一家貓頭鷹: 9月 2014

2014年9月30日星期二

我升K1了

1 Sep 14 Claire 升K1了，停左三個月學後，今日再返學，可以同佢愛錫既哥哥一齊返學放學，不知幾開心。

不過我地返第二組，成十一點至開始返學。媽媽先送哥哥返學，回家見到Claire，已經急不過及待馬上換校服等出門口。不停咁催媽咪快D出門，果然係快手女，媽媽鍾意。

臨行前，例牌影張返學相。

時光飛逝，當年今日，邊個諗到媽媽身邊舊粉糰，會變成今日呢個美人兒呢？大個女了。

爸媽一直唔擔心Claire 返學會扭計，因為Claire 性格好獨立，正式係女生外向。一入學校門口頭都唔回個隻黎既。膽子仲大過哥哥。

未夠鐘我地呢日出左門口，係商場閒逛到夠鐘至返學，途中Claire 好唔耐煩咁扯住媽媽走，因為佢話遲到囉喎。一入課室，揾到自己個位後，Claire 快手到即除書包，勾係椅背。熟手到呢～～～媽媽之前仲擔心佢細小身型，舞唔掂個大書包TIM。

咁岩Claire 身後有塊生日版，媽媽一眼望到Claire 個樣貼左係佢生日月份到。估唔到佢生日個月得兩個同學生日，真係好似少左D喎。

因為我地好早返到去，所以未夠鐘時，我地可以玩下枱面玩具。Claire 見到對面同學仔砌到架單車，跟住要媽媽砌一架比佢。即時見到Claire 同同齡小朋友砌野既能力分野了。

除左薄片，Claire 枱面仲有盆厚碌架。不過Claire 就唔係好識玩。

Claire: 呢個點玩架？

Claire: 唏，點解我會唔識砌架？

睇返D相，好明顯Claire 呢日又係好眼瞓。唉，成日唔瞓晏覺，夜晚又夜瞓，梗係眼瞓啦。媽媽至擔心會影響佢外型不得止，仲影響埋佢學習能力。所以，而家已經開始迫Claire 早瞓，希望可以培養Claire 唔瞓晏覺但超級早瞓既習慣啦。

2014年9月28日星期日

轉左個講英文既工人後，Claire 對住佢都不經不覺有半年了。最近，Claire 有個好明顯既改變，就係會無啦啦扮講電話，不過係講英文。有時見住佢真係好搞笑。可能Claire 年紀細，仲係海綿吸收階段，所以有呢個講雞腸既現象；反觀哥哥就無咁了。按此收看偷錄片段，不過無對正Claire ，因為一對正Claire ，佢就會自動熄機唔講野架。

除左呢樣外，Claire 性格有點似媽媽細個，成個管家婆咁。以前公公成日話媽媽係管家婆，全家上下既行為都要理埋。而家Claire 都一樣。好似有朝，Claire 係屋企發現左爸爸個袋，平時爸爸已經慣左唔執袋，劈埋一邊，就係咁，Claire 發現左，就指住個袋話爸爸無收野。媽媽睇見，真係笑死。好可愛呀，Claire。（按此收看）

雖然年紀小小，身型細粒，不過真係唔好睇少Claire . 就算而家返學，老師都話佢成個班長咁，管埋隔離位同學既行為架。聽到真係好笑。

2014年9月22日星期一

劍擊比賽。亞軍

29 Aug 14 呢日下午，匆匆忙忙去阿蛇教室出席劍擊比賽。一報到，原來幼兒組只係得四個參賽者，仲要係平時上堂個幾位同學。媽媽心諗，早知唔黎啦，報名費又唔平，仲要同同學仔對劍，好似獲益無之前個D比賽咁大咁。

不過既然黎到，點都要出賽。今次個場地認真麻麻，明明幼兒係兩點開始，但同場仲有小學打緊，兩條LANE一齊比賽，但評判共四位，兩位各自負責不同LANE，一齊打又一齊開始又一齊叫停，媽媽企係側邊，覺得好亂呀～～～究竟邊個評判負責邊條LANE呀（仲要係四個評判輪流做出聲個位，唉）。難為出賽者，戴住個MASK仲可以好冷靜咁分得出邊把聲係叫梗自己停囉。

