中秋晚會

26 Sep 15 呢日有個衰妹一起身，無啦啦拎個電話出黎話要打電話比班主任喎。嚇死媽咪，鬼咩，爸爸成日同佢講，掛住老師就打電話比班主任囉⋯⋯爸爸以為Claire 真唔會行動。卒之，呢日自己去拎電話⋯⋯當然，佢係唔記得學校電話號碼⋯⋯不過，咪睇少佢。佢總有辦法的。

究竟邊度揾到學校電話號碼？點此咪知囉。爸爸成日以為Claire 無方法揾到學校電話，但爸爸唔知所有學校手冊同書本，都有學校電話架⋯⋯Claire 讀到咁上下，本野已經比媽咪搶左去⋯⋯真係好怕佢會記住個號碼然後靜靜雞打比班主任呀⋯⋯

之後，早餐時間，媽媽提起同學仔已經識跳落水池游，有個衰妹又懶叻，話自己都識喎 （點我看）⋯⋯相信係發夢個時囉。

飯後無野做，齊齊落公園玩下。呢兩兄妹難得咁大個，仲可以一齊玩⋯⋯因為而家落公園，已經各自玩架⋯⋯

Claire: 哥哥，我地大個左，仲會唔會咁FRIEND架？ 

Isaac: 梗係會啦，你唔同我玩⋯⋯咁邊個比我蝦呀⋯⋯
Claire： 耶⋯⋯好衰架。

夜晚爸爸放工返黎後，我地既節目，就係去屯門巿區中心⋯⋯中秋晚會。媽媽呢兩年都見過佢既POSTER，不過無去過。Isaac 呢年話要去⋯⋯成日提住，咁就去啦。點知原來係圍內搞比自己人既晚會⋯⋯我地去到就變得生面口咁。不過唔緊要，全場最正係呢個扭波。點解？因為媽媽未見過扭弓箭架⋯⋯

Claire: 嘩⋯⋯真係射得出架喎⋯⋯

哥哥都唔執輸，要排隊等呢套弓箭。亦都係呢套弓箭，吸引左唔少朋友黎排隊等候。

呢晚既攤位好求其⋯⋯所以我地好快玩完一輪又一輪。唯獨係呢個搖控車，只係玩左一次咁大把。因為得兩架，仲要每人得五分鐘⋯⋯跟住又話唔夠電⋯⋯真係搞笑。

不過點都好啦，雖然唔夠吸引，但呢兩兄妹已經過左一個好開心既晚上⋯⋯我地仲諗住玩完再去公園玩燈飾⋯⋯但呢度都玩左成兩個鐘。所以，玩完呢度，我地就晚飯回家休息了。

2015 中秋前夕玩一玩

25 Sep 15 又到中秋⋯⋯呢年中秋，係好多年無遇過。因為⋯⋯今年得媽媽湊兩個，好快手搞掂兩個小朋友食晚飯之後⋯⋯仲要鞭策哥哥快手做完功課後，我地快手快腳走去隔離公園玩下燈籠。呢D日子，一年先得一兩日，媽媽都唔想剝削佢地玩既權利。

Claire: 睇下⋯⋯我帶左兩個燈籠呀⋯⋯

 呢日唔係正日，所以，公園唔係好多小朋友。我地行下行下，行左去球場個邊，叫做熱鬧少少⋯⋯撞岩隔離一大班鄰校幼稚園畢業生團聚⋯⋯都幾唏噓下，人地都係小一生，但人地可以咁團結，成班出黎GATHER⋯⋯我地反而只係兩兄妹⋯⋯咁零丁。唉⋯⋯鬼叫Isaac K3班家長一向都係幾個幾個自己暗地裡玩⋯⋯好難搞到咁大⋯⋯

 好在，兩兄妹都好開心咁玩拋螢光圈。

呢隻濕水鴨，自己砌左個兔頭飾。不過，相中可見，佢已經面露疲態了⋯⋯係時候返去沖涼休息下，下次再黎玩過。

佻皮妹

21 Sep 15 話說暑假時，媽媽一心栽培Claire 入學校故事組，所以暑假尾聲開始教佢講教事⋯⋯經過一番努力，Claire 得償所願，入到故事組了⋯⋯點知有人入左之後，開始同哥哥鬥叻⋯⋯（點此） 唔知哥哥聽住聽住，會唔會UP住UP住呢？！！

