沙頭角農莊一天遊

12 Jun 16 呢日我地一早報左仁愛堂既親子旅行團，目的地係沙頭角農莊。其實呢個天氣都幾熱下，聽到仲要係BBQ，媽媽真係一額汗。不過見平時我地都好少去呢D農莊，加上仁愛堂包埋接送，不失為一個好節目。一於豁出去，熱溶就熱溶吧。

點知，呢日居然下雨，有點掃興。落雨仲怕多蠓、蚊。一去到，搏命搽防蚊膏，兩兄妹冒住雨都要聽導賞員講解香茅功效。

Claire: 幾時先可以玩呀？
Isaac: 係囉，好悶呀⋯⋯係咁行。

 天氣實在太熱，我地行完個有機農場放低左幾百蚊之後，實在忍唔住返去有風扇既地方嘆雪條。居然比爸爸揾到有孖條賣，真叻。係Claire 第一次食孖條咋。

略為休息一下之後，導賞員又趕鴨仔了。今次唔係放低幾百係農場，而係放低幾十係錦鯉魚場⋯⋯奶樽餵錦鯉。十元一支。其實好快飲完，純粹綽頭而已。

難得兩個小朋友好開心。叫做第一次，新鮮感，有回憶。

Isaac: 媽咪，我未試過咁餵魚架。

Claire: 係囉，我都未試過呀⋯⋯

 餵完一輪，跟住又落超大雨⋯⋯避左一陣雨，我地終於可以返回原地，有得坐下。爸爸又走左去買布甸⋯⋯好難食，哈哈。

呢日節目認真緊湊，等既時間，仁愛堂又安排我地自製茶果。不過媽媽睇完永遠都唔敢食。

Claire: 我整架喎⋯⋯好好食架⋯⋯

Claire: 睇下，我整左兩種形狀呀。

Isaac: 我用塊葉包住舊茶果呀，實唔會同人撞款啦。

搞下搞下，最後，又係搓返平時既形狀。

茶果出爐，形狀走哂樣，但依然有人力讚好味。

搞一大輪，終於開餐BBQ了。算唔算佢地有記憶以黎，我地一家人齊齊去BBQ呢？

BBQ無幾耐，兩個小朋友已經忍唔住，要跑出泥潭到玩。經過上次JASPER生日會，媽媽就學識，無論幾熱都好，去呢D地方，下雨天一定要穿水靴同長褲，減少比蠓咬既危機。

Claire: 哥哥，我地玩飛碟吖。

Isaac: 我想玩自己個飛碟多D⋯⋯

卒之，佢兩個，一人一個飛碟，各有各精采。

為左呢次活動，媽媽仲幫佢地執左回力刀同竹蜻蜓呀。輪住每樣玩D，幾咁開心。

Isaac: 等我左右手齊出動，睇下邊樣飛得遠先⋯⋯

玩到咁上下，導賞員又帶我地去參觀另一個區，係動物區。原來要行好遠下⋯⋯雖然下雨天，但陣風都無，真係好辛苦下囉。幾經艱難至行到去動物區，原來不多動物，唉⋯⋯只有駝鳥同白兔。

