相親相愛

30 Apr 16 呢兩兄妹真係好愛對方，越愛對方就越要作對。好既時候就糖痴豆，唔好就水溝油。好似呢日咁，無啦啦哥哥叫阿妹坐落佢度。冧死Claire 了。

Isaac: 媽咪，你睇我幾錫阿妹。
Claire: 由我幸福既笑容，就知我好冧哥哥啦。

 之後，哥哥仲夠膽比Claire 坐人肉馬，嚇到媽媽叫停。因為，Claire 唔再係BB了，媽媽真係分分鐘怕坐斷哥哥腰骨呀。

Claire: 嘻⋯⋯我扮坐咋嘛，我對腳踩住地架。
Isaac: 係呀，妹妹高左啦。以前佢對腳掂唔到地架。

雖然唔少人都話Claire 長高了，但仲係好矮喔⋯⋯媽媽有點擔心，唔知佢上小學點HANDLE到個書包呢！

落樓放電記

26 Apr 16 呢日，又係由爸爸帶Claire 入迪迪尼玩。難得爸爸去，梗係要玩SPACE MOUNTAIN啦。

玩完出黎，居然見到兩位威武既白兵。

27 Apr 16 好耐無做旦糕，呢日忽然興起整下旦糕，Claire 越大越愛幫手下廚，就比佢幫下手攪粉啦。

Claire: 呢次既旦糕，應該實好好味既姐⋯⋯我整架。

 整完旦糕，有時間，就落去放下電。之前係落去踩單既，但嚴打違例踩單車後，媽媽都唔敢落樓下踩單車。踩板車好似安全D囉。

29 Apr 16 呢日又落公園放電。應該話，我地幾乎日日都落一落樓放下電。不過，呢日Claire 就選擇左去公園玩手抓球。

Claire: 媽咪，睇下我隻手幾大⋯⋯

咪睇咁大塊板，原來要捉到波，真係有難度架⋯⋯可能對Claire 黎講，個目標太細，下下都跌落地。好在Claire 唔介意，仲玩得好開心TIM。

女中豪傑

25 Apr 16 同學仔家長一向力讚Claire 係女中豪傑，因為佢膽量同行為，一點都唔輸蝕比男孩子。就拎體操堂為例，呢個（點此）引體上升加"燒豬"動作，當年既哥哥都唔敢做。

再黎多個高級版既引體上升，呢個真係少D膽量都做唔到，企到咁高仲要放膽向下倒轉。妹妹，你係叻既。（點此）

除左呢個之外，Claire 仲夠膽做側手翻。不過，動作梗係不敢目睹（點此）。媽媽見到，即刻叫爸爸幫佢惡補一下。不過，爸爸到而家仲未有時間教佢囉。難得Claire 完全唔驚，呢個膽量咁大，真係應該好好把握至岩嘛。好在，導師見到，都幫Claire 一把，希望可以教到佢側手翻（點此）。阿妹，加油，希望你得償所願，做到個靚靚側手翻啦。

溜冰鏟冰

24 Apr 16 呢日，爸爸又話去踩冰喎。睇返原來呢個四月，佢地兩兄妹都踩左成兩三次冰。真係有無咁HAPPY呀，成日去玩。

呢日踩冰有個小插曲，就係佢地飛的出九龍時，Claire 遺留左件外套係的士裡（咪就係兩兄妹仲未養成離開一個地方要回頭望有無漏野的習慣囉⋯⋯好明顯，爸爸都一樣無呢個習慣啦）。卒之，爸爸局住要買件外套比Claire。買完仲係咁講Claire 搞到佢要買外套⋯⋯真係好笑，明明呢三個成員習慣都一樣，爸爸仲可以賴個細路漏野。