之前Isaac 出賽都會好緊張，有幾次睇到媽媽都火。呢次Isaac 緊張到阿蛇都睇得出，不過今次Isaac 進步左好多，好明顯幾次出劍，睇到媽媽緊張埋一份。好似呢次咁(按此進入），呢五分鐘真係緊張到呢～～～（近鏡頭短褲係Isaac )

不過唔知係咪飯氣攻心，加上無乜朋友仔，所以Isaac 打左頭兩劍，開始有發夢情況出現，即係企係度唔識郁，等人埋身篤佢。激死媽媽。先睇下呢條片，留意下有無呢個情況先。其實條片太長，中間斷左，再按下呢度睇埋下集先。

好，到激氣片段了，就係不停防守後退，好幾次比強勁對手迫入牆而被捱一劍。輸得好無辜。真係唔知係咪Isaac 捱唔住成個比賽過程，已經開始進入瞓覺狀態，所以媽媽後黎不停係側邊叫佢唔好發夢。唉。（按此進入）

四個參賽幼兒不停咁打打打，打到媽媽都想走，不過原來已經進入冠亞爭奪戰，阿蛇仲好抵死咁走埋Isaac 身邊，話要嚇下佢，等佢再緊張下，話一陣贏左就可以拎冠軍，因為係冠亞爭奪劍了。對手其實係一個好瘦小既男孩，不過動作好快，好似衝埋黎打咁。之前呢個對手，係其它比賽以新人黎講，算係好叻。Isaac 就依然係慢條斯理好斯文咁出劍，所以媽媽聽到，其實都好好好緊張，只係盼望有奇蹟出現。（按此進入觀看冠亞爭奪劍）

最後，Isaac 拎到第二名，對佢黎講，其實係開心事黎。不過之前比媽媽鬧左好多次發夢，所以，可能拎奬都拎得唔開心。

同阿蛇一齊影返張合照，唔經唔覺，都跟左呢位阿蛇兩年了，真係睇住Isaac 越來越成熟（阿蛇成日咁講）。

好耐無拎過劍擊奬，難得今次第二名，梗係要影返張相留念下。四個人比賽，其實呢次拎奬好似唔係好光榮咁。不過爸爸話唔緊要，因為無人會研究有幾多人出賽喎。ANYWAY，今次睇到Isaac 真係有進步到，每次比賽果然係學到野，都叫媽媽最安慰係佢學習有所進展了。

2014年9月21日星期日

最後一堂習水課

28 Aug 14 呢日係呢年度最後一堂游泳班。雖然兩兄妹仲未識游水，但相對佢地自己黎講，媽媽覺得兩兄妹其實已經有好大進步了。因為兩兄妹超級怕水，尤其係水淋頭更加接受唔到。教練成日覺得好可惜，因為Isaac 好明顯領悟力同體力係好好，動作做得到，唯獨個頭唔肯入水，影響成個游水既進度。如果Isaac 有朝一日醒悟過黎，相信佢會游得好叻的。

平時媽媽其實係被迫落水一齊暴曬（咁岩呢日下午學叫做無咁曬，之前早上係曬正）。媽媽見呢日最後一堂，又無乜大進展，索性偷懶唔落水，可以錄低兩兄妹習水片段。好奇怪，有時兩兄妹狀態好好，但有時就會好似呢日咁，發哂狂咁喊。明明自己曉得拎住塊板踢水，都要喊，真係唔明。(去片）

