暑假遊濕地

13 Aug 15 呢日無節目又唔駛去跳繩，媽媽就帶兩兄妹去濕地放下電。咁岩遇著濕地有小型環保攤位，兩兄妺見份禮品幾得意，又走去玩一份，點知仲比負責人影埋相⋯⋯但禮品就無。玩完不知幾咁失望。

明明早前同Claire 黎玩，Claire 可以上樹屋，開心到不得了。點不知，呢日重遊濕地，卻因高度問題，唔可以上最刺激既樹屋玩。卒之，有人勁憂愁

Claire: 我明明咁高，點解淨係可以玩BB區呀⋯⋯

Claire: 唉～～真係好想喊呀⋯⋯

Claire: 我好嬲架啦，你唔好再影我呀⋯⋯

 不過，媽咪都係要影佢喎，仲錄埋衰妹發脾氣想打人既惡樣TIM。（按此）

幸好，Claire 有個錫佢既哥哥，哥哥終於肯落黎BB區陪Claire 了。

Claire: 我咪同你講左，唔好再影囉⋯⋯

點解會有人咁玩滑梯架⋯⋯真係睇見都覺得膝頭痛。

Claire: 嘩，乜哥哥你唔識企既咩？你睇我，我都無跌。

大舊哥哥，玩呢個滑梯，真係格格不入咁。哈哈。

咦，後邊好似仲有人喎。

睇下衰妹笑得幾咁甜，頭先發脾氣既憤怒無哂LU。多得哥哥陪佢咋。

之後，我地出左去揾怕醜草。

咦，連哥哥都好認真咁揾緊怕羞草喎。

石屎森林長大既小朋友，難得見到大自然，真係好好奇咁研究。

最後，玩完公園，Isaac 又話要係門口影返張3D相⋯⋯其實次次都要影呢個佈景，悶唔悶？

Claire: 唉，我都唔想影架，係哥哥捉住我⋯⋯

妹妹花式跳繩花絮

12 Aug 15 話說妹妹上花式跳繩之前，係對跳繩完全唔識。不過一來無人湊，二來妹妹亦都唔想呆坐，所以都一齊跟哥哥學。

既然係唔識，不過以妹妹性格，無論點困難，Claire 都會好落力做。有時都覺得佢本人可能會因而壓力過大。

去片睇下Claire 點落力嘗試先（按此）。

單睇個人跳，好似無乜大進步。不過再睇下Claire 跳大繩時，對比第一堂既表現，Claire 真係進步左好多了（按此）。

之後，Claire 仲即堂做返呢堂學過既花式  － 踢腳（去片）。雖然生硬，但都做到一兩下，佢呢個年紀，初學者黎講，真係唔話得了。

可能老師都見Claire 有進步，再黎多個大繩轉身。真係睇得出Claire 下下落力跳架（按此）。

花式跳繩第二堂。踢腳

12 Aug 15 自從上左第一堂花式跳繩之後，Isaac 愛上跳繩。係屋企係咁練，不過呢日第二堂，教既同第一堂又唔同喎。

第二堂教踢腳。Isaac 呢次好似比較慢上手咁。不過都叫做踢到一兩下啦。

個人跳去片

大繩去片

雖然呢堂好似比較難操熟，不過呢種花式跳繩，真係無難到Isaac。之後幾堂，Isaac 真係好用心去學架，真係返學都無咁比心機呀。

精靈寶貝S

8 Aug 15 呢日路經屋企隔離個商場，見又有新佈置。兩兄妹又趁下熱鬧去扮下野。

Claire： 喂，哥哥，你唔係話要扮馬騮咁既動作既咩⋯⋯

Isaac: 係喎⋯⋯唔記得⋯⋯而家扮啦。
Claire: 我而家又唔扮LU⋯⋯ 

Isaac: 阿妹，望鏡頭呀⋯⋯
Claire: 我唔望呀⋯⋯你頭先都唔望啦⋯⋯

 11 Aug 15 呢日爸爸牛一，不過爸爸話要返工，所以日頭都係由媽咪帶兩兄妹出動四圍去。呢日又路經另一個商場。Isaac 問媽咪，呢D公仔叫乜名，媽咪話我都唔知。然後，Isaac 一臉正經答： 叫AURW）Q＃＊R＠ 
媽咪失笑斜眼望住Isaac： 你講乜呀⋯⋯（心諗，又吹水）
Isaac 傻笑⋯⋯真係比佢激死。

Isaac: 嘩。我扮緊佢呀⋯⋯我個口夠唔夠佢咁大呀？

Claire: 我斯文D，唔擘大口。淨擺對手⋯⋯

扮呢隻又有模有樣咁。

好奇怪既佈景，明明幅背景地好3D，但加左隻好唔3D既公仔。就算兩兄妹企正位，都一點唔迫真喔。

迫真唔迫真唔緊要，最緊要我地係隔離買齊有機零食，用黎煲湯整早餐。咁兩個寶貝就食得健康，笑得燦爛。好似隻公仔咁精靈？

古惑牛王妹

7 Aug 15 暑假本來淨係幫哥哥報名去花式跳繩班。一向愛跟哥哥既Claire諗多兩諗，又話要跟埋一齊跳喎。於是乎，兩兄妹就齊齊上堂。

本來Claire 係唔識跳繩既。不過學阿SIR話，跟佢既學生，唔識都可以一個COURSE教到識，所以，第一堂，阿妹除左自己密練跳繩外，仲識得玩下跳大繩。

當然又係好好笑啦。按此看片一。阿SIR跟得好貼，邊FING繩邊行前迎接妹妹。之後仲好笑，按此看片二，阿妹比阿SIR整鬼都唔知。好在後黎望到，自己行返後再跳過。媽媽係現場真係忍住笑。

