25 Oct 10 放完周日, 呢日返工, 可能爸爸又唔係屋企, 臨出門口阿仔攬住媽媽喊, 狂嗲媽媽唔比媽媽返工. 好辛苦至喝到工人過黎捉走阿仔.
不過睇返相, 阿仔呢日不知幾享受玩既樂趣. 拎個槌仔出黎玩扑傻瓜
Isaac: 哎呀, fing 甩左個槌仔tim
26 Oct 10 Isaac: 你做乜影我食相, 破壞我形象呀
夜晚, 媽媽知爸爸掛住阿仔, 阿仔又掛住爸爸, 所以叫左工人飛的士去媽媽公司附近, 再一齊轉巴士去機場. 去到換埋片片岩岩好, 爸爸架機降落左, 大家一齊企係閘口等啦, 不過阿仔超無耐性, 不停轉身又不停發忟
Isaac: 媽媽, 我地係咪一陣見到爸爸架啦?
爸爸見到阿仔接機, 不知幾開心
食晚飯時仲非禮阿仔強吻佢.
阿仔最鐘意學大人, 有得拖車, 梗係爭住拖埋一份.
24 Oct 10 爸爸第二日出差, 阿仔成日都叫爸爸, 一聽到鎖匙聲話係爸爸, 點知唔係時, 又扮哂失望咁扮喊. 出街見到中年男人又大聲叫爸爸,真係掛到上腦呀.
Isaac: 爸爸唔係到, 無人整古做怪引我笑, 好悶呀
Isaac：我無眼睇呀
返完教會一如所料, 一覺瞓到三點幾, 阿媽餓到頭都暈埋, 終於等到大少瞓醒, 陪媽媽去食個tea. 食完tea又去另一個附近既公園玩下.
Isaac: 嘩, 又係爬高, 正呀
Isaac: 媽媽, 唔該影得我正經d吖, 等爸爸返黎知道我呢幾日好乖.
玩完公園, 返屋企時特登兜去睇水池, 阿仔由細到大都好鐘意屋企樓下個五六個水池, 次次都可以望好耐.
Isaac: 爸爸, 你放心啦. 我無蝦媽媽呀, 我好聽話, 因為媽媽帶我睇水水, 又帶我去踩單車同去遊樂場同食左好味既下午茶.........
Isaac: 爸爸唔係到, 成間屋得我一個男丁, 我梗係要展示下我既力量至得.
23 Oct 10 爸爸公司泰國開會半玩旅行. 留低媽媽湊住Isaac四日咁多啦.
呢日本來以為打風, 諗住夜晚同工人帶阿仔出去食m記當同阿仔玩下算. 點知又咁好天, 橫掂阿仔見到阿媽都唔願瞓架啦, 所以帶佢去附近個公園玩下啦. 無計, 屋企樓下個公園仔, 阿仔已經玩到厭 @_@
去到呢個公園, 第一間爬上車
Isaac: 等我坐車車先
Isaac: 媽媽, 我夠唔夠正經呀?
點知即刻想爬出車囉, 好危險.
阿仔去親公園都鐘意玩呢d引體上升, 媽媽大肚, 唯有工人上馬.
Isaac: 媽媽, 仲有呢個呀, 呢個屋企樓下無得玩.
Isaac: 呢個搖搖馬係咪咁坐架....
Isaac: 工人, 好似唔係咁坐, 幫我的返出黎吖
Isaac: 原來咁坐至岩.
玩到傻左, 好辛苦至氹到阿仔返到屋企, 用既方式係----返屋企有果汁飲.
你睇, 未飲咋, 已經拎住個盒傻笑.
飲完瞓晏覺, 晚上再出去陪媽媽食個冷面dinner.
自從懷左細 b 後, 口味同以前一樣, 無變過. 都係唔鐘意食肉, 都依然咁鐘意食焗溶左既芝士, 食甜品糖水, 同陀Isaac個時既口味唔同, 以前一陀Isaac 勁鐘意食熱辣辣既野包括粉面飯, 仲有一定要食牛肉, 無肉不歡, 見到甜品糖水魚生都無胃口.
