一家貓頭鷹: 我三歲了

6 Apr 14

Claire 係三年前既愚人節出世。註定出黎係玩死媽媽。呢年，媽媽本來無諗住開生日會，因為Claire 其實無乜同學仔有私下聯絡。不過見哥哥講左成年話要開，爸爸又話同佢開生日會。順理成章，同樣四月出世既Claire，話咁快就開第一次既生日會。不過睇返相，好似呆呆地咁，唔通太眼瞓？？

講生日會前，點都要回顧下三歲既Claire 而家長成點先。首先，依然係古惑，更加古惑。借口多多。唔知既真係比佢呃左。之前夜晚見媽媽搽護膚品，貪靚既Claire 點都要搶黎搽，仲大大聲話係一齊用既。媽媽心諗：邊個話同你一齊用架～～～～

最近，媽媽放工回家，見到護膚品開左蓋無蓋返，另一支又放左係一邊。心諗，唔通工人姐姐偷用？細細聲問Claire，見Claire 面有難色，跟住話：我搽少少咋～～～～謎底就係咁打開左了。

又一次，媽媽同哥哥沖涼出黎，一開廁所門見Claire 企係門口面有難色，媽媽心疑之際，一手拖住Claire諗住問下乜事～～～咦，做乜手袖濕哂架～～～原來Claire 拎左個玩具桶駁腳，企高係廚房昇盤玩水。哎呀，點解咁曳曳豬架。三歲既哥哥唔敢咁危險架