第一次食蘋果蓉 ＋ 肯食粥仔

29 Sep 11 呢日又試粥仔， 係第二日試食了。不過呢日好明顯進步左， 至少有食兩啖先。

自從病過後， 阿囡好似愛上左側睡同趴睡， 夜晚一定係趴轉瞓， 日頭有時就側瞓。呢日仲自己瞓瞓下捉住隻SOPHIE TIM。


媽媽叫工人煲既粥仔， 點知講黎講去都係煲到好杰， 好似爛飯仔咁。後黎要加水至可以似返粥仔， 但都係好杰～～～原來工人話佢未試過煲好綿既粥架喎 ＞＿＜ 咁又係既， 哥哥個時都唔係工人湊大。好難怪佢。 媽媽睇個樣好似好掂咁啦， 殊不知餵完後， 發覺囡囡做乜額係LUR 返幾粒飯出黎， 媽媽執黎食下， 嘩， 原來 D 飯好硬架～～～比煮生米好少少。總之硬過食飯。媽媽都唔明點解會煲到咁。以後真係要自己試食過至比妹妹食了。

肯食幾啖既妹妹。不過好似食到要求救咁。

Claire: 嘩， 我投降啦， 唔好再餵我食啦。D 粥好似未熟透咁。

30 Sep 11 經過摛日連續兩次煲既生米粥仔後， 呢日媽媽督導工人教佢煮粥。終於用左個新方法， 煮到都叫做食到入口既軟粥仔。媽咪仲可以餵到1／5個大人碗呀， 其實食食下， 媽咪都好担心妹妹消化唔消化到， 所以餵餵下都停左手， 餵返人奶算。始終妹妹體格既發育都係好似比較慢少少， 所以人地六個月要食固體， 妹妹都係慢慢黎啦， 總之返健康院時唔好比姑娘罵媽媽仲未開始試食就得了。之所以呢幾日不停試糊仔粥仔就係咁解。

Claire: 媽咪， 我今日叻唔叻呀？

Claire: 固體食物黎講， 我個人認為拳頭好食D。

Claire: 好悶呀， 坐係度， 有乜好做～～～ 媽媽： 女仔之家你放返隻腳落黎啦。

Claire: 我食到好悶呀～～～我想食奶奶～～～我想媽媽抱～～～

Claire: 我放返隻腳落黎囉， 你幫我抺咀仔啦媽咪。

呢日除左食粥仔叻叻， 媽媽仲試埋生果蓉， 呢日食蘋果蓉。不過好明顯阿囡第一個反應係好難食呀媽咪～～～～

試食餅仔

29 Sep 11 呢日媽媽買左餅仔比妹妹食。一返黎急不及待開比妹妹食了。點知妹妹開頭唔識食， 可能性格關係， 要睇定D先～～～所以見到哥哥食， 至慢慢含入口食餅餅

Claire: 媽媽， 你比乜野我食呀？


女仔之家坐都坐得衰過人， 無啦啦伸隻腳黎踩住樽餅。

 Claire: 我係想認住呢個嘜頭咋。

近鏡睇下隻魔爪

金口難開之試粥仔篇

28 Sep 11 媽媽懷疑阿囡牛牙仔， 牛到好忟， 呢幾日搏哂命叫。唔知叫乜， 仲要叫到好肉緊架喎。不過呢條片只係小兒科聲浪咋。妹妹真係大聲起上黎， 媽媽爸爸都要縮埋一邊（抱住妹妹時），因為真係好易聾架。


Claire: 你唔好破壞我形象喎， 我個樣呃得下人架， 斯斯文文咁


呢日唔試糊仔， 改試粥仔。仲要由哥哥餵， 點知妹妹口都唔擘大， 真係傷透小小年紀的哥哥心了。




唔食粥仔但一埋身呢， 又叫到大大聲，因為好肉緊阿， 要開餐食奶奶啦。

我真係好憎食糊仔架

26 Sep 11 呢日婆婆上黎, 咁岩撞正妹妹準備試糊仔時間, 就比婆婆餵下啦.
Claire: 唔好啦, 嗚嗚~~~~好難食呀

卒之第三日糊仔試食, 係一啖都入唔到口, 阿囡把金口撓唔開. 無計. 但一抱埋身呢, 就大大聲尖叫, 阿媽聾咁滯......尖叫因為鬧阿媽, 快d 比奶我食啦. 於是搏哂命食奶. 唉

