一家貓頭鷹: 2011

2011年12月31日星期六

家居好幫手

新既一年, 希望仔女聽聽話話, 唔好越學越曳.

撇除仔仔係學校學埋哂D 衰動靜外, 基本上仔仔都係一個好得人錫既小朋友黎. 經過工人長期教導, 仔仔唔知幾時已經識得幫工人掠衫, 果然係工人好幫手.

最可愛係讚完佢叻後, 仔仔滿面成功感既天真樣. 真係好可愛呀

浪好哂衫, 仲主動要媽咪同佢影張成品照.

除夕

30 Dec 11 Claire: 我要開個蓋呀

Claire: 做乜咁難開架

31 Dec 11 除夕, 媽咪同妹妹又出去玩. 呢排妹妹叫做好左架啦, 無咁怕陌生. 點不知去到一放落波波池, 就喊成咁.

哥哥就笑成咁, 係咪好大對比呢

最後都係要warm up下, 比妹妹熟習下環境, 至肯入返波波屋. 仲要哥哥陪住.

開始可以一個人. Claire: 橙色好味定綠色好味呢?

Claire:媽咪, 我想食橙橙.

朋友仔謙謙屋企好多大玩具架. 玩完波波屋, 仲坐車車. 哥哥成程最鐘意坐呢架車同波波屋.

Claire: 等我研究下點玩既先

同場加映大妹妹三日咁大把既超等巨型b.

妹妹一於少理, 超懶. 毫無意欲爬去揾玩具, 成程要挨住人氣. 因為爸爸要返工, 工人姐姐返老家, 所以姨姨上場幫手睇妹妹.

明明挨住姨姨, 唔知做乜又忽然趴左去對面個叔叔到, 要叔叔抱.
Claire: 嘻...我奸計得逞, 有男人抱我了.

Claire: 唔好偷影我罪証喎

呢日其實係bbq, 媽媽好泥hea, 因為大家都係二打一或三打一. 媽媽同姨姨就一打一, 所以都無乜點食野, 只係影下相就算. 姨姨見到媽媽泥hea到甩褲咁滯, 就話唔會生兩個喎, 不過生一個都有奶奶湊, 唔駛好似媽媽咁, 忙到成程去湊仔女.

不過媽媽都係鐘意生兩個. 所以都ok 啦出街咁忙碌甩頭甩骨咁.

呢日係2011年最後一日. 希望新既一年, 妹妹唔該你一覺瞓天光, 唔好晚晚醒幾次要媽媽抱. 希望妹妹你健健康康唔好成日病. 媽媽好感恩生左個咁惡湊既妹妹, 比媽媽知道原來媽媽既耐性同愛心係咁有限, 都知道原來湊大一個小朋友, 係咁講心機既. 多謝囡囡你比媽咪呢個機會去湊大你.

蝦碌鏡頭

27 Dec 11 好失策. 呢日居然無同妹妹影相, 嗚嗚嗚....勉為其難得呢一張咋. 妹妹你唔好怪媽媽啦.

28 Dec 11 媽媽都幾殘忍, 成日覺得影到最可愛既相...係喊緊既時候. 所以一有機會, 就即拎相機, 捕捉最真既一面.

跌到面容扭曲咪呢 d 囉

睇下面仔, 真係有眼淚架. 不過成日跌架啦. 唔係企到攰向後中, 就係打側中低. 陰公豬.

不過好快無事架啦, 只要媽媽抱抱呵呵, 就收聲. 又繼續活動.

難得一下....爬爬. 妹妹寧願扶住行都唔爬. 唔知做乜呢日忽然係洗手間爬出黎. 莫非妹妹去完poo poo.

自從識自己企後, 妹妹最鐘意自己罰自己企. 最近鐘意左望風景罰企tim.

29 Dec 11 呢日無啦啦又自己捐左入凳底攝住左出唔返黎, 跟住大叫..... 要媽媽捉返佢出黎.

呢兩兄妹最鐘意係互學. 你睇. 一齊要帶帽, 仲要動作一致. 笑死媽媽. 就連哥哥見到妹妹上邊張相, 夾住凳底出唔到黎大叫呢刻, 哥哥都即攝入同一張凳底, 又大叫.....媽媽唔啋佢時, 哥哥就會叫: 媽咪抱返我出黎啦...真係比兩兄妹玩謝.

2011年12月29日星期四

朗豪坊

26 Dec 11 呢日開始回暖, 不過媽咪都唔敢同妹妹著得少, 費事一陣又冷親. 因為我地發現, 妹妹真係一攝親就病. 抵抗力麻麻, 難為佢仲要食人奶, 成日都想唔再餵人奶既媽媽一諗到咁, 就要繼續再餵, 為左唔好令妹妹好弱既身子再變弱.
Claire: 媽咪, 我著咁多衫做乜呀?

