名古屋之旅 DAY 2 － 二見夫婦岩

23 Mar 15 上完山又下海。離開橫山展望台，我地出發去鳥羽會路經二見夫婦岩。所以順便又去到此一遊。嘩，一落車，凍到呢～～～好似得三四度咁。簡直無心逗留。

不過有個唔識凍既細路，一支箭咁標左出海了。果然有得玩，乜都會唔記得。

Isaac: 喂，快D啦，過黎睇下D海浪～～～好得意架。

 究竟有幾凍？凍到平時唔怕凍既爸爸，都要笠埋頂帽，就知我地一家都賴哂野。著唔夠衫頂硬上衝出海灘啦。

呢舊就係聞名既二見夫婦岩。其實佢最聞名係可以透過夫婦岩睇日出，影相一流。咁我地一家大細，梗係唔會咁辛苦半夜起身去睇日出啦。所以呢個MOMENT，夫婦岩唔及呢個水平線既海灘咁吸引。

有個傻佬唔怕比海浪捲走，堅持等大浪撲埋黎要影張相。大風到呢，件外套帽都飛起。

咁冰冷既天氣，呢個太陽顯得好温暖。忽然好愛太陽伯伯喔。

天寒地凍，黎到DOU一DOU圈就要走。兩個小朋友見到有河馬瞓地，一時忘記變雪條，都要走去踩下河馬。

二見夫婦岩對出，原來係有酒店架。仲要對正呢個無敵大海。真係好正。不過太凍。急急腳返上車，無再影酒店外觀了。

好，係時候出發去花真珠。

名古屋之旅 DAY 2 － 橫山展望台

23 Mar 15 離開神宮後，我地驅車往鳥羽方向。因為是晚寄宿係鳥羽温泉酒店。由伊勢去鳥羽要要半個鐘車程。路經橫山展望台，梗係要上去睇一睇個鳥羽海灣有幾咁靚啦。沿途，見到好多櫻花呀。

雖然三月底都可以睇到櫻花，不過我地經驗話比我地知，我地對植物觀賞係無緣，所以，呢次旅程無特登去睇。可能反而咁，就撞岩成行櫻花掛。

渣車去橫山展望台，無GPS CODE，只可以輸入遊客中心個電話。好在～～～原來有車呢，係唔駛停車係遊客中心出面架。我地渣住架車越過左遊客中心，直上山～～～呢下，真係慶幸自己係渣車黎，唔係真係行到隻野咁。

第一個展望台，見到少少海同島仔啦。

媽媽做足功課，知道展望台不止一個。還可以繼續拾級而上。正當爸爸打道上車時，媽媽就話再上去睇。上到去，ZOOM 近D，連海女島搭既捉珍珠既棚都見到。

一家人凍到好似去左外國咁。

Claire: 我凍到無眼睇啦～～～就黎變雪條。

去到見晴展望台，天氣晴朗，見到好遠好遠好遠既山～～～

本黎我地見仲有最後一個展望台，不過估計可能要行成廿幾分鐘至到。我地實在凍到不得了。妹妹已經變左冰條，要用爸爸外套保暖。所以，爸爸堅持唔再去睇最後一個展望台。唔知個個展望台，風景係咪最靚呢？不過呢種食西北風天氣，真係無乜心情再ENJOY個景。哈哈哈。

Claire: 快D走啦～～～好凍呀～～

名古屋之旅DAY 2 － 伊勢神宮おかげ横丁

23 Mar 15 循例行完神宮後，我地快速直闖 おかげ横丁，其實妹妹一早已經喊肚餓，要買野食（鬼咩，行入神宮之前路經咁多食店。餵食貓妹妹梗係心掛掛D野食啦）。

係神宮門口，已經有呢間出名既赤福名物。不過唔可以做手信，所以只係買左一盒黎食。

外形好似好靚既紅豆蓉。但食落真係唔係我杯茶。不過兩兄妹就搶食得好滋味。

行下行下，又路見鮑魚燒。伊勢出名食龍蝦同鮑魚。咁梗係試下路邊燒鮑魚啦。

爸爸點左兩客唔同味。不過好唔好食？我地都唔知。

因為呢兩串咁貴既鮑魚，去左呢兩兄妹既肚度囉。兩兄妹仲要老實不客氣搶住要，我地一啖都無食到呀，嗚嗚～～～

Claire: 唔⋯⋯好難食呀，媽咪，你唔好食啦，我幫你食埋佢啦。

 呢條橫丁，其實好多人～～～近神宮出入口個度係好多人。睇下好似成條街都係人頭湧湧。

咁多食店，最多日本人幫襯可能係呢間燒魚店。多人幫襯佢試食，哈哈。不過味道不是我們杯茶。

伊勢好似豆腐都好味。一於買杯小朋友裝細細杯黎試下。

明明係自己想食，點知買既時候，又有兩個小朋友忽然出現嘈住要食。卒之都係一人一支⋯⋯媽媽又無份，嗚嗚～～

係橫丁街上，見到呢間誠實屋好似好多人幫襯咁。就膽粗粗試下兩串牛啦。其中一串係松阪牛串。

已經忘記邊串係松阪牛。只記得爸爸講，要近一百蚊港紙一串。所以，今勻，經過咁多次比兩隻豆釘搶食，爸爸話呢串牛係一定要比媽咪食⋯⋯之但係，最後又係一人一啖。哈哈哈，原來帶住兩個餵食豬，後果係咁架。

