濕地放電小記

20 May 16 呢日Claire 學校假期，雖然大雨，不過無損媽媽帶佢出去玩既意欲。雖然約左同學仔，但同學仔臨時話大雨唔黎濕地（但之後又自己出左去迪士尼喎，真奇怪）媽媽唯有獨自帶佢去濕地放下電。濕地都去得多，兒童餐都食唔少⋯⋯吖，呢日唔知做乜，Claire 居然清哂成個兒童餐。好勁呀。開心死媽咪了。

Claire: 媽咪，我大個囡架啦。你記住話比爸爸聽，我食哂成個兒童餐吖⋯⋯

通常我地去濕地，主要都係留係室內個遊戲室玩幾個鐘。對佢地黎講，夠有突，真係攰到暈呀。所以，每次回程坐車，呢個妹仔，實昏睡過去。 出面倒水咁大雨，我地著哂水鞋雨衣準備離開⋯⋯咁岩比Claire 見到部攝影機係門口，話要影張合照喎。好啦，媽媽拎住咁多野，都陪你影一張啦。

Claire: 我愛媽媽～～～

開心兒童餐。大膽嘗試

19 May 16 呢日，媽媽帶Claire 首次造訪學校附近既餐廳食兒童餐。Claire 好開心，好興奮。仲好奇怪點解一間餐廳明明賣什物，但點解裡邊又有得食野呢⋯⋯仲有，點解又有玩具拎呢？一連串問題，不過問完之後，就專心挑選玩具。

Claire: 嘩⋯⋯好似好靚咁喎。

Claire: 媽咪，點解呢度咁奇怪既呢？究竟係餐廳定商店黎架？

下午，同妹妹去學跳舞，放學路經呢個公園，有個妹仔膽生毛，忽然玩新玩意，仲要堅唔比媽媽扶。真係嚇死媽咪了。（點此觀看）囡呀囡，點解你咁大膽架⋯⋯明明之前未試過咁玩架喎，咁都夠膽咁試。媽媽心血少D都唔得掂。

踩單車入洪水橋

15 May 16 呢日，爸爸興起，居然話齊齊踩單車入洪水橋食糖水。雖然未到炎夏，不過真係幾熱下囉。仲要對剛滿五歲囡囡黎講，由屯門不停咁踩入元朗，真係好大挑戰。爸爸就一於少理，完全不當一回事，一個箭咁不停去，堅話小朋友唔駛抖喎。至慘係⋯⋯滿心期待爸爸所講既洪水橋糖水⋯⋯入到去，居然未開門喎⋯⋯媽媽可以想像小朋友有幾咁失望囉⋯⋯

Claire: 終於到埗啦⋯⋯可以食糖水⋯⋯

Claire: 搞錯呀⋯⋯糖水鋪未開⋯⋯咁我咁辛苦唔停咁踩入黎做乜呀？

Isaac: 好野⋯⋯我未試過踩咁遠架⋯⋯

Claire: 好叻咩⋯⋯我夠未試過啦⋯⋯但我好嬲呀～

卒之，爸爸帶佢地入左超巿買左支飲品，然後，抖都未抖⋯⋯又話直踩返屯門。媽媽真係擔心妹妹體力⋯⋯最後，妹妹暗地裡同媽媽講，其實個日好攰囉。媽媽梗係明啦，小妹妹咋喎⋯⋯又唔坐又唔抖，爸爸真係當佢大鐵人麼？！

翌日，妹妹複述老師對佢踩單車入元朗的反應，笑死媽媽。（按此觀看）

運動日

14 May 16 Claire 約左幾個同學仔齊齊學游水。正式學之前，媽媽叫爸爸帶佢落水熟識水性先。睇幅相，Claire 好似少少緊張喎。

Claire: 好驚呀⋯⋯
爸爸： 唔駛驚啦⋯⋯我扶實你架嘛。

 早上游完水，回家吃個飯沖個身，下午，我地又出車去踩單車。嘩，好充實好運動既一天喔。

呢日踩單車，爸爸教曉Claire 企起身踩。Claire 又真係試喎（按此）呢下企起身踩單車，媽媽都唔夠膽呀。Claire，你果然好叻女。

媽媽的翻版？？

13 May 16 有時望住呢個女，覺得佢真係媽媽既翻版咁。好似呢日咁，之前媽媽去換左堆中式唐餅返黎⋯⋯其實媽媽係唔食呢種中式唐餅。不過見小朋友鐘意食，又有飛，就換啦⋯⋯有個小朋友，梗係當早餐食啦⋯⋯咦⋯⋯點解，點解呢一幕咁熟口熟面既？

Claire: 等我摵哂呢D皮出黎，咁中間個舊就好好味啦，嘻嘻⋯⋯

好似咁，媽媽無做過唔食酥皮吖⋯⋯因為我直情唔會食呢種食品架喎。點解，呢個女既口味，居然會同媽媽咁相似架⋯⋯就連食旦撻，佢都開始識講，我只係食曲奇皮既旦撻。哈，果然係兩母女呀。