開始踏入四個月, 唔知係咪細 b 開始發作----越來越鐘意食面. 雖則阿媽一嬲都鐘意食粉面多過食飯, 但而家惡化程度係, 連晚飯都好想食面呀. 食小小飯已經唔想食, 但食面呢, 可以好快KO左一碗.
忍左好耐, 今天早餐破例食左個公仔面.............自從中學後, 都無食過成個公仔面了, 因為知道超級唔健康. 仲要係食早餐喎, 但無計, 因為媽媽打算放工返去既下午茶係食烏冬, 晚飯係去食冷面......咁朝早呢, 唯有食公仔面, 都係面.
都忍左好耐............想飲檸檬茶, 之前媽媽一向極少飲, 一年可能飲唔夠三包檸檬茶 + 零杯茶記檸檬茶. 今朝又自我安慰下, 反正陀Isaac都飲奶茶啦, 今日早餐係公司附近既大快活, 奶茶應該都係同檸檬茶差唔多
我諗咁破例法, 又公仔面又奶茶, 細 b應該唔會怪我既
今日17週, 早上去私家產檢, 下午再入返屯院產檢.
17週, 爸爸媽媽諗住都應該知性別, 點知細B好用力咁夾實大脾仔, 私家醫生睇唔清楚, 只係靠有無野跌出黎去睇性別. 暫時估係女, 不過媽媽又真係見到人地話女既超聲波有三間喎. 同醫生講, 醫生又話係喎, 只係大脾無擘大, 唔可以百分百sure. 唔怪得細B到今日都無當年ISAAC咁活躍起勢咁踢媽媽啦, 媽媽睇返陀ISAAC個時寫既BLOG, 原來三四個月阿子已經係咁郁.
下午去到屯院, 因為之前有少少見紅, 所以又有得照超聲波, 不過細B依然力保不失, 無轉過姿勢, 依然好用力咁夾實, 姑娘話睇唔到性別.
呢個疑似女既疑團, 唔知到照結構個日會開估未呢.
媽媽摛日睇返陀ISAAC時既BLOG, 原來陀細B舒服好多, 又輕鬆好多, 細B果然錫媽媽呀.
細B生長狀況
6wk 2d 0.57cm
10wk2d 3.40cm
16 Oct 10 重陽節, 一早plan左呢日去迪士尼. 天氣真好, 唔太熱又唔曬, 岩哂怕熱既媽媽.
已經搭最遲一班車去迪士尼, 點知去到阿仔仲瞓緊, 爸爸媽媽唯有係門口等佢瞓醒至入去, 反正今次係為左阿仔而去迪迪尼的
十一點, 阿仔叉完電了, 一副未瞓醒既樣
Isaac: 我地去邊呀?
雖然未瞓醒咁, 但一見到周圍都係差唔多年紀既小朋友, 阿仔不知幾興奮, 簡直係high爆. 成程都唔駛點拖住爸爸媽媽, 自己周圍行同摸野算.
Isaac: 嘩, 原來迪迪尼都有吹波波玩架喎
Isaac: 爸爸, 做乜要捉住我隻手呀
爸爸話要同阿仔入去玩巴仙光年既槍戰, 不過阿仔唔係咁識欣賞. 不過好叻喎, 入到黑猛猛既地方都無喊. 果然夠淡定.
巴仙光年對出仲有架好搶眼既跑車, 阿仔係咁話要坐. 前後比佢坐左兩次咁多. 因為仲要發掘其它好玩野比佢玩嘛, 所以唔好玩咁耐車啦.
Isaac: 嘩, 有得渣車, 我好開心呀
跟住去左之前同爸爸黎都未開既小小世界. 淨睇個外型都好卡通. 出面 d 鐘仲會咯咯聲, 阿仔睇到目定口呆
入面又係黑猛猛坐住架船仔睇卡通, 成場播住世界真細小既兒歌
出返黎經過影相區, 同阿仔影張pooh pooh, 阿仔好叻仔, 無驚不特止, 仲hug 住pooh pooh 又kiss pooh pooh, 可惜我部相機一早比迪迪尼工作人員拎左, 影唔到. 迪迪尼工作人員又無影低, 早知比錢買迪士尼官方相機影個兩張啦
家庭照.....四個月既細ｂ又呢埋左係媽媽肚裡面
嘻嘻, 兩年半前既家庭照, 原來生左仔又懷緊孕既媽媽, 個outlook一點都無變, yeah. 我生埋細 b 要繼續以呢個為target呀.