呢日我地去朗豪坊影相. 原來朗豪坊仲有十二星座

一副有仔女萬事足既爸爸樣.

哥哥真係好錫妹妹架, 睇下抱得幾肉緊.

全家福同hello kitty 新人影返張相.

食完飯影埋相, 咁又一日lu.

出年聖誕節, 呢幅相應該可以加到媽媽啦, 因為哥哥同妹妹都大啦嘛. 唔駛再抱.

斯文定惡死

Claire: 我其實好斯文架....出街個時.

Claire: 不過係屋企, 係人都會有真面目架啦....呢個就係我係屋企既樣.....我日日都要大嗌練聲架.

妹妹第一個聖誕節

23 Dec 11 寒風到了. 為免妹妹又唔小心著涼, 呢次媽媽精左, 寧多莫少. 包到妹妹隻種咁. 不過都無阻妹妹企係度摷野既行為.

Claire: 乜姐.....唔好話我啦.

24 Dec 11 呢個衰樣....係當妹妹見到媽媽影相時, 即刻做既表情.....要喊喎

呢個表情係, 媽媽即上場餵妹妹食粥. Claire: 嘻嘻, 你仲唔上當.

好凍呀呢日. 但媽媽一早買左會所搞既自助餐券, 無理由唔去架. 未開餐, 先影下相....可惜想影埋個backdrop架嘛....不過路人甲影唔到.

爸爸媽媽進餐樣.....其實旁邊仲有工人姐姐同埋婆婆. 但唔知點解, 可能係爸爸媽媽都鐘意親力親為, 所以即使有工人, 媽咪爸爸都係邊食邊餵小朋友. 好泥hea.

婆婆卒之填飽自己個肚, 走黎抱下妹妹. Claire: 你唔好錫埋黎呀.....

呢幅咁肉緊既相, 係婆婆同哥哥講, 要帶走妹妹. 所以哥哥出盡九牛二虎之力係咁抱實妹妹, 唔比婆婆帶走. 當然都有同我地求救, 話婆婆要拎走妹妹啦. 妹妹, 你睇哥哥幾咁錫你.

好凍既晚上, 為左大抽奬, 一家四口係咁等...婆婆同工人填飽左個肚就各自返屋企. 兩大兩細等呀等, 等到十點爸爸至話唔等...變左白等一場. 不過哥哥話出年要再黎. 因為有姐姐唱歌好好聽喎.

25 Dec 11 聖誔正日, 我地無街去. 好似平時周日咁, 返下教會出街食飯. 妹妹可能悶得滯, 要學打鼓喎

Claire: 我唏....我馬步穩唔穩呀?

2011年12月23日星期五

聖誕趴地

Isaac 人生既第一個表演, 媽媽暗示要爸爸請假去睇...卒之父母都可以齊齊出席. 等到頸都長, 終於到仔仔個班上台.

係後台周圍望既仔仔. 後黎媽媽好努力咁揮手, Isaac終於見到坐係側邊既爸爸媽媽, 跟住同我地笑完後, 就同老師講野仲指住我地, 可能係同老師講, 爸爸媽媽黎左啦.

可惜男仔企後排, 唉, 遮住哂影唔到相. 不過八卦既 Isaac 係咁裝出黎.

高抄都揾唔到 Isaac 企左去邊.

卒之因為前排幾個掛住喊, 老師捉左後排企得定既男仔上黎. 包括Isaac.

企前排仲識笑, 媽媽比個叻叻你. 好幾個同班同學仔, 企左無耐已經喊到豬頭咁, 有d仲要老師抱住唔肯落地.

Isaac: Rex, 你見唔見我媽咪坐左係下邊呀?

好快表演完, 跟住到其它班級表演. 一個悶字, 悶悶悶....唉. 各家長都悶住坐, 心諗, 完咪架(真架, 係fb 有人咁留言)

所有班級同興趣班都表演哂後, 又要逐班上台同聖誕老人拎禮物. 各小月友又係喊到豬頭咁.

好可愛既喊樣....係另外一班既.

終於等到Isaac個班上台拎禮物了.

Isaac: 媽咪, 你睇下, 我有禮物呀

Isaac: 咦, 唔見左媽咪既

黎緊日子, 大把呢d表演同畢業禮要睇. 媽媽希望可以做到, 每次仔仔有份表演時,媽媽都可以坐係下邊啦. 因為媽咪咁大個, 幼稚園小學中學既表演,都無人黎睇, 所以好明白小朋友係好想屋企人黎支持既心態架.

聖誕假期, Isaac 同學仔又一齊玩. 呢日係去我地屋企玩. 同同學仔係屋企食左飯至落街玩個夠. Isaac 好好客, 係咁拎玩具比朋友仔玩.

好在都有個姐姐陪妹妹玩波波.