25 Sep 15  Claire 係屋企，一向都好佻皮下⋯⋯好似呢日咁，又走去坐梳化頂（點此）。真係激死媽媽⋯⋯之後，仲要扮可愛咁，你話點大鬧得落吖。

搞笑妹

17 Sep 15 呢日有個餵食妹係屋企開左罐果汁飲。明明爸爸係買比哥哥既，爸爸又買埋比Claire，點知Claire 飲完，有咁既評價（點我），笑死媽咪。

18 Sep 15 呢日放學帶Claire去圖書館一陣先去接哥哥放學⋯⋯每次唔見人，都會係呢個CORNER見到個專心看書既Claire。呢個英文書系列，真係好得Claire 歡心架。不過佢仲只係限於看圖既階段，唔知幾時，Claire 會開始識睇字呢！

19 Sep15 呢日，我地坐車去上環，因為Isaac 第二年拎奬。經過去年經驗，今年我地周六下午先去，仲要差唔多完場先去⋯⋯果然無乜人，同去年排長龍搞足個幾兩個鐘真係差天共地。

Isaac:呢幅畫我畫架⋯⋯主題係未來世界。

ICEHK係我地第二年參加了。全靠畫班老師安排下參加。今年Isaac 既奬比以往好。 今年有一等奬。不過都係過去式了。升小後既Isaac, 對畫畫一點興趣都無。

呢年除左Isaac 外，Claire 都有份參加架。不過係優異奬。都好過無吖。自小睇住哥哥不停拎奬，媽媽由Claire 平時既行為可以感受到，佢都好恨拎奬架⋯⋯

Claire: 好野⋯⋯我可以同哥哥一樣咁叻⋯⋯

 事後，我地坐港鐵去尖沙咀食甜品⋯⋯呢餐甜品咪睇少佢得三件咁大把。其實⋯⋯好貴囉。

Isaac: 妹妹，我地有三件蛋糕食呀⋯⋯好野⋯⋯
Claire: 唔⋯⋯咁細件⋯⋯

 係好貴好貴，成八十蚊一件。不過，真係好味，好香蛋味。同埋千層得好薄呀⋯⋯

夜晚瞓覺，忽然有個人仔古古怪怪，無啦啦著到咁喎⋯⋯係咪笑死媽咪吖⋯⋯究竟佢想點呀⋯⋯金色個條係乜野褲黎架⋯⋯

Claire: 嘻嘻⋯⋯好搞笑呀⋯⋯

Claire: 睇下⋯⋯金色褲腳幾靚⋯⋯

Claire: 等我做埋朦面超人先⋯⋯
媽咪： 暈～～件金色係褸黎架⋯⋯唔係褲黎架⋯⋯仲要係哥哥件褸黎既TIM。

話時話，當年仲係兩歲左右既Claire（下圖中的下圖）, 都係無啦啦自己拎件家居外套當褲著架⋯⋯自娛一番。呢個女真係由細到大，搞笑度十足。

學校戶外小活動

16 Sep 15 呢日放學去公園偷閒一陣子，有個活潑妹一個箭步跑左去攀架，年紀小小，真係膽子大大。

同晚，婆婆拎左兩個公公送既燈籠比兩兄妹，媽媽就話要幫佢地錄返比公公睇。媽媽兒時既玩具，都係公公買架咋，公公對小朋友真係有呢份心思。（點此）

17 Sep 16 呢朝食早餐，有個古怪女係度整古做怪。笑死媽媽了。

Claire: 媽咪，點解我個咀咁爆既？

Claire: 睇清楚D，我個咀多左舊野呀⋯⋯

呢D動靜，十足爸爸咁，真係遺傳。

返到學校，呢日有戶外小活動，係教交通安全。有義工幫手影相比媽媽睇。雖然媽媽無份做義工，不過看到照片，都覺Claire 好享受呢個活動。

Claire: 喂，上車比錢呀⋯⋯ 

Claire: 坐好未呀？我開車架啦！

 做完司機掉返轉做乘客.   睇返條校服裙，當時仲好長下咁，而家改到最長了，條裙仲係岩岩好⋯⋯有點短。看來，呢半年黎，Claire 長高了不少呢！

