第一次賣旗

28 Aug 13 一早同 Isaac 報名呢日參加東華三院賣旗日， 唔係為左攞乜証書， 而係想 Isaac 親身體驗一下， 賣旗既滋味。媽媽以前中學至開始賣旗架咋， 而家小朋友真係進步左好多。

未出發時， 媽媽打定輸數， 心諗以 Isaac 慢熱性格， 應該都係媽媽開口叫人賣架啦。咦， 殊不知， 一出校門， Isaac 已經好積極好主動咁叫門口個婆婆賣旗。嘩， 媽媽真係喜出望外， Isaac 果然大個仔左了。原來有時D野， 真係估佢唔到。

未出發前， 先係門口影張相留念先

同同學仔一齊賣旗。不過我地都好認真架， 一開始賣旗就各自各分開哂。

不過夏天賣旗真係好辛苦呀～～～～不過Isaac 係好開心就真。呢個體驗， 比佢知道自己大個仔左， 又醒目左(唔駛媽媽開口叫人買旗喎， 好叻架啦）。同埋又知爸爸好SUPPORT佢， 係屯門做完野都走黎幫襯自己愛兒買一支旗。

餅印兩兄妹

19 Aug 13 Isaac 仲放緊假， 不過， 佢對妹妹愛錫有加， 妹妹未開學前， 成日話要送妹妹返學。仲不斷提妹妹， 返學唔可以摵人架， 會比老師鬧架。真係生性。

Isaac: 妹， 影張合照先啦

 嘩， 乜兩兄妹真係似樣得連面形都咁似。

妹妹：哥哥， 點解我地咁似既            哥哥：梗係啦， 我地兩兄妹黎架嘛

我又講電話

15 Aug 13 繼妹妹手執電話同爸爸談情後， Isaac 都唔輸蝕架。曾幾何時， Isaac 一諗起爸爸， 就打電話比爸爸問佢係邊之餘此類。不過， 爸爸話， 一日唔可以打多過十次～～～自此之後， Isaac 一次都唔夠膽打比爸爸。次次都要媽媽主動提佢， 仲要撥埋號比Isaac ， Isaac 至肯講， 可能怕比爸爸鬧掛。哇哈哈。其實骨子裡， Isaac 都係一個聽教的孩子黎既。希望佢長大後， 能夠做個好人啦。

Isaac: 爸爸， 你返黎未呀？

Isaac: 呀， 你返緊黎啦， 好哇～～～～

每日Isaac 都好期待爸爸會早返黎同佢一齊食晚飯架。不過爸爸咁忙， 其實呢個心願都好少會實現， 嘻嘻。

小女人？？？？

又要倒數返暑假時發生既事（無計， YAHOO BLOG 比人停左咁耐）。

話說呢日Claire 收到爸爸電話， 好快咁拎黎聽。唔止咁，仲拿拿臨爬上枱揭書。嘩， 睇佢副樣， 幾咁純熟。好似人地女人邊煲粥邊睇雜誌個D咁。

唔通Claire 係一名經典長氣女人？？？仲要佢真係逐頁揭， 邊揭邊講， 有模有樣架。究竟佢學邊個呢？

Claire: 爸爸， 你估我做緊乜？

Claire: HMM， 咁你又做緊乜呀？

Claire: 你返唔返黎陪我食飯呀？

我要開始煮飯呀

準備升K2的 Isaac， 有一晚忽然好認真咁同媽媽講： 媽媽， 我大個仔了， 我要開始煮飯架啦。咁你同工人姐姐咪舒服D 囉。

嘩， 媽媽聽到， 心花怒放。乜 Isaac 忽然咁生性呀（其實佢大多數都生性既）。好， 既然主動投案， 媽媽梗係諗有乜可以比佢整啦。於是乎， 翌晚呢餐， 係由 Isaac 小師傅親自操刀架（當然有媽媽在旁協助）。有三味餸，分別係蜜糖雞膇／蒸旦／同埋焗薯蓉。仲有仲有， 仲有煲爸爸鐘意食既喳咋。

似乎除左洗碗， Isaac 係廚房開始涉足於煮食喎。唔知幾時可以自己一人操刀， 煮餐比媽媽食呢？

做左廣告代言人？

嘩， 呢日暑假， 忽然收到 Isaac 同學仔MSG， 話係小巴見到 Isaac 呀。嘩嘩嘩， 好大個 Isaac 周街走。可惜到目前為止， 媽媽都無緣見到呢幅廣告。不過收到個時， 其實都唔係咁接受到做左學校宣傳圖架。但又無計， 無理由申請話唔參加呢種宣傳， 咁仲令學校更加唔方便。唯有接受現實。

講開又講， Isaac 隔離帶帽個位女同學， 係 Isaac 鐘意既女仔黎架， 哇卡卡， 不過兩年之後， 呢位女同學會入間出名既屯門小學， 因為佢家姐讀緊嘛。至於 Isaac 入唔入到， 真係睇彩數。希望到時大抽奬抽到啦。

