與同學約會去圖書館

10 Jan 15 呢日我地約左Claire 同學仔㪫㪫一齊去屏山圖書館。話說原來大家周六都係去圖書館打書釘過日晨，咁索性一齊去打書釘。係Claire 第一次約一個朋友仔出街咋。

㪫㪫： 你走咁快，我追你唔到架。

 正所謂，三人行，必有我師。今次由哥哥帶兩位小朋友去圖書館，唔知大家係書上學到幾多野呢？

本來我地諗住食附近出名既快餐店。點知原來間野收一點。唉。我地無得食之餘，仲要捱白曬呆企等另一間食店。大家都等到又呆又餓。真係陰公。

唔緊要，媽媽係附近買左間士多啤梨。望落好似幾香甜咁。元朗自家種架喎。應該好味D掛。

睇下Claire 坐車幾咁小心奕奕睇實袋士多啤梨，就知佢幾咁期待食呢袋野了。可惜，呢隻士多啤梨唔夠甜，咀勺妹兩啖已經放棄左。

13 Jan 15 雖然Claire 咀勺又公主脾氣，不過卻深得爸爸愛錫。點解？睇下佢幾識冧人咪知囉。（按此去片） 真係七情上面交足戲架。仲要講埋下集TIM（按此去片）。真係三歲人仔，有紋有路，唔好睇小佢。 正係咁多表情咁識冧人，所以變成爸爸個情人了。

整古做怪哥哥

9 Jan 15 呢日生日會完左， 帶左阿妹去畫班後，就比 Isaac 放下電。有人叫媽媽影佢相喎。真係好難明，有時想影佢呢，Isaac 又會整古做怪唔比你影。一係好似而家咁，忽然叫你影。

話說媽媽越來越擔心農葯既問題，上網睇左好耐，好想試下酵素浸菜。一於的起心肝整左兩樽，兩兄妹各自幫手整，當玩咁。整完仲影張相留念TIM。咁既表情，唔通佢兩個想食左落肚？

台上一分鐘表演賀功

8 Jan 15 話說呢年，學校早會有個活動叫台上一分鐘。每個同學無論K1定K3都可以上台表演。媽媽當然都幫Claire 報左名啦。不過以表演經驗，Claire 尚算膚淺，所以，媽媽都幾擔心Claire 會怯場。

殊不知，媽媽見妹妹一個人上台，一個人拎住支咪，一字不漏咁背哂首詩出黎。雖然朗誦變左急口令，但媽媽覺得以一個人黎講，佢要獨自面對咁多同學老師，都唔怕仲背哂出黎，真係好叻女好勇敢。

