科學館。太空館兩天遊

20 June 17 貴人出門招風雨。呢日帶完妹妹返學就落狗屎，媽媽的一雙鞋變了一雙般船。還要接Isaac 和雅雯放學，真係濕住對腳無陰公。大雨天，三個小朋友，近近地，都係响樓下大快活醫肚就算。難得佢地一樣咁開心。

食飽飽，齊齊換返套衫出發去⋯⋯科學館。又係時候一拖三去玩。

雖然雅雯比妹妹大兩年，但難得雅雯一點都唔嫌妹妹細，反而好照顧妹妹，真係一個好姐姐。

點解我地前排先玩完科學館無幾耐， 呢日又去呢？因為，有難得一見既木乃伊展喔。

點知⋯⋯兩個大既哥哥大姐姐反而不停嚷好驚好驚⋯⋯快D走。而年紀最少的Claire，一D都唔驚，好想睇⋯⋯可能係扮掛⋯⋯你睇佢呢個樣，都係一副驚樣，究竟佢係真唔驚，定係扮唔驚呢？

好快KO左木乃伊展，三個小朋友又大玩科學館。呢次比佢地發現有得玩電子畫蝴蝶。

Claire 好認真咁畫畫畫。

一按完成，係電子屏幕上，就會出現Claire 頭先畫既蝴蝶飛舞。

輪到Isaac，好似配色配得好靚咁喎。

大家揾唔揾到Isaac 隻蝴蝶呢？

帶完去科學館，晚上帶三個回家，媽媽覺得腰骨和腳都斷了（因為全天沒得坐喔！）。但呢三個小朋友，好明顯仲係好HYPER。這是第二次，有小朋友回家和他們一起睡喔。

21 June 17 晨咁早，Claire 就返左學，家裡只餘下醒左既雅雯同仲懶緊床既Isaac. 

Isaac: 放假都要咁早起身⋯⋯有乜好做姐⋯⋯
雅雯： 咁我上黎陪你啦！

 最後，等接妹妹放學之時，兩個小朋友摷左波子棋出黎玩。

咁岩婆婆打電話黎話去飲茶，媽媽就帶埋雅雯一齊去。

原來雅雯識得玩爸媽兒時玩的天下太平喔！仲教 Isaac 玩 TIM。

妹妹放學了，一齊回家換好衫，又出發去街。難得雅雯呢兩日肯跟媽媽撲黎撲去，回家又出去又回家又出去⋯⋯一日行幾轉。抵帶佢出街去玩。

今日咁趕又為乜？就係為左呢套夢幻極光⋯⋯即係北極光。就黎落畫啦，所以，媽媽就帶佢三個一齊去睇。點知⋯⋯好悶呀～～～～悶到媽媽都差點瞓著。

Claire: 我未睇都知好悶啦！
Isaac: 開始未呀⋯⋯

 睇完極光，就去尖咀西鐵站樓頂個公園玩一陣。

因為天氣都幾熱下，又落完雨，有些地方都係濕濕地。加上雅雯爸爸要接人了，所以，我地都係玩一陣咁大把，就搭返車入屯門了。感覺上，好似有點遊車河咁，特登出黎睇套悶戲，玩一陣又搭返車返屋企。幸好，兩兄妹都好開心，感覺這兩天好充實咁。