首次貝澳掘硯

5 Sep 15 係大澳搭巴士轉到黎貝澳。終於展開我地既首次掘硯之旅了。係渡假屋放低哂行裝，換哂玩水輕便裝朿，我地就去沙灘玩了。

好温馨的一張父女漫步照。

爸爸： 嗱，我地要行出去先掘到硯架⋯⋯

爸爸：嗱，要踎低先掘到架。

哥哥開頭都只係用腳踢下。

玩多兩玩，成個都忘形哂。索性踎低埋去玩水。

嘩，駛唔駛咁瞓身呀⋯⋯一個唔小心，咪成個趴低哂～～

Isaac: 點解我仲未摸到硯架⋯⋯

Isaac: 我係用正宗方法去摸硯呀⋯⋯點解仲未摸到既⋯⋯

另一邊廂，人仔小小既Claire，摸多兩摸，索性坐係泥地玩沙玩水算。

難得玩到成腳泥漿，都無嫌污糟。

Claire: 媽咪，一齊黎玩泥漿吖⋯⋯

夏天天氣真係好熱，我地玩到成六點，都仲熱氣迫人。不過怕太陽一落山，小朋友濕哂身會攝親。所以，我地六點幾就離開，去換衫食晚飯了。明天再黎玩過吧⋯⋯

掘硯前奏。大澳半天遊

5 Sep 15 前一天，爸爸忽然心血來潮話去大嶼山住一晚喎⋯⋯臨時臨急，又比佢揾到渡假屋。不過入渡假屋之前，爸爸話去下大澳先喎，呢下真正叫大嶼山兩天遊呀⋯⋯大熱天時，媽媽真係服左前面呢三位⋯⋯

大澳遊，大熱天時，真係好易中暑。呢兩兄妹就疏乎⋯⋯一人一杯。當然，最後Claire 個杯變左水，哇卡卡⋯⋯都唔明佢既，食雪糕又慢，食旦糕又唔好⋯⋯究竟佢愛食什麼呢？

去大澳，梗要幫襯炭燒雞蛋仔。爸爸不停咁話呢檔係冒牌架喎，因為呢個叔叔，同海報個位個樣係唔同⋯⋯明明係同一個人黎架⋯⋯

Claire: YEAH～～～我食雞蛋仔咪好快囉⋯⋯一陣陣同你食哂成包都得呀⋯⋯

除左雞蛋仔，大澳之遊必飲凍檸茶⋯⋯大熱天時，媽媽一口氣飲了兩杯。實在太熱了⋯⋯加上杯檸茶又真係好正喎⋯⋯仲有件多士。呢款外脆內軟的多士，我最愛。係茶記懷舊日一女山特色黎，而家好少餐廳整到呢個口感。

大澳之遊，好快完。完之前，爸爸話遊個白海豚遊船河。成舊水一位，都咪話唔貴。不過兩兄妹未坐過，就玩下啦。不過Isaac 全程都好驚⋯⋯沈船。哈哈，其實媽媽幾廿年坐呢種快艇都驚架。

白海豚我地就無緣睇到了，只係睇到呢種風化石咋⋯⋯ 之後就折返上岸⋯⋯而我地就開始入渡假屋玩了。

奬勵雪糕的一餐

4 Sep 15 話說暑假尾聲時，同Isaac 行去VCITY食野，Isaac 見到張好吸引既雪糕POSTER，話想去食⋯⋯媽咪就話佢識得拼POSTER最大個行英文字，咁咪同佢去食囉。二話不說，Isaac 好努力咁利用佢學過既PHONICS黎拼讀。吖，估唔到佢又拼到喎⋯⋯抵奬既。

所以，呢日趁小學仲係返半天時，放學我地一齊去食⋯⋯不過，原來LUNCH SET好好好好貴架⋯⋯貴到媽媽索性唔食，哈哈哈。Isaac 係咁問媽媽，做乜唔叫野食⋯⋯妹妹係咁話，做乜唔食野⋯⋯不過，要叫埋個碟奬勵既雪糕，呢餐真係貴到不可接受，所以，媽媽話自己唔肚餓⋯⋯其實係好想食埋一份⋯⋯哈哈，原來母愛係咁偉大。

