迪迪尼買劍記

21 Dec 16 一年一度學校聯歡會又到，各同學每人帶一款小食返去分享，睇見枱上滿佈食物，真係HAPPY。難得今年學校家教會有資金多出，可以每同學一支巨大珍寶珠，開心死Isaac. 

放學回家，好快換完衫，因為媽媽張迪迪尼PASS剛剛過期，所以，呢次由爸爸出動，負責帶兩兄妹去迪迪尼。媽媽終於有得抖下了。

咁岩遇到IRONMAN 會員試玩日，媽媽提前幫三位BOOK左試玩。試玩後，三個都大叫好好玩，好想再去玩多次喎⋯⋯究竟有幾好玩呢？

IRONMAN： 你入黎玩過咪知囉！

 呢次爸爸大手筆，話送兩兄妹每人一支激光劍喎。仲要係自砌個種。一D都唔平囉。

Claire: 喂，阿哥，呢支貴D架⋯⋯梗係拎呢支啦！

 選完配件之後，各自要砌返把劍出黎。

Isaac: 嘻⋯⋯我好緊張呀，唔知砌出黎會點呢！

Claire: 我把係超長劍黎架！

 一砌完，兩個即刻係迪迪尼揮劍。

22 Dec 16 Claire 無啦啦發燒，呢日節目留係屋企抖下。不過抖既時候，Claire 都掛住佢新玩具－－激光劍。

Isaac: 睇我幾型～～

媽媽見到佢地由迪迪尼拎劍回家時，已經無眼睇。唔係好明點解女仔要買劍⋯⋯睇下，兩個就索性係屋企對打。女仔人家咁粗魯，真係令媽媽愁一愁。

活潑女馬騮架提升玩法。三繩齊跳

16 Dec 16 放學無野學，例牌節目，就係玩下公園。呢日有個小朋友，忽然咁爬馬騮架，雖則無乜特別，但Claire 只係岩岩學識爬馬騮架，隔幾日咋嘛，就變左呢種爬法。媽媽真係覺得Claire 好厲害（按此觀看新爬法）。

下午學完野，順道買了一些餸菜同下午茶回家，有個小妹妹好主動咁幫媽媽拎哂所有野，真係好窩心呀。唔怪得人地話，生女會窩心D啦！

18 Dec 16 周日，Claire 繼續返下花式跳繩班，其實佢旨在唔係提升跳繩技巧，而係見下阿SIR一面。不過，呢堂難得跳三條繩，媽媽在旁看到，都覺得好亂呀～～～難得Claire 完全不受影響，值得一讚喔！（按此）

首次校際朗誦比賽－英文組（B）級

12 Dec 16 有個小朋友呢日做功課，有條題目係自由發揮。媽媽看到，真係笑左出黎。超爆有童真。此外，畫功也畫得很仔細，媽媽真的很欣賞Isaac 好仔細咁畫滿被子的圖案喔！

14 Dec 16 一年一度校際朗誦節又到，Isaac 表現很好，完全發揮了在家中練習的水準。連學校老師都覺得可以去比賽了。可惜，評判反而喜愛温和斯文的表達。故此，Isaac 在這次校際朗誦比賽，只獲B級成續咋。睇佢一副幾唔開心的樣子。真可憐。

Isaac: 媽咪，我得B咋⋯⋯點解既⋯⋯？

唔緊要，下次再努力。

首次參加校際朗誦比賽－－普通話組榮譽奬（A）

11 Dec 16 為左佈置新居房間，爸爸吩咐妹妹再補買夜光裝飾⋯⋯Claire 仲懶叻話爸爸係指定呢兩包⋯⋯影相比爸爸，點知，爸爸話妹妹買錯喎。ANYWAY，呢兩包夜光蛇，最後都貼左係兩兄妹的睡房內。

13 Dec 16 唔駛問Claire 早餐食左乜，睇佢呢副樣子，就知一定有朱古力。

Claire: 你估唔到我係邊個喎⋯⋯

 下午放學，帶Claire 係附近餐廳醫肚先。

Claire: 哼⋯⋯樣樣我都唔想食⋯⋯我淨係想食糖同抽玩具咋⋯⋯

 媽媽買左包橡皮糖接佢放學，因為，Claire 之後要去校際朗誦比賽。睇下呢位小朋友，拎到包糖幾咁開心（按此）。

出發去校際朗誦比賽地點時，有個人對包糖愛不惜手。

Claire: 我一陣一定要食哂呢包糖架⋯⋯

 之前係學校練習，老師對Claire 表現評價麻麻，話佢唔夠自然，聲線唔夠響。比賽之一晚，Claire 忽然係屋企練習時，加上狡猾的眼神⋯⋯媽媽即話好好呀。估唔到，比賽一刻，Claire 真係用返早一晚係屋企練習時的眼神，獲得評判讚賞，眼神自然流露童真，夠哂活現詩歌的感情。好開心，首次參賽，居然獲得A級榮譽奬。全場只有六位同學有咋。

