台中之旅DAY 4 （下）。妖怪村

14 Aug 16 好辛苦係集集逛左一輪（因為要發掘有乜好睇⋯⋯但結果係無野值得再留），我地就CALL小傅司機出發，順路去下軍事公園。小傅知我地未食LUNCH（因為集集真係無野好食，連地道司機都咁講），小傅就車我地去，成個集集最好食既豆花店買豆花食⋯⋯原來，係小販一名。我地唔駛落車，由小傅幫我地搞掂幾碗上車，去到軍事公園開餐，作為我地既LUNCH。

估唔到係我地開餐既時候，公園裡面既蚊都一齊開餐⋯⋯食完之後，Isaac 被咬了幾口，真陰公。

行程裡面，本黎係無軍事公園，不過真係無野好做，見地圖又係牛肉面附近（當然因為牛肉面休店，我地無食到），所以，我地係順路即時話黎呢度的。

入面其實唔係好大，唔係太多軍事用機展示比人影相。真係路過的話先黎朝見先無咁揼心。

成個軍事公園，最值得黎（小朋友覺得）咪就係呢個小CORNER囉。

天氣太熱，唔可以玩太耐，加上大家都好肚餓，要趕路，唯有急急腳上車，出發去妖怪村揾食去。

相比集集、車埕同妖怪村，妖怪村係比較商業化，相對地岩我地行，同埋食囉。終於有啖好食了。

即劈。

Claire: 我餓左好耐啦，好肚餓呀⋯⋯

好快各自醫完個肚，我地就漫行妖怪村。發現妖怪村酒店後方，還努力裝修中呢。

傳說中排長龍既包店。當然，我地無特登去排，唔知係咪堅好味了。

不過，淨睇間包屋既裝潢，都夠引人入勝。

咦⋯⋯點解有塊紙板人係度既⋯⋯

Claire: 媽咪，我黎架⋯⋯

妖怪村的酒店一偶。

這些門，令媽媽想起鬼太郎。

行下行下，我地好似行到好入咁，連荒廢左既酒店舊址都行埋。

Claire: 係囉，行到我腳軟呀⋯⋯
Isaac： 你知就好啦，搞到我玩少左呀！

抬頭一望⋯⋯只見密麻麻的樹喔。究竟我地行左去邊呢？

Claire: 嘩⋯⋯點解呢邊咁荒廢FEEL，但有條七彩大蟲係度架？

行下行下，我地真係响妖怪村磨左好耐⋯⋯終於，行返出妖怪村既商店街個頭，見呢個泡芺幾特別，買幾個黎食下。

Isaac: 好似妖怪呀⋯⋯好搞笑呀。

我地係妖怪村，大概磨左三至四個鐘先走，完全補返日頭係車埕同集集既時間。夜晚返酒店，係酒店附近既阿榮邵族面食晚飯。呢間係上網睇台灣人評價既，好似話幾地道咁。地唔地道我地就唔知，不過，價錢係比我地之前個晚既明湖老餐廳平好多就真。

 呢碟豬腳大碟到食唔哂。

招牌邵族面，感覺麻麻。唔識欣賞。

無記錯呢碟應該係炒蟲⋯⋯

呢日飯後甜品，就係Claire 落去同ZAC玩。真係打攪哂ZAC 媽了，晚晚都有隻馬蹓去跳床去大叫。