所以，媽媽之前答應左Claire, 做得到，之後可以食薯條。睇佢幾開心。

Claire: 哇，我食你啦～～～

可愛小公主

6 Jan 15 Claire 生得嬌小，有個好處，就係望落仲係好BB FEEL，好得人鐘意。襯返佢個BB LOOK，媽媽鐘童幫佢紮兩個春麗LOOK。感覺上可愛過孖辮。不過Claire 只鐘意孖辮。

Claire: 乜我咁紮，好可愛咩？

Claire: 哈，我呢個LOOK係咪冧死好多人呢？

自從十二月，Claire 就同哥哥去習舞 ，不過Claire 好似越來越唔鐘意咁。就連著起套跳舞裙咁靚，都唔肯比媽媽影相。媽媽唯有偷拍。

Claire: 都話唔好影囉。

希望有一日，Claire 可以同哥哥一齊踏上舞台，黎一檔兄妹檔啦。

放盡電＠錦田鄉村俱樂部

3 Jan 15 趁仲放緊學校長假，Claire 同同學仔出黎玩。認真係Claire 人生以黎，第一次放假約同學仔玩既日子。所以，Claire 未出發，先興奮，超期待。不過我地去到，大家仲未到達，爸爸就建議去摘下士多啤梨。

最近忽然鐘意痴住爸爸既Claire，呢日當然唔例外，選左爸爸陪佢一齊摘士多啤梨。

兩兄妹一齊摘，好開心。

呢頭摘完士多啤梨，個頭同學仔到齊，一齊玩。忽然有人足球小將上身咁。

㪫㪫： 可唔可以一齊玩呀？

嘩，原來Claire 踢到飛起離地架喎。勁呀。

但點解踢波可以踢到㪫㪫由頭到尾追住，Claire 就一人帶到尾既呢？

唔講真係以為佢一個人玩波仔。

㪫㪫： 等埋我呀，唔好走咁快啦。

Claire: 嘩，咁搞笑既，個波飛起既。

 玩下玩下，小朋友就好快熟。兩個拖埋一齊行。兩小無猜咁既樣。明明 Claire 自己仲矮過㪫㪫，但好搞笑，佢笑㪫㪫細粒。㪫㪫媽媽聽到，無言地笑。

兩個幾咁老友，齊齊吹波。

Claire: 好似呢支槍仲吹得大D 喎。

 吹完波，又玩波。不過今次有晴晴要一齊玩。

Claire: 個波我玩先架，你追到咪一齊玩囉。

 結果係點？爸爸話，Claire 自細跟得哥哥多，所以體能好似敏捷過同齡喎。

晴晴： 喂，我仲未踢到個波架。

Claire: 你自己唔走快D咋嘛。

 忽然，波戰發展到K3，K1 一齊玩波。

仲齊齊玩集體遊戲TIM。

媽媽一直無教過既氹氹轉，估唔到兩兄妹今日可以一齊玩。（按此收看）

之後，大家仲開始玩埋麻鷹捉雞仔TIM。（按此收看）

一玩捉人，大家都好投入。好在Claire 性格輸得起，唔會好似哥哥咁即發脾氣唔肯玩。

㪫㪫： 哈，你走唔到啦。
Claire： 放開我吖，媽咪話男仔唔可以摸女仔架。 

Claire: 哎呀，我起唔到身呀～～～

Claire: 今次走快D呀，唔係又比人捉到我架啦。

Claire: 不如我地拖住手，扮大隻雞仔，咁咪唔比麻鷹食囉。

原來玩呢個麻鷹捉雞仔，係最令小朋友投入既。不過大人就要好大體力咁跑呀跑。

睇Claire 笑到四萬咁口，就知全日最HIGH就係玩捉雞仔啦。

臨走，各小朋友要去踩車，Claire 就選左呢款單車。會唔會英左D呢？阿囡，你好似係女仔黎架喎。可唔可以擺返個斯文D既POSE呢？

錦田放電記

3 Jan 15 新的一年新開始，趁仲係學校假期，呢日約左妹妹同學仔一齊出黎玩。問過幾次，Isaac 都話要跟埋一齊玩。趕頭趕命入到元朗錦田俱樂部，同學仔未到，我地爭取時間去摘下士多啤梨。假期尾聲，士多啤梨比人摘哂，淨返最後一塊田（網住）可以比人入去摘。

Isaac 第二次摘士多啤梨了。對於選士多啤梨，Isaac 已經叻過爸爸。哇卡卡，因為媽媽教佢架嘛。所以今次摘到既，依然係紅當當。

為保士多啤梨無咁快爛，Isaac 今次唔駛媽媽提，已經識得留返半吋左右既支條。寧願嘥重量，好過未返到屋企即爛哂。

趁同學仔未黎，我地好快手一人剪左一盆，多謝一百大元。不過日本種，真係甜好多。

今次GATHERING係妹妹同學，同Isaac 相差兩年，所以，開頭時間未熟絡，Isaac 好悶場咁一個人呆玩。

Isaac: 無人陪我玩既⋯⋯我吹泡泡都無人黎拍波。唉～～

卒之一個人生悶氣，不停玩滑梯，不過以佢身型，好似唔多岩玩囉。

好在同行有個大細路，就係爸爸。見Isaac 咁慘，就同 Isaac 玩埋一份。

Isaac 咁重，都抱住黎轉，媽媽真係服佢。

所以，兩人變滾地葫蘆，笑死媽咪。

好WARM的一張相。爸爸好似好耐無咁攬住Isaac 談心了。媽媽覺得Isaac 大個仔後，都應該會鐘意呢張相的。

同爸爸癲完，又一個人揾節目。自己玩飛碟。依然未埋到堆。

幾經辛苦，Isaac 終於揾到個小妹妹陪佢玩，即刻笑得幾咁開懷。

Isaac: 個變身器係咁玩架⋯⋯

Isaac: 嗱，係咪好易呢？

 最後，有個姨姨提議玩氹氹轉。Isaac 終於可以埋堆玩餐飽。

寜舍高人一等。

之後，黎個激烈遊戲，就係小朋友至愛的麻鷹捉雞仔。Isaac 咁怕死，梗係死人都要做母雞，唔駛比人捉吖嘛。不過佢呢個姿勢，究竟保唔保護到後邊班雞仔呢？

 其實媽媽都忘記左，唔知點解忽然變左Isaac 變左做麻鷹，走去捉雞仔。最搞笑就係，Isaac 破口而出，童言無忌咁大叫： 捉到肥雞啦⋯⋯
在場各媽媽敢笑不敢言。

Isaac: 我捉到肥雞啦。

 之後，小朋友繼續捉黎捉去，Isaac 古惑怕死，係都要做捉人個位。直情大蝦細。

Isaac: 哈哈，我捉到你啦。

 玩到差唔多五點，臨散大家一齊去玩車。Isaac 選左呢架，好似要六十蚊。都唔平，所以無乜人玩。Isaac 坐左上去，成個大爺咁款。

錦田呢個地方，的確幾好玩。放電一流。下次要趁未夏天，再黎多轉先。