努力不懈的Claire

31 Jul 15 媽媽為左Claire 可以長高一點，暑假特登幫佢報彈床體操班，等佢跳多D。因著哥哥關係，年紀小小既Claire，每次上堂，都會走出黎做熱身動作示範。

Claire: 乜姐，我都好似哥哥咁叻架啦⋯⋯

 Claire 上左體操堂都近一年，媽媽真係睇住佢體能進步左好多。由以前唔識打翻斗，到識左，到呢堂，可以好敏捷咁打翻斗（按此去片），Claire 既努力，大家都睇到既。雖然佢天生嬌小，但佢真係唔放棄呢種性格，真係可取。

至於跳彈床，媽媽睇住佢由初初亂跳，到而家真係有模有樣，跟哂指示做。媽媽覺得佢真係好叻。就連分腿抱膝都做齊，呢個年紀加佢體型，真係唔易。

返到家，有個得戚妹，無啦啦反轉媽媽拖鞋係度玩蹓冰⋯⋯玩既呢日，Claire 係未玩過蹓冰既。但佢扮出黎既動作，真係有模有樣咁喎。真係估佢唔到。

去片 1 睇Claire 老積樣

去片 2 睇Claire 踩冰

細膽高大哥哥

31 Jul 15 又係暑假體操堂既時候，媽媽見係體操暑期班尾聲，呢日索性影下相，錄下片，記錄下呢兩兄妹係呢兩週既進展。首先呢篇先講下Isaac 先。

上左體操咁耐，Isaac 已經慣性被挑選出黎做示範，因為佢熱身動作做得靚之餘，仲好岩TIM⋯⋯至於妹妹，係跟住哥哥，所以都一齊出左去。哈哈。

Claire: 乜姐，我都好靚架，你睇下，我趴到幾低⋯⋯

咪以為Isaac 牛高馬大會大膽過人，佢正好同阿妹相反。鬼咁高大卻膽子超細，有幾細？按此去片咪知⋯⋯驚到縮沙係Isaac 上體操堂常見現象。

最後，導師都整到佢上單槓，仲玩埋倒轉TIM。其實呢個動作，對Isaac 黎講，一點都唔陌生啦，但佢仲係好驚咁既。（按此去片）

Isaac: 吖⋯⋯跌死我啦⋯⋯

Isaac: 原來咁矮架咋⋯⋯哈哈哈⋯⋯

 繼體操，同堂仲有彈床，呢範就岩哂Isaac。完全係揮灑自如。（按此去片）

Isaac: 好易姐，彈下彈下咋嘛。

 雖然Isaac 係彈床方面好似好有天份咁，但當佢見過大哥哥係彈床上做前後空翻時，呢個Isaac 居然同媽媽講，佢唔想再學，因為佢唔想係彈床上面做空翻喎。真係比佢激死。

Isaac: 阿蛇，我準備坐落去架啦。 

Isaac: 坐彈話咁易啦⋯⋯唔好叫我係呢度打翻斗就得。

望道號。尖咀一日遊

30 Jul 15 暑假遇著望道號訪港，媽媽年年都想上去朝聖一下。雖然呢年無左工人姐姐，不過見兩兄妹都咁大，一於單挑兩個，山長水遠一早黎到望道號朝聖。每次去書店／圖書館，兩兄妹都好主動拎書睇。真係聽話。

 

望道號係一輪大郵輪，一上到去，好多環遊世界各地停泊既相，掛係門口展示比人睇。

除左相，仲有少量畫。Claire 就挑選左呢張咁得意既食飯相，要求媽媽同佢影相。為左配合畫面，Claire 仲扮隻小兔，好可愛呀。

海港城為左配合望道號來臨，係戶外廣場都SET左一大堆書既背景。真係滿街書香。

Isaac: 好曬呀～～跟住去邊呀？
Claire: 點解我可以企上本書度既呢？

見兩兄妹咁聽話，媽媽就帶佢地食泰菜，旨在係比佢地食呢碟飯後甜品。

Claire: 我一啖食哂落肚啦⋯⋯
Isaac: 塊葉留返比爸爸食吖⋯⋯

飯後，媽媽揹住個袋石頭咁重既書，就遊暈尖沙咀⋯⋯真係膊頭都斷。飯後，我地先行去太空館買飛睇下日月蝕。不過對妹妹呢個年紀黎講，好似深左少少。幸好，睇完後，Claire 都無喊悶。反而仲學左個新詞語。

