迪士尼玩水樂

16 Feb 15 Isaac 見同學仔成日去迪迪尼，呢幾個月成日哦住話要去迪迪尼。咁岩媽媽見有特價票，成人500元可以入去玩兩次。見咁抵，一於順下Isaac 意思，去玩下啦。

Isaac開始放年假，見平日，諗住少D人，點知去到鬼死咁多人，周圍都要排隊。爸爸話要晏D JOIN我地，媽媽就同兩兄妹自己入去玩先。

Isaac 去到巴斯光年個區，最鐘意跑入去"被"噴水。睇佢笑得幾咁開心。

Claire： 哎呀，淋到我呀。
Isaac: 你做乜呀？就係要淋至開心架嘛。

Claire: 嘩，好大雨呀，走呀～～
Isaac: 哈哈，好好玩呀～～

Isaac: YEAH~~~~ 

唔知點解，呢個星球，幾乎成為Isaac 指定景點。仲要話用手指篤起佢黎影喎。

呢日唔知係咪臨近新年，就算係平日，都好多人。我地玩完巴斯光年，去小飛象排隊，都排足一個鐘。暈～～

Isaac: 媽媽，我大個啦，可以一個人坐。

嘩，好大支棉花糖呀。繼冒險樂園個支大過人頭既棉花糖，呢支係媽媽見過第二大既棉花糖。睇Isaac 食得幾咁滋味。細路真係細路。

爸爸黎到，話去灰熊山谷玩迷離火車喎。係Isaac 第一次玩過山車咋。不過只此一次咁多，玩完係咁話唔會再玩。之後，又係玩Isaac 最愛既水～～

Isaac: 嘩，我倒水呀，好好玩呀。快D過黎比我淋啦。

爸爸： 嘩，成桶水倒落黎啦⋯⋯小心呀～～

玩完倒水又去射水槍。媽媽掛住影相，都比附近小朋友射濕左少少。真係唔明做乜忽然間迪迪尼咁多水既玩意。爸爸話，等你地濕哂可以幫襯迪迪尼既鋪頭買新衫喎⋯⋯哦，原來係迪士尼既陰謀論，又幾好喎，呢招做生意既諗頭。

同爸爸談心

18 Feb 15 話說早幾日，媽媽買左個FROZEN電話比Claire，Claire 好開心之餘，閒時仲不忘拎個電話黎講。最常見，就係同佢既大情人談心。

咁岩呢日又特登瀨尿（爸爸覺得佢係懶惰豬，特別凍個幾日，日頭都唔去坐廁，寧願急到瀨），媽媽就叫Claire 自己問爸爸，要唔要罰。吖，個衰豬就係咁打比佢個大情人講： （按此去片）

睇完條片，不知幾想咬個衰妹一啖。臨尾仲要好得意既眼神話爸爸唔駛佢淋眼睛喎。真係無佢咁好氣。

畫班傑作

16 Feb 15 呢堂畫班用新材料畫畫，就係呢D彩麗紙。講真，媽媽見到都幾失望（材料），因為呢D紙，之前Isaac都會用牙簽或者木筆黎畫下塗鴉。估唔到老師呢日比咁簡單既紙Isaac 畫。睇下畫左乜，又好似好複雜咁喎。

專心既Isaac，唔通會玩弄咀巴？

Isaac: 跟住畫邊筆好呢？

 17 Feb 15 翌日，收到老師比既相，係Claire 既。呢次真係好SURPRISE。估唔到人仔細細既Claire ，畫起水仙好仔細。像真度都幾高。問左幾次Claire，佢話只有個名係老師寫，其它全部係Claire 親手畫架喎。希望佢學懂技巧，之後用得返啦。

情人節

14 Feb 15 有了小朋友後，情人節就變左一家人一齊過。呢日情人節，兩兄妹出街坐車。Claire 攰到一上車，即主動挨住哥哥膊頭瞓覺。睇下哥哥幾咁樂意借個膊頭出黎。就知兩兄妹感情幾咁好。情人節對佢地黎講，情人咪就係對方囉。

之後，我地食完SAVOUR後，揾左間甜品店食。今次唔叫盆栽了，改叫分子雪糕。嘩，Claire 一見到噴煙既分子雪糕，幾咁興奮。

Isaac: Yeah, 我有出煙雪糕食呀～～～

 媽媽就叫左個綠茶心太軟。個心太軟既綠茶餡好正呀。

Claire 正餐唔食得多，不過一到甜品，就變得好開胃。果然係女士既天性呀下。

Isaac: 我就唔同啦，我食正餐都食好多野既。唔駛媽咪勞氣。

唔知過多幾多年，呢兩個小朋友，情人節唔會再同爸爸媽媽一齊過呢？！

賀年掛飾

8 Feb 15 每年臨近新年，畫班老師都會安排恒常班同學仔做少少應節掛飾。K3既Isaac，今次畫左幅羊揮春出黎。嘩，好靚呀，尤其係個對咩咩羊。

13 Feb 15 除左畫班老師悉心安排外，學校每年都會有農曆新年賀節活動，比各大小朋友返去玩下。今年Isaac 跟妹妹個時間返去。難得Isaac 無扭。抵錫。不過媽媽就有扭，仲要好驚。扭乜？咪就係波波囉。年年都有架，激死媽咪。不過媽咪都係扭兩野架咋，之後交比老師幫手。媽媽最驚爆波。

