再見K3

14 July 17  三年幼稚園生活終於結朿了。呢日係傳聞中好感動既畢業聚餐，哥哥當年因為颱風關係，延期改為幼稚園舉行，地方狹小，家長不能出席。呢年，好在無打風，媽媽總算可以第一次參與幼稚園既畢業聚餐。

畢業聚餐開始之先，我地一班K3 家長好齊心咁呢埋一邊為小朋友製造呢兩張咭，送比兩位班主任。媽媽好開心，可以認識到一班咁齊心的家長，可以齊心合力造紀念品給老師。

同哥哥當年一樣，各畢業生會自繪畢業樣子，張貼在入口處。

 媽媽問，點解你個公仔係啡色頭髮既⋯⋯妹妹答，因為老師話我D頭髮係啡色囉。哦，原來係頭髮薄，所以無人地咁烏黑姐⋯⋯

其實，係咪傳聞中咁感動⋯⋯喊濕幾包紙巾呢⋯⋯（按此便知）

未夠感動？？再睇下呢班K3 同學仔，好好演繹畢業歌（按此）⋯⋯媽媽係第二次聽佢地唱呢首歌，好明顯的分別，就係呢次大家都成熟左，動作齊左，終於大家都大個仔大個女了，可以升小學囉！

表演後，當然要捉住Claire 最掛念的幼稚園同學仔影個合照啦！

還有好錫Claire 的班主任張老師。

教曉Claire 講故事既資深楊老師。媽媽都要好好向楊老師學習講故事技巧呀！

小學會再見的晉廷同學。

Claire: 喂，你唔好咁熱情好喎⋯⋯

一班小朋友，難得可以咁天真開懷地笑，唔知小學後會點呢？

晉廷： 小學後？我同頌恩繼續日日見囉。
Claire: 哈哈，你唔好唧我條頸啦！

畢業聚餐⋯⋯原來全場都無開餐無飲品，唔明點解叫聚餐。ANYWAY，成個活動完結後，少不得梗係同班半日班黎張合照啦。下次再見，唔會再咁人齊了。

K3 最後一天，當然要玩盡佢。完左活動拉大隊一齊去V CITY玩餐飽，玩完仲可以一齊食飯。

唔知承㪫同Claire 講乜呢～～～

可以令到Claire 事後陰陰咀笑～～

 這班玩左三年既小朋友，見到佢地咁開心溝通，媽媽都好開心喔！

幼稚園畢業典禮

13 July 17 終於⋯⋯終於⋯⋯終於比媽媽等到了，Claire 妹妹終於幼稚園畢業啦。好野，媽媽以後唔駛兩頭撲，因為佢可以同哥哥同一間小學了。真係等呢日，等到頸都長。

幼稚園畢業，可惜的是無左故事組，Claire 無得再扮小司儀，取而代之既，係入芭蕾舞組，都好吖，有機會著套靚裙。穿起呢套裙，Claire 特別興奮⋯⋯實在掩不住佢內心個種貪靚既女孩本色。

Claire: 哈哈，媽咪，你點著都唔夠我咁靚架啦！

 想知Claire 跳成點？按此就可以睇返⋯⋯如果仲記得佢排位既話。

媽媽裝過好幾次佢地既排練，每次都覺得呢對組合好搞笑⋯⋯一肥一瘦一高一矮。好似無乜邊對有咁大對比。

Claire： 咁你即係笑我矮啦⋯⋯

分返開，單獨企，係咪似返樣多D呢⋯⋯

明明有好多外形相襯的同學，老師反而編個最高大的同Claire 做PARNTER，望落真奇怪。

 表演完跳舞之後，就係一輪頒獎禮。經過媽媽好努力同Claire 温習，Claire 總算KEEP到拎學習奬！抵佢既，因為佢都好比心機去認字。

數拎奬，最醒目係呢次了。由學校報名參加普通話校際朗誦比賽，因為害羞，聲線及發音等⋯⋯賽前老師都期望不大，點知出賽前，Claire 執好哂發音⋯⋯當日，仲配搭埋佢既眼神，榮獲榮譽奬，校長開心到不得了。話佢地咁多年都未出過一個榮譽奬既學生。原來認真起上黎，Claire 的表現可以令人好驚喜的。

之後，Claire 仲要再上台拎奬架。呢次就係故事比賽奬，Claire 係英文故事季軍，另外兩位同學係廣東話組。嘩，原來Claire 英普都得架喎，好厲害呀～～～～

一輪頒奬典禮完結後，巡例又係全校K2-K3 學生出黎唱歌，配合埋主禮嘉賓上台，真係一場大龍鳯。媽媽睇左五年，感覺有點悶了⋯⋯不過，呢次係Claire 做主角，當然好緊張找尋一下主角蹤影啦！ 

不過，這個小妹妹，在看什麼呢？

Claire: 我咪係度望緊你地坐係邊囉⋯⋯

帶著安慰的笑容，媽媽欣賞完Claire 幼稚園畢業典禮，算係為佢幼稚園生活劃上句號了⋯⋯六年的小學生活，正等著這位小妹妹。加油呀⋯⋯好多功課同文字等著你喔。

暑假開始了

12 July 17 學校放暑假了，呢日係學校搞既暑期活動日，媽媽幫 Isaac 報名參觀維他奶廠。咁岩又抽到 Isaac 可以參加。因為學校已經放暑假，所以，呢日活動日係無校車提供。本來正煩惱緊點安排兩兄妹不同的返放學時間。幸好同校車的一位熱心家長多口問媽媽，幫媽媽帶 Isaac 返學校集合⋯⋯真感恩，大熱天時，唔駛度時間帶住妹妹奔走三地。參觀完結，又有雅雯媽媽幫忙接放學。兩位熱心家長，造就了 Isaac 可以如期參加參觀活動，又唔影響妹妹上學的節奏。

