三日不同的表情

兩個月零十七日:

 Isaac: 哎呀, 比媽咪發現左我又周圍YOUNG TIM.

 Isaac: 媽咪daddy, 我大個仔啦, 你睇我識好似你地咁坐係樹.

兩個月零十八日:

 Isaac: 媽咪, 我好驚呀, 有雀仔想咬我呀.....

兩個月零十九日:

媽咪: 仔呀仔, 你係度用條巾黎包乜呀?

Isaac: 嘻嘻, 我想引你注意吖嘛.

終於影到啦

Isaac鐘意同人講野, 成日好長氣咁講BB話架. 不過每次見到相機對住佢, 又即刻收聲, 搞到媽媽無一次成功影到BB講野, 留返比佢第時留念.

兩個月零十五日: 媽咪返左學, 爸爸就偷影左Isaac講野啦. 下次等媽咪靜靜雞影住佢講野先.

兩個半月

兩個月零十五日: 媽媽呢日又要返學. 以為 Isaac早兩日啋返媽咪, 今日放學返去無野啦. 點知呢日返到去, Isaac又係唔肯望媽媽.

嬲爆爆咁, 唧都唔笑. 食完人奶就算. 激死.

兩個月零十六日: 呢日媽媽返半天, 放工又係飛返屋企. 咁岩 Isaac 醒左. 媽咪一哄個頭埋去, Isaac仔係咁笑呀, 幾開心呀. 仲要係咁young 腳. 好興奮咁既樣.

 Isaac: 媽咪, 你今日終於早返啦, 我好掛住你呀.

Isaac: 媽咪, 我最鐘意媽咪陪我, 坐係床邊陪我講野呀..

Isaac唔通真係識叫mama?

呢兩周, 爸爸成日同我講, BB 叫你呀, 佢係咁叫mama. 一係就話, 媽咪你係邊呀? BB叫緊你呀. 不過, 做媽媽既我, 真係無聽過Isaac仔對住我講一聲: mama

 

可能係我响BB前面, BB都唔駛叫我啦. 又或者我無爸爸咁好想像力, 由BB喊聲可以聽得出叫緊mama. 雖然昨晚Isaac仔聞到我陣味返到屋企, 狂喊叫mama, 咁我又真係出聲叫BB唔好喊, Isaac仔真係望向我把聲的方向(爸爸話的). 不過我只係聲到人未出現係Isaac前面, Isaac停左喊見無媽咪出現, 又再喊過. 爸爸好不耐煩要我企係BB前面, Isaac又真係停哂喊, 眼定定咁望實我…唉, 睇見佢眼仔濕濕又滴哂淚咁, 真係心痛.

 

今天問婆婆覺唔覺得Isaac識叫mama, 婆婆竟然都答: yes. 仲要係話, Isaac仔响喊得最淒涼個時, 會喊mama.

 

呵呵呵, Isaac仔, 究竟你係咪真係叫媽媽呀?

在職奶媽的安慰

兩個月零十三日: 呢日媽媽要返學, 夜晚十一點至返到屋企, 為左爭取親子時間, 決定埋身餵人奶. 不過BB都係唔啋媽咪, 真係得個食字.

因為太夜返又掛住餵奶, 阿B又唔啋媽媽, 媽媽都忘記影相. 唯有拎張兩個月零十二日..凌晨影既相啦, 過左半夜十二點, 都當係十三日架啦.

唔好意思, Isaac唔係望媽咪, 佢仲嬲媽咪架, 只係天生做model咁, 一見鏡頭就眼定定望住唔郁.

兩個月零十四日: 放左工又係飛返屋企, 為左要埋身餵人奶. 呢日 Isaac終於肯對媽咪笑啦.

餵完奶奶, 媽咪幾眼瞓都好, 媽咪都氹下 Isaac, 同佢講下野, Isaac呢日終於望媽咪唔望爸爸. 係咁好長氣同媽咪講野, 你睇佢講緊野架, 但唔明佢講乜. 可能問: 媽咪, 你做乜成日唔係屋企呀.....

兩個月零十五日: 第四日返工, 連續第四日做姑厘咁, 日日拎住一大袋奶泵同保温瓶帶奶返屋企比 Isaac仔翌日飲用. 連 lunch 時間都趕頭趕命扒兩啖就拿拿臨開工泵奶. 朝早餵完晨早奶, 又趕返公司趁未開工前, 又泵多一次. 唉, 咁辛苦咁趕為乜?

