名古屋之旅 DAY 6 － 機場展望台

27 Mar 15 經過幾次遊日經驗，我地知道我地今次一定要提前到機場。因為我地次次都係遲到架，有次飛機起飛之後我地至跑到去CHECK IN COUNTER，離譜到呢。所以，今次死人都要提早好多去到。既然時間咁充裕，媽媽就提議出去展望台睇下飛機。點不知，呢解有個小妹妹苦埋塊面既？

Isaac: 妹妹，你做乜唔開心呀？ 

Claire: 我唔想睇飛機呀，我想睇 ELSA 多D呀。

 呢個展望台可以近距離睇到飛機升降，媽媽以為Isaac 會鍾意TIM。

Isaac: 睇完未呀？好悶呀～～

 估唔到，平時見到飛機飛緊時，咁興奮，但去到近距離睇，卻無哂反應。

Claire: 係囉，悶到我想瞓呀～～

 咦，兩個小朋友去左邊呢？

原來有得免費拎比卡超帽，兩個貪玩小朋友又走去拎黎帶。

Claire: 哥哥，我好眼瞓呀，你攰唔攰呀？
Isaac: 我都好眼瞓呀～～不過唔好瞓住呀，我地仲可以叫爸爸買野比我地食架。

 卒之，用埋最後盤村，買左呢味大福比小朋友食，還有無入鏡既冬甩比爸爸食。因為我地坐既飛機，係無晚飯供應既。所以，要食飽飽至好上機。

因乜解究，兩個小朋友忽然變左身既呢？咪就係爸爸見登機位附近有古玩店，有超人面罩，係都要捉住小朋友一人一個。莫非爸爸嫌當時既妹妹仲未夠男仔頭？

就係咁，兩個帶住面具搭飛機返香港也。結朿呢六日五夜的名古屋之旅。下趟旅程，唔知要幾時至可以去了。

名古屋之旅 DAY 6 － HEA遊名古屋

27 Mar 15 名古屋之旅最後一天，呢日主要係名古屋巿內HEA下。出發前係網上好似見到有個巿內漁巿場。不過見無乜人提及，好奇怪。咁好在距離酒店好近，步行真係十分鐘內就到，但一去到，原來真係一個漁民巿場囉。哈哈哈，好似人地開食店去拎貨個D批發巿場咁。DOU勻都唔見有刺生魚生即食。唔怪得無乜人提啦。問左其中一間店，話有一間食刺身既食店⋯⋯DOU下DOU，以為見到寶。點知入到去，無胃口食。同我地去旅行個D朝巿魚生食店係好唔同，呢種格局，真係好似街巿佬入去食早餐個D FEEL。

係朝早揾唔到食，我地又死返落去駅下邊既食街揾早餐。路過一間好似連鎖店既包店連餐廳好受歡迎咁，我地又入去湊下熱鬧。

呢個係一SET既咖啡奶酪吐司早餐。不過好明顯係唔會飽既。

所以，食完我地又HEA下超巿。好平好想買既士多啤梨，可惜已經到LAST DAY，我地先遇到佢。

所以，最後我地只係選擇買兩盒刺身，以滿足晨早無得食魚生既欲望。

之後，又見大把時間，即興上左名鐵上邊既MIDLAND SQAURE 46／F 既360度展望台。行上去時，見無人喎⋯⋯心諗，咦，乜咁好既，景點都無人？？！！原來，呢個景點係要付費既，哈哈。唔怪得無人上。雖然只係幾十蚊，唔貴，不過值唔值，見人見智。我地係擺明無野好做，周圍HEA下咁。

