遊台北飛牛

19 Oct 12 呢次係Claire 第二次衝出香港去旅行. 話說第一次係未夠一歲, 仲未識行. 淨識喊. 估唔到咁快就一歲半, 第二次去旅行. 今次係去台北, 因為媽媽有MILAGE就到期, 唯有快快手換左去, 近近地去台北算. 搭十點鐘機, 六點就要起身. 去到機場, 阿妹仲未瞓醒既樣.

未出發, 望住飛機風景先.


夠鐘上機, Claire 話要自己揾返個位喎. 所以拎住張boarding pass 揾位坐.

話咁快就落機. 我地包左車, 第一站去飛牛牧場. 嘩, 估唔到以前仲係一舊飯既Claire, 一坐CARSEAT就喊爆. 但今次呢, 一開車門, 見到張CARSEAT 居然自己主動行去坐, 嘩, 真係叫我地嚇一驚呀. 唔通妹妹記性咁好? 記得八個月前佢仲係喊爆BB時, 坐車係要被迫坐CARSEAT既???

最脫胎換骨既係, 之前去旅行坐CARSEAT就喊足一程, 呢次呢, 居然係唔單止自己主動行去要坐CARSEAT, 仲要一坐上去, 好主動好聽話咁自己瞓覺. 唔駛喊唔駛人氹. 叻女, 變左好多呀.

話咁快, 其實一個鐘就到左飛牛, 但已經近下午兩點, 我地仲未食LUNCH. 我地唔緊要, 最怕係細細粒又未識講野既Claire, 所以我地好快咁比佢食左d飯, 就出發餵牛牛. 不過妹妹太細, 我地無比佢餵牛仔飲奶. 餵牛牛食草算啦.


 餵完牛牛, 仲有餵羊羊食草, 不過羊仔既草就短好多. 但Claire 一點都唔怕喎, 只係好呆咁唔知發生乜事咁餵, 可能仲未瞓夠.

除左羊羊同牛牛, 仲有兔仔架. 嘩, 我地又餵兔仔了. 對妹妹黎講, 呢D都係好新奇既野~~~不過二小姐好明顯仲係好眼瞓, 所以都係好呆.

 最唔呆, 就係玩滑梯了. 一展其平時本色, 擘大口黎SIR, 真開心.


餵哂各種動物後, 我地又準備打道回酒店沖涼再去食飯, 因為夜晚仲有DIY活動架.

呢個農場真係好多草, 不過比媽媽想像中細咁. 可惜換左係台北機票, 無理由去到台中清境咁遠架嘛, 所以至揾最近台北既飛牛牧場. 呢個角度, 可以睇到大草地, 後邊既紅屋頂就係牛牛唧奶奶同餵奶奶既地方. 同行有婆婆, 三代一齊影相相

最難得係, 呢個農場有好幾塊大草地, 仲要係好厚個隻. 岩哂兩個係石屎森林長大既兩兄妹, 不停咁係草地行行行. 郊區大風, 幫妹妹著左風褸後, 好似個麻甩仔咁.

Claire: 我地返去酒店沖涼喇.

沖涼食飯後, 妹妹無哂電, 所以無再影相~~~之但係當全家都上床瞓時, 妹妹又出奇地好HIGH咁係地下爬黎爬去, 周圍玩, 玩到成十一點幾至肯上床瞓. 真係十足哥哥以前去旅行咁. 一到酒店就HIGH到周圍玩.