台中之旅DAY 5 （上）。薰衣草森林

15 Aug 16 呢日無乜節目，本應直出台中巿，司機小傅建議我地可以出台中之前去一去薰衣草森林，因為小朋友應該係去呢D地方喎。

台中果然係一個好貼近大自然既地方，隨時隨地都見到蜘蛛、蒼蠅外，仲有好多不同品種的昆蟲。

由日月潭坐車，都要成個鐘，先到達薰衣草森林。條路都幾難揾，唔係熟路都應該要花點時間係山區揾小路上山囉。薰衣草森林，名符其名，係大自然既森林一個，亦即係好惹蚊。所以，入口處，有一角偶係叫淨身區，其實，亦即係噴灑薰衣草驅蚊水。

兩兄妹，好開心咁按制，不停咁被噴。

話明薰衣草森林，入口處都刻意種了一排薰衣草。

成個薰衣草森林，滿佈綠色植物。對於我地石屎森林既城巿人黎講，係另一種感受。

都話台中係接近大自然架啦。隨處可見各種昆蟲。

雖然我地好少見森林，不過，對於小朋友黎講，呢度最吸引既地方，就係呢個旋轉木馬了。不過要另費玩一次的。價錢已經忘記了。

木馬係有定時開始的。等玩既時候，幾個小朋友呢埋入小屋度⋯⋯

哦，原來係玩印章。

又會咁岩既⋯⋯點解兩個男孩子動作眼神都咁一致架⋯⋯

薰衣草森林深處有一條山路。不過時間關係，我地唔係咁想額外用時間去遠足了。所以，只係遠觀而已。

終於，都等到旋轉木馬開動了⋯⋯

Claire:今日最開心係玩呢個呀⋯⋯

對正旋轉木馬，有一個小賣亭。最吸引，當然係雪糕啦。

薰衣草森林，有得賣薰衣草雪糕呀⋯⋯不過，都係北海道既薰衣草雪糕好食得多。

Claire: 係囉⋯⋯好似有陣味咁既⋯⋯

食完雪糕HEA完之後，我地係時候要決定邊度LUNCH了。因為薰衣草森林都幾僻下，如果渣返車出另一邊食飯，係無地方可以食。司機小傅勸我地係薰衣草森林食左先走。當然，司機全程無陪我地入去，加上幾日行程，我地都相信小傅既意見係好中肯。所以，我地都決定留係度食飯了。

薰衣草森林LUNCH既選擇不多，最後，我地去返入口處附近的餐廳食。餐廳後方，有一小處比小朋友放電。呢個小朋友，一見有得玩，完全不放棄任何放電郁動的機會⋯⋯反之，同年紀的ZAC就即時揾凳坐。好大對比喔。

Isaac: 我唏⋯⋯嘩，我可以一下跳到六字呀⋯⋯

Claire: ZAC ZAC, 不如我地玩打呢個波吖⋯⋯
Zac: 唔玩呀⋯⋯我好攰呀⋯⋯

一個不停跳，同一個攰到應該隨時瞓著的小朋友。呢張相都幾搞笑。

最後，我地被餐廳安排到戶外坐⋯⋯因為，室內冷氣位滿座⋯⋯時間關係，唯有坐出面，邊食邊餵蚊，狂搽蚊怕水。

好吸睛的飲品。

估唔到，旅遊區的餐廳，造出來的食物賣相，真係超吸引囉。

Claire: 我望到都想食呀⋯⋯

爸爸點的燒雞。估唔到咁大隻。同媽媽的手有得揮。

媽媽點的炒意粉，味道也很好喔。這道午餐，不貴。如果沒有太多蚊，其實是可以好輕鬆好寫意的一個LUNCH喔。

連蛤蚧都要吃LUNCH囉。就在我們午餐枱的前方，有一個小水塘，臨走，居然比我地發現佢既蹤跡。

吃飽飽，我地就離開薰衣草森林，當然，離開前，要探訪一下附近商店的洗手間⋯⋯嘩，咁靚既，係呀，呢間真係洗手間黎架，仲要係單人既洗手間⋯⋯唔知，個浴缸係咪真係比人用既呢？！

之後，繼續一輪崎嶇既山路，爬個幾鐘車程離開山區了。