Claire: 咁人地真係唔鐘意食米糊吖嘛

呢日下午, 媽媽好熱呀, 又無開冷氣, 因為兩兄妹都病, 媽媽熱到成身汗, 於是坐係妹妹隔離食雪糕, 吖, 衰妹呢, 睇住媽媽食雪糕時, 反而好似好有興趣喎.
Claire: 咦~~~~媽媽你食緊個d好似好味過糊仔喎

27 Sep 11 媽媽同妹妹沖涼時間, 嚇然發現妹妹做乜仲拎實個牙膠玩具架~~~~~

 Claire: 食飽牙膠咪唔駛食糊仔囉.

第四日試糊仔, 把口咬到實一實, 一條縫隙都塞唔入~~~~~卒之餵哂下巴食糊仔.

 Claire: 我做人好有原則, 唔食就唔食~~~~

呢日妹妹卒之有迹象好返, 無哂running nose, 咳都少左. 不過點先可以令妹妹肯食下糊仔呢??????

原來一套湊仔方式唔係萬能架, 阿仔當年邊有咁煩架. 兩兄妹簡直係天壤之別.

媽媽決定放棄糊仔, 因為四日了. 都唔食. 索性煲粥仔試下先.

第一次試糊仔之唔食篇

22 Sep 11 呢日媽媽唔係屋企， 工人可能悶得滯， 摷左媽媽買落但無帶過既夏天帽比妹妹帶。真係好， 買左返黎唔駛得個擺字。

呢日妹妹個病情好似好左， 無咁多咳同埋無乜RUNNING NOSE了。

23 Sep 11  呢日妹妹病情又惡化返， 唉， 唔知點解會咁。

 Claire: 我未好返你地就唔同我玩架啦？ 我好悶呀， 放我出黎啦。

 Claire: 我好悶呀～～～～無人同我玩。

 由呢張相可以知道， 貪心係人既本能黎。都唔知阿妹食得邊舊， 要學人一手拎住一個牙膠玩具。

 
玩玩下牙膠， 忽然又趴轉。媽媽索性放本書係前邊， 等妹妹有D野望下。
 

24 Sep 11 呢日周六， 媽媽本來一心打算上個星期試食糊仔既。但妹妹體格發育好似未READY咁。等多一週但妹妹又未好返， 但再唔試就六個月了， 要食粥仔。所以趁呢日係周末唔駛湊放學， 媽媽就改早左開餐時間， 方便之後餵完粥仔就湊哥哥放學。可惜呢， 由胎兒已經患厭食症既妹妹， 對呢碗野一點興趣都無， 擰黎擰去。唔知想點。


 Claire: 我想唔食野囉， 媽媽你咁都睇唔出咩？

25 Sep 11 揳而不捨係媽媽既精神， 呢日又再試下餵糊仔。有爸爸撩講野下， 妹妹係咁二食左兩啖啦， 真係難為妹妹。不過後黎媽媽試過， 又真係幾難食架， 可能媽媽用奶粉開啦， 所以媽媽諗住下次試下用熱水開算。 不過媽媽仲係好懷疑， 係咪妹妹仲未READY食固體呢， 因為條腰仲未發育得好硬淨。坐直個時都仲係少少LU埋咁。

 Claire: 我伸個懶腰先～～～

 阿妹呢輪瞓得好招積，最鐘意浪對腳上個音樂機個度。

呢日妹妹仲未好返呀， 仲要呢朝一起身真係涼到有寒意， 加上我地有海風， 唔覺意攝一攝都真係要著返多件衫呀。不過咁， 家下著多左衫既妹妹， 手腳終於係暖架～～～～媽媽反省左好多日， 究竟咁暖既手仔， 有幾耐無掂過。可能可憐的妹妹， 成個夏天比媽媽夾硬凍到傻架， 因為妹妹房個冷氣機係過大的， 但開得暖又會好焗， 已經SET到25度但仲係好凍要開窗開門走咁D冷氣， 不過媽媽記得個時妹妹既手無呢兩日咁暖架。真係陰公囉妹妹。可能個時都凍到傻左。經一事長一智， 媽媽以後湊小朋友會加偣注意了。