咪就為左呢個 Isaac囉

其實媽咪真係好累呀, 好眼瞓. 不過, 一返到屋企, 真係乜野辛苦都唔緊要啦, 做姑厘又點話吖, BB 有媽媽奶奶食喎, 都值既

因為要返工, 又keep住唔夠瞓. 放工返去真係散哂, 仲要爭取時間泵奶同埋身食奶. 不過媽咪都會爭取係BB未瞓覺時, 專心同 Isaac仔玩下, 建立下親子感情.

呢日, 媽咪趁 Isaac仔瞓著左, 拿拿臨去做gym修身啦, 點知返到屋企, 爸爸又話 Isaac仔扭計. Isaac仔聞到媽媽陣味返到屋企, 仲大叫媽媽咁(其實只有爸爸聽得明bb叫媽媽), 不過, 當媽媽出現企係 Isaac仔面前時, Isaac仔就收聲, 眼定定眼濕濕咁望住媽咪了. 呢下, 又係乜野辛苦都唔記得囉.

在職人奶媽媽有話說

之前睇書話, mama返工後, bb會扭計, 要找媽媽.

我上周六返左半天, bb無扭. 昨天返左一日, 係webcam睇bb, 又好聽話.

做人奶媽媽真係唔容易, 放工谷奶谷到爆, 一關房門就健步如飛咁跑去巴士站, 仲要一路開車一路心急....怕囝囝肚餓醒左等唔切媽媽返去餵人奶. 下次買返工鞋, 都係要找對可以跑步既至得.

不過到我趕返屋企餵奶時, 唔知係咪心理作用呢....Isaac明明肚餓 (過左食奶時間, 鐘點 EE 話佢狂喊), 媽媽就接手抱佢打算餵人奶啦...平時 Isaac 肚餓, 我一抱, 佢d 要開餐既表情會出哂黎.好搞笑好可愛的.

但昨晚返去抱 Isaac 入房開餐, 衰豬望都唔望我, 擰個頭去另一邊....好似嬲左媽媽咁 跟住我準備就緒比個人肉咀咀佢開餐時, 佢好快咁擰返個頭黎食.....但成程都無望媽媽. 無論我點唱歌仔呀, 撩佢講野呀, Isaac 都費事望我. 仲要成晚都無同我講野呀,  等到爸爸夜晚十二點返到屋企, Isaac 至同爸爸講野, 同佢笑...但當媽媽塞個頭係 Isaac前面時, Isaac 又擰開個頭, 依然唔肯望我.

估唔到咁細個人仔, 都識嬲人....當然唔知係咪我心理作用去估啦. 但好搞笑.

但個衰爸爸, 竟然同 Isaac講: 你嬲媽媽好啦, 唔好嬲爸爸.

太過份啦, 媽媽都係要出去返工, 無見 Isaac一天, Isaac至會咁咋嘛. 哼, 下次爸爸再咁縱容囝囝嬲媽媽, 唔同 Isaac解釋係媽媽要返工找錢錢時....媽媽一於辭工, 全職湊BB算啦.

Isaac 仔的初吻

兩個月零十二日: Isaac仔的初吻就係呢日無左了.

話說, 爸爸成日話媽咪喉住 Isaac, 成日想攞佢初吻喎. 雖然媽咪見到 Isaac, 真係好想咀佢一啖.

今天, 媽咪要返工, 離開 Isaac 成日咁多呀, 餵完奶放佢落床, 見佢咁可愛

咪隊個頭埋去錫下BB啦. 媽咪成日都忍唔住錫BB呀, 所以爸爸至話媽咪想攞BB初吻.

點知今日真係唔覺意, 錫左BB個咀仔TIM 真係唔好意思啦. 比爸爸發現媽咪攞左你個初吻, 實打死媽媽都似. 平時BB鐘意捽面仔, 今朝比媽咪唔覺意錫到咀仔時, BB捽左個咀仔幾下, 唔知係咪想捽甩媽咪的口水呢.

呢個咁卡通的睡姿, 係爸爸影既. 可惜媽媽已經在上班途中, 看不到.

媽媽今天下班, 真係飛返屋企咁滯, 為左餵人奶, 同埋多點時間同BB玩. 點知BB好累呀, 食完就要瞓.......媽咪今天咁攰, 諗住可以同BB玩乜都抵返啦, 點知今天只可以"暗" BB 瞓覺, 無得同BB玩呀. 有點失望呀.

