悶呀, 可唔可以唔坐車呀?

卒之架車係帶黎擺, 妹妹只係坐黎影左呢張相, 就嘈生哂要落地.

見佢咁悶, 帶佢睇下魚魚啦. 睇到阿妹眼都定埋.  

2 Oct 12 媽媽發現, 妹妹由呢日開始, 好似開始扁咀, 唔通學阿媽d動靜?!!
Claire: 你點知我學你架?

Claire: 但我呢個練腰力既運動, 唔係學你架喎.   

都唔知做乜呀, YOUNG 住床仔, 係咁桔起個PAT PAT, 真係好似做運動咁. 無野拎野黎玩, 服左你.

3 Oct 12  呢晚, 又趁哥哥食緊飯, 走左入哥哥房仲上埋床, 拎哥哥床頭的野黎玩.

Claire: 我呢個樣, 似唔似哥哥呀?

又拎指甲鉗黎玩.

Claire: 咁都比你發現左.

媽媽影低, 係妹妹好自然咁走左上床, 仲要攤左係床, 好似大爺咁~~~~~阿妹, 莫非你當正張床係你自己既.

 

發燒中秋日

30 Sep 12 中秋正日, 嘩, 日頭妹妹無發燒, 仲鬼咁生猛, 媽媽以為好返啦.

Claire: 媽媽, 我玩緊撞牆呀




Claire: 咦......影張相先啦.

 無錯, 有個傻妹係咁係張床行前又向行, 撞埋牆又向前行, 係咁傻笑.

Claire: 好搞笑呀....

你睇你睇, 又撞....但仲四萬咁口.

以為無燒, 下午我地出左街, 爸爸自己帶妹妹落食TEA, 之後又開始燒了......我地食中秋做節飯時, 妹妹就瞓足成程, 真係陰公呀. 快D好返啦阿妹.

發燒迎中秋

28 Sep 12 呢朝, 媽媽發覺妹妹好似燒, 但爸爸就話唔係, 係正常温度喎.    Claire: 做乜又影我地呀?

29 Sep 12 晨早, 阿妹好似火人咁, 清晨媽媽又嘈爸爸起身, 係咪發燒呀, 爸爸又係答唔係. 但朝早一量體温, 徘徊係37.2 - 37.6, 都唔知去唔去睇醫生好. 之後連續幾日假期, 唔睇就無得睇了. 媽媽放工返黎, 嘩, 升到39度, 即刻同妹妹去睇醫生....一D都唔似發燒既小朋友囉, 一著對鞋, 就興奮到催人出門口.  

返到屋企, 仲咁鬼馬, 拎張紙係咁玩.  Claire: 估下我係邊個??!!

雖然發燒, 但話哂係迎月夜, 我地梗係落附近行下, 應下節先.  Claire: 嘩, 今晚個月亮係幾圓喎

轉個頭, 變左一個男仔咁, 去踩單車. 鬼叫阿妹無頭髮咩, 黑猛猛更加乜都睇唔到. 成個光頭仔咁.

呢個係妹妹第一個可以玩燈籠同食月餅既中秋節. 妹妹, 中秋節快樂.

肚腩玩形記

23 Sep 12 妹妹細粒, 所以每到電視時間, 都唔可以好似哥哥咁, 活動自如咁彈左上沙發. 唯有坐自己位~~~地下睇電視. 而家抱左阿妹上沙發, 佢要落地時, 仲係跣自己落地....跣到自己個身瞓哂係梳化, 但對腳又掂唔到地, 係咁FING 住對腳叫人求救. 依然係好搞笑. 不過呢種搞笑面, 好快會無~~就係等妹妹再高D, 佢到時就會一跣, 可以對腳落到地既時候. 所以呢家要好好寫低, 第時諗返黎笑.

24 Sep 12 Claire: 我又趁哥哥返左學, 摷佢D 砌圖黎玩呀

25 Sep 12 Claire: 再唔係, 就係趁爸爸返左工, 著爸爸對拖鞋.

Claire: 哥哥放學瞓醒晏覺, 就會陪我玩. 阿哥好錫我架, 好似呢晚咁, 我地一齊唱歌歌.

Claire: 我仲伴埋舞TIM. 不過工人姐姐影唔到哥哥個頭咋嘛. 媽媽夜返, 無媽媽份呀.

26 Sep 12 Claire: 我呢個笑容, 無翁鼻了.

27 Sep 12 Claire: 我今日晏左起身, 起身媽媽已經返左工了... 

Claire: 無哥哥又無媽媽係度陪我, 我唯有自己拎書出黎....掉哂落地.