Claire: 媽咪，我得左啦⋯⋯

 其實係宣佈Claire 獲奬一刻，媽媽真係感動到想流淚。媽媽實在估唔到，妹妹可以獲得這個成績。她的努力，實在沒有白費。希望這個小朋友，日後繼續努力，不要驕傲。

離開會場，有個人幾咁招積，拎住袋糖曉飛咁。

Claire: 哈哈，我都話我實會食到呢袋糖架啦！

飄雪＠迪迪尼

9 Dec 16 Isaac 學校放假。呢日可以帶妹妹學英文。路過商場有張3D佈景，有人話要影相喎⋯⋯迫唔迫真呢，就見仁見智了。

等妹妹學完英文下堂之後，我地又齊齊出發去迪迪尼了。今次好夜先去，目的係純粹比佢地睇煙花同巡遊。小插曲係响巴士站見到幼稚園校長同主任，佢地知道媽媽一個拖住兩個入迪迪尼，都好驚訝，話媽媽好厲害喎⋯⋯其實，兩兄妹咁聽話，帶出街真係無乜難度既。

入到迪迪尼，岩岩好天黑，準備睇巡遊。

睇完巡遊睇煙花。次次都話要睇煙花，但次次一路睇一路驚⋯⋯真係想點呢！

睇完煙花順著人潮離開，係美國大街見到飄雪呀。以往聖誕，迪迪尼都會有飄雪營造聖誕氣氛。估唔到，我地又遇到"落雪"喎。

Claire: 嘩，香港都落雪呀⋯⋯

有個人仔，笑得幾咁燦爛！就知佢勁開心啦。

我們三個的自拍照，看頭上幾多雪花！

忽然含羞的小妹妹和哥哥。

Isaac: 其實，我地好相親相愛架⋯⋯
Claire: 係呀～

Claire: 我真係好開心呀～～可以睇到落雪。

 就係咁，我地歡渡左一個好HYPER既晚上。歡欣咁等著"飄雪"放完，再聽埋聖誕歌，先出去停車場揾爸爸。因為，爸爸放工就會係特登黎到迪迪車場，車兩隻眼瞓豬回家呀。

終於識玩馬騮架。花式跳繩－胯下一

8 Dec 16 放學唔需要學野，例牌玩陣公園。呢日，Claire 忽然煞有介事咁叫媽咪行埋去睇佢玩馬騮架（按此）。嘩，真係唔經唔覺，居然識玩喎。大個女了。早幾日同同學仔玩公園，明明得個睇字，睇人點玩，估唔到今日忽然識。

因為下午又要返學校選拔中國舞隊員，所以，玩完公園，索性係附近餐廳醫肚。咁岩同學仔又去食喎⋯⋯於是，齊齊開TURBO做功課。Claire 仲好慷慨，借出文具比同學仔用TIM。

放學回家，見有時間，就的左Claire 落樓下練下跳繩，年紀小小的她，已經懂得胯下一側擺了。真係好厲害（按此），媽媽不得不刮目相看。Claire 不再係以前笨手笨腳的小妹妹了。

呢日，Claire 發現新事⋯⋯就係佢出左門牙了。嘩，大個女囉。咁快出牙仔。好快，Claire 就要面對甩牙既又驚又怕既感覺了。

IRONMAN出動同舊班主任影畢業照

4 Dec 16 周日約左幼稚園班主任影畢業相，Isaac 駛出計仔，變身IRONMAN，一於搶盡風頭。呢套衫全新架，係姨丈公司既玩具辦，可惜，牛高馬大既Isaac, 首次穿起已見吊腳。襯埋Isaac 係迪迪尼買既聖誕禮物 －－IRONMAN手套，簡直一絕。不過點解呢幅相，影到隻手無比咁大既呢？

姨丈有兩套比Isaac, Isaac 早前BBQ讓左套綠巨人套裝比進進。諗住叫進進呢日齊齊變身⋯⋯可惜進進媽咪唔比，話巨人裝好恐佈喎⋯⋯所以，進進改為美國隊長，加上呢個CYBER LOOK既背景，造型襯絕。唔知會唔會嚇親莫老師呢？

經過多年努力，莫老師終於畢業了。樣子依然青春甜美。我地好多人都好掛住佢呀！

難得係畢業兩年，呢位有心的班主任，仲會叫齊呢班豆釘，同佢出黎影畢業照。

雖則十二月，但其實仲係好好好熱囉⋯⋯熱到相中的兩姐妹，齊齊出動夏天裙就知啦。

這三個小學男生想點呢！！人地正正經經影畢業相，佢地就一副準備出動打壞人既樣子。

連媽媽都有份被邀一同拍照，真係受寵若驚呀～～

有媽媽，又點少得仔仔呢！企係莫老師側邊，Isaac 寧舍含蓄。

四個男孩子，總算比面。肯企定定同前任班主任合照。不過Isaac 就唔識笑，好委屈咁款囉。

我地由屯門公園，影下影下，影到返母校。真係有點攪笑。難得大家依然保持四萬笑容。

其實除左進進外，其它小朋友，對母校都唔會特別掛念啦，因為大家細佬妹仲讀緊呢間幼稚園。接送返放學，總會耐不耐經過的。

 影左一個下午，呢張應該算最有活力了。各自擺返自己的POSE。

影完相，各自晚飯，適逢聖誕臨近，商場又有聖誕擺設，Isaac 循例又要影返張先。

下次再同老師出黎GATHER，唔知又係幾時呢！