呢日下午，我地約左同學仔踩單車去公園玩。睇住呢個背影，真係好開心。人仔細細可以HANDLE到架兩輪單車，真係少D膽量都唔得呀。

點知個公園無乜好玩，玩左兩玩，就各自騎馬仔，連哥哥都做完功課過黎一齊玩。日後，妹妹升上小學後，就好少會再見幼稚園同學仔了。而家係時候留多一點歡樂時光至得呀。

母親節手工

9 May 16 呢日收到畫班老師傳黎既相片。原來係Claire 自製的母親節禮物。

似乎好專心咁摺朵花喎⋯⋯可惜吖，上完畫班，Claire 好似唔係好識運用學過既技巧⋯⋯係屋企都未試過摺多次花花比媽咪呀。

同場加映，青蛙伴荷葉⋯⋯不過，隻青蛙返到家，好快比百厭兩兄妹拆甩哂眼睛出黎玩。真係陰公呀，特登掘甩D眼珠出黎⋯⋯咁做乜要嘥時間去整喎。

橋咀島撈海蔘

8 May 16 呢日，天氣唔太熱⋯⋯我地決定去下橋咀島，比小朋友玩下捉蟹仔。每次去橋咀島，都要係西貢坐呢D街渡去。對於不諳水性既媽媽黎講，每次都心驚膽跳架。

Claire: 嘻嘻，唔駛驚啦，我會保護你架，媽媽。

Isaac: 你都唔識游水，點保護媽咪呀？
Claire: 係喎⋯⋯

 一心黎呢度玩掘蟹，點知⋯⋯居然水漲喎。好無奈呀。

Claire: 下⋯⋯無哂個石灘既⋯⋯

無得掘蟹唔緊要，好在有個沙灘，我地玩住沙灘先啦，Claire 恨左去沙灘好耐架啦。因為呢年，我地都無去過沙灘。

Claire: 係呀，我好鐘意去沙灘玩沙架。

何止Claire, 就連哥哥都好鐘意玩水架。

等呀等，終於等到水退⋯⋯睇下，成條石路出哂黎了。最後，我地都係無上過對面個島仔。因為，有兩個小朋友掛住掘蟹。

呢兩兄妹，好既時候就糖痴豆。

掘蟹工程展開了，媽媽只負責遠觀，哈哈。

Claire: 媽咪，睇下，我幾快掘到一隻蟹。

Claire: 蟹呀蟹，你唔駛驚架，我會放生你架。唔會捉走你架。

第二年黎，今次，哥哥終於夠膽捉蟹了。好叻仔呀。叻過媽媽了。

掘呀掘，原來橋咀島仲有好多螺仔，好多師奶們都去撈一桶桶走。我地無撈走，不過，就見到好長既海蔘呀。

長過石仔都有。

卒之，我地改變目標，改為撈海蔘。

Claire: 點解呢條海蔘咁肥既呢⋯⋯

Claire: 仲長過我把沙灘鏟喎。

 撈左一桶海蔘之後，我地滿載而歸返出西貢，當時都近黃昏了。咁岩碰到有兩位伯伯，好熱情咁放左堆樂器同鼓係海邊，比各小朋友玩。自小愛打鼓既哥哥，梗係要去打返幾下啦。

Claire: 點解哥哥你打鼓咁叻既？
Isaac: 因為我以前係鼓隊黎架囉。

橋咀島，下次再黎，唔知會係幾時了。因為⋯⋯當妹妹升上小學之後，日後生活都不敢想像⋯⋯

首次合唱團表演

7 May 16 呢日，係Claire 首次以合唱團身份出席小學表演。好緊張呀～～～佢。

成班K2 著起呢套表演衫，又有D似香兒喎。果然唔同哂LOOK。

紮起孖辮，成個可愛哂。

完左表演，一人一份小食。愛錫哥哥既Claire，二話不說分左自己的小食比哥哥。哥哥感動到即刻攬住個妹。如果平時係咁愛錫妹妹，就好囉。

Claire: 哎呀，唔好攬咁實啦。

聽聞可愛的Claire，深得半日班男同學歡迎。無計，鬼叫半日班得三個女孩子咁吃香咩。所以，Claire 熟悉的同學仔，都係男同學。因為無得選擇，哈哈。

㪫㪫： 嘻嘻，可以同頌恩合照了。
Claire: 有幾開心姐⋯⋯

Claire: 我終於可以同女仔合照了⋯⋯不過佢兩個都唔係我個班，嘻嘻⋯⋯

其實呢日都幾熱下⋯⋯要著住呢套又短又窄仲要係絨既表演服，真係幾辛苦架。

所以，同老師影完大合照之後，我地就即刻變身，換返套夏天衫鬆動下算。