到齊齊跳大繩，當然又一蝦碌。（按此）

不過，妹妹對跳繩既興趣，真係唔大，返到屋企，都無哥哥咁上心去練。

8 Aug 15 呢日帶兩兄妹去食飯。飯時，Claire 好老積咁話要再比錢去學溜冰。仲要一臉老積樣，媽媽就叫佢做多一次比爸爸睇，睇佢七情上面，真係牛精到呢。（按此）好明顯D理由，係抄襲自爸爸架啦。

除左呢個，仲有就係衰妹晚晚都要半夜攝入黎瞓，媽媽就趁機問下佢，點解佢要入黎瞓。吖，個衰妹古古惑惑，諸多借口⋯⋯卒之，自己漏左口風⋯⋯係乜？自己按片睇下。

花式跳繩第一堂。開合前後

7 Aug 15 呢個暑假，除左幫仔仔Isaac 報彈床班外，仲幫佢報左花式跳繩班。旨在比佢跳多D，趁有得高就好高。哈哈。

第一堂，原來家長可以坐埋一邊睇，又幾好喎。至少知道小朋友學左D乜。同時，亦都留意到阿SIR 好細心拆解每個同學錯處，從中指正䓢中秘訣。

睇下第一堂，第一個花式係乜先  －－ 按此去片。

各自練習到咁上下，就跳大繩 －－按此又睇下跳成點。估唔到係大繩，都做到一兩下開合動作喎。

之後，到齊齊排隊跳繩。旁觀者既阿媽，邊睇邊笑，蝦碌到呢。我諗阿SIR應該每堂都忍笑忍得好辛苦都似。因為成日見阿SIR忍唔住笑出黎，但一兩聲又要死忍收聲。 －－ 按此睇下成班點蝦碌法。

見佢跳得咁辛苦，返到屋企，梗係要比少少甜頭比仔仔。甜頭就係呢杯整到懶係靚既啫喱了。（按此去片）

豐富想像力

7 Aug 15 暑假無無聊聊，忽然見到有人好似抽筋咁瞓左係地。問下佢做緊乜，有個傻豬答我： 我扮緊隻暴龍囉，似唔似呀？ 

 真係可愛到爆。

之後，無無聊聊又同阿妹玩影相。去片（按此）睇下點玩。真係笑死媽咪。影影下，自己都玩埋一份，嘩，真係交足戲架喎。小朋友既想像力，真係唔可以睇少。（按此）

Isaac: 媽咪，幫我同堆暴龍影相吖。

濕地玩樹屋

6 Aug 15 暑假呢日無體能班，媽媽索性帶佢地去做下體能活動，放下電。地點就係濕地公園。估唔到濕地公園都湊熱鬧，整幅3D畫係入口，Isaac 就係都要影左相先肯入去玩。

Isaac: 快D影啦，條鱷魚就係食我啦。

Isaac: 嘩，跌落去會浸親架喎⋯⋯

呢次黎濕地，最開心，應該係Claire，因為估唔到呢次度到夠100CM高，可以上佢恨左好耐既樹屋玩超長滑梯。睇下呢個妹，笑到四萬咁口，就知佢幾咁滿足啦。

  

 不過上得高，代價就係要心驚膽跳行呢條網橋，睇Claire 幾咁小心，就知佢當時都驚驚地。

Claire: 媽咪，上邊好好玩呀⋯⋯

平日黎濕地，有個好處就係任玩呢個樹屋，唔駛排隊拎籌。我地玩左成三次，真係散咁滯，先至捨得離開。

係出口，濕地又有新玩意，兩兄妹係都要自拍一番。不過，呢部機好似影得曚曚地，不過兩兄妹係都要影，媽媽就POST一張咁大把啦。

學踩冰

1 Aug 15 呢日爸爸帶我地去溜冰。雖然Isaac 未試過溜冰，不過佢K3 旅行時，就試過玩ROLLER，所以，對於踩鞋平衡黎講，應該難唔到Isaac. 不過爸爸見兩兄妹第一次玩冰，有理無理都比錢租隻海獅先。Isaac 好明顯貪玩隻海獅多過玩冰。

Isaac： 哇⋯⋯好跣呀⋯⋯好搞笑⋯⋯ 

Isaac: 阿妹，係咪好搞笑，好好玩呀？

好在，玩到咁上下，Isaac 都肯利用下呢百幾蚊租返黎既海獅去溜下冰。

連爸爸都玩埋一份，要坐係海獅等哥哥推。妹妹就係後邊力追。

究竟呢兩兄妹做緊乜呢？唔通又爭野玩？

哦，原來係商量左，由Isaac 推妹妹玩。估唔到呢隻海獅咁受歡迎，大家都爭住坐喎。

好了，係時候操下點踩先。先回顧返兩兄妹點踩入冰場先，估佢唔到喎，諗住粗心既Isaac 會心急失平衡係門口跣低架嘛，但佢又無喎。（按此去片）

果然學溜冰係越細越好，Isaac 居然唔怕跌，放開爸爸，自己摸索向前行（按此去片）。

Isaac: 其實好易咋喎⋯⋯

 好快，Isaac 仲識得向前溜TIM。（按此去片）

玩到散場，Isaac 就上左平台公園玩，不過撞岩無小朋友，唔駛十分鐘，佢又喊住要落返去踩冰。

Isaac: 點解今日無人玩既？

 卒之，玩足一日，我地用左成千蚊去玩冰。真係富貴人家玩意黎。