又一個賀節揮春。睇唔出Claire 咁細，但佢聽老師指令好叻，老師講完，一話開始，Claire 好快手咁望住個標準揮春黎做。

Isaac： 我都叻啦。

Claire: Yeah, 我最叻。
Isaac: 都話我叻囉。

兩兄妹，最鐘意鬥叻。好搞笑，讚完一個叻，另一個又會嬲霸霸話我唔叻咩，哼⋯⋯

360小人類大作戰（美贊臣A＋）

31 Jan 15 之前朋友SENT左美贊臣個優惠黎，一於幫兩兄妹報名，點知原來同一個A／C只可以報一個小朋友。媽媽一個AC報兩兄妹，最後抽到媽咪，但只能夠哥哥出席，妹妹當無報到名。

去到機場個童夢城通識學園，好幾年前爸爸話比幾百蚊去玩。今次唔駛錢，入到去，嘩⋯⋯原來得佈景板架咋，無乜野好玩咁。好在當年媽媽堅持唔比錢玩。

媽媽報名時，Isaac 係第一個輸入既小朋友，所以慒下慒下咁，求其CLICK左做MODEL，育嬰護士同埋太空人。唔知係咪咁，呢組超少人，反而其它做消防員就成十幾個小朋友一組。

一開始，我地被編左去做MODEL先。一向怕羞既Isaac，被換好衫後，自己行出黎擺POSE影相，但見到咁多家長拎住相機（其實都唔係影佢），Isaac 即刻好含蓄，笑容都無，幾咁COOL。

呢個場，最吸引Isaac，都係消防員既水喉。媽媽以為係假野。

Isaac: 有得射水架。

原來做消防員個組既小朋友，有大約半分鐘係企出黎射水。幾咁好玩呢。

每場BREAK中間，A＋會比大家影下立體佈景板，然後上FB BOOKMARK 返張相，咁就有五元收。呢五元，加埋Isaac 每次打工（每個造型）得到既廿元。加加埋埋，可以去佢個小食部換小食架。

BREAK完就去做育嬰護士。

好似好認真咁聽導師教點搓手喎。

Isaac: 你做乜又偷影呀？

終於埋位照顧BB。

其實由細到大，Isaac 都好鐘意照顧幼兒。唔知佢大個，會唔會真係走去做育嬰護士呢？

Isaac: 嗱，你唔好扭計呀。

Isaac: 哦，原來賴左，幫你換啦。

做完護士又抖一抖，見到咁大架道具車，梗係要影一影。不過架車好鬼假囉。

Isaac: 咁呢架飛機夠真啦掛。

飛機真唔真真係不敢評論。不過Isaac 換個套太空人衫，都幾真咁（因為無見過真架嘛，無得比較，哈哈）

唔知攝影哥哥同Isaac 講乜呢？講到Isaac 咁開心既。

笑完之後，又一面COOL樣。

Isaac: 嘩，噴火龍呀。我去救火先。

新年之後，Isaac 話想做科學家，要讀到博士喎。希望佢大個，真係可以完成博士學位啦。

Isaac: 咁我讀完博士，莎士比亞會唔會同我再握手架？

今次個遊戲係A＋免費抽到既幸運兒玩。正所謂人出豉油我出雞。玩完臨走，每個小朋友有三張紀念照賣⋯⋯係賣。每張一百。買齊三個造型既相就$270. 本黎媽媽係唔會買呢D相既。吖，就係見難得影到Isaac 可以笑得咁燦爛。好，就買一張啦。呢張係媽媽爸爸覺得最靚既一張。

至於呢張，其實好有紀念價值，因為平時無乜幾可著太空人。又笑到四萬咁口。所以又買埋。二百蚊走唔甩，索性買埋育嬰護士既造型照。卒之唔駛錢玩既情況之下，媽媽都係放低左二百七十元去玩。

玩完，Isaac 話好好玩，下次又黎過喎。好似去邊度玩，之後既評語都係話要再黎⋯⋯時間有限，咁可以去得邊呢？

橙咀妹

29 Jan 15 Claire 一向古靈精怪鬼鬼馬馬引人歡笑，十足爸爸性格。呢日食食下橙，忽然咬住塊橙皮扮咀巴。引起媽媽發笑，一於影張相比佢自己大時留念。

不過影到呢張，居然係比Claire 對手按實塊橙皮，唔係咬住扮大咀巴。ANYWAY，當時都笑死媽咪了。