爸爸小情人

15 Sep 15 呢日收到畫班老師傳黎既照片，睇到Claire 好專心咁搓"月餅"。

Claire 成日都叫媽媽買返呢D月餅模，同佢搓月餅又可以做勞作。

笑得好牽強的Claire 同佢作品S一齊合照。

呢日我地去食M 記，唔記得乜野原因，有個人嬲霸霸既衰樣⋯⋯唔通又係比媽咪鬧佢唔可以淨食薯條？

Claire：你仲講⋯⋯我好嬲呀⋯⋯我唔鐘意你呀，成日迫我食哂個包先⋯⋯

呢個脾氣妹，性格真係硬頸都爆燈，媽媽都頂佢唔順。係爸爸先會成日氹佢架咋。唔通佢真係爸爸情人？

小學開放日

13 Sep 15 我家有兩隻餵食豬，Isaac 餵食唔駛多講，睇佢身型就知；Claire 話就話食得少，之但係遇著岩佢胃口既食物時，個肚可以塞好多入去架⋯⋯呢日，我地完左教會崇拜，兩個小朋友唔願走，話要留低食野喎。

Claire: 好多野食吖嘛⋯⋯

人地明明影大合照，吖，媽媽收到幾張合照，幾張相⋯⋯Claire 個頭無郁過，依然係望住枱上的各種美食⋯⋯而Isaac 呢，就得呢張係有對睇見到鏡頭既。邊個餵食D？一望就知。

食飽飽，我地就出發去哥哥小學，因為呢日開放日，會招待埋小一新生。兩年不變，Isaac 依然係比機械人吸引左。

不過阿妹你著住條裙，可唔可以坐得好少少呀⋯⋯

學校一角有幅攀石牆，Isaac 成日都話自己爬過⋯⋯呢日開放日，真係可以爬上去喎，又睇下Isaac 爬成點先⋯⋯（點此）

Isaac: 我叻唔叻呀？

除左攀石外，Isaac 仲好想玩去年開放日玩過既水火箭。不過依然係每人只可玩一次，就睇下今年火箭射得有幾高先⋯⋯（點我）

下次開放日，可能要等妹妹入左小學後，先再去玩了。希望Isaac 真心愛上呢間小學啦。

又去溜冰

12 Sep 15 呢日又去踩冰，由爸爸帶領佢地入場。媽媽決定放棄了。溜冰呢家野，真係痛苦呀⋯⋯

睇下兩兄妹入到場，幾咁興奮，速度真係快過媽咪架，哈哈（點我）。

再單獨睇下Claire 溜成點⋯⋯五隻手指數埋既次數，可以咁快溜前夾行步，媽媽覺得算係唔錯了。（點此）

至於Isaac, 直情快到無人有，好似人地玩曲棍球咁，係咁衝係咁行（點我）。

唔知佢地要幾時，先可以不停咁溜，達到爸爸想的要求呢？！

黃大仙鳯德公園一遊

12 Sep 15 自從Isaac 幼稚園去過黃大仙鳯德公園活動學習孫悟空後，佢就成日都話要帶媽咪去一次。等左好耐，等到呢日先有時間同佢去，一去到，Isaac 就入哂迷咁欣賞呢幅孫悟空圖。

兩兄妹去公園，其實互相為伴。好開心。

Claire: 嘩⋯⋯唔好跑咁快呀⋯⋯

 呢個公園有個特別少少既平衡木，每一個距離都會郁的。考起小朋友平衡之外，仲要夠定先可以行得哂。睇下Claire 緊張到兩隻手仔緊握拳頭黎行。

Claire: 我就黎行完喇，我加油先得呀⋯⋯

大大隻既 Isaac 行呢條橋，一點難度都無。以佢身型，可能好快就唔再玩公園了。

究竟呢條係咪滑梯黎既呢？Claire 好似係度研究緊。

Claire: 咦⋯⋯都SIR到架喎⋯⋯

原來呢個黃大仙公園好細架咋。真係街坊公園咁，唔知點解當年幼稚園都可以當係孫悟空活動學習用。因為唔係好大，我地好快玩完，就再飛的去下一站進行另一個活動去了。