爸爸話，呢日教識左哥哥鏟冰停喎。睇下幾勁先（按此）

事後，佢地齊齊去食M記⋯⋯爸爸又比Claire 恰啦，話食唔哂個包喎。明明呢個小妹妹，每次同媽媽去食M記，都要迫住吞哂一個包先可以食薯條，Claire 睇中爸爸無先小人規定，所以就選擇只係食佢愛吃的食物。呢個古惑妹真係⋯⋯

Isaac: 係咪我乖D吖？我食得多野過妹妹喎。
Claire: 我唔鐘意食包架⋯⋯我淨係鐘意食香口野⋯⋯

故事演講比賽決賽

23 Apr 16 終於等到故事演講比賽決賽了。地點係向商場入面，唔好講小朋友，連媽咪咁大個，都未必衝破到心理關口，企出黎扮鬼扮馬呀。好在，媽媽都知自己份量，都估到仔女咁上下，事前已經去左兩次實地試講。呢日正式決賽，主辦機構都好體諒大家，事前安排各參賽者踩台試講。我地已經好早去到，比Claire WARM UP下，點知左扭右扭，都唔肯講，話好驚喎。媽媽見佢咁驚青，就話去食個LUNCH先。LUNCH後，爸爸就帶Claire 買糖，講得到故事當奬賞。吖，見糖開眼呀，終於肯上去講了。

不過，試講一刻，都仲係好好好驚⋯⋯要工作人員係側邊不停安慰佢⋯⋯但都要前後上第二次，先成功講得到故事。不過，一開口，又唔覺Claire 係驚架喎。

Claire: 我唔想講呀⋯⋯

工作人員： 唔驚⋯⋯我壯你膽。
Claire: 我驚到笑唔出呀⋯⋯

最後，正式出賽了。媽媽陪住個好驚好驚既小妹妹去到台前，邊行邊提醒佢深呼吸⋯⋯忽然個刻，覺得好殘忍，因為，媽媽望到，呢個小妹妹對眼，上到台後，仲係搜尋緊媽媽的蹤影，望到媽媽對佢好鼓勵的一笑，佢就定好多，開始講故事了。Claire，你真係好勇敢呀。（點此）

想當年，自己細細個，真係蠢架，成舊飯咁。估唔到幾十年後既自己仔女，比自己醒目同勇敢好多。媽媽睇在眼裡，真係好感動。

評判之一，楊婉儀。

成個比賽完結，Claire 獲得優異奬⋯⋯其實，媽媽同老師在場，都估計係季軍架⋯⋯真係唔知評判準則，因為Claire 之後個兩位，好似急口令咁，又快又短。姑勿怎樣，係媽媽同老師眼中，Claire 你已經贏左。

第一次出賽，梗係要同學校教佢講故事既楊老師合照啦⋯⋯可惜既係，原來Claire 呢年係最後一年有故事組，即係呢個比賽係Claire 幼稚園生涯裡最後一個故事出賽。真係可惜呢。楊老師真係教得好入神，Claire 本身又鬼馬，唔發揮係故事演繹就浪費了。

一家人，齊齊整整出場支持Claire 第一個商場故事演講比賽。

呢次比賽好搞笑，拎既唔係盃，而係一籃玩具。哈哈哈。可能係各方贊助掛。最後，Claire 仲好捨得送其中一樣玩具比姨姨呀。呢個性格，媽媽真係好欣賞，希望佢長大後，繼續願意分享吧（按此）。

