同學仔M記生日會

23 Apr 17 呢日去同學仔健浩生日會，Claire 呢期好冧健浩，我地梗係出席，一齊慶祝啦。一去到，Claire 就鎖定目標，咁岩，有得玩遊戲喎，衰妹又好好彩，可以同健浩一齊玩（按此），開心死佢。

Claire: 好野，可以攬到健浩，呵呵。

 聽Claire 講，平時係學校大肌肉時間，佢兩個係做兵足賊既隊長同副隊長，所以，Claire 特別同佢熟。

一眾K3 同學好齊心咁祝福健浩。一齊許願。

係M記開生日會，時間其實好快過，因為得1.5小時，連埋搶住落單玩遊戲切旦糕分禮物，真係時間緊迫。不過，一班小朋友柴娃娃，邊度開生日會，都一樣咁開心咁HYPER。

周六閒情逸記

22 Apr 17 自從工人姐姐離開後，媽媽開始要求兩兄妹各自照顧自己，包括煮食。因為，媽媽總有一天會病倒，病倒了，誰人照顧他們呢？幸好，兩兄妹都好樂意學習，希望好快的日子之後，佢地曉得煮餸開飯啦。

Claire: 哼⋯⋯係你想偷懶姐～～～
Isaac: 我識自己煮面呀！

 食完自己煮既午餐，媽媽就帶佢地去拎生日禮物，睇下呢位小朋友，拎住份禮物，幾咁開心。

Isaac: 玩邊個先呢～～

 呢日，我地係出荃灣愉景買書包，因為EARLY BIRD平D，買完就順便係呢個鯨魚花園玩，兩兄妹超愛。

Claire: 阿哥，快D行開啦，我要SIR落黎呀。 

Isaac: 媽咪，我比鯨魚吞左呀～～

 愉景REVAMP得好成功，全層地下都係成功轉型比小朋友家長行，閒時仲有表演及公仔出黎同小朋友合照，氹得Claire 幾咁開心！

三個都是紅色系列的上衣，不過，都係紅噹噹的ANGRY BIRD搶眼D。下次再黎過鯨魚花園，呢度真係好值得去的一個免費玩樂公園。

餵食妹

21 Apr 17 呢日同妹妹落去食早餐，商量之際，忽然有個小妹妹話要去呢間餐廳食早餐，話呢度有香芋牛奶飲，話陪媽媽食早餐都得，但佢要飲香芋牛奶喎⋯⋯媽媽聽到，係咩？乜有呢D咁特別既飲料咩⋯⋯落到餐廳，睇下個餐牌，係喎，雖則對面呢個小妹妹，有時讀書吸收力好似一般，但點解對於食，有佢媽媽遺傳，記性特別好既呢？

科學館玩樂

18 Apr 17 復活節仲未過，媽媽挑戰自己能力，一拖三個去科學館，點知學校假期既科學館要排長龍進場，搞到我地一行四人，企係出面排左半個鐘。熱到呢～～～

雅雯： 姨姨，我地排左好耐囉喎⋯⋯
Claire： 係囉，我企到腳軟呀！

好不容易排到入去買飛，睇下佢三個，等到個個嬲樣上面。 好在佢地都聽話，肯陪媽媽等咁耐。

三個小朋友柴娃娃，去到科學館，乜都笑一餐，平時照哈哈鏡，好平常姐，但三個朋友仔一齊玩，效果變左咁： （按此）。

就連同北極考察人員李樂詩合照，Claire 都一臉傻笑。

睇住佢地咁開心，媽媽都覺得值既，原來同朋友仔一齊黎，開心程度係 x 10 倍。

 不過，唯一遺憾係，中途，Isaac 想去對面既玩具展⋯⋯點知原來文化館係周二係休館。Isaac 唯有同張海報合照⋯⋯因為有佢最愛的恐龍。影完又返番入科學館繼續玩。

科學館四月有新節目，就係四樓開放左MIFFY天地，其中一個CORNER係比130CM以下的小朋友玩，三個小朋友，只得Claire 合資格入去玩咋。趁雅雯爸爸放工趕到，雅雯爸爸就睇住Isaac 同雅雯，媽媽就陪呢個小妹妹去玩工程師。

好認真咁周圍揾木頭放。

又好認真咁鬥快搬石（按此）

不過咁，有無見過著裙既工程師既呢～～～哈哈。

Claire: 咁你有無見過咁靚既工程師吖！

 三個傻豬，係科學館玩到關門，齊齊晚飯再吃甜品，其實都幾攰下，但難得佢地仲咁HYPER。

Claire: 我地都唔攰～～
Isaac: 係呀，我都唔眼瞓。

呢頭食完晚飯，個頭係同一條街揾甜品，岩哂Isaac 胃口⋯⋯所以，佢對眼係無離開過碗糖水。

Isaac: 我睇緊我個碗多定雅雯個碗多吖嘛。
Claire: 嘻嘻⋯⋯我碗龍眼冰好正架。

假日農莊玩樂

17 Apr 17 復活節長假，除左去旅行，唔少得，梗係約班同學仔去玩。呢次我地拉大隊，BOOK埋車，去假日農場玩。呢個地點，算係我地第二次去了，上一次應該係三年前，Isaac 仲讀緊幼稚園時，學校旅行既景點。當日仲落住雨，鬼咁掃興。反而呢日我地自己組團去，就熱到爆燈。

