貝澳掘硯後記

6 Sep 15 翌日一大早，瞓醒食個包⋯⋯因為CAMP SITE無野好食。好在我地預先買定包仔，求其充好個肚就出發玩水去也。

爸爸見之前個晚收穫唔係咁理想，所以，呢朝佢一早係貝澳士多用一百蚊租左個鏟黎掘硯。

Claire就變左掘蟹。細細粒拎起手，對佢黎講，易如反掌。厲害過哥哥同媽咪。

爸爸媽媽好落力咁周圍掘，終於一堆硯仔送到妹妹手上。由佢負責挑返細BB走。

呢兩兄妹，好明顯掘掘下，已經忘記左自己係黎掘硯，以為係黎沙灘玩水架啦。

到尾聲，有個大姐姐走黎撩兩兄妹捉魚仔，咦，又一新玩意喎。

睇佢兩個，幾咁專注望水底去捉魚仔。

呢D，先係小朋友應有既生活嘛⋯⋯媽媽都好想佢地可以多點拾回呢種童真。

到最後，我地既硯收成，只係咁多⋯⋯不過，都足夠我地開心一天了。

呢個灘，就係向CAMP房影返出去既⋯⋯好似好靚既海景⋯⋯不過行到隻野咁⋯⋯由車站行去，大家邊行邊呻熱又辛苦⋯⋯真係大家都怕怕。連爸爸都呻笨。所以呢個位置，真係無下次。

拖住疲乏既身軀，我地終於返到屋企⋯⋯攰到暈了。不過，仲要煮呢碟生捕硯仔。好鮮味呀，我地只係用水煮咋。都夠好味了。雖然好熱好曬，不過，大家都好享受呢個活動，爸爸話下次再去喎⋯⋯不過唔會再住個度了。