病左的女子足球

20 Sep 11 之前一晚開始， 妹妹好辛苦呀， 係咁咳。呢朝媽媽決定餵完奶揹佢出去睇醫生。點知撞正返大風， 又揾唔到帽， 唯有拎個頭帶頂住先， 遮到幾多得幾多。媽媽仲好熟手咁揹住阿妹出街睇醫生。
 

不過睇完醫生， 返到屋企又係咁玩。
 Claire: 媽媽， 我見到你喎， 點解咁得意既？

成條U型枕咁就比妹妹拎起左， 媽媽真係要諗下點搞好， 咪一陣識爬時， 真係跌落床都似。

Claire: 我想玩僕厘厘咋嘛

Claire: 你唔同我玩， 我拎SOPHIE 食算。
 估唔到一手就伸左隔離隻SOPHIE 食。仲要浪對腳上個U型枕到， 阿囡你個樣好嘆喎。

可惜囡囡精神時間好快過， 下午已經無哂電， 仲開始越咳越厲害， 不過無阻妹妹練女子足球既時間喎。

夜晚， 妹妹咳得仲辛苦， 媽媽睇見就覺得佢辛苦囉。仲要咳到喊， 可能有痰咳左出黎整住唔舒服啦。咳咳下自己趴左係到。


21 Sep 11 呢朝妹妹食奶正常返。不過可能藥力發作， 精神既時間無乜。通常都係瞓。
 下午媽媽見妹妹醒左， 比佢係地墊玩下。妹妹就仲係好努力咁想學人爬， 不過好慢速咁郁多過爬。

玩左一陣， 妹妹又要瞓了， 瞓到咁上下又搏命咳， 咳到自己要反轉趴係到黎瞓。
 媽媽初頭好担心會唔會咁趴， 會抖唔到氣架。

不過好在無幾耐， 囡囡轉左側頭瞓了。

囡囡， 媽媽希望你快D好返啦， 好辛苦呀見到你。最衰妹妹仲細， 唔係可以煲D川貝湯佢飲止下咳咪好囉。

體貼的仔仔

做左全職媽媽後， 有乜唔開心， 通常都係即刻揾阿仔或者揾阿囡呻。阿囡就會眼定定咁望實媽媽聽媽媽訴心聲。阿仔就會比少少反應。

呢日放學同仔仔沖涼， 媽媽問仔仔：不如媽媽返工工揾錢錢好無呀？
仔仔即好緊張咁攬實媽媽：唔好， 爸爸揾錢錢。
跟住係咁扯實媽媽慌死媽媽走左去咁。唉， 真係心都窩埋， 有幾唔開心都溶哂。

話說唔知幾時開始， 仔仔差唔多日日都問一次：爸爸做乜鬧媽媽既～～～

當然啦， 鬧人個位一向都唔覺自己語氣有問題， 以前話返佢語氣差， 就唔會認仲會誇細自己好温柔個聲線。家下有個公正大明既第三者， 仲要係天真無邪唔識講大話既小朋友， 成日都問呢句， 媽媽覺得係時候要反省下囉。又或者， 媽媽要有心理準備， 第時會比仔女喝罵， 大大聲聲仲要理直氣壯。媽媽有諗過， 寫低好似唔係咁好， 不過又咁， 兒時回憶有時都要寫下呢D， 等仔仔大個發覺自己做乜成日咁大聲鬧人時， 又或者唔開心做乜爸爸媽媽無係埋一齊時， 呢D點滴可以解答到佢心中疑團。

生左仔仔後， 媽媽好多時都做左忍者， 就係遇到明明想駁咀既MOMENT， 都係個心自己駁咀算。好阿Q。為既就係唔想比仔女覺得爸媽鬧交既感覺， 可能因為媽媽細個時就生長係一個父母日夜都鬧交既家庭環境之下， 所以媽媽唔想自己小朋友都係咁成長。