我地太早去到了，十點未到就落車，乜都未開比人玩，大家唯有係入口處HEA 下盪下千秋咁啦。

好明顯真係無乜好做，兩個大人夾埋小朋友一齊黎騷擾 Isaac 玩千秋都有既。

Isaac: 所以我都係玩呢個，唔駛比人搞。

Isaac: 妹妹，坐穩未呀？
Claire: 坐好啦，我影緊相呀。

坐下坐下，越坐越多人。前前後後都有人坐，真係好熱鬧呀。

玩玩下，Claire 忽然自己走黎坐小型搖板。

不過，唔駛三分鐘，又係坐滿同學仔了。人滿之患呀！

媽媽見佢地坐得咁開心，又坐下啦⋯⋯嘩，點解同爸爸坐左落去，塊板唔曉郁架，仲話左搖右擺⋯⋯我地重量原來令塊板CLICK實左地下郁唔到，笑死我地了。

呢次旅行，全部都係妹妹同學仔，難怪 Isaac 有點悶，一個人走去自己玩下吊空千秋。

哦⋯⋯原來咁矮架咋⋯⋯唔怪得 Isaac 肯凌空玩啦。

成日都話兩兄妹，係兩種性格，點解，睇下佢兩個點對付個沙包咪知囉。

Claire: 我唏～～

Isaac： 乜咁重架⋯⋯好難推郁喎。

就係咁，我地係入口處HEA左接近一小時之後，先開始去爭排玩開放左的遊戲。首先玩既，係挑戰心理障礙既超高搖搖板。不過睇 Claire 表情，好明顯一D都唔驚（按此）。

Claire: 嘩，其實我真係好驚架～（當Claire 睇住媽媽打呢張相的台詞時，Claire 叫媽媽要打⋯⋯我個時好驚呀⋯⋯你寫我好驚吖。）

岩岩先接受完畏高挑戰，跟住仲要用力氣拉自己上山坡。睇見佢兩兄妹，真係好好笑，完全係兩種不同風格黎。先黎 Isaac, 按此睇下佢幾咁努力扯自己上山。好辛苦咁呀。

咦，妹妹Claire 好似爬得好輕鬆咁既！

原來，另一角度，係有人扶助的。

呢個小妹妹，跌低都跌得咁HAPPY。

Claire: 嘩哈哈，好難爬呀⋯⋯D 碌係咁跣返我落去既！

正所謂，失敗乃成功之母。經過一兩次爬坡之後，Claire 叻左好多了。按此睇下，咪知佢有幾純熟。

假日農莊除左呢D外，仲有個好好玩既千秋。呢個玩意，係兩兄妹幾年前都玩過架。呢次只係再玩多次，不過小膽的 Isaac 開頭話唔玩⋯⋯排排下，見妹妹玩，無伴之下，被迫頂硬上。睇下Claire 玩得有幾咁開心先（按此），至於 Isaac, 個樣都幾緊張架。難為佢對腳差不多到地，都咁怯（按此）。

玩飽一輪後，我地係炎熱之下，冒住太陽既威力食午餐。唔好睇少四月，呢日真係熱到爆。

幸好，大家都有點餓，都食得落少少野。

食都未食飽，就齊齊落左去玩掟波。

Claire: 嘩～～～唔好掟到我呀⋯⋯好驚呀⋯⋯等我遮住個頭先。

Claire: 唏，你掟我⋯⋯我掟返你呀～～～

開心到連哥哥都忍唔住要加入戰團。

玩完掟波，我地又上返山坡仔，睇下有乜玩先⋯⋯咦，滑梯咁奇怪既⋯⋯

最奇怪唔係要兩腳分開用腦筋去諗點樣溜落黎，而係要先挑戰勇氣，爬上樹，先可以滑。

點滑？

原來有兩條繩比你自己諗方法SIR落黎架。

之後，我地仲用左五蚊雞買草餵山羊TIM。Isaac 好難得肯企到咁埋餵架。

Claire: 我最唔怕餵動物呀⋯⋯食吖，食多D呀。

順帶一提，假日農莊真係好值得去，不過真係唔駛咁早去到，一早去到諗住玩耐D⋯⋯其實D遊戲設施都未有工作人員，係唔玩得。

最後，呢個波波池，雖然另外付費，但兩兄妹都玩得超開心呀⋯⋯可惜錄唔到，但睇既過程，都感受到呢個設施既刺激。

唔好睇佢縮埋好驚，咁多個遊戲設施，應該得呢個係 Isaac 狂呼好玩，要玩多次既環節黎。

玩完之後，齊齊上車大覺瞓。呢度幾僻，路又窄，建議還是租小型旅遊巴去。