筲箕灣太爺雞

係鯉魚門渡假村玩完出黎，梗係又要係筲箕灣揾野食。思前想後，都係去大路既燒味店食老少咸宜既燒味飯。

老老實實，媽媽覺得呢間店既出品，絕對好食過貴到飛起既太興。

行到太爺雞門口，驚覺原來裡邊係好傳統既老店，大係大，不過好麻甩FEEL個D。ANYWAY，一坐低，即叫碟太爺雞脾飯。嘩，真係超大隻脾。啖啖肉，我地食飯一向少撈汁，所以對呢個汁無乜講究，但佢隻雞真係好滑，皮薄唔肥。

另外，最令媽媽覺得正過太興既係佢既燒肉。脆卜卜既外皮，舊肉又唔會太硬。唔識講佢點好過太興，但太興有時食到既燒肉皮，都唔係太脆。如果以四十幾蚊碟頭飯價錢，論飯既量，同燒肉質素，呢個價錢已經贏左太興啦。

我地食飯一向好少飲例湯，因為唔想飲味精。不過太爺雞叫飯，送既湯，好似無味精架喎。差唔多成碗比媽媽自己KO哂。勁。

成條食街，其實媽媽都好想幫襯太爺雞隔離排哂長龍既清湯腩，記得十幾年前有個客請食過，真係好好味。不過當日一家大細餓住個肚，揹住行裝，無理由仲要捱餓排隊。唯有食太爺雞算。好在，呢餐飯都叫做唔差。總算黎過筲箕灣食。

華星冰室（筲箕灣）

好耐無寫過食評LU。數下手指可能有幾年，哈哈哈。自從生左小朋友後，對食都無乜所謂，最緊要係間餐廳放到BB車。坐得舒服。

而家小朋友大左，可以坐得迫D，又唔駛顧放唔放到BB車，可以自由選擇返食乜。

呢日我地一家人去老年咁遠既鯉魚門玩。臨去之前，先醫個肚，我地選擇左去華星冰室食LUNCH。坐坐下，至知，原來呢間係由華星藝人開，唔怪得成間都佈滿藝人照同演唱會POSTER 啦。又，原來華星冰室有幾間分店，我真係鄉里，完全唔知旺角同灣仔都有分店。

最令媽媽大開眼界，係所有WAITER都穿住LEVI'S牌子既圍裙。真係好想知，呢條圍裙成本要幾錢。

ANYWAY，黎華星梗要試下杯奶茶，不過不失啦。唔係特別好味。

反而佢個外硬內軟既沙嗲牛肉包幾特別－－－個名。哈哈。

豬扒包。都OK啦。

其實有樣係無影過相，就係常餐。同佐敦澳洲牛奶公司既常餐一樣：厚多炒旦叉燒意。個炒旦應該係超好味。仔仔一食，就大呼好味呀～～～據聞華星係用3.6牛乳黎炒。不過媽媽一啖都無食過，唔知有幾好味。淨係知，最後我地ENCORE多份常餐，就係為左隻旦。

媽媽反而鐘意食呢個校長多士。有黑松露係裡邊，少少咸，幾惹味。

原來筲箕灣咁多好野食，可惜我地太遠，唔可以成日去。

食飽飽，我地就出發去玩LU。

賞煙花 @ 峰景餐廳

大年初二, 爸爸BOOK左枱, 話去山頂睇煙花. 之前一直諗, 山頂咁高, 其實唔知睇唔睇到. 得個謎字. 

日頭係樓下踩下單車整下雪糕, 差唔多四點至出發. 估唔到 N 咁多人上左山, 或者一齊上山. 所以條山路好塞下. 後黎諗下, 好在爸爸明智, 話渣車上去咋, 因為搭纜車既蛇餅, 由我地到達直至食完飯個時, 都仲係一個餅. 真係恐怖. 

山頂峰景餐廳二樓望落黎既夜景. 究竟睇唔睇到煙花既呢?


我地BOOK左六點半. 其實四點出門口, 塞下車又排下隊, 坐低真係岩岩好六點半. 我地之前BOOK 左係食SET DINNER, 咁樣至可以有WINDOW SEAT喎. SET DINNER外, 仲叫左兩個兒童餐比一對仔女. 最先上枱既係 Isaac 既意大利飯, 精緻到呢~~~~媽媽懷疑夠唔夠飽架. 


set dinner 既頭盤係生蠔. 媽媽一向唔食生蠔. 不過見咁貴, 諗一隻啦. 但感覺好似南丫島個次既美國蠔好食d. 哈哈. 

食完生蠔, 有刺身同軟殼蟹. 感覺又係好麻麻. 由此可以想像, 樓下buffet 既冷盤可以有幾新鮮. 