有時真係唔可以睇少兩歲小朋友， 呢日媽媽下午好簡單同仔仔講：媽媽唔開心呀。仔仔就會答咀：爸爸好大聲呀。
仔仔真係好體貼。呢個可能就係全職媽媽的苦與樂。

媽媽當然習慣左大聲既爸爸好似鬧交好似發老四既語氣啦。不過最唔開心， 係爸爸可能深信一樣野好耐， 諗左好耐， 潛移默化左好耐既信念， 卒之講出黎， 就係， 媽媽你唔嫁比我， 你都嫁唔出， 不過我唔同， 我都會結到婚， 結唔到婚我實揾到女朋友～～～仲要係唔差個D。

媽媽聽到其實係好唔想答咀， 因為係好無聊。不過爸爸一副得烕既樣， 媽媽唯有好無奈咁數下幾樣啦。然後不了了之。不過跟住又發生大聲事件， 然後， 媽媽就相信， 兩個原理其實係可以扯埋一齊既， 就係有咁既諗法所以爸爸成日咪好忟好唔願意又或者好厭惡咁應一應媽媽又或者大大聲咁呼喝囉。

所以呢日仔仔一問爸爸：做乜爸爸鬧媽媽？
媽媽即諗起呢個原因， 所以呢日同仔仔講自己唔開心， 其實唔係大聲咁簡單， 不過仔仔咁細， 唔會明架啦。無人知日後發生乜事， 不過媽媽覺得都可以記低， 留返仔仔大個睇返。

Isaac: 老師奬我貼紙， 點解媽媽都仲咁唔開心既呢？

再加兩條片， 一條係仔仔好可愛咁自拍自唱， 媽媽其實聽唔到佢唱乜歌詞。 唔知有無人聽得明。當然其它歌媽媽聽得明既， 媽媽無錄低啦。特登錄呢首歌係因為媽媽想仔仔大個睇返， 自己翻譯吖唔該。

另一條係， 小朋友真係小朋友， 玩個汽球都咁興奮， 真係佩服。

爬爬篇之氹氹轉

19 Sep 11 呢朝媽媽心血來潮， 放妹妹係大床上邊。事綠係爸爸媽媽留意到妹妹已經曉得爬得郁自己，不過子母床狹窄， 打橫趴係床時， 有時未必有空間比妹妹再爬到向前。所以呢朝就放妹妹係大床。 不過妹妹趴左係床， 只係望出邊既風景， 同哥哥一樣咁鐘意望街街。


大床唔得， 再試下地墊啦。吖， 一放地墊就反身。不過媽媽爸爸暫時未發掘到妹妹心頭好， 所以媽媽唔知揾乜黎引妹妹爬爬。唯有順手拎個公仔， 呢個公仔係當年哥哥爬前既大誘力黎架。

不過妹妹無爬前， 只係氹氹轉姐。點都好啦， 照放上黎留比佢第時睇返， 因為都唔知之後仲錄唔錄到。不過條片好似把BB講到好似叫軒軒哥哥個名咁， 希望妹妹唔好介意啦。其實媽媽係叫BB架。

轉到頭都暈既手軟腳軟相， 哈， 好似手腳都扭曲哂咁

Claire: 媽咪， 你係都POST呢張相啦  

呢日媽媽好攰， 所以下午食雪糕， 點知妹妹望住， 唔通妹妹又想食？？？
 Claire: 你食緊乜野呀媽媽？

半歲生日會 ﹣ 第二回

18 Sep 11  期待已久既半歲生日會， 呢日終於到了。本來一直諗緊好無唔去， 因為妹妹好似唔舒服， 但見呢朝一起身， 妹妹都無事仲要擘大喉嚨係咁叫， 即係好返啦。好啦， 就如期出席啦。

屯門友當然又係揾返上次小型生日會個旦糕搞手造呢個3D旦糕啦。好靚呀。


一家人黎張合照先  ISAAC: 咦～～～做乜迫人黎影相喎      CLAIRE：媽咪， 你咪迫咁埋啦。

話說呢個生日會， 有個造型奬， 媽媽諗住應該無乜人玩掛， 所以只係好隨意咁拎件鴨仔衫著， 點知黎到後， 嘩， 原來個個都悉心打扮架。

最靚既當然係好有MIX FEEL既ABBY 姐姐啦。 媽媽：ABBY， 你好望鏡頭囉喎              ABBY： 我想望下點解你對眼咁細既， 同我差好遠～～～～