Claire 不懼動物，第一個話要餵駝鳥（按此）哥哥見到，又想試下⋯⋯不過，最後都係由爸爸隻手餵，有圖為証，真係笑死。

Isaac： 我都係睇人餵算⋯⋯

之後，有個衰妹忽然話要去洗手間⋯⋯即時離開。只餘下媽媽陪哥哥餵佢既小小小白兔。

Isaac:我唔驚餵白兔架。

 呢日最後一個節目，就係參觀紅樹林。媽媽咁大個都未睇過⋯⋯原來行落去海邊，就是紅樹林一遍。石地上，仲有好多潮退餘下的好多不知名生物。

Claire: 估唔到呢度都有蟹捉。

卒之好努力咁摷石頭底，又想捉蟹。

熱到溶了的一家四口⋯⋯好似Claire 係最熱個位TIM。

Isaac: 我都捉到野呀⋯⋯
Claire： 唓，我仲細過你啦，我都得啦⋯⋯

一望無際的紅樹林，對面岸原來係大陸⋯⋯這麼遠又那麼近。

臨抽奬前，居然有社工出黎講故事⋯⋯去左咁多次仁愛堂旅行，第一次見有人講故事咋。難得兩兄妹都聽得咁入神，真係好。

綜觀呢次旅行，真係咁多次仁愛堂親子之旅最充實最開心的一次，簡直超值。希望下次都有機會玩呢D健康農莊啦。

超巨棉花糖特飲

9 Jun 16 呢晚見兩兄妹好返無咳無病，我地走去360趁下熱鬧。叫左杯棉花糖香芋⋯⋯點知，原來舊棉花糖咁嚇人架⋯⋯

Claire: 呢舊棉花糖仲高過我手指呀⋯⋯

11 Jun 16 呢晚，有個人仔係屋企梗係好悶定。無啦啦踩起架單車玩。不過唔係平時咁坐呢⋯⋯媽媽係側邊睇，真係覺得好可愛呀。（片一）接（片二）唔睇真係唔知呢個衰妹咁百厭，居然咁玩法。

第一堂學水

8 Jun 16 呢日第一堂同同學仔一齊學游水。果然有同學在場，Claire 好勝心發作，表現寧舍唔同。

唯一可惜係，Claire 半日班既同學仔無乜幾個女同學，所以，五個一齊學游水，四個都係仔。難得Claire 可以同大家玩得埋。

呢個教練都幾好，嬉戲中上堂，大家都玩得好開心。媽媽係側邊都睇得好開心呀。（按此）

最搞笑，就係有一次，成班小朋友比教練整古左都唔知，媽媽真係忍唔住笑左出黎，失禮哂。（按此）

係幾個同學仔之中，暫時Claire 表現最優秀⋯⋯佢就以為自己識游水。返到屋企，話唔要用板游喎⋯⋯話自己識游水喎⋯⋯（點此）如果係就好囉，咁就唔駛繼續去游。

硬頸妹

2 Jun 16 摛日哥哥放假，呢日輪到妹妹放假。妹妹放假，通常節目就係去濕地放電。睇見佢咁開心，媽媽都開心。

平日去濕地，幾乎係包場咁滯。成個場都係得兩三個小朋友，媽媽最鐘意呢D時間，唔怕比人撞。不過Claire 就麻麻鐘意，因為無乜人陪佢玩喎。

所以，玩到最後，就拉媽媽出去睇彈塗魚。嘩，呢日好多招潮蟹呀。Claire 叫媽媽影比爸爸睇喎⋯⋯

睇完招潮蟹，走去濕地唯一一個CANTEEN食兒童餐⋯⋯呢日兒童餐居然係薯餅⋯⋯跟住有個人仔呢，咬哂D角比媽咪囉（按此）

4 Jun 16 硬頸又懶叻既Claire ，有一樣唔好，就係唔聽人教。好似呢日咁，死人都話自己識玩波子棋。

Claire: 唏，咁簡單，我都識啦⋯⋯

Claire: 嘩⋯⋯好難喎，等我諗下點行先。

開心兒童餐

1 Jun 16 呢日哥哥學校假期，一齊去接妹妹放學，順便去食佢想食既兒童餐。鐘意食兒童餐，係因為有得抽玩具。呢個好似係成個兒童餐既高潮咁。

Isaac: 係呀，我係兒童餐係因為有玩具架咋。

咁呢個餐又氹得小朋友幾開心既，至少有成個面包超人樣出黎吖。不過份量就⋯⋯似人地三四歲小朋友既食量囉。一D都唔抵。

麻甩女？

31 May 16 下午返一返學校，天氣熱到不得了，唯有買杯雪糕消下暑。點知，有個女孩子，企到咁麻甩⋯⋯

Claire: 做乜影我呀⋯⋯

 晚上，媽媽心血來潮下廚一番。出黎之後，驚見Claire 變左身⋯⋯

點解話佢變身？亮點係佢個頭同個身到，都唔知好嬲定好笑。

Claire: 我呢個LOOK好唔好睇呀？