落街放電

21 Apr 16 呢日媽媽又返小學講故事。每次都見 Isaac 好專心，木無表情咁聽，都唔知佢係咪咁ENJOY媽媽返去講故事既姐。

放學後，見佢咁快做好功課，就奬佢落樓下放下電。

一個踢波一個踩車。真開心。

如果Isaac 每日都可以咁快完成功課，落街放電，咁就好了。唔好再望住功課發呆喔。

\

女子足球

20 Apr 16 中村藤吉係尖沙咀開分店，媽媽無緣去食。不過爸爸就買左一堆外賣既朱古力同旦糕返黎谷肥媽媽⋯⋯仲有呢個餵食女。呢個Claire, 有飯唔食，但最愛零食。

Claire: 呢堆都係我最鐘意既綠茶糖黎架⋯⋯好味過食飯。

下午，見天氣幾好，又未夠鐘接哥哥，就同Claire 落公園玩。點知，有個人叫媽媽帶波⋯⋯媽媽諗住係同佢一齊拍波架啦，點知⋯⋯

Claire: 波係用黎踢架⋯⋯

 點解會咁架⋯⋯最難接受既，係居然媽媽要落埋場做女子足球⋯⋯天啊！

好在，踢波呢家野，吸引左唔少男孩子黎一齊玩⋯⋯雖然有伴陪Claire，但呢個情形，媽媽真係有點驚囉。阿妹，你咁瘦，做乜要做龍門呀？

玩左一陣，呢個妹妹仔就陪媽媽去接哥哥放學。踢開有癮，沿途都可以邊行邊踢波。媽媽諗到，日後暑假，可以幫你報名玩女子足球囉。

體操節錄－浮撐

17 Apr 16 呢日又出動，去荃灣商場實地試講故事。哥哥知道Claire 之前個日可以食牛角燒肉咁開心，呢日就話要跟埋一齊出黎陪妹妹喎。實則係旨在食。練完故事玩完公園，又係例牌係車站門口買軟雪糕食。

Claire: 唔⋯⋯好⋯⋯味呀⋯⋯
Isaac: 我慢慢食。

20 Apr 16 呢日體操堂，Claire 有新野玩，就係浮撐。先係哥哥試先既，唔知係咪用錯力定哥哥比較重，做唔到浮撐，媽媽見Claire 骨瘦如柴，睇死佢都做唔到啦。吖，又比佢輕易過關喎。真係唔可以睇少呢個女。（點此）

妹妹跳JAZZ。鬼馬超人LOOK

14 Apr 16 經朋友介紹下，Claire 係四月份，轉左新跳舞學校。跳左三幾堂JAZZ，估唔到又有少少成績喎，媽媽都估佢唔到。（按此）

16 Apr 16 因為Claire 之前故事初賽入到圍，順利進入決賽。地點卻係商場內。媽媽都暗地裡抺一把汗，心諗，如果Claire 順利完成，佢個膽量，真係大過媽媽好多倍了。講係咁講，反正地點近近地，所以，復活節假，媽媽都帶佢實地試講一下。當然，過程好唔順利，Claire 又怕呢又怕路，左氹右氹先肯試講。媽媽都唔知Claire 到時點算喔。

