STAR WAR ＠迪迪尼

2 Dec 16 學校生日會，趁仲有迪迪尼年票，索性放學陪Claire 黎迪迪一趟。呢次目的，係要玩STAR WAR。因為平日，無乜人排，下午個場就已經玩到，Claire 上台時，一臉滿足！

不過正值日落西斜，個台係曬正。難為一班小朋友，仲要撑大對眼黎玩。

Claire: 你唔覺得好刺眼咩？

 其實當時都幾熱下，雖則十二月，媽媽都有點頂唔住熱既感覺⋯⋯難為佢地仲要披住件唔知幾耐洗一次既袍。媽媽望到都覺得臭呀～～～

Claire: 我淨係知好曬呀！！

 曬到成班小朋友要擰歪面唔望台上主角。

雖然等既時間仲多過打黑武士既時間，但Claire 依然覺得好開心囉。仲話要玩第二次。

玩完STAR WAR，同童童影完合照，我地就要走LU～～～

Claire: 我影張獨照先走啦～

 適逢聖誕，媽媽容許Clarie 係迪迪選份聖誕禮物。佢居然選左想買好耐既鎖匙扣。靚係幾靚既！但點解要買扣呢？

Claire: 因為可以扮警察同爸爸咁，勾哂係褲度囉。

為左呢兩個鎖，Claire 一沖完涼，就要揾條有得勾帶既褲黎著，為左要勾起佢既鎖匙扣。係幾可愛既。

順便一提，媽媽幾欣賞Claire 係選聖誕禮物時，係憑自己心意去選，而唔係刻意挑份大既。點解咁講？因為回程時，童童拎住盒大禮物，不停同Claire 講，佢自己選左份好大盒既聖誕禮物⋯⋯Claire 好在不為所意，因為，呢對匙扣，係Claire 恨左好耐想買的。媽媽欣賞呢個小朋友，清楚自己想要乜。唔受朋友影響，希望長大後既佢，依然咁有性格啦！