廿四孝媽媽去散步

兩個月零十一日:

等媽媽讚下自己廿四孝先.

早幾日, 爸爸說豬流感大爆發, 建議我和Isaac暫時不要到人多 + 細路堆埋一齊的教會喎. 加上最近天氣好熱好焗, 迫住廿四小時開冷氣比 Isaac仔嘆, 所以, 媽媽決定今個周日, 帶BB散步. 呼吸下新鮮空氣.

不過天氣熱, 所以, 媽媽心裡已經打算, 晨早流流餵完早奶後, 趁太陽伯伯威力唔係好勁時, 就帶BB出動架啦. 當然, 媽媽都預左爸爸會缺席, 寧願走去找周公談心.

今天五點幾, Isaac又喊醒要食奶奶啦. 一如所料, 爸爸又瞓到唔願起身. 餵完奶奶, 媽媽食完早餐, 媽媽一個人就帶 Isaac仔去公園行.

因為今日晨早, 好似想落雨咁, 媽媽一個人唔敢帶BB行落公園, 只係向有瓦遮頭既地方逛下咋. 費事忽然下雨, 擔得遮黎推唔到BB車啦.

 Isaac: 媽咪, 我好熱呀, 行完未呀?

媽咪: Isaac仔, 我仲熱呀, 我好想拎你車仔把風扇黎吹呀, 媽咪而家成身濕哂啦, 估唔到太陽伯伯無出動, 都可以熱死媽媽.

Isaac: 媽咪, 點解你叫廿四孝既?

媽咪: 因為媽咪以前想像唔到自己會肯半夜或者晨早流流起身餵奶, 跟住仲要咁熱天時, 仲有心情同bb一齊去散步囉. 就係為左比你吸下新鮮空氣.

行左一陣, 媽媽推返BB入商場, BB就即刻瞓著左了. 可能有冷氣真係易瞓著.

跟住, 媽媽懶叻去超巿買餸啦, 點知超巿未開門, 迫住同班婆婆伯伯企係門口等開門, 個下覺得自己好異類呀. 得媽媽一個人推住BB, 其它人都係耆英.

媽媽返工啦

兩個月零九日:

Isaac: 等我做下早操先, one more two more

Isaac: 媽咪, 我塊面好痕呀.

Isaac: 爸爸話我瞓左呢個枕頭, 唔會再young去床頂喎. 媽咪, 你睇下, 我示範一次比你睇呀, 你話比爸爸知, 我都會young去床頂架.

兩個月零十日: 媽媽今天返工了, Isaac就今日半夜三點幾喊醒, 要媽媽"暗"佢瞓, 搞到成六點bb至肯瞓著. 唉, 呢個時候, 媽媽都要起身返工啦. 累死媽媽啦衰豬.

放工返黎, Isaac醒左, 幫返bb影張相相先.

Isaac: 媽咪, 你返黎啦? 我好掛住你呀.

你仲唔抱我既媽媽... 

剪腳甲

兩個月零八日：

 Isaac: 媽咪, 你又影相呀, 我今日無乜精神同你玩呀.

五合一既針真係好強呀, 隔左兩日, Isaac仲係好無精神, 成日都好累要瞓覺.

自從Isaac出院後, 媽媽只係每周幫bb剪兩次指甲, 因為bb指甲長得好快呀. 腳甲反而無剪過. 媽媽成日諗, bb的腳甲幾時至長到要剪呢.

點知呢日餵奶, 見到bb的腳趾公的趾甲都有少少反起了....所以趁bb瞓著時, 幫bb剪腳甲.  係bb出世以黎, 第一次剪腳甲呀. 唔知下次又係幾時呢.

打針後的 Isaac.

兩個月零五日:

 Isaac 回復返正常啦, 前兩日打既肺炎針副作用已經退哂, 變返做一個精靈活潑既BB. 成個下午係咁講BB話, 不過媽媽一拎起相機諗住錄低時, BB會望住鏡頭眼定定唔再講野, 激死.

兩個月零六日: 呢頭回復生猛既Isaac, 呢日又要再去打五合一呀. 呢頭打完個頭累到瞓著左, 奶咀都唔駛要, 少有.

不過返到屋企, 又變返生猛左

不過又好快瞓返啦.