今次輪到雅雯媽媽帶住三個小朋友⋯⋯點解？因為有兩個貪玩小朋友，要媽媽折返家中，把他們的泳衣帶過去，比佢地去玩水喎⋯⋯嘩，曬到呢⋯⋯校服都未換，究竟佢兩個諗乜呢？居然叫媽媽獨自回家幫佢地拎野去玩，激死⋯⋯

明明張相係兩位少女在氹氹轉上⋯⋯奸笑的 Isaac ，在想什麼鬼計呢？

鬼計按此

Isaac: 嘩⋯⋯咁熱天氣⋯⋯真係唔好坐呢張凳呀！辣親PAT PAT！

Claire: 所以我企係度盪千秋囉！

之後，雅雯媽媽帶佢地去冒險樂園掟下錢。估唔到 Isaac 真係好聽話，因為媽媽一直教佢，唔好用人地既錢去玩冒險樂園，所以，呢次 Isaac 真係企係度睇住妹妹同雅雯兩個掟錢。媽媽都好安慰⋯⋯至於妹妹，真係仲要時間去調教一下。

玩左一陣，佢地一行四個就返左雅雯屋企嘆下午茶⋯⋯呢個時候呢⋯⋯媽媽就身水身汗咁拎住行裝出發去接應佢地囉⋯⋯

Isaac: 唔⋯⋯媽咪幾時黎呀⋯⋯幾時先可以去游水呀～～

終於，終於⋯⋯媽媽拎左堆衫黎了⋯⋯換好哂衫，即刻去玩水。

後來出現的上恩⋯⋯當時，上恩同雅雯先岩岩開始學游水⋯⋯半年唔駛，兩位小妹妹已經曉得背泳了。真厲害。唔知兩兄妹，幾時可以重新習泳呢？！

HAPPY DAY

11 July 17 就黎放暑假，學校都係活動日，返去既活動就係睇電視同睇電視⋯⋯睇足半天先放學。呢日又係媽媽一拖三的日子，放學先去附近餐廳醫左個肚先。之後就去附近會所玩，因為媽媽硬著頭皮問了其它媽媽借用了會所証。所以，大家食完飯，就準備去玩。

呢兩個小朋友，真係唔知幾時開始，變得咁熟稔。

食飽飽，一齊衝去附近會所玩⋯⋯無錯，呢度就係暑假後我地極速搬進的屋苑。未住入黎之前，兩兄妹不知幾咁迷呢個遊戲室。所以，媽媽都特登借張咭比佢地黎放下電。

玩到自成一角扮屋企，咁大個原來仲玩呢D。

Isaac: 嘻嘻，有得玩咪得囉。

一袋二袋行李，因為我地未住呢度架，所以，玩完就要執包伏走人。

Isaac: 好開心呀，如果住係度，日日落黎玩就好囉。
Claire: 我覺得唔開心⋯⋯雅雯都唔同我玩⋯⋯

離開了屋苑，為了送雅雯回家去，我地特登搭車去到V CITY，等雅雯爸爸到之際，我地一齊買支雪糕開心下。

雅雯： 好開心呀，平時我無得食雪糕架！

 一人一支雪糕，小朋友最開心最滿足的時刻，莫過於呢個享受了。

Claire: 呢支綠茶雪糕好味呀～～～

食飽雪糕，我地拖住好攰既身軀，行返去置樂屋企休息去⋯⋯咁又一天了，小朋友真係開心⋯⋯無功課無考試的日子，可以玩足一天。SO HAPPY～

Aloha Gecko 體驗玩

10 July 17 屋企附近有間新PLAYHOUSE開幕，有試玩價＄50/50 分鐘。好抵。媽媽就約左Isaac 同學仔一齊去體驗下。進場前，我地係隔離間親子餐廳食個TEA兼晚餐，因為都近五點幾了，諗住食完就去玩，玩完就回家休息瞓覺。呢間餐廳有個CORNER比小朋友玩下，睇下Claire 坐張凳都坐得咁開心。

食完TEA，夠鐘入場玩，Aloha Gecko 有個網通道，不過好窄咁，大隻D的話，活動應該幾吃力。

Aloha  Gecko 有一個唔起眼既CORNER，放左個好似跳彈床既物體，Claire 行埋去試玩⋯⋯彈左一陣就放棄了。

呢度新開，人流都幾多下。不過有少少危險既位，好在夾到既係大隻Isaac，如果係幼兒，被夾到應該都幾痛下（按此）。

玩樂既時間過得好快，話咁快就50分鐘了。開業期間，JOIN會員係免費，所以，媽媽都幫兩兄妹做左會員，方便日後仲想黎玩既時候，可以黎HAPPY一下。

咦，走囉喎，呢三個男孩子係度睇乜呀？

哦，原來係POKEMON卡。睇Isaac 個頭，玩到濕哂⋯⋯哈哈⋯⋯後來媽媽先知，頌熹的卡，全部都係朋友送的二手卡，而且開學之後，全部被沒收，要專心讀書⋯⋯希望Isaac 都可以學識乜野叫專心温習啦。

Isaac: 唓⋯⋯我好專心啦！