都唔知邊個教佢, 最鐘意橫掃書櫃. 激死人. 總之成個架好快比阿妹逐樣拎出黎掉落地至安樂.
 
呢日媽媽返大陸, 返到香港見仲有少少陽光, 索性帶兩兄妹落去玩一陣. 不過妹妹對公園無興趣, 只係掛住捉哥哥整既泡泡.

臨尾見哥哥玩引體上升, 阿妹又要學, 卒之露左個肚腩出黎. 呢個腩, 儲左成年半至有架, 真係辛苦經營.
呢日玩完公園, 媽媽發現, 妹妹主動要拖住哥哥呀, 真係温馨. 希望你兩兄妹, 大個之後, 感情一直都係咁緊密就好了. 記得大個時, 要互相幫助呀.

有性格

20 Sep 12 Claire: 我扮緊鴨仔呀


Claire: 喔喔....而家係扮雞.

21 Sep 12 Claire: 我好眼瞓呀~~~~但我又想去街街.

Claire: 婆婆一陣黎帶我出街呀, 嘻嘻~~~

22 Sep 12 呢朝周六, 爸媽不用上班, 哥哥唔駛返學, 卒之出現呢個現象~~~就係阿妹醒左, 見哥哥仲瞓緊, 自己好唔客氣咁走上哥哥張床, 攝埋一邊一齊瞓

Claire: 做乜影我睡姿呀

去完街街, 夜晚食飯, 一副眼瞓樣, 但又要咁風騷除埋外套除埋HIGHCHAIR既安全帶, 仲要露出個腋下....即係想點呢.

 妹妹咁細個, 已經好有性格.....難聽D 就係好惡教. 好似坐HIGHCHAIR咁, 唔肯比人縛. 食飯唔肯要口水肩, 稍為唔涼唔肯著外套. 唉, 搞到媽媽頭都大埋.

正經的一刻

18 Sep 12 其實阿妹有時都好正經架， 你睇呢張相， 一副楚楚可憐咁。唔知諗緊乜呢？

 Claire: 但我有時都好馬蹓下架， 睇我攤係度玩就知啦。

 Claire: 不過我都好女仔， 鐘意玩女仔野。我當呢個係我私人電話黎架。

19 Sep 12 Claire: 等我介紹下呢個玩具， 其實我好少玩， 但媽媽又唔捨得比人。

 Claire: 喂喂， 我聽唔到呀～～～～BYE BYE

而家妹妹隨手拎起野， 就喂喂喂， 跟住又BYE BYE， 學足我地咁。如果見我地一路講電話一路寫野， 妹妹又會即拎筆同紙出黎， 學到十足。

Claire: 做乜講我壞話呀～～～

第一次睇煙花

15 Sep 12 Claire: 嘻嘻, 我今晚去睇煙花呀


Claire: 咦.....我既招牌笑容

呢日, 婆婆忽然打黎話有免費飛去迪迪尼. 咁岩爸爸返工, 媽媽梗係二話不說, 同婆婆夾份帶兩兄妹遠征迪迪啦. 未出發, 幾得戚

 Claire: 我坐得似唔似大人呀?

話就話秋風起, 但迪迪尼不知幾咁熱, 仲要顧大顧細. 媽媽真係熱到濕哂. 乜心機都無. 但仲要排長龍. 做阿媽真偉大

其實媽媽放工返到屋企再出返去迪迪, 都真係好晏了. 所以玩左一陣, 又要揾地方tea一tea

你睇婆婆同兩兄妹幾咁happy~~~~~

話咁快, 就到煙花時間, 呢日提早左放, 七點半就放煙花. 仲好, 早d放完早d返屋企~~~~媽媽熱到攰一攰, 好想快d返屋企呀. 不過呢次係妹妹第一次睇煙花. 睇到阿妹呆哂. 不過好叻, 無喊, 媽媽見同場有小朋友嚇到喊, 要走架.

16 Sep 12 Claire: 呀.....比你發現左我著你對鞋tim

17 Sep 12 Claire: 我好眼瞓呀~~~

Claire: 我吖~~~~~~打緊喊嚕你都影~~~

成日話哥哥錫妹妹, 究竟妹妹有幾錫哥哥呢~~~~好似呢晚咁, 哥哥唔舒服, 扭計唔食飯(其實舒唔舒服都係扭計唔食飯), 比媽媽罰既時候, 哥哥喊左出黎. 妹妹即埋去呵呵. 仲踮高對腳仔架. 雖然媽媽鬧緊哥哥, 但都忍唔住要拎起相機, 影低呢刻咁温馨的場面.