飯後，仲叫左LUNCH SET 加五蚊既MOVENPICK雪糕比Isaac 食。

就係呢兩兄妹囉⋯⋯就係呢碟超貴既雪糕囉⋯⋯搞到媽媽淨坐一餐。不過，睇見呢兩兄妹，好明顯呢趟都值得既。明明影相，四隻眼睛依然望住碟雪糕⋯⋯碟雪糕有無咁吸引呀？

返到家又準備換衫出街，有人居然諗住用BACKPACK 勾住頂帽，咁就唔駛除帽時要自己收。咁都比佢諗到，真係夠抵死！！

貪玩妹

2 Sep 15 呢日接哥哥放學遇著下雨天，岩哂呢個貪玩妹。睇下，一去到收埋把遮，跟住變左一把槍，係咁射射射。真係笑死。

Claire: 地下有蟻呀⋯⋯等我篤死佢先

 岩岩開學，大家都好閒，所以下午無野做，齊齊坐埋一邊睇書。呢個MOMENT，媽媽就最開心，因為睇書係一個好習慣黎吖嘛。

小一了

1 Sep 15 開學日，Isaac 正式成為保記一份子了。之前一連串叩門接獲收生電話，一切都好似發夢咁。如真如假，到呢日一切都確實好多了。不過有人三年幼稚園習慣左校服配白波鞋，呢日返小學，Isaac 都好慣性拎對白鞋著。直到媽媽等校車時，先留意到佢著錯鞋。不過媽媽都無理了，反正錯一次，以後實會小心⋯⋯反而爸爸知道後，責怪媽媽搞錯左。不過唔錯過，又點會成長呀⋯⋯從此，Isaac 就變成小學生了，希望佢能夠比心機讀書，並好好享受六年既小學生涯。

暑假完結了

30 Aug 15 暑假就黎完結。成個暑假，Claire 都係睇住哥哥玩LEGO，睇得多，呢日朝早，佢又玩埋一份。自己砌左間屋，又拎LEGO人仔瞓低哂扮瞓覺。好搞笑。不過對LEGO，呢個女興趣依然麻麻。唔知係咪遺傳左媽媽呢。

31 Aug 15 Claire 一向好鐘意照顧哥哥，成個小媽媽咁。呢朝我地去食早餐，哥哥話想食皮喎⋯⋯Claire 二話不說，係自己個包度，摵左D皮餵哥哥食。慘得過阿哥真係擘大口食，唉⋯⋯究竟邊個係大，邊個係細呀？？！！

Claire: 唔好咬到我手指呀⋯⋯

 1 Sep 15 開學了，升K2了。開學日，估唔到都有功課做。呢日下午要學野，所以Claire 就係街邊食LUNCH，之後即做功課⋯⋯咁返歸可以安心玩。呢個係媽媽過去幾個月，無工人幫助下，訓練出黎既模式。我地都已經有哂默契架啦⋯⋯

Claire: 油油油～～唔可以出界架⋯⋯

花式跳繩。最後一堂

28 Aug 15 最後一堂跳繩班，朝早要返小學適應班，諗住下午SKIP左呢堂跳繩，點知有人話想繼續返喎。見佢進步得咁快，跳得幾好，於是放學即飛的去玩。

最後一堂，花式都學哂咁滯，呢堂好似只係一次過運用返出黎，去片睇下（點此）。

到跳大繩個下，媽媽又係大開眼界，估唔到Isaac 手腳協調得咁厲害喎。（點此）

到大繩加手花式，真係無得頂呀。（按我） 自從學左花式跳繩，Isaac 就好似迷上咁，成日係屋企練習。都好，至少日後係小學苦悶生活中，都有D野可以寄託下，舒發下悶爆情緒。