展望台一望無際既名古屋。

原來呢度望到名古屋城好近架咋。媽媽摛日咪係個度暈到唔想行囉～～

HEA遊完展望台，係時候又要去排下矢場食店了。爸爸仲話時間好早⋯⋯一上到去，嘩，乜條人龍已經排到去後樓梯架⋯⋯

門口一大隻豬，擺明係食豬。

一人一杯其實唔知乜，唔通係消熱氣既地道飲品？仲有好似係子薑既物體。

呢間矢場吉列，天花有一大隻豬。

呢味唔記得係乜名堂既黑豚吉列。老老實實，食唔出有幾咁鬆軟。

呢味係爸爸普通吉列豬。

同鐵板吉列。食完我地都覺得不外如是也。唔明點解咁出名，要大排長龍。

同場加映，白飯沙律任裝的。

食飽飽，又係時候出發去機場LU。

名古屋之旅 DAY 5 － 名古屋城

26 Mar 15 經過一晚嘔吐後，翌日都要撐住出發。本來諗住去揾連鎖店KOMEDA老爺爺食早餐。不過揾唔到，所以求其落左駅下面的食街，揾左間日式店食早餐。呢間餐廳既凍啡有佢特別既自行調較方式。

我地求其點左份三文治就算。

去旅行要食得豪既爸爸，早餐就叫左呢份吉列朱扒三文治。

食完早餐，我地就坐車出發去名古屋城。其實呢個地點係臨時加既，因為臨尾兩日，都唔知去邊好。點知，一落車，媽媽又病發，又暈又想嘔，唉～～

Claire: 好在媽媽幫我帶定羽絨咋，如果唔係，我陪佢一齊嘔LU～～

Claire: 媽媽，多謝哂你呀。

對花無緣既我地，出發前都知有櫻花睇，不過我地無刻意PLAN去睇。估唔到，咁反而有機會影到櫻花。

不過呢兩兄妹想點，輪住扮鬼扮馬，同櫻花背景一點都唔襯既。

Claire： 咁我而家正唔正經呀？

背後的名古屋城，係去名古屋旅行必到之處。媽媽身負重病就黎暈倒，所以爸爸唔比媽媽行。只有佢地三父女去

Claire: 媽咪，你無睇住我地，我都好聽話好正經呀～～

Claire: 媽咪，但係哥哥唔正經呀～～佢又玩眼睛喇

至於媽媽去左邊？？咪就係坐係太陽下邊曬住瞓囉～～真係無陰公。成個阿婆咁。參觀只有健康後生仔女。

明明瞓左一陣，精神係好左架嘛。但爸爸都唔比媽媽食野囉⋯⋯你睇你睇，睇住仔女食至愛緣茶雪糕，自己無得食，幾咁陰公。

Claire: hmm，好香綠茶味呀～～

Claire: 嘻嘻，呢杯係我同爸爸SHARE既，媽媽無得食。

就係咁，明明我地PLAN左下午去睇花之里既燈飾，可惜病倒了。被爸爸下令要返酒店自己瞓⋯⋯卒之成個下午，三父子女自己去遊商場，媽媽一個人瞓酒店。乜節目都泡湯了，嗚嗚嗚，仲諗住去睇花燈架嘛⋯⋯

名古屋之旅 DAY 4 － 臨病晚餐。鮨 魯山

25 Mar 15 由奈良坐左兩個鐘車返名古屋。CHECK IN完我地拿拿臨彈出駅上面既鮨魯山本店食晚飯。呢間食店，係向日本食評網揾到，果然係日本人為主。好似唔見有遊客。等左成個鐘，至到我地。入到去，大家又餓又攰。難得大個仔女去旅行，爸爸比佢地一人一客魚生兒童餐。不過，睇下Isaac 就知個晚大家有幾眼瞓啦。

