復活遊濕地

18 Apr 14 呢日太陽猛烈到爆，不過無阻我地重訪濕地興致。可惜撞岩復活節假第一日， 入場既人排哂長龍買票。咁岩婆婆又去， 所以爸爸就排隊買飛；我地就先係草地暢玩。

Claire: 媽咪，睇下我！哥哥拖住我吖。

兩兄妹最鐘意係呢塊草地狂跑。咁岩影到呢兩張頗有動感既相。仲影到Claire 成條骨既外型TIM。

去咁多濕地， 第一次見到公仔出黎同人合照。當然我地第一次見咁新奇， 都一齊影返張留念。

一臉正經咁同婆婆合照。

蝴蝶小姐喎， Claire 梗係要同呢隻蝴蝶影相啦。

影完相， 我地係室內悠逛一輪。Claire 就係記得去呢邊既兒童遊戲間玩。

係室內玩左陣又玩左次室內遊樂場， 我地就去食飯了。

同婆婆影合照， 都要SHOW返個係濕地做既自製襟章出黎。

幾經辛苦至餵到衰妹食哂成碗飯。點知一食完飯， 就話要食餅（因為媽媽話食得快， 一陣TEA TIME有餅食）。點知衰妹係咁螺， 邊食餅仲邊話自己未飽喎。

Claire: 好好味呀～～～～呢D 至係我正餐黎架嘛。

之後我地行經漁塘， 有個傻妹見到魚魚。就摵自己大腿肉出黎， 話餵魚食喎。笑死媽媽。婆婆見到， 仲笑佢，邊度可以有肉摵出黎。哇卡卡。証明Claire 真係好瘦呀！！

女仔到爆既Claire， 一見呢D FIGURES， 又要走埋去影相。

之後， 我地正式轉口戰室外。咁岩見到棵浦公英， 爸爸就話試下吹走浦公英既果實。睇下， Claire 就好殘雞咁樣狂吹。

係浮橋附近， 其實都仲有個草地。Claire 一見草地， 又係起勢咁跑。其實都係一件好事黎， 睇見Claire 日漸敏捷的身手， 真係令人安慰。

Claire: 好攰呀～～～

估唔到次次去濕地， 我地都係玩到夠鐘關門至走。臨走見到呢堆石仔， Claire 又要走上去行。唔通細路仔都係鐘意咁？

小插曲一幕。就係Claire 執到支樹支仔， 係咁追住爸爸篤佢。仲好搞笑咁同爸爸講：你企係度啦， 你企係度， 我咁篤就唔痛架啦。

Claire: 咁係吖嘛， 你睇支野咁幼， 點會痛姐。

Claire: 喂， 爸爸， 你唔好跑咁快啦。我追唔到你呀～

呢日濕地都咁熱。再過多兩個月， 我地都唔知點黎好了。不過買左年票， 唔多點黎又好嘥。

曬燶 ＠ 橋咀島

12 Apr 14 呢日周六， 爸爸建議去橋咀島玩蟹。所以千里迢迢搭車又坐街渡黎呢度。時間仲早， 都算無乜人。咁岩又潮退， 所以我地可以行落石灘。往石灘方向行緊時， 見到前邊呢對父子都好温馨咁行。唔知幾多年後， 呢種情景唔會再有呢？

要去石灘， 必先經沙灘。一見沙灘， 兩兄妹都好鐘意停低慢慢玩沙。

成日都有機會玩沙， 難得第一次接觸石灘。對Isaac 同妹妹黎講， 係好新鮮既事黎。不過Isaac 對捉蟹就麻麻地。反而好落力咁揾螺同埋玩石灘中的水。因為好清， 同埋有蝦又有魚仔仲係石灘中間既水到游緊架。