阿妹既兒童餐黎lu. 係超有味道既超級芝士餅. 阿妹食到lam lam 利. 

呢個湯好味架, 係支竹湯. 真係未飲過乜叫支竹湯. 

爸爸既海陸空咖喱

媽媽既大蝦肉眼扒. 好好味. 咪睇份量好似好少, 但食完我同爸爸都覺得好飽. 

食哂就岩岩好, 放煙花. 

美中不足係, 明明人地專心睇緊煙花, 點知waiter 係咁上甜品, 仲要係梳乎厘加雪糕. 咪即係要人拿拿臨食埋佢, 如果唔係, 等得煙花放完, d 甜品都唔知變左乜樣. 

就係甜品上後, 加埋兩碟甜到漏既曲奇, 一對仔女既專注力放左係KO甜品上, 所以甜品相欠奉. 真係可惜. 

不過甜品真係好好好好好甜~~~~~~~~~甜到怕. 

ANYWAY, 多謝爸爸比我地上山頂過新年, 睇煙花

孤獨老人lunch @ 小酒窩

呢日去產檢, 本來無打算食lunch既, 因為唔餓, 二黎想快 d 睇完可以返歸瞓晏覺. 殊不知去到診所, 醫生未返.........返左都仲要等九個字比前面幾位睇左先喎. 姑娘叫媽媽出去食野先. 唯有唔餓都要食住磨時間啦

一話有九個字, 個腦只係諗起去銀杏館. 不過未去到銀杏館, 見到間無乜人既餐廳, 門口寫滿英文menu, 岩哂媽媽西化口味. 咁岩裡面又有兩枱孤獨老人一個人食lunch. 襯埋媽媽, 無咁礙眼. 於是膽粗粗入去試下先.

孤獨 lunch好在餐廳都係雞腸滿天飛, 感覺至少無一個人坐港式茶記咁核突先

唔肚餓, 本來想叫pizza 但見到 indian beef........又怕辣, 唯有叫個最 light 既 caesar salad w/ grilled chicken.

餐湯其實個碗好簡陋下, 好在個湯都幾好味

呢個係我想講既salad, 比想像中大碟好多. 我第一個印象係諗起applegreen 既salad 囉. 呢碟份量真係好多, 雖然話係大肚, 已經好努力咁哽都哽唔哂呢碟野. 不過好鐘意佢個sourse, creamy 得黎又唔漏.

呢個 lunch 五十幾蚊, 平銀杏館一半有多, 下次再黎產檢, 會再試埋佢既 pizza 的.

呢間中東野, kebab 同 curry 好似都好多人叫. 不過唔係媽媽杯茶, 唔會有機會試. 以後係佐敦唔止一間銀杏館選擇了, yeah yeah yeah.

為食一天 (見城 . 大榮華)

老闆曾經推介為全香港最好食既日本野, 大肚婆成年無食 lu, 對上一次係生日食佢. 呢輪臨生心癮又發作, 又想去食, 可惜上次產檢, 特登行成半個鐘諗住食佢啦, 點知遇著見城年休. 激死.

所以呢日放工, 爸爸就陪媽媽去食呢個好新鮮好新鮮既日本刺身. 可惜第一道散叫既吞拿魚鮫.....影唔到相, 吞拿魚鮫真係好鮮好軟熟呀

之前黎見城都係order 佢師傅發板既set lunch, 今次諗住慳少少錢, 叫左個壽司餐算.

 不過我都係鐘意食師傅發板既set lunch 多 d 囉.

爸爸叫既刺身set lunch

散叫既帶子刺身, 好爽

不過都係個句, 吞拿魚好食過佢, 嘻嘻..........爸爸話阿囡應該好鐘意食壽司, 因為當日陀住 Isaac, 係望到壽司張相咋....已經即刻無哂胃口, 爸爸個時仲好開心, 以為以後可以慳返錢唔駛再食日本野. 但呢胎口味同上胎就差好遠囉.

完成左個食刺身既心願, 夜晚, 輪到爸爸發板, 話去食大榮華喎. 個名聽左好耐但一次都未食過, 呢晚就食埋大榮華

爸爸點既雞油炒豆苗, 又真係幾香喎, 雖然好油下, 但食落又唔覺油. 仲好香口好夠氣.

反而呢味香茜脆皮米鴨, well............有幾特別呢, 食唔出, 只係知佢皮薄唔肥. 但味道無乜特別

黎大榮華, 媽媽只係為左呢味馬拉糕囉, 因為對中餐興趣不大, 呵呵. Isaac 仔都食到1/8件架(已經食飽飯至出黎陪我地食)

成餐最欣賞, 其實係呢碟梅子醬烏頭, 梅子醬cover哂烏頭既腥, 好出色. 分分鐘怕腥既人可以食到tim.