我要努力跳跳跳⋯⋯好似哥哥咁叻

28 Aug 15 呢日跟媽媽去小學接哥哥後，我地就飛的去跳繩。係呢個暑假最後一堂了。一直以黎，Claire 係堂上都好努力嘗試架，不過，活在哥哥陰影之下，Claire 對跳繩滿足感都唔係好大。

睇下最後呢堂，Claire 跳成點先⋯⋯首先係左右腳輪流跳，雖然唔係好粹熟，不過睇見佢咁努力，就知Claire 係好想好想跳到好似哥哥咁。（按此）

之後，到跳大繩，今日做轉腳。係導師協作底下，Claire 都叫完成到吖（點我），真係要比個叻叻掌聲佢，希望佢日後可以拾回信心，對跳繩更加有熱誠吧。

新生適應日。第二日

28 Aug 15 呢日又係新生適應日。岩岩升做小學雞，上堂仲係一舊雲。全靠媽媽收風，先知今日要著運動服，否則Isaac 一句都無提過。上課室了，當時既Isaac，仲會同媽媽打招呼架⋯⋯而家？啋我都傻，唉，真係仔大仔世界。

Isaac: 我就黎放學，等埋我呀⋯⋯

放學了，一堆家長一齊等放學。不過媽媽一個都唔認得⋯⋯Isaac 木無表情⋯⋯因為咀巴痛囉。

睇下，成日都整起個咀。生痱兹都有排好啦。

放左學，玩完跳繩，趁仲係暑假，我地又走去公園玩下。次次經開爬蟲館，最吸引除左個館外，仲有呢堆戶外既爬蟲模型。

Isaac: 我型唔型呀⋯⋯

估唔到，兩個月暑假咁就過了。過多兩日，Isaac 會正式成為小學生，究竟小學生活適應成點？真係引頸以待。

我上小學了。新生適應日

27 Aug 15 等左咁耐，終於等到呢日了。猶記得當年參觀小學開放日，Isaac 就被呢間學校既機械人製作班吸引，當時仲係K3既佢，自己決定選讀呢間小學。可惜電腦攪珠只能派往另一間唔係心儀既小學。媽媽真係心力交瘁，不停諗方法，寫信打電話周圍問人，叩門都叩了唔少間，幸好，最後呢間心儀小學打電話黎話收我地，爸爸仲以為係玩弄電話，唔係好信⋯⋯唔信唔信，到註冊買書日，又真係見到Isaac 個名在LIST架喎⋯⋯好似夢一場咁⋯⋯⋯疑幻疑真，直到呢日，Isaac 正式開始適應班，媽媽睇住佢入去排隊上課室⋯⋯一切都變得真實了。實在感恩。

第一天上學，就爛咀巴。笑得幾咁勉強。

妹妹都一齊送哥哥返學，仲叫哥哥加油。其實妹妹真係好錫Isaac. 

Isaac: 我都好錫阿妹架⋯⋯
Claire: 咦⋯⋯夾住我條頸，我抖唔到氣呀⋯⋯

 一年級生，分班排隊上課室⋯⋯嘩，顯得Isaac 好似好高咁，不過佢好明顯唔係最高個位囉。

睇下，後面位男同學高Isaac 少少，又後面隊都有兩位同Isaac 一樣高。

呢日媽咪聽講座，妹妹就被安排去睇電視，講座後，就接埋Isaac 放學，一齊食LUNCH。咁開心既日子，當然食佢最鐘意既火車路軌LUNCH啦⋯⋯不過兩兄妹各自一個兒童餐⋯⋯跟住兩兄妹都食唔哂。結果係比媽媽哦足半餐，哈哈哈。做媽咪真係好長氣呀⋯⋯

傻兄妹玩HIDE ＆ SEEK

26 Aug 15 傍晚無乜節目，見兩兄妹悶悶地，媽媽就話玩佢地最鐘意既屋企遊戲 －－HIDE ＆ SEEK。每次玩親，兩兄妹都異常興奮。

不過，次次都係兩兄妹爭住做捉人個位。睇下呢個奸妹，摸兩摸就放棄，仲要嗲下你咁，頂佢唔順（按此）。

之後，就好似傻妹上身咁，自己係度傻笑喎。乜真係咁好笑咩⋯⋯（點此）。

次次玩HIDE ＆ SEEK，Isaac 都最鐘意匿埋係枱底。可能阿妹都估到，所以就出現咁既搞笑畫面（點此）。

TOY STORY留倩影

26 Aug 15 呢日跳繩之後無乜搞作，媽媽見暑假呢個TOY STORY就黎擺完，就索性帶兩兄妹去影下相。由TOY STORY展期開始，次次經過，Isaac 都話想入去影相⋯⋯媽媽一直話少人D先。見呢日平日，唔算多人，我地又得閒，就入去影下啦。

Claire: 嘻嘻，我高過三眼仔⋯⋯

Isaac: 我一早高過啦⋯⋯

Isaac: 我個POSE 似唔似三眼仔呀？

Claire: 睇我幾高⋯⋯

Isaac: 唓，你撐高自己咋嘛⋯⋯點會同我一樣高姐⋯⋯

Claire: 影快D啦，我對手好攰呀⋯⋯