好左定惡化左?

Isaac越來越唔聽話, 次次食奶奶, 食五分鐘就自己瞓著, 慢慢食又或可能根本無食, 只係啜住黎瞓. 打又唔醒, 放落床瞓左又大喊又要食, 跟住五分鐘又瞓. 激死我呢個本身都無乜耐性的媽媽.

本來以為滿月之後, 阿B食奶會好D架啦, 心諗: 捱埋佢啦, 繼續餵人奶啦. 點知滿月之後都無改善. 晚晚凌晨十二點, 好難至打得醒阿B, 跟住等佢喊到自己醒哂....誰不知, 又係食兩下自己瞓覺, 放落床又喊...次次要搞到差不多半夜兩點至輪到媽媽休息. 接著, 四點零五點又喊過又要食.....計埋媽媽只可以恰兩個鐘咁多. 諗住食完一大早的奶, 媽媽又可以瞓啦, 唔知點解, 清晨四點零五點呢餐, 阿B永遠都係要折磨媽媽到早上七點....不停重覆打醒阿B啦, 掃風啦, 放落床啦, 跟住又喊又要抱過再食啦, 換片啦. 媽媽跟住都比Issac整到人都醒哂, 好難再瞓得返, 跟住又到早上九點一轉的人奶啦........一日廿四小時, 基本上時間就是這樣比Isaac佔去全日.

為左試下阿B係咪真係食奶粉會易湊d (婆婆成日話食奶粉無咁扭計, 起碼食飽即刻瞓, 咁媽媽都無咁辛苦), 媽媽今天半夜決定, 開始幫BB逐步轉飲奶粉啦. 由今晚凌晨十二時個餐開始. 希望BB飲完凌晨個餐, 唔駛到一點就自己瞓啦, 咁媽媽就比以前可以早一個鐘瞓覺.

一個月零五日:

油脂炎唔知叫做好左定差左呢....爸爸好衰, 成日幫Isaac改花名, 今次又叫阿B做胡鬚勇.

一個月零六日: 經媽媽勤力清潔和塗葯膏後, 油脂炎好像沒有減輕喔....除了堂眉回復稍為正常一點之外

但下巴和面珠, 就結哂焦. 見到都替BB痛, 因為看來, 應該都幾崩緊皮膚的.

今天, 家裡存貨沒有了, 唯有一個人揹住阿B出街補給補給. 原來揹住阿B出街, 真係唔可以買餸架, 條頸已經揹住阿B好累, 隻手仲要拿重野, 真係有點後悔出街補給呢. 阿B仲要係超巿喊, 好在我呢個媽媽帶備奶咀, 搖下阿B等佢停左喊喊後, 塞佢食奶咀....跟住阿B就係超巿裡面瞓左. 前後無五分鐘. 好險喔~~~~否則媽媽就好狼狽了...如果BB的喊聲驚動所有人怒啤的話

返到屋企, 好在阿B仲未醒, 否則媽媽的早餐, 又要攤凍至有得食了.