扭咁耐，其實阿蛇只不過想捉住佢地對手教撥水咋嘛，真係難為阿蛇。（去片）

之後，Claire 無比人捉住，就好地地自己好靜咁練手。（去片）

跟住比阿蛇捉住出去，又發狂咁喊。頂佢地唔順。（去片）

輪到Isaac 哥哥，一樣喊到九彩。明明兩兄妹自己去泳池自己都游出去，做乜一見阿蛇就發哂狂架。唔通係怕阿蛇捉捉下，會壓佢地入水游？？（去片）

其實Isaac 真係做到的，係唔明做乜仲要發哂狂咁喊。呢日做到後，即彈上水喊住唔學（去片）

ANYWAY，呢日係最後一堂，之後泳池CLOSE無得再游。兩兄妹又唔想再學，咁唯有停一停，等佢地條癮又起，至再學啦，希望在明年。

推氹氹轉

最近幾個月，發覺Claire 去公園有個嗜好，就係扯住個氹氹轉係咁跑。有日卒之錄低左，吖，乜小朋友咁鐘意咁玩既咩？（按此去片）

定係我呢兩兄妹有呢個特殊習慣呢？

因為哥哥細細個時，又係咁玩架。（按此看Isaac 推氹氹轉片段）。當時 Isaac 只係兩歲半左右，同而家三歲鬆既Claire , 又有乜分別呢？

呢兩兄妹，真係有唔少共通點喎。

2014年9月18日星期四

K2賣旗日

27 Aug 14 一年一度學校賣旗日又到。自從K1試過賣旗後，Isaac 成年都提住要去賣旗。暑假一開始，就追問媽咪點解唔幫佢報名賣旗喎。明明報左名，Isaac 見自己無通告就以為無報名。望到頸長，卒之等到呢日。呢年好多K2小朋友參加喎，影都影唔哂咁多。

Isaac 企左係邊？咪角位囉。真係好難ZOOM到咁遠。

其實呢日，Isaac 好似未瞓醒咁，呆呆地囉。

連影幾張，表情都係一致－－無表情，哈哈。

睇下，笑得幾咁勉強。

K1同K2賣旗最大分別係： K1時，媽媽以為Isaac 好怕羞，唔敢叫人買旗，殊不知Isaac 一出校門已經叫出面既婆婆賣旗，叫媽媽另眼相看。不過，K2了，以為Isaac 有經驗啦，點知佢反而好驚，唔敢叫人買旗，仲發埋忟～～～～一直等到媽媽話走人，佢至肯開始叫途人買旗。唉，有時真係唔明佢地小朋友諗乜。

Isaac: 我未瞓醒吖嘛。

呢年賣旗，爸爸黎唔到捧場，不過出門前，爸爸有交低十元話支持Isaac 架，不過Isaac 掛住發忟，唔肯入爸爸個十元入袋。一直到中後期，至好少少，肯拎爸爸比佢既十元放入袋咋。（按此去片）

Isaac: 睇下，我賣左咁多呀～～

賣完旗，難得成個暑假無見同學仔，我地同同學仔食飯。Isaac 仲話要拎個新玩具送比佢好朋友進進喎。媽媽無反對，反而比Isaac 呢種大方分享既性格吸引，媽媽真係好鐘意你呢種愛分享既性格既姐。

未送之前，媽媽叫Isaac 錄片比爸爸睇，等爸爸都知佢咁大方（按此去片）。不經不覺，而家K3了，唔知Isaac 一年後又會變成乜境況呢？希望Isaac 最後一年幼稚園生活，繼續開開心心地過。

暑假最後一堂體操彈床實錄

暑假完結前，點都要再影一影兩兄妹學體操情況。仲好記得呢日媽媽好安慰，因為見到Isaac哥哥擘腿進步左。嘩，睇下，五體投地架。

原來，妹妹Claire 都進步左好多呀～～～～

呢日，Isaac 哥哥仲被選出去做示範既位，做動作比各同學仔睇。睇見 Isaac 越來越認真，媽媽真係開心死。

除左熱身動作認真，跳彈床都好認真架，好努力咁練習緊坐彈轉身既跳彈床動作（按此去片）

相反，本來好聽話既阿妹，上親跳彈床都放鬆哂，掛住玩。好似呢家咁，個個坐係度等上彈床，Claire 就自我娛樂中（按此去片）

唔知係咪最後一堂，老師無乜好教，就比班馬蹓上彈床，一次過UN 佢地。不過細路仔黎講，呢下真係好興奮架囉。唔知Claire 係咪都咁享受呢？（按此去片）

細細粒既Claire，每次玩跳箱都好小心，仲要每下動作都周圍望老師，慌死自己做錯咁。好搞笑（按此去片）

2014年9月16日星期二

我的衰妹

Claire 仔細就比爸爸話佢古惑，因為Claire 會諗早你一步，預知你反應再做一D行為等你氹返佢。

好似呢日朝早咁，食緊早餐，其實媽媽都唔記得乜事了，總之只係略略話下Claire，個衰妹就扁起個衰樣，目的係要你氹返佢，唔該你收聲唔好再話我。開始精既阿媽梗係唔會上佢當（不過爸爸仲係比佢呢招呃左，一見扁咀即刻哂冧主動氹返阿妹）。卒之Claire 繼續要扁咀食早餐。

