金童玉女LOOK。開始唔用板學水

22 Oct 17 因為舅父結婚，我地出席婚禮，點都無理由CAUSAL LOOK去，所以，媽媽都幫佢地諗左呢套金童玉女LOOK去出席婚禮。

為左襯呢套公主裙，個頭無理由咁DRY。所以，媽媽係臨時以及即日去買呢個DIY頭飾⋯⋯貴到無倫。但問左人有無貨，無理由人地痴完個箍，我先話唔買，真係諗都諗唔到，DIY居然可以賣到成二百蚊。真係個頭飾仲貴過呢件美國貨既公主裙囉。無第二次囉⋯⋯

Claire: 唔緊要啦，最緊要我帶得靚吖嘛。襯唔襯我條裙先？

呢晚瞓覺，幾乎係我地最後一晚住係呢間屋。所以，妹妹都一齊瞓，Claire 好有心機咁砌到張床出黎，分哂界限。仲拎埋衣夾固定，真係可愛到呢～

Claire: 點解我夾好張床單，好似咁難拎開張被捐入去瞓既⋯⋯

 24 Oct 16 呢日放學，同Claire 係學校附近食兒童餐。佢最鐘意黎呢度食，因為兒童餐有橙汁又有玩具。

Claire: YEAH～～好味呀～

食完，趕住又去游水呀⋯⋯呢堂，終於可以唔駛用板了⋯⋯雖然係驚，但Claire 都做到吖（按此），仲做得好好喎。點解佢唔肯再學呢？好可惜喔～

兄妹情深

23 Aug 16 有兄弟姐妹真好，廿四小時有個玩伴。好似呢兩兄妹咁，年紀相約，玩起上黎傻更更，最愛任何時候都玩一餐。

無啦啦都可以玩到傻笑，大家一齊唔見左對眼。

媽媽呢日特登早黎幫襯呢間夢見屋，貪佢架車仔兒童餐。因為之前試過，12點半已經話賣哂啦喎⋯⋯有無搞錯呀，一點LUNCH HOUR都未到就賣哂。呢日不得不提早少少再去過。