好在今次打五合一, 又無發燒. 不過見到囝囝咁累, 係咁瞓, 其實覺得幾陰公架, 不過為左佢健康, 無計啦.

呢日, BB去埋母嬰, 重5.71KG呀, BB好叻呀. 食人奶都可以KEEP到標準重量.

兩個月零七日: Isaac 仲係好累, 成日無精神同媽咪玩.

 Isaac: 媽咪影相喎, 等我碌大對眼望住鏡頭先.

睇住Isaac呢日又係咁瞓, 真係無陰公呀. 雖然咁樣真係好湊好多, 但同平時個百厭 Isaac爭好遠呀.

好在瞓著都識得笑姐, 証明 Isaac都仲係表情多多.

Isaac 出世重3.25kg, 一個月重4.52kg, 兩個月重5.71kg.

兩個月零四日

兩個月零四日:

 Isaac: 嘻, 又坐車車, 媽媽梗係又帶我去街街...

Isaac: 媽咪, 今日我地去邊呀?

媽咪: 我地今日返教會呀.

 Isaac: 好野, 有得返去聽歌歌...

媽咪, 其實我好鐘意返教會架.

因為打左肺炎鏈球針, Isaac 昨天都好累呀, 真正食飽就瞓覺, 其實咁樣我地仲湊得輕鬆左呀.

感謝神呀, 打完針到而家都無發燒, 又無乜特別副作用. 明天就帶bb去打五合一. 希望又係咁啦.

遊街街

二個月零三日: 飲完早奶的Isaac, 媽媽就陪BB玩, 睇下Isaac笑得幾開心

Isaac: 媽咪, 今日我地係咪去街街呀?

媽咪: 係呀, BB, 媽媽就黎返工, 所以要出尖咀剪髮呀. 跟住爸爸話帶你出去愉景新城行下BB野喎...其實係爸爸自己想行咋嘛, 就用借口話你未行過愉景....

去到愉景, 媽媽第一件事就係濟Isaac五臟....食完奶奶後, 一齊迫係荷花世界入面間育嬰室黎張家庭照

Isaac: 你兩個搞乜呀, 我食飽左好想瞓呀, 唔好影啦.

行左一陣愉景, 又趕頭趕命返屯門, 因為要幫BB打針針呀. 醫生好好笑, 話 Isaac 食輪狀食得好快喎, 兩三啖食鬼哂成支....跟住仲要眼金金望住醫生, 唔知係咪想繼續食. 食完輪狀打肺炎鏈球針, 打到阿B用盡全力去喊. 不過都係喊兩三聲就收聲.

打完針又食媽媽奶奶啦, 食完奶奶又同媽媽係育嬰室來一張合照先.

兩個月人仔啦

Isaac仔係六月十一日, 滿兩個月啦. 一如以往, Isaac最鐘意young到自己上床頂, 再塞自己塊面仔落床圍, 好似想用床圍遮住自己咁.

腳仔越來越有力既 Isaac, 除左食奶奶會起飛腳踢媽媽外, 仲會咁樣架喎

就係"浪"左上床圍上面.

Isaac: 媽咪, 你估下我對手仔去左邊?

媽咪: 係喎, BB, 你對手手係邊呀, 媽咪見唔到呀.

Isaac: 嘻嘻, 呃到媽咪啦.

兩個月零一日: 一如以往, Isaac 好陶醉於同pooh傾計中, 不過呢幾日, 媽媽開始教 Isaac 認識花花, pooh pooh 同顏色啦. 雖然 Isaac聽唔明, 不過我相信呢d會入左佢記憶體裡面既.

呢日, 媽咪又係廚房洗緊碗, BB係到喊, 洗完碗出黎, BB變左咁樣啦....

媽咪: 你做乜呀, 又想玩伏匿匿呀.

哦, 原來係阿B又發忟, 因為眼瞓瞓唔到呀, 就會變左狂人一個.你睇連床圍都扯到幾遠.

阿B咁眼瞓又咁忟, 要好有耐性重要好温柔咁至冧到BB瞓架. 爸爸唔好同阿B鬥忟呀, 唔係阿B會越來越忟的. BB其實好乖架. 媽媽錫哂下.

陀住 Isaac重左35磅, 生完仲有22磅. Isaac滿月時, 媽媽仲有18磅多左出黎, Isaac六周時, 媽媽仲有12磅....估唔到呢12磅死都唔肯走. 媽媽已經唔期望返工前可以回復原形了, 嗚嗚嗚......