Isaac: 我笑.....
Isaac: 哦, 點解你隻手咁大既, 我學唔到你個pose tim
之後要揾地方醫肚, 阿仔呢, 慣住望街, 加上身處迪迪尼, 特別興奮, 呢餐佢郁身郁勢睇街多過食野
萬聖節到, 連menu都係萬聖節造型. 下面係主菜, 上面係爸爸特登order既甜品. 不過呢間大街餐廳呢, 真係食一次都夠......好難食 >_<
食完飯又去同pooh pooh 影相, 不過呢個game就對 Isaac 黎講, 同巴仙光年一樣, 無吸引力, 嘻嘻, 玩完阿仔無叫再黎多次
之後, 好好彩我地揾到個靚位睇巡遊. 一路睇阿仔都無反應, 以為佢係瞓著咁滯啦. 點知最後一架車走左, 我話, 走啦, 完左了.....阿仔就話要one more 睇多陣........原來係阿仔睇到太投入, 目定口呆阿媽以為佢係悶
Isaac: 嘩, 點解pooh pooh 同豬豬都變左色既
玩騎木馬, 細路仔應該勁鐘意, 阿仔一如所料, 玩完又要再one more 喎, 不過佢又想去玩小飛象喎, 所以只係排左一次木馬算
阿媽坐左係架高過阿仔既木馬黎影相, 爬上去個時都唔覺自己係個大肚婆tim
玩完黎多張全身馬相既父子合照
之後再去排長龍等玩阿仔話要玩好耐既小飛象. 可惜差唔多排到我地時, 阿仔已經揾左周公. 個時係五點半左右啦.
玩足成日足之頂唔順要揾周公了. 爸爸媽媽諗住去東涌睇下有無波鞋比Isaac, 點知去到阿仔醒左仲好鬼精神又繼續佢個high 爆status...........而爸爸媽媽都揾唔到岩碼既鞋比阿仔. 磨下磨下搞到九點至返到屋企.........同係迪迪尼睇埋煙花無分別囉. 早知留係迪迪尼等阿仔叉一陣電再比佢玩埋去啦.
媽媽呢日見阿仔咁high 爆, 真係有衝動買張annual pass, 以後得閒同佢入黎比佢玩架. 好在無買, 而家等媽媽冷靜下再考慮下買唔買先算啦.
11 Oct 10 Isaac歲半了. 時間話咁快就年半, 媽媽越來越愛上Isaac, 點算好呢? 真係要不停remind自己, 要學習放手了, 因為阿仔要有自己獨立既生活.
歲半既Isaac, 老早已經識自己餵自己. 日子有功, 仲食得好好, 唔會點跌落地.
歲半既Isaac, 無再搶媽媽相機, 因為佢識望住鏡頭擺pose. 而家明知你錄緊佢, 都會繼續做佢做緊既野.
歲半呢日, 爸爸係九龍酒店買左兩件西餅比媽媽食, 想媽媽患上糖尿病定啦, 所以有件芝士旦糕, 落左係Isaac同爸爸口中. 算唔算係歲半生日旦糕呢?
因為媽媽大肚, 同仔仔一齊咁早瞓, 搞到阿仔而家要痴實阿媽黎瞓, 半夜仲會桔起身要瞓埋上黎. 六點又會再醒再大叫媽媽. 為左矯正阿仔有健康既睡眠習慣, 歲半呢日起, 咁岩就比佢試下瞓返bb房既子母床. 希望試得成功, 以後可以一個人一間房啦.
接近歲半, 阿仔越來越識講好多野. 媽媽懷疑其實係一早識講不過又唔講囉. 而家唔會講叠字咁簡單了, 可能忽然講係呀,唔要, 輕鐵, F, 鎖匙.......... 唔知阿仔幾時會識講簡單句子呢?
歲半了, 阿媽唔會再每日POSE相了, 因為由出世到而家, 個樣都變定左. 以後有特別野至再POSE啦.
