幼稚園同學的打風過後GATHERING

23 July 17 本黎呢日係約左Claire 幼稚園同學出黎玩，點知撞正打風。活動告取，傍晚落左風球，呢枱家長不甘寂寞，死都要出黎食返個晚餐先甘心。

點解打風都要出黎，就係為左同班主任一齊食飯，見下班主任囉。但每次Claire 望到班主任，佢個樣就會變得好正經好緊張。

笑得咁燦爛咪幾好，咁先似Claire 架嘛。

Claire： 但張老師一掂我，我又會變得好緊張呀～～～

張老師： 咁咪無咁緊張囉～～～

無論點玩都好，老師既磁場就好似觸電咁，每次挨近，Claire 就控制唔到自己變得好緊張，塊面都緊哂。所以班主任成日話佢好搞笑，一驚個樣就係木無表情。

暑假閒日無聊攝

22 July 17 放暑假，媽媽有時會帶兩兄妹出去食下佢地鐘意既早餐。好似呢日咁，雖然天氣好熱，但無損Claire 好想食粥做早餐既意欲。估唔到，鐘意食粥⋯⋯居然成碗KO哂。勁呀！

食完早餐唔駛學暑期班，為左消磨成日流流長，媽媽就同呢位小妹妹玩下數字棋。

真係估佢唔到，年紀少少，已經曉得一個人玩哂成鋪，有時仲可以贏到哥哥TIM。好厲害呀！

玩完棋無乜野做，媽媽就帶佢地出巿中心圖書館嘆下冷氣，睇下書。路經商場既擺件，有個女孩子又女孩氣發作，主動要求同公仔合照。

Claire 好貼心，知道哥哥未影過呢個佈景，特登拉哥哥黎呢度影合照。年紀少少的Claire，越來越喜歡哥哥呀！希望佢地大個繼續相親相愛吧。

與友共宿 day 2 ＠麥理浩夫人渡假村。西貢Camden Town

19 July 17 開心既時間過得特別快，玩完成晚，呢朝瞓醒，食過早餐，好快又話要走LU。臨走，真係要揾D野玩下⋯⋯

原來大家最唔捨得係離開呢部好舊式既遊戲機⋯⋯好明顯呢班小朋友係屋企都無得玩。

爸爸趁機也玩一番。

媽媽明明唔識玩，但見朋友仔唔識控制，都要硬著頭皮一齊去摸索下。

我地大約十一點就離開營舍。有個麻麻地既地方，就係營舍離巿區真係有點距離，強烈建議預約佢既穿梭巴士⋯⋯否則，好似我地咁，諗住一早去排小巴啦，點知等左好耐⋯⋯都未輪到我地上小巴。又熱又悶喔～～～～

出左營舍，反正係西貢落腳，媽媽就揾左西貢好出名既FISH ＆ CHIPS食個LUNCH。

可能平日關係，間餐廳無乜人，Isaac 仲可以拎餐廳既玩具黎玩TIM。

這裡唯一好，就係可以好CASUAL咁玩下輕鬆下。

因為唔知食乜好，媽媽求其點了兩個漢堡包⋯⋯不過無食到，因為比左兩位男士食。爸爸話唔好食喎～～～不過價錢好貴喔～～～

Claire 一見到就雙眼發光的香口食物。炸魚真係好好好滑～～～～～不過成碟咁食，我地真係好少可囉。

爸爸點比兩位小朋友食既燒魷魚。媽媽也是沒有吃過，不知味道如何。不過，食完之後，我地對呢間高評價的餐廳反應麻麻～～～可能，我地都唔係鐘意食FISH ＆ CHIPS同BURGERS既人掛～～下次黎西貢，唔會再食囉。

與友共宿＠麥理浩夫人渡假村

18 July 17 呢日約左 Isaac 幼稚園同學仔去CAMP。臨出發先知 Casey 病左，所以呢次得 Isaac 一個男孩子，好在我地一家人一齊去，當陪佢玩姐。去宿營，對我地黎講唔係陌生事，因為以往媽媽都會入紙申請，一家四口去玩返兩晚。呢次既分別，就係有幾個同學仔一齊去玩。今次地點係西貢麥理浩夫人渡假村，勝在有獨立家庭屋，唔駛同人共用廁所。我地遲入紙，只能住山頂六號屋。

感覺上，裡面都好乾淨喔～～～至少比大棠乾淨得多。

爸爸在營地發現的野生蛇⋯⋯好像準備發動攻勢～～

爸爸遊盪之際，媽媽就帶著兩兄妹同其它同學仔一齊去整膠匙扣。

只見大家對成品都好滿意喔～～～而媽媽的成品呢？是沒有的，當日只是在拍照和陪伴。都夠滿足了。

之後，大家一行人滿心歡喜地往箭場去，打算去體驗一下射箭樂，點不知，原來最低年齡是八歲，即係好多人都玩唔到喔～～～～～所以，媽媽睇左 Isaac 射左一次後，就帶妹妹玩其它野，睇下 Isaac 射成點先（按此）。