爸爸即場示範點捉魚仔比Isaac 睇。不過Isaac 點會敢用手捉吖。最後當然無捉到。

玩完石灘去左海灘玩沙。開正 Isaac 個範。

睇下， DUMP低頭都仲見到 Isaac 笑哂口咁筆沙。可想言之Isaac 幾咁愛玩沙。

後尾， 仲掘左個隆， 比自己坐入去疏乎下。如果唔係太陽伯伯太曬， 呢日係幾舒服既一行。不過玩左大半日， Isaac 已經曬到燶哂。好可憐呀。

橋咀島玩沙玩螺玩蟹

12 Apr 14 呢日我地去爸爸講話有蟹捉既橋咀島玩。先係西貢碼頭坐街渡， 每位廿蚊來回。都算抵。呢艘就係我地坐既街渡， 都算大了。

橋咀島一落船就係沙灘。不過D沙好粗下， 好多石好多爛左既貝殼， 真係要步步為營至得。一見到沙， Claire 二話不說就要去玩沙。

之前上網SEARCH， 話橋咀島出名係呢種波蘿石。不過我地無澗水去另一邊， 所以全日， 只係見到一舊咁大把。哈哈哈。

第一次黎呢個島， 真係見識到， 原來香港都仲有水清既海灘架。不過咁多石， 點游呢？ 

我地著哂拖鞋涼鞋黎， 唔係為左游水；而係捉螺。呢個石灘除左蟹多， 仲有好多螺架。

哇， 原來捉既蟹唔係招潮蟹咁紅色架喎。不過我地臨走， 真係放返生架。比返條生路呢D小生物吖嘛。

係石灘見到舊痴滿貝殼既“化石”。

呢兩兄妹好起勁咁筆水筆螺捉蟹。無懼咁猛烈的太陽。

Claire: 等我睇下邊度仲有蟹先！

 呢三父子女， 好陶醉咁玩水玩蟹。媽媽就負責影相。哈哈。

橋咀島無野食架， 我地買左包包入去食， 加埋小食亭既燒賣腸仔， 咁就一餐。之後我地係沙灘玩水， 唔再留係石灘。話時話， 係橋咀島無食水供應， 連公廁既水喉都寫明係井水(仲要好弱水個隻）所以媽媽其實唔敢食小食亭既野， 係爸爸話乜都無所謂。

玩完石灘玩沙灘， Claire 一樣咁開心。

Claire: 好開心呀， 可以同哥哥一齊玩沙。

Claire: 嘻嘻， 我對腳唔見左呀！！！

估唔到四月既太陽咁猛烈， 去左大半日， 返到黎兩個小朋友黑哂。真係見到都心痛呀。咁呢個SUMMER 點算呀？ 咁快就曬到咁。

校服PARTY

7 Apr 14 呢日放學， 我地同以前BB班同學仔食飯， 因為洛洛生日呀。有媽媽形容呢次為校服PARTY。皆因大家都著自己校服出席。

咁岩主角今次識酒樓侍應， 所以兩圍可以HOLD到間房， 小朋友放左學就齊齊玩。估唔到成班圍埋， 無玩具都可以諗到野玩。

Claire 就自我玩樂都好開心。因為年紀同身型都差好遠， 所以其它大姐姐都無乜點同佢玩。

咁睇， 計埋Claire， 已經有四套不同校服了。

呢班小朋友， 都係Isaac BB班同學仔黎架， 而家已經咁高咁大了。

生日照， 唔少得主角父母。洛洛爸媽都係一對好關心細路既和善父母黎架。睇下當日大家幾咁温馨合照就知。

Claire: 媽咪， 睇我吹得幾叻。

Claire: 喂， 細路， 我玩先架喎。你唔好同我爭呀～

終於五歲了 ﹣﹣﹣生日會

6 Apr 14 

恨左好耐， Isaac 終於可以開個人生日會了。自從識左班同學仔媽媽後， Isaac 差唔多個個月都要去參加同學生日會。去多兩次， Isaac 就成日問媽媽， 點解佢生日時， 無同學同佢一齊慶祝，係咁嘈話要開生會。所以， 今年就同 Isaac 開生日會啦。之前仲特登揾左頂生日會比佢， 因為冒險樂園提供既生日帽比各大小朋友帶， 頂頂都係一樣既。為免唔見左個主角， 所以媽媽就特登為佢地預備左主角生日帽。

事前問 Isaac 想要乜野旦糕， 一如所料， 要韓國巴士既旦糕。問左好多間， 都話造唔到架消防車。最後都係上網揾左間叫CAKE HOUSE 去造。不過要三磅起。咁呢三磅同隔離兩磅真係好似差好遠咁。不過個色真係好SHARP， 至少媽媽見到， 都好開心。

今次生日會， 主要都係Isaac 同學仔出席。

今次生日會， 除左請返同學仔外， 仲有請左以前BB班（而家唔同學校）的朋友仔。媽媽每次見到佢地玩， 都覺得好開心。因為好難得， 只係同窗一年， 都仲可以KEEP到聯絡。

除左BB班時的同學仔， 今次仲有主內弟兄兼鄰居樂樂。真係好比面呀。 

今次生日會， 媽媽太忙預備， 當日無影到大合照。事後至發現原來無影到大合照。唯有揾張半照黎留念啦。希望日後都仲記得有邊個出席過呢次生日會吧。

跟住到家庭合照， 兩個仔女掛住切旦糕唔望鏡頭。睇黎以後生日會， 要先影一張合照， 至可以再比刀佢地扮切至得。

影完家庭合照， 由同學仔媽媽比返張， 居然望鏡頭既相。真係激死。

之前老師成日讚 Isaac 好照顧人。今次真係有相為証架。隔離兩個睇住Isaac 分餐具。媽媽睇到呢張相， 真係覺得好安慰。

         

Isaac: 哈哈， 好開心呀。今次生日會全部都係我鐘意食既朱古力黎架。

咦， 唔通 Isaac 食緊雪糕？ 非也。而係媽媽用雪糕筒裝住生果， 貪得意希望小朋友鐘意姐。難得仔女捧場， 真開心。

食飽飽， 又係時候去放電。呢個就係 Isaac 要係冒險樂園開生日會既原因。

Isaac: 我扮篤波呀！

臨走， Isaac 居然拋波拋到好開心。仲猛咁叫媽媽睇下佢掟入洞。

Isaac: 等我再掟過先～～～

話咁快， 呢個仔就五歲了。媽媽最近忽發奇想： 就係最緊要開心。叻同唔叻， 都係一個點黎既姐， 人生漫漫長路，有排學有排叻。不過呢個短暫的童年， 過左就無。真係最緊要佢大個後， 有個好既回憶就夠了。