扁咀完無耐咋嘛，睇下，幾咁精靈可愛。所以話，小朋友既情緒真係無可預測。其實呢年中秋我地唔係香港過，不過Claire 之前抽到個燈籠，話要拎出街玩，所以，媽媽晨咁早出街買餸，都比佢拎住遊街。咁晨早拎燈籠玩，都咪話唔礙眼。不過算啦，見衰妹咁開心，又咁想玩燈籠，我地又就旅行無得玩，一次咁多啦。Claire 已經好滿足了。

2014年9月14日星期日

開心LUNCH

呢個暑假，我地去得最多除左係游水外，仲係圖書館，差唔多日日我地都聞住書卷香過炎夏。兒童圖書館去左好多次，但媽媽都無留意到角落個公仔係乜樣。但呢日，兩兄妹不約而同好興奮咁指住呢隻公仔，Claire 仲話要影相TIM。越來越大既妹妹，而家去邊見到靚公仔，都話要影相，好得意。

之後，媽媽見兩兄妹辛辛苦苦頻頻撲撲過左成個暑假，呢日就帶佢地去嘆下個LUNCH。因為之後正式返學，兩兄妹各忙各的課外活動，無得再慢慢出街嘆LUNCH架。

第一味，係Claire 妹妹最愛既香口脆脆蒜蓉包。一啖食哂落肚。

至於Isaac，十足佢爸爸咁，郁D都話熱，乜都要攤。

食個湯包都要吹凍佢。唔知再大D，係咪十足爸爸咁，食乜都話熱呢！

Isaac：我食意粉無吹架～～

一個拖兩個百厭精，為免係街變潑婦，所以媽媽一開始講明食得快有旦糕，所以兩兄妹好快手食哂兩份LUNCH，仲可以自己出去選旦糕TIM。

Isaac: 媽媽，呢件白桃係限定架，好好味呀～～～

至於妹妹，就選左呢件朱古力。咁睇法，呢旦糕SIZE好似有一半Claire 塊面咁大囉。

三母子女開開心心一個LUNCH，開學後，唔知幾時可以再咁開心嘆了。

自創歌舞

又係時候數返兩兄妹呢個暑假既玩意。睇返之前既相，去年暑假兩兄妹最鐘意玩維修BB床。不過今年無玩LU。改為玩跳舞，因為呢年兩兄妹勁愛睇韓劇。搞到兩個成日上身講"韓文"。

好似呢晚咁，Isaac 哥哥忽然上身，起勢咁跳舞唱歌。如果有人知佢唱緊乜，真係唔該話我知。（按此去片）

見到媽媽錄影，跟住又話要跳多次喎。細心D 睇，兩節舞係唔同架，好明顯即興又跳又唱，動作都即刻諗。（按此去片）

Claire 妹妹見勢，又走埋黎要跳埋一份。每個動作都睇哥哥頭，Isaac 點做佢又點做。好明顯一個模仿力強勁既小女孩。（按此去片）

跳跳下，無啦啦仲比哥哥抱起狂轉，媽媽睇到都驚。一陣Isaac 連自己轉到企唔穩，真係抱住個妹一齊中個頭落地。好在最後安全停低姐。（按此去片）

其實呢首歌，Isaac 不只呢晚唱，究竟係乜歌黎既呢？媽媽真係要留意下平時卡通係咪唱呢首歌先得。

2014年9月12日星期五

兩隻百厭星

自從Claire 學左體操約個多月, 做倒立已經有明顯進步. 好似呢晚咁, 忽然做比婆婆睇. (按此去片)

身為哥哥既Isaac, 見到妹妹做得咁興起, 又要做埋一份. 仲耐過平時上堂TIM. (按此去片)

隔左幾晚, Claire 好似倒立進步左. 條腰直左, 同埋捱得耐左. (按此去片)

不過未睇Claire 平時咁斯文, 其實媽媽一直都話佢係隻馬騮黎. 睇下呢日, 無啦啦走去爬人, 就知佢幾咁百厭. 聽到哥哥叫佢掂天花, Claire 仲興奮, 真係頂佢唔順. (按此去片)

玩左一次意猷未盡, 再爬多次人人. 今次仲純粹到好似行路咁.唔通佢唔係馬騮咁簡單, 而係spiderwoman?? (按此去片)