學校小意外

27 Jan 15 呢日朝早，媽媽送完兩兄妹返學後，返到屋企一陣，收到學校急CALL。老師語帶驚惶述說Isaac 係學校跌倒，撞穿左個頭，而家流緊血，媽咪你快D黎學校睇下帶佢睇醫生啦。

嘩，聽到撞穿頭，又話要睇醫生。媽媽即刻飛出門口接Isaac 啦。路途上仲想打比爸爸報告報告，不過又唔知詳情，唯有見到Isaac 至再決定。

好在，所謂既流血，其實只係皮外傷。不過由老師陪同下，我地都飛的去左附近一間診所，貼老師介紹既吻合膠布。尤其係醫生話傷口都少少深，又係面上，無謂聯針，不如貼吻合膠布等傷口自行復合。睇完醫生，Isaac 好想繼續返學，不過老師們一口拒絕。Isaac 唯有無奈咁跟媽媽先返屋企。

 係診所離開到去輕鐵站，都唔駛九個字，但塊膠布已經現哂血了（下邊仲有層吻合膠布架喎）。

到下午三點幾學完英文，英文老師問係咪撞到頭，睇住D血不停咁滲出黎。呢塊膠布，係我地臨出去學野時換架。兩個鐘都無，又變到咁。

第一日整到，媽媽前前後後都換左四五塊膠布。不停咁滲血。好在原來爸爸識個醫生，醫生叫媽媽夜晚返診所拎多少少吻合膠布，自行係屋企再換。

28 Jan 15 放學後，塊膠布無咁多血了。

到今日，都三個月了。傷口依然係度。不過究竟點解會跌到咁深呢，真係謎一個。老師話Isaac 撞到枱角，但枱角係圓膠、地板亦都係鋪哂防滑墊。咁都可以跌完個傷口好整齊咁比人界左一下，都真係只有佢本人至知點解會跌倒，又撞到邊了。

可惜，Isaac 依然係話只係企起身睇黑板，咁就跣親。其它資料一概欠奉。所以，呢D咪就叫做意外，真係意料之外。到事後，依然無人知前因後果。只知面上多了一條疤痕。