名古屋之旅DAY 1 －伊勢晚飯

22 Mar 15 話說之前爸爸成日話同媽媽去多次二人世界旅行。左思右想，最後的起心肝訂機票去名古屋。點知工人突然辭職，最後爸媽既二人世界，變成四人行。

因為我地係買HK EXPRESS，貪佢夠平。所以就要接受平機票既午機。去到名古屋，都四點幾五點。跟住我地之後幾日行程都係落三重縣。所以，一落機，即拎車直驅三重縣既門口 －－ 伊勢。貪翌日可以晨早去伊勢神宮，慳返成個鐘車程，之後又可以直入鳥羽。

嘩，話說之前BOOK伊勢酒店，發覺無乜選擇，之前仲以為係自己差唔多出發至黎BOOK，所以FULL BOOKING啦。原來，伊勢真係好鬼細架咋。我地去到酒店CHECK IN埋，落街都唔夠八點。睇下，呢條街～～～～已經係主街黎架啦。係咪好驚呢！大街人影都無隻。仲要無乜餐廳，真係捉哂蟲。

成條街好明顯反映出鄉下既特色  －－ 人口少。係無餐廳選擇之下，我地只好食一間好似好貴既日本野。入到去，梗係要叫碟燒玉子比愛兒。咁大碟，如果係自己，真係食呢碟都飽哂。

去到伊勢，梗係要試埋伊勢名物  －－烏冬。不過又淋又粗，無D口感。都係手打烏冬好食好多。

Claire: 唔好理啦，又夜又餓，乜都照食左先啦。 

Claire: 嘩，我識用大人筷子食面呀，哈哈哈，我要繼續努力～～～夾呀夾

 同場，仲有爸爸點既魚生飯，好似好正咁呀。

每次去日本，都必叫既刺身。真係好新鮮有咬口。

呢個係魚生茶漬飯，最搞笑係面個塊大紫菜。不過最後比兩兄妹分屍左。

拎起左塊大紫菜，仲有仔仔最愛既温泉旦。

三重縣，最出名係龍蝦刺身同鮑魚刺身。呢晚第一餐，爸爸話唔試刺身住，不過平平地，試左隻鮑魚燒。媽媽就覺得OK，彈牙鮮味。爸爸就覺得麻麻喎。

就係咁，我地名古屋之旅第一晚又第一餐，就咁求其解決左（無選擇之下叫求其啦）。多謝五百幾港元。爸爸就話好抵，因為叫做有刺身，有鮑魚又有魚生飯。

食飽又要回歸個間細到爆既酒店呀。再有下次，爸爸話唔好再BOOK呢D細酒店。真係細到喊⋯⋯不過都唔夠當年係大阪個間咁豆腐細。