係咁食, 呢日淨係食既洗費都九百幾囉. 睇黎我地過埋呢個新年要慳返 d 至得.

嘉麟樓 vs 九龍酒店 奶皇月餅

呢幾年中秋都想食嘉麟樓月餅, 可惜每次醒起個時都為時已晚. 問親都話售罄. 所以, 今年趁自己晨時茂時忽然醒起時, 即打去半島問. 加上團購力量, 最後用166.4大洋買左一盒比自己食. 

打開盒蓋都聞到陣陣香噴噴既焗野味. 之前係公司就咁食左件, 好好味, 真係有奶皇味, 又唔會太甜

為左比較下傳聞中話一樣味道既九龍酥皮奶皇月餅, 於是叫左老公買一盒返黎食.

 

但係打開盒蓋, 無陣陣焗野味

個人意見, 色: 兩者差唔多.

香: 半島勝一籌. 個人測試無論就咁聞, 又或者放完焗爐出黎個下, 九龍酒店係好微弱的奶皇香; 嘉麟閣則一出爐已經係好強既奶皇酥皮香. 已經好引人流哂口水了.

味: 個人選半島嘉麟樓. 九龍酒店的, 真係試過一次就算. 係好夾硬至食到好微弱的奶皇味而且好似無乜味. 無論焗幾耐兩分鐘好五分鐘好, 九龍酒店既酥皮奶皇月餅, 真係食唔出有幾奶皇香. 但半島嘉麟樓呢, 就咁食又好, 係雪櫃即拎出黎又好, 焗完都好, 都係有好香好滑既奶皇味. 呢 d 似奶皇多d 囉.

同事話就咁係雪櫃拎出黎食仲好食喎, 無咁漏. 但我就比較過, 好似焗完再食會香好多.

兩盒共16件迷你奶皇月餅, 食完應該有九成機會會患上妊娠糖尿病.

娘惹印尼菜

工人話周五係新年, 咁岩我地又要返工, 放唔到佢假. 所以呢日請餐印尼家鄉菜當係同賀新年囉. 去到印尼餐廳, 有個識講印尼話既華僑同工人介紹菜式, 工人聽到係同鄉, 不知幾開心.

工人淨係點左兩樣野 : 雞肉串燒同加多加多.

左手邊黑猛猛係巴東牛肉. 好濃味同埋牛肉都煮得好淋無渣.

右手邊係工人點既加多加多. 但工人話, 味道同佢家鄉有分別喎. 咁我都明既, 我地去到外國食茶樓點心都係爭 d架喇......

雞肉串燒

其實我唔係好鐘意食印尼菜, 真係比面工人姐姐至揾間印尼野同佢食, 所以我只係識欣賞個沙嗲醬同加多醬既姐 ~_~

呢個包得咁似魚形既, 就係燒鯖魚

打開賣相好麻麻呢......其實係芭蕉葉香料燒鯖魚.

工人話佢地家鄉好鐘意用芭蕉葉煮餸....但呢味佢真係無食過喎. 都唔知係咪真係地道印尼菜黎既 ~_~

全場我最欣賞既, 係呢碟印尼炒飯. 因為有點似泰式既蝦膏炒飯, 不過就無泰式個 d 咁濃味.

 但下次再黎, 我諗我只係會再點呢碟飯...同埋就返周六日黎, 食佢既印尼糕點. 數印尼野食, 只有印尼糕點係我杯茶, 可惜呢日係平日, 無得賣.

一個人的午餐 @ papa razzi

呢日又係去產檢. 一早已經計畫左, 即使一個人都好, 都要上去諾士佛台食個lunch(其實係掛住佢既PIZZA). 呢間野, 好耐無幫襯啦. 對上一次係陀住 Isaac. 無計, 已經無係尖沙咀工作, 平日無可能去諾士佛食lunch, 假日更加唔會帶埋 Isaac 特登出黎食.

去親papa razzi 食lunch, 至少都要一個鐘.....真係lunch hr 得一個鐘就唔好黎囉.

大肚婆好大胆叫左個生既吞拿魚仲有魚子.....太肚餓了, 好快KO左成碟沙律同埋所有吞拿魚, 心諗, 諾士佛台既生野食, 應該唔會有菌掛.....

仲有肚餓得滯, 即刻食哂成個熱辣辣脆卜卜的餐包.....呢碟醬, 無記錯, 好似唔係以前碟番茄醬了. 呢次食落有點辣的.

是日餐湯有凍辣蕃茄湯同周打硯湯. 大肚婆唔好食咁多刺激食物, 所以只可以ORDER 周打硯湯....

 我比合格佢囉. 個湯唔係超好飲, 但好過好多餐廳既餐湯了.