Day 3 返學， 媽媽係邊吖

不經不覺又到第三天上課天，一如以往， 無得陪課。不過， 又係放學前可以比家長裝五分鐘咁大把。呢日所見， Claire 醒左， 識得揾媽媽不特止， 仲曉得跟好多動作喎。

坐正窗口的Claire 好專心咁睇住老師唱GOODBYE歌。

跟住仲做埋動作TIM

不過好似坐到有點呆。

咁望， 好似Claire 係全班最細粒個位， 所以， Claire 係屋企成日同媽媽講， 係學校同哥哥姐姐玩， 嘻嘻， 其實係同學仔， 邊係哥哥姐姐吖。

好， 去片， 第一條影得好差下， 係見到Claire 係窗邊跟下動作咁。第二條， 就係醒目女發現有好多家長人頭係窗隙， 所以搏哂老命咁望下阿媽係邊。

第一條

第二條， 媽媽係邊吖～～～

球形黑森林旦糕

話說呢日係爸爸牛一， 諗唔到整乜旦糕， 阿仔話要食朱古力， 咁不如試下整黑森林旦糕啦。但又唔想咁悶， 一個普通樣， 所以， 就自己膽粗粗用個大小小既面碗， 砌左個球形旦糕出黎。

用個碗做旦糕，因為甩模怕整散， 所以， 我事先鋪左塊大既保鮮紙入碗。咁反轉甩旦糕時， 可以輕輕扯張保鮮紙去甩模。唔怕個球形旦糕會散。

其實呢個球形旦糕換湯不換藥。個做法係跟之前做既魔鬼旦糕一樣. 不過， 今次做左個雪芳旦糕就批左上下三層。然後， 用其中一層界開三角形， 鋪落碗底（大概四塊左右）， 好似砌PUZZLE咁， 唔好砌得太細， 成個碗貼住咁鋪密就得， 中間隙位可能要再界不規則形攝入去架。

鋪哂底， 我就用CREAM放上， 跟住再加D士多啤梨， 再加批左出黎既第二層旦糕（之前雪芳旦糕批左三層出黎， 而家應該剩返兩層未用）如是者鋪到個碗滿爆為止。不過每次加旦糕體落碗時， 一定要用力壓一壓實佢。唔係一陣反轉個碗， D旦糕同CREAM痴唔實， 瀉哂就搞笑。

倒轉左個碗後， 小心甩模， 跟手好隨意咁抺CREAM上去。今次個CREAM 同之前整魔鬼旦糕一樣打法， 不過今次打六成左右。發覺好稀的CREAM， 抺上去仲易， 同埋可以抺平。不過人懶， 反正呢個球都會曬野上去裝飾， 所以， 我就係咁易抺哂CREAM上去就算。

加左朱古力針既球形旦糕出左黎。遮住哂求其抺的CREAM。哈哈。

切開無散架。不過士多啤梨好似唔夠多。但真材實料， 無浸糖水。健康D。個底其實仲有脆脆架。係鋪滿哂個碗， 最後加塊脆脆上去再壓實。真係下下心驚膽跳。

脆脆做法， 係之前個魔鬼旦糕食譜有寫架啦。

做過呢個球形旦糕後， 好似有少少領略到做3D旦糕既秘訣。等我有時間又試下玩下先

回顧未返學前的興奮

8 Aug 13 又要數返成個月前發生既野。呢日， 八月八號， 媽媽去左Claire 學校開家長會順便拎書包校服返屋企。妹妹見到， 第一時間要執紙巾入書包。好搞笑， 呢個其實係Claire 習慣黎架， 平時出街， 無人教佢， 都會自己拎包紙巾放入袋。真係天生女仔。

Claire: 我要放紙巾入去， 做個淑女

之後， 仲要揹書包TIM不過個書包會唔會大左少少呢？

哥哥一向對妹妹愛錫有加，千叮萬囑叫妹妹返學啦， 唔好再立亂摵同學仔架（因為係屋企成日摵阿哥），媽媽在旁聽到， 真係好窩心， 好一個生性的哥哥呀。

Claire: 我笑～～～～但點解我手上無奬架

跟住， 哥哥仲叫妹妹扮拎奬

哥哥：唔緊要啦， 我地照笑啦， 上台拎奬要笑架

 話係同Claire 一齊拎學業奬喎。如果大個左， 兩個都咁生性讀書， 媽媽就老懷安慰了。

第二天上學去

嘩， 呢篇要數返一個月前發生既事， 媽媽實在忘記左了。無計， YAHOO要迫遷， 搞左咁耐， 摛晚至可以順利遷黎呢度。希望呢度可以留守至仔女大個， 比佢地自己回味返兒時既日子啦。

好， 一個月前既第二天返學日， Claire 依然係好開心既。媽媽依然無得入去， 不過臨放學個五分鐘， 可以係窗口裝下。呢日無一舊木了， 識得做少少動作架。

有埋VIDEO， 不過唔係好聽到老師唱乜歌。但第12秒開始， 睇到Claire 腳仔跟住會郁。比起第一天， 有進步了。DAY 2 返學的VIDEO可按此

放左學， 幾咁得戚坐係巴士，返左學， 果然大個女左， 一點都唔似兩歲小朋友了。