最特別既， 仲有係咪叫做巫婆造型呢， 真係好靚喎。可惜影相睇唔出有幾特別囉 因為媽媽呢日著左對高踭鞋， 搞到高過KAREN 姨姨一大截TIM。

因為生日會係下午至開始， 其實朝早阿囡都無瞓覺， 一路撐到生日會， 所以媽媽上半場係抱住佢暗囡囡瞓， 中半場阿囡瞓左， 好啦， 食野吹水等走人既時間， 阿囡至起身， 唉， 所以都無乜機會滿場飛周圍影造型照TIM。

唯有臨走同ZOE 姨姨影張相， 做乜兩個都係BB囡， 但兩隻好明顯係相差兩個碼咁架～～～～～  ISAAC: 唔緊要， 我最搶鏡， 你地爭幾多個碼都唔係重點了

返到屋企睇相機， 媽媽問爸爸： 點解我地影得咁少相既， 以前仔仔生日會影好多相架喎
爸爸好無奈好無厘精神咁答媽媽：以前一個湊仔另一個咁得閒梗係影到， 而家一個湊仔另一個抱住個囡邊個影相呀？
媽媽心諗： 又係喎
～～～～再心諗， 咁下次一定要帶埋工人出去了， 免得阿囡大個睇返， 以為媽媽大細超呀， 生日會都影咁少相。
不過今次真係阿囡出不逄時姐， 成場都要暗住瞓， 無計。唯有再等下次影多D 相。

病倒了

15 Sep 11 

Claire: 等我睇下書書先


Claire: 媽媽， 我WEAR起個咀似唔似哥哥呀？

16 Sep 11  呢日終於捱唔住了， 都係要帶妹妹去睇醫生。醫生話係過濾性病毒感染喎， 其實點分細菌同過濾性， 媽媽都唔識。只係知道妹妹終於病左。不過妹妹好叻架啦， 係一間病菌屋生活左成個月， 捱到呢日至病～～～其實RUNNING NOSE左一段日子， 只不過呢日有咳， 媽媽唔放心都係去睇下。醫生話妹妹喉嚨好紅。
成朝無瞓， 睇完醫生返屋企食埋葯， 一次瞓左兩個幾鐘， 真係好安靜下呢日間屋。

瞓醒左既妹妹， 可能葯力關係， 都仲係呆呆地咁。無乜聲氣。


17 Sep 11 呢朝起身， 妹妹直頭起埋痰TIM， 唉， 仲要成日都唔出聲， 可能喉嚨真係好痛啦。陰公豬囉。不過媽媽仲係成日同妹妹講， 你好叻架啦， 捱左一個月至病。
 Claire: 一日都係你地惹病我。

呢日媽媽出左成日街， 淨返妹妹同工人係屋企。唔知係咪咁， 媽媽睇返相機時， 見到妹妹好呆呀， 好慘咁。 Claire: 我好嬲呀， 媽咪出街掉低我一個人。

 Claire: 究竟媽媽去左邊呀， 我好悶呀～～～

夜晚返到去， 媽媽嚇見妹妹粒聲都唔聲， 哎呀， 做乜咁架， 又無燒喎， 唔通係病到唔想出聲？ 凌晨個轉奶， 仲醒左兩次但又係唔出聲， 媽媽怕佢半夜醒左又唔出聲周圍碌， 一陣碌落床， 所以呢晚媽媽瞓係妹妹張子母床到。好讓媽媽隨時睇下妹妹有無YOUNG被同埋怕佢半夜醒左周床碌。

18 Sep 11 呢朝妹妹七點就比哥哥嘈醒左， 跟住妹妹又一齊大叫LU。好明顯回復生猛， 間屋又好似之前咁熱鬧。經過妹妹沉默左兩日， 媽媽而家寧願聽到佢日叫夜叫LU。

晨早流流周圍爬又不停咁叫叫叫既妹妹， 好明顯係好返哂囉。所以呢日會出街街。

Claire: 你睇我兩手托起個U型枕同枕頭， 就知我幾咁生猛啦。


妹妹， 媽媽希望你健健康康唔好再比我地惹病， 咁就好了。