一心期待呢日黎PAPA RAZZI, 其實係掛住呢個比梳打餅更薄既PIZZA. 一點油膩都無. 一端上枱, 見到個PEI 芝士已經心滿意足. 拎起手, 仲要脆到不得了. YEAH.....我就係為左呢塊PIZZA而來.

至少八寸的PIZZA, 一個人KO哂. 食完好怕會喉嚨痛

是日甜品幾靚.

講真, 90元一個LUNCH 我覺得可以接受, 係諾士佛台仲有佢LUNCH既質素. 有機會再係LUNCH HR 路過, 我都會幫襯架. 不過通常入面坐既, 都唔係打工仔食飯囉, 而係BUSINESS SOCIAL 既大粒佬. 所以, 每次入去都覺得同自己身分有點格格不入. 不過有時掛住佢既PIZZA OR 意大利飯, 點都要入去食番一次半次至安樂.

轉左有機既銀杏館

呢日心血來潮, 打去銀杏館book lunch 食飯, 竟然有位喎.

一直都好鐘意食銀杏館, 不過就未食過佢既lunch, 以為lunch 都係around 50-60元加一咁啦.

點知去到, 嚇左一嚇, 做乜仲貴過諾士佛台架.

原來係佢八月份, 轉哂有機食物, 所以價錢都加左

最平既唔知乜野冷面望落唔多吸引既menu都要88大洋

難得請自己lunch, 豪氣 d 都要. 所以點左個肉眼扒比老公, 自己再食個黑松露意大利飯.

先黎一個自家製既香草包, i like it, 尤其係新鮮出爐仲熱個下. 一流

一端上枱就聞到好香既雜菜湯.

話係自家製有機沙律. 我選左法汁(左邊個pei黃色).....其實食唔出味. 老公選左薄荷汁, 都係食唔出味. 係咪有機所以 d 汁都寧舍淡架.....都係落返意大利醋仲好食.

老公既七成熟肉眼扒, 影相麻麻地......不過賣相ok架喎. 個底仲鋪左紫心蕃薯

我既黑松露意大利飯, 做乜成個秋千咁既....好搞笑.

無甜品得飲品.

多謝平均每位150大洋.....呢餐lunch 呢, 老老實實, 我下次要食LUNCH呢, 我會返去搬左去諾士佛加價加到飛起既MUNCH, 一樣都係食有機, 但相信應該無佢咁貴嘛.....同埋會返去諾士佛台PAPA RAZZI, 至少PAPA RAZZI 都係一百蚊一位仲有埋甜品喎. 份量都多過呢間呢.

但晚飯呢, 我應該都仲會去銀杏館既.....希望份量無變就好了, 唔理佢有機定無機.

粟子西餅 @ 九龍酒店

因為害喜, 成日無胃口食野, 尤其一到晚飯時間, 求其飲碗湯食兩啖已經好飽唔想再食. 所以爸爸成日都買甜品返黎幫媽媽開胃.

其中一個甜品係, 九龍酒店既粟子西餅, 唔太甜, 好滑既粟子mouuse.

媽媽可以一滴不剩食哂, 因為一 d cream都無架, 岩哂我口味.

最憎食旦糕有大大pei cream, 呢件西餅反而無. 所以係推介之選.

爸爸話唔算好貴, 都係28大洋一件. 平過konditional ^_^

不過害喜期過去了, 踏入第八周, 媽媽已經回愎一個正常人, 唔駛再揹住件長袖外套亦都唔駛餐餐誓願咁. 所以爸爸唔好再買咁多甜品返黎啦, otherwise, 患上妊娠糖尿病, 對 bb 同媽媽都係一件長遠既病黎.

西環德記潮州

話說有次要同家中大少去西環個西寶城playtown玩, 去到西環反正大少仲同周公密計中. 所以就係西寶城附近醫肚先.

見到餐牌, 好多野都想叫呀....不過爸爸話費事諗, 索性叫個set lunch.

set lunch 有呢兩碟細到離奇一個人都唔飽既海蜇同卥水拼盤. 媽媽見個個食客都一杯咸檸七, 又學人叫一杯黎試.

雖然細碟, 但鵝脾真係唔肥架喎.

跟住有一個小小小小窩既蟹粥. 媽媽覺得好麻麻, 寧願食蠔粥可能好味 d.

仲有一個一點都唔油膩既墨魚卷, 其實一點都食唔出墨魚個種膠....唔通佢係打成粉咁炸?

成個set lunch最似二人份量就係呢碟菜了, 哈哈哈......

未去playtown前, 先付178大洋....lunch 黎既姐.

雖然份量真在太小, 不過勝在無乜味精. 所以爸爸話得閒會帶爺爺黎食潮州菜喎.....不過真係幾遠囉.