之後，媽媽本黎諗住帶佢地去科學館玩半日既。由太空館揹住袋石頭，行到落尖東。大熱天時，真係想死。點知行到過去，科學館係休館喎。激死媽媽。坐係附近抖下對腳同膊啦，又忽然醒起有個圖書館⋯⋯點知，行到過去，又係休館。唉～～～好重呀。仲要拖住兩個細既，真係想返歸。不過又約左爸爸食飯，唯有繼續行⋯⋯

卒之就行去文化博物館比兩兄妹見識下。

Claire: 嘩，呢支炮好大喎⋯⋯
Isaac: 打仗用架⋯⋯點解而家無打仗架⋯⋯

 原來係文化博物館，係有架電車古物。不過，好似未見過著裙既司機架喎⋯⋯

Claire: 你地想去邊呀⋯⋯

 文化博物館入口，有得玩托印。兩兄妹都玩得好投入。連影電車相，Isaac 都要拎住影。

玩完文化博物館，我地終於夠鐘可以出發去揾爸爸了，嘩⋯⋯媽媽期待既抖抖終於卜竹竹人水了，可以放低膊頭既石頭。真好。行去公司期間，附近有機械人展示，就順便同兩兄妹影下相。

古靈精怪既Isaac，無啦啦放自己個頭入去斬⋯⋯

Isaac: 點解切唔開我個頭既⋯⋯咁渣架⋯⋯

Isaac: 嘩，媽咪，呢個超人都好渣咋，我個頭仲硬過佢把劍呀⋯⋯ 

Claire: 媽咪，得呢個公仔得意咋⋯⋯哎呀⋯⋯我拉唔郁既⋯⋯

Isaac: 嘩，我有佢把劍咁高喎⋯⋯

Isaac: 我想拖下佢呀⋯⋯佢好靚呀⋯⋯

Claire: 我都有把劍咁高啦，好叻咩⋯⋯

 兩兄妹忽然齊齊企係度合照。梗係要影下。

Claire: 我覺得佢好可愛呀⋯⋯同頭先哥哥影既超人唔同⋯⋯我可愛定佢可愛呀？

影完相，終於終於⋯⋯可以去放低石頭了。呢日，真係行勻成個尖咀咁滯。攰死媽咪了。

反斗城扮超人。體操節錄

28 Jul 15 呢日同兩兄妹去反斗城探下玩具，Isaac 又走去男仔區，拎起個面具黎扮超人。雖然Isaac 越大越令人激心，不過，諗返一層，平時帶佢去反斗城探玩具，咁多年黎，佢真係唔會扭，比妹妹更識控制自己，媽媽話走，Isaac 真係跟住走。反而妹妹未識性時，真係LUR哂地大喊，Isaac 抵錫好多。

Isaac: 我似唔似超人呀⋯⋯ 

Isaac: 你知唔知我係乜野超人吖？

29 Jul 15 又到體操堂，呢日好似有新野，對細膽既Isaac 黎講，算係新挑戰。（按此看），就睇得出Isaac 平衡原來幾好。係厚墊上，仲可以保持平衡。跟住，黎個半空翻（按此看），雖則小兒科，但有導師協助之下，Isaac 叫做進步左，開始半空翻既體驗。

體操小節錄

27 Jul 15 又係體操暑期班時間，呢日有新玩意。好似當年媽媽去CAMP玩既活動咁，諗返以前，真係玩得幾開心架。睇下Isaac 又玩成點⋯⋯按此去片。

之後，又玩跨跳，睇見體能佳既Isaac 跳呢個時，真係好搞笑，有點似摩打腳咁，哈哈。（按此去片）

之後，又到練手力時間，吖，玩左成兩年幾既Isaac， 依然撐唔到自己上去，仲比阿蛇寸佢TIM。（按此去片） 後黎，阿蛇把單槓調低，Isaac 至可以撐到自己上去咋（按此去片）

睇完Isaac，又睇下阿妹。Claire 體能無哥哥咁佳，不過，依佢體型，真係算唔話得了。睇下佢跨步時，都算靈活架。（按此去片）

除左腳靈活外，Claire 對手臂真係唔可以睇少，佢真係可以吊住自己好長時間去盪千秋架。媽媽都服佢。（按此去片）

雖則呢D係公園都練到，不過，體操真係對頭腦有益，所以，媽媽都贊成佢地繼續去玩體操彈床架。