北海道之旅 DAY 3 。登別熊牧場。ホテルまほろば

18 Aug17 同朋友仔告別之後，我地由支笏湖直驅登別熊牧場。

爸媽好多年前都黎過熊牧場，不過今次爸爸話再黎，因為想比兩兄妹見識體驗一下。

泊低左架車，我地就買入場券。登別熊牧場係山上面，要坐纜車先去到架～～～咁岩呢日陰陰寒，又落雨，仲要上山，唉～～～

一落纜車，就有兩隻幼熊歡迎我地。 

黎熊牧場，重頭戲梗係要餵熊。雖然D熊比人由朝餵到晚，但佢地仲係好餓咁款，好多都識擺POSE引人餵佢食架。

熊： 喂，細路，快D掟比我食啦～～～

 就睇下Claire 掟唔掟得準先⋯⋯（按此）

至於這個哥哥，好明顯太興奮

Isaac: 我都有掟到架⋯⋯

究竟Isaac 掟唔掟到呢 （按此）

兩兄妹掟得好開心。不過牧場好明顯比幾年前差左。成個場得熊可以睇，再行入少少都唔得，幾乎都封哂。如此這般入場費加徧僻地點，下次真係要諗下仲黎唔黎了。

因為下雨關係，我地係戶外餵左一陣，就落室內玩下。室內都有得餵架，不過無戶外咁掟得咁開心囉（按此觀看），不過哥哥都好開心既，話哂咁近距離望住隻熊喎（按此）。

餵完熊，無野可以行，唯有走上二樓睇下，嘩，路中有隻大熊呀～～～～睇相真係好迫真喔！妹妹你要小心。

講真，個二樓博物館真係可以不去。又臭又焗。我地好快行完即刻搭返車落山了。

Claire: 下⋯⋯咁快走？但係我唔捨得隻大BEAR熊喎。

Isaac: ROAR～～～～你唔捨得BEAR BEAR，咁我扮大灰熊比你。

 牧場差不多關門，我地都係時候離開，去附近既温泉旅館  －－ホテルまほろば
                       
好別緻好舒服的一間套房。

日本人特別細心，每次入住温泉旅館，總會有小吃歡近我們。

我地急不及待換好哂衫，出發去浸温泉了。鬼馬妹妹又出現。

媽媽選擇訂ホテルまほろば既主因係貪佢晚飯係三大蟹食既自助晚餐。而且見網評都以日本人為主，咁應該好少同胞出現。好，一於住佢。

一去到晚飯BUFFET，最吸睛不是蟹喔，而係呢碟橙⋯⋯喔，呢兩盤其實唔係切開的橙，而係魚子喔～～嘩，好正呀，媽媽咁大個人，未試過有BUFFET可以任拎咁多魚子架。睇見都口水流。

魚子伴飯，超滿足的小妹妹。

甜品部，亮點係呢碟蜜瓜。嘩～～～～夏天黎北海道，當然係食蜜瓜。仲要係任食，正！

哥哥最愛的雪條任拎。

Isaac: 嘻嘻⋯⋯我第三條啦～～～～

 很地道的咖喱飯。

ホテルまほろば的BUFFET晚飯，媽媽評超滿分，超滿足。好開心的一天。温泉區都好滿意。

吃飽飽後，兩兄妹嚷著要落去酒店夏祭區到玩。既然來到旅行，我地都好寬容咁比佢兩個散發一下童真。

呢個撈波同撈金魚，一樣難。但估唔到呢位小妹妹憑住佢既小心，成功撈到一個波（按此）

幾咁開心的表情。好成功喔！

Isaac: 我去射槍好過！

 哥哥射槍，妹妹梗要學埋一份，好在有爸爸相助。

Claire: 我一定要射到好多禮物！

 玩完仲有飛剩，拎埋去抽奬。不過咁大個輪盤，呢位小妹妹好似都轉得幾辛苦下喎。

Isaac: 其實好易轉姐～～

Isaac: 跌左⋯⋯

 滿載而歸的兩兄妹。我地都未去買手信，兩位小朋友已經塞滿自己個喼都得LU。

Isaac: 好開心呀～～～～超多禮物。

 兩個小朋友玩到唔願走，玩完夏祭仲想玩埋遊戲機。

就係咁，我地呢晚係酒店玩到成十點，就返房瞓。一返房，細心的工作人員已經為我地鋪好地墊。一家人，呢晚就齊齊瞓叠叠米了。