後來收到爸爸發來的一張照。原來爸爸差點射中核心了，好勁呀～～

那邊廂，媽媽睇住一班小妹妹在冷氣房內嬉戲。

 果然女孩子都係玩呢D～～～

媽媽而家先知，原來Claire 係有縮骨功的。哈哈！

Claire: 咁你唔好再睇少我～～

這兩位夠八歲的小孩子，玩完戶外箭場，又去玩室內既空氣箭⋯⋯其實唔知係乜黎既呢！ 

這三位，幼稚園玩到而家，唔知幾多年之後，仲可以保存到呢份友誼呢！

大家各有各玩，直到晚飯後，先可以GROUP埋一齊落球場玩下羽毛波⋯⋯

那邊廂，爸爸又娛樂最細既兩位小妹妹⋯⋯真係替他擔心⋯⋯條腰骨。都一把年紀了，仲咁玩～～～

雖然呢日天氣唔好⋯⋯但我地係營裡，完全無落雨，直到晚飯後，先開始倒水咁⋯⋯好在，有個羽毛球場比我地避雨。好開心的一天，返房瞓醒又繼續玩囉～～～暑假，呢個先係暑假嘛！

布景板留念

16 July17 暑假正式開始，同呢個寶貝女出街時，咁岩見到商場擺左BOOTH推廣韓國旅行，唔知係咪好少見呢D公仔板，定係暑假太悠閒的關係，有個小妹妹居然話要影相留念喎⋯⋯

Claire: 好似好多野食吖嘛，影張相比爸爸睇，比佢估下食唔食得。

拎住杯凍飲去汗幕蒸，又同D板公仔幾襯喎，如果包埋個頭就更似！

Claire: Yeah~~~ 我地出發去SHOPPING囉。我最鐘意洗錢～～

睇返呢幾張相，都唔明有乜咁靚⋯⋯最可愛最吸睛，還是這個寶貝女，呵呵。

再見K3

14 July 17  三年幼稚園生活終於結朿了。呢日係傳聞中好感動既畢業聚餐，哥哥當年因為颱風關係，延期改為幼稚園舉行，地方狹小，家長不能出席。呢年，好在無打風，媽媽總算可以第一次參與幼稚園既畢業聚餐。

畢業聚餐開始之先，我地一班K3 家長好齊心咁呢埋一邊為小朋友製造呢兩張咭，送比兩位班主任。媽媽好開心，可以認識到一班咁齊心的家長，可以齊心合力造紀念品給老師。

同哥哥當年一樣，各畢業生會自繪畢業樣子，張貼在入口處。

 媽媽問，點解你個公仔係啡色頭髮既⋯⋯妹妹答，因為老師話我D頭髮係啡色囉。哦，原來係頭髮薄，所以無人地咁烏黑姐⋯⋯

其實，係咪傳聞中咁感動⋯⋯喊濕幾包紙巾呢⋯⋯（按此便知）

未夠感動？？再睇下呢班K3 同學仔，好好演繹畢業歌（按此）⋯⋯媽媽係第二次聽佢地唱呢首歌，好明顯的分別，就係呢次大家都成熟左，動作齊左，終於大家都大個仔大個女了，可以升小學囉！

表演後，當然要捉住Claire 最掛念的幼稚園同學仔影個合照啦！

還有好錫Claire 的班主任張老師。

教曉Claire 講故事既資深楊老師。媽媽都要好好向楊老師學習講故事技巧呀！

小學會再見的晉廷同學。

Claire: 喂，你唔好咁熱情好喎⋯⋯

一班小朋友，難得可以咁天真開懷地笑，唔知小學後會點呢？

晉廷： 小學後？我同頌恩繼續日日見囉。
Claire: 哈哈，你唔好唧我條頸啦！

畢業聚餐⋯⋯原來全場都無開餐無飲品，唔明點解叫聚餐。ANYWAY，成個活動完結後，少不得梗係同班半日班黎張合照啦。下次再見，唔會再咁人齊了。

K3 最後一天，當然要玩盡佢。完左活動拉大隊一齊去V CITY玩餐飽，玩完仲可以一齊食飯。

唔知承㪫同Claire 講乜呢～～～

可以令到Claire 事後陰陰咀笑～～

 這班玩左三年既小朋友，見到佢地咁開心溝通，媽媽都好開心喔！