媽媽：其實鄦地對眼望左去邊呀？

Isaac: 係喎，我望緊你啦，我健唔健康呀？我飲鮮奶，阿妹飲橙汁咋。

兩兄妹，最愛互打小報告，媽媽真係頂佢地唔順。

Claire: 哦⋯⋯你放野入杯奶度。等我話比媽咪知。

Isaac： 媽咪都見到啦。
Claire: 嘻嘻，媽咪，你見到咩？

Claire: 同我影張相呀！影得我靚D喎。

 食飽飽，去放電。特登揾左個地方，比Claire 熟習下對新鞋仔。教練係Isaac 哥哥。

Isaac: 我扶住你行啦，唔係咁跣架⋯⋯

Isaac: 你隻腳係要咁擺，先可以做到頭先想做既動作架！

嘩⋯⋯看在眼裡，好窩心好SWEET呀。唔知衰妹Claire 冧唔冧呢！希望佢唔好再成日發哥哥脾氣，錫多D哥哥就好了。

運動日

14 May 16 Claire 約左幾個同學仔齊齊學游水。正式學之前，媽媽叫爸爸帶佢落水熟識水性先。睇幅相，Claire 好似少少緊張喎。

Claire: 好驚呀⋯⋯
爸爸： 唔駛驚啦⋯⋯我扶實你架嘛。

 早上游完水，回家吃個飯沖個身，下午，我地又出車去踩單車。嘩，好充實好運動既一天喔。

呢日踩單車，爸爸教曉Claire 企起身踩。Claire 又真係試喎（按此）呢下企起身踩單車，媽媽都唔夠膽呀。Claire，你果然好叻女。

落樓放電記

26 Apr 16 呢日，又係由爸爸帶Claire 入迪迪尼玩。難得爸爸去，梗係要玩SPACE MOUNTAIN啦。

玩完出黎，居然見到兩位威武既白兵。

27 Apr 16 好耐無做旦糕，呢日忽然興起整下旦糕，Claire 越大越愛幫手下廚，就比佢幫下手攪粉啦。

Claire: 呢次既旦糕，應該實好好味既姐⋯⋯我整架。

 整完旦糕，有時間，就落去放下電。之前係落去踩單既，但嚴打違例踩單車後，媽媽都唔敢落樓下踩單車。踩板車好似安全D囉。

29 Apr 16 呢日又落公園放電。應該話，我地幾乎日日都落一落樓放下電。不過，呢日Claire 就選擇左去公園玩手抓球。

Claire: 媽咪，睇下我隻手幾大⋯⋯

咪睇咁大塊板，原來要捉到波，真係有難度架⋯⋯可能對Claire 黎講，個目標太細，下下都跌落地。好在Claire 唔介意，仲玩得好開心TIM。

再見幼稚園。畢業聚會

15 July 15 三年一度，畢業至有既畢業聚餐，因為打風關係，取消左⋯⋯改期到呢日既下午，但係，遺憾既，改期既呢日，卻係沒有家長份兒。無份一齊感動，好失望呀。

一返到學校，好大塊畢業公仔板呀。

媽媽初頭以為係簽名係人地既公仔度⋯⋯留念啦⋯⋯原來，只係向自己畫既畢業公仔上面，寫返自己個名⋯⋯下⋯⋯咁，作用係乜呢？

右二係Isaac 畫既，其實角位已經有佢地既名，而家又要用色筆再寫一次⋯⋯係咪簽係人地張咭上，會有記念價值多D呢？

因為呢個聚，無家長份，媽媽諗住搏下大霧，企係門口酷熱一輪，會有同情分入到去啦⋯⋯點知企左大半個鐘，都無得入去一齊感動，真係失望而回。不過咁，好在影到愛兒表演既相。 

可惜聽唔到Isaac 講乜。後黎，問返佢，Isaac 話係同老師講約定，升小學後，會準時交功課喎。

聚會完左，每人一個畢業公仔，仲有埋佢個名架，真係好有紀念價值。

畢業了，最唔捨得，當然係呢個錫Isaac 既莫老師⋯⋯後黎，我地至知，原來莫老師都離職了。好可惜喔，Isaac 唯一掛念幼稚園既人物，都走了。再返黎，真係可能無哂歸屬感了。

叫Isaac 同同學仔影相，又係都唔肯。係門口，走時至到雨恩，係咁倚影張合照。

三年了，Isaac 係度三年，都無POST過Isaac 既樣。難得而家畢業，係學校門口，居然見到佢個大照⋯⋯ 臨別時，梗係要同自己影返張合照留念。

嗚嗚⋯⋯再見了，幼稚園。Isaac 邁向六年既小學生活，希望佢更加享受小學既時光吧。

我畢業了。

14 July 15 Isaac 今日畢業了，係幼稚園最後一次演出。呢日由爸爸送佢去大會堂預先入場準備。

Isaac: 望清楚呀，我一陣會化哂粧架⋯⋯

試過K2 一年，Isaac 真係怕怕，因為，佢話畢業個日，佢地要揹住個鼓成個鐘罰企，都未話唔陰公。鬼咩，企定定係度等各家長入場⋯⋯再等各位安坐，再等會場宣佈開始，再等嘉賓入場，唉。聽見都覺得呢班小朋友辛苦。

Isaac: 我好眼瞓呀⋯⋯開始得未呀⋯⋯

Isaac: 你地就好啦，可以坐係度⋯⋯我個鼓好重呀。

本來，Isaac 係叫個妹K2 入鼓隊既。但後黎，Isaac 一改口風，叫妹妹K3 至好加入鼓隊，因為Isaac 話個鼓好重架⋯⋯果然係好錫個妹呀。

Isaac: 我條腰就斷⋯⋯

終於，終於⋯⋯等到入場了。Isaac 可以打鼓，唔駛再悶（按此觀看）

一臉認真的Isaac.

也不忘怒啤我地。

Isaac: YEAH～～～打完⋯⋯

 雖然台前一臉COOL爆嬲樣，不過，台後，卻笑得幾開心。
同一班朋友仔三年，呢日齊齊出台前領奬，又唔駛揹住個鼓，笑都笑得開心D。

Isaac: YEAH～～～我頭先打得好無呀？我而家準備出去領奬了。

幼稚園生涯三年，Isaac 真係踩足呢個台三年。媽媽真係好欣慰，因為，Isaac 係讀書方面，真係一個人材，天生記性好，領悟力佳。媽媽唔駛勞氣，佢靠自己上堂專心，就有佳績。盼望Isaac 上小學、中學後，繼續努力。唔好浪費佢天生讀書既好材料。

 領完奬，又到表演時間，之後，各大表演生一齊出黎同台唱校歌。Isaac 依然係咁木獨。

成日比人話高大，究竟有幾高？呢張相，可能顯得比較清楚。

完了，隨著畢業禮完結，Isaac 真係要同幼稚園講BYE BYE，同同學仔講BYE BYE。臨走，媽媽叫佢同同學仔影相，點知，Isaac 全部SAY NO。究竟 Isaac 係點既心情，只有佢自己至知。

幸好，Isaac 仲肯同媽媽影合照。最後一年了，真係畢業啦。大個仔了。

唯一一個，Isaac 肯合照既同學，就係QUENTEN，呢個同學，會同Isaac 小一同班架。唔知，一年後既佢地，又會變成點既樣呢？

呢三年既幼稚園生活，媽媽希望Isaac 真係會掛念，成為佢日後既好好回憶。