Claire: 食完牛，又搶下爸爸串燒帶子先～～～好味道。

行下行下，見到有間鈴木水產。見價錢唔係貴，又唔少人幫襯，一於又試下。原來呢間鈴木，係橫丁街尾都有一間。不過個間就少好多人，但變相有好多海鮮放地下比食客選購。

自助式購票，有埋圖。好方便。

超鮮味既貝類刺身。今勻生野，兩個細路無得食，卒之可以食返餐好。

鮮甜海膽。廿幾蚊港紙，抵到爛。

彈牙既鮑魚刺身呀～～～好味道。香港好少食得到。就算有，都好貴。所以黎到點都要食返餐飽。

Isaac：嘻嘻，我有得睇無得食。我只係食最側邊個碗伊勢烏冬咋⋯⋯仲要好淋好咸唔好味。

 計埋摛日，我地試過兩間伊勢烏冬，的確唔係我地食開既手打烏冬。伊勢烏冬又淋又咸，真係好難食呀～～

食飽飽，我地沿住條街行下，忽然見到間銀行。好古色古香咁。

其實行到橫丁街尾，已經無乜路人。原來遊客都只係集中哂係神宮出入口個邊架咋。

係咁倚行完條橫丁，我地就出發趕去第二個景點了。呢條おかげ横丁，的確值得一黎⋯⋯食下海鮮都好。其實之前揾到間食松阪牛都好正，可惜去到，無地圖又無WI-FI情況下，我地放棄左。幸好間水產店都唔差。叫做不枉此行啦。

名古屋之旅DAY 2 －伊勢神宮

23 Mar 15 係車上快手快腳食完早餐後，我地出車去神宮，未入神宮前，路經名點おかげ横丁，順便影張相留念。其實要入宮，都會路經おかげ横丁，所以唔難揾。不過呢度手信店食物店好多，好易迷路之餘，仲要遊到超哂時。真係要小心小心。

係路上，見到風光幾好，其實路上仲落雨，不過行下行下，好似天空又放晴。係橋邊影返張相先。不過呢條係咪傳說中既宇治橋，真係不得而知了。因為我地其實無地圖架，哈哈哈，又無租旦，無得上網，真係乜都唔知咁就去左。

明明出發前，天氣預告話名古屋最低至係13度左右。但點解我地一家四口都堅凍架⋯⋯究竟幾度架⋯⋯睇下我地個個變糉就知。連唔怕凍既爸爸，都拉上拉錬保暖，嗚嗚～～～

行下行下，終於行到宮門LU。仔仔凍到要搶媽媽條頸巾保暖。不過難得去旅行，我地都唔理咁多，玩左先。

當地人入宮前，會先用神水洗乾淨手仔。

哥哥有樣學樣。

妹妹更加不在話下，又玩下先。

五十鈴川御手洗場。睇人地BLOG好似好靚咁。不過可能我地唔識影相，加上無太陽。其實變左普通河一條。哈哈哈。

其實都唔少人落去影相架。我地梗係要留返腳毛啦。

Isaac: 不過唔好推左我落去喎，實凍死我都似～～～

行下行下，行到神廟。入到去唔淮影相。見好多日本人好凝重咁行入去。我地都係尊重下人，就咁係門口影張相算。

呢日伊勢神宮一遊，其實重點不在宮內。所以，叫做係咁二到此一遊就算。然後重點出擊，出去おかげ横丁掃街也～～～

下一篇： おかげ横丁

名古屋之旅DAY 2 － 冷清伊勢巿揾食

23 Mar 15 話說之前個晚我地漏夜抵達伊勢巿入住。當時觀察，媽媽都話好似無地方食早餐。不過爸爸性格，硬係要坐低餐廳有個SET至叫做係早餐。所以，九點鐘，我地就遊街⋯⋯嘩，九點鐘都幾咁冷清呀條街。又凍又餓⋯⋯真係凍得我騰騰震呀～～

全條街，因為伊勢神宮係巿內景點，所以唯一似樣既，係伊勢巿駅。終於似返個人氣景點。

究竟有幾凍⋯⋯睇下兩兄妹咪知囉。

Claire: 媽咪，好肚餓呀，又凍又餓⋯⋯無野食。

終於，爸爸帶住我地圍住呢個伊勢行左一圈，大家吹住北風，都係揾唔到食。最後好似媽媽一開始咁建議，入去便利店求其執個包上車食咪算⋯⋯一開始係咁，咪好囉，哇卡卡。