點都好，講完故事，緊係要輕鬆下。路過咁大既公園，Claire 無理由會放過。

Claire: 點解上次爸爸帶我黎，無經過呢個公園既呢？

 玩完公園，仲有架雪糕車係車站前等我地。Claire 獨霸一支，食得幾咁ENJOY。

Claire: 點解你唔買支比你自己姐⋯⋯

 媽媽明明話係SHARE，但呢個人仔呢，好明顯搏慒唔記得，話咁快清剩個筒。

 結果唔駛估都知，就係呢位小妹妹獨吞了一支雪糕唷。

回到家，媽媽忙著做菜，出到廳⋯⋯又嚇左一跳。兩兄妹又搞乜呢？

Claire: 哥哥幫我夾架。

Claire: 似唔似超人呀？

乜超人咁既咩？

Isaac: 係呀⋯⋯擺個POSE你睇下吖。

 呢兩兄妹，真係鬼馬呀。咁有創意都諗得出。

Isaac: 我係超人跑步呀⋯⋯

Isaac: 望下鏡頭啦，掛住玩BUBBLE紙。
Claire: 我望緊啦，E～～～

生日正日上體操。迪迪夜遊

11 Apr 16 Isaac 生日正日，遇著考試，之後就體操堂，旦糕又早一日切埋，所以，呢日好平凡咁過。平凡歸平凡，呢日體操居然要拉筋，嘩，第一次見Isaac 咁拉呀⋯⋯好似好勁咁喎。

Isaac: 好易咋喎，你拉多幾次咪得囉。

 呢日，咁岩Isaac 比導師捉住練倒立。無倚無靠，算係咁啦（點此）

12 Apr 16 呢日下雨天，媽媽早已計劃去迪迪尼。當係兩兄妹生日玩餐飽，不過遇著大雨，真係得個玩字，巡遊煙花乜都無得睇。但個場係無人架囉，轉轉木馬任玩唔嬲，玩完落黎又即刻再入返去，排都唔駛排，爽呀。

係繁忙既考試日子裡面，難得見到Isaac 可以拋開一切，還有些童真咁玩。雖然帶兩個黃昏趕黎都幾頗繁，但都係值得既。

綠豆豆生日會

10 Apr 16 呢日係0904BB會朋友仔生日會。早上落好大雨，但唔知點解我地都無諗住取消，仲原定計劃黎參加⋯⋯卒之餵飽蚊。因為生日會地點係錦上路西鐡站的綠豆豆農莊。主人翁包場包BBQ，我地唔係旨在食，而係旨在參加一齊玩，因為主人家要回流加拿大了。日後唔知幾時至可以再見。

一去到，草地仲係濕到不得了，因為落左好耐雨，好在我地打定雨靴黎。不過忘了著長褲囉。

Claire: 點解得我同哥哥玩既？

呢個衰妹呢，最鐘意大力踏水氹⋯⋯你睇你睇，成副出動樣又黎了⋯⋯

Claire: 我係黎執波咋嘛⋯⋯

Claire: 哈哈，好大個波呀～～

Claire: 嘩，我拋波比自己先。

Claire: 嘻嘻，跌左TIM⋯⋯

Claire: 等我試下玩細既黃色先⋯⋯

怕羞既Isaac, 未同其它小朋友WARM UP前，就淨係同個妹玩。一副好哥哥既模樣，而Claire 就一臉好幸福既笑容囉。

Isaac: 我一向都係好哥哥黎架。

一臉落寞的Isaac, 好孤獨咁。但佢又好似自得其樂喎。

坐坐下，忽然多左個，Isaac 就縮埋一邊，兩個小朋友一樣姿勢，好搞笑。

就算叫佢同其它0904小朋友影相，佢都好似好唔投入呢！

Isaac: 點解坐到咁迫架⋯⋯

Isaac: 我係咁架啦⋯⋯我唔鐘意同人玩架嘛。

係咩？睇下點？

四大天王，七年後繼續一齊，真係好難得。

話唔鐘意一齊玩？睇下，WARM UP後，Isaac 變哂樣囉。

雖然，變極都係擘大口⋯⋯

Isaac: 嘻嘻，我特登既⋯⋯睇下我條脷！
ZAC： 嘩⋯⋯好恐佈呀⋯⋯
JASPER： 嘩，你唔好嚇親人啦。

Isaac: 好啦，咁我合埋口⋯⋯都要擺個嚇親人既POSE先。

四大天王，由呢四大母親組合而成，哈哈哈。原來我地相識都八年幾九年了。時間過得好快呀⋯⋯

但願我地四個家庭，可以繼續保持聯絡，咁就好了。

而呢三個，好短日子之後，就會一齊去台灣，而家各自扶實個千秋咁拘謹，唔知到時台灣之旅之後，會癲成點呢？

再見了，四大天王合照。再聚你呢四位小朋友一齊合照，唔知係幾多年之後既事LU。

雖然落左成日雨，成地濕，好在呢個生日會無落過雨⋯⋯不過大人細路都比蚊比矇咬到九彩，真係陰公囉⋯⋯事後幾日，我地四個媽媽仲係度鬥數蚊LAN同數蚊膏。可想而之，呢日既"戰績"有幾恐怖。