Claire: 嘻嘻，但我唔眼瞓喎。

 雖然話哥哥眼瞓，但其實最攰最眼瞓最病個位，係媽咪本人。呢餐，係臨嘔之前既晚餐。

超濃既麵鼓湯。好記得嘔個刻，係呢種味道嘔返出黎。一句講哂，成餐貴野嘥哂。

呢盒係爸爸既便當。

呢餐食左都唔記得幾錢，不過就好記得，食完已經唔舒服。卒之返酒店獲利回吐。真係無陰公。點解會嘔？就係凍左幾日既後果，嗚嗚嗚～～

名古屋之旅 DAY 4 － 奈良公園

25 Mar 15 屈係呢間松阪酒店住左一晚，真係住多陣都怕怕。呢次旅程終於見識到三重既鄉下特色： 就係伊勢同松阪明明係觀光點，但係酒店卻係好得人驚⋯⋯

可能呢間酒店太時鐘FEEL，又太佬FEEL（好似機器佬入住多）。所以，早餐成本比較低。呢個送既早餐，只係港紙廿幾元。見咁細份，價錢唔貴，我地豪不猶豫就要多一份。反正附近係荒蕪一片，揾唔到食也。

Claire: 好野，我第一次一個人獨霸成份早餐。等我慢慢摵蛋殻先⋯⋯

其實呢間餐廳原來只係開早上。媽媽其實好懷疑究竟佢點揾食。仲要係呢間咁既爛鬼酒店裡邊開喎⋯⋯

食飽飽，我地驅車去奈良。無錯，係由松阪去奈良。因為爸爸話，要帶小朋友去餵下鹿喎。所以，爸爸無視來回四個鐘車程，都要去喎⋯⋯四個鐘，真係坐到屁屁痛呀！明明係名古屋三重好凍⋯⋯點解去到奈良，一落車⋯⋯嘩～～好熱呀。

又一張温馨的兄妹合照。每次旅行都一張，睇住佢地越大越相愛。

幸好Isaac 到而家都仲咁嗲媽咪。唔知下次再去旅行，會唔會仲有呢個情境呢？

嘥兩個鐘坐車，就係為左呢隻通街都係既鹿。

鹿：喂，細路，你有無帶野黎探我呀？
Claire：我地買左好多餅餅黎呀。

Claire: 嗱，食啦。好味架。
鹿：唔⋯⋯咁就乖喇。
爸爸： 阿妹，唔好行咁埋呀。

Isaac: 我又要試下餵⋯⋯不過我好驚呀。我企後D先餵。

鹿：喂，你地行咁後，我食得好辛苦呀。好心你地行埋D餵我啦。

誓估唔到，妹妹Claire 一點都唔驚大隻過佢既奈良鹿。好好笑，仲要追住兩隻鹿去摸同影相，搞到最後鹿都驚左佢。

Claire: 埋黎我度食餅啦。仲有一塊好細塊架。

Claire: 喂，呢度有隻鹿呀，快D埋黎睇下吖。

追鹿追到另一端大草地～～

Claire: 埋黎食啦。

Isaac: 你唔好食左我手指呀～～

Claire: 嘩，你好乖喎，行埋黎比我摸。

嘩，奈良公園另一端，一片草地滿天白雲，好舒服呀。岩哂小朋友狂跑。如果香港有呢種大草地公園，咁就好了。

Claire: 媽咪，我又揾到另一隻鹿合照呀。

Claire： 喂，你唔好走啦，比我摸啦～～

Isaac: 咁好天，我都係影下風景好過。

一望個天，就知同三重縣既天氣差天共地。呢度熱到要不停除衫。

離開奈良公園，我地點都要去返奈良既中谷堂食呢舊當年好回味既草餅。不過，媽媽覺得無想像中咁好味～～～可能口味不同了。

因為無諗到食乜LUNCH，所以，好順其自然咁行到去奈良駅附近既食街，咁岩見到呢間食店做平日LUNCH 特價餐。於是乎入去一人一餐。睇個餐牌就知幾咁抵。四十幾蚊港紙一個日式LUNCH，平過香港好多了。

呢度四十幾蚊，係咪抵到嘩嘩聲。

三個餐，已經飽到上心口。

不過行去拎車時，咁岩見到紅豆燒，媽媽又話要買兩個比兩兄妹試下喎。

Claire: 好好味呀～～～

奈良行程完畢，我地又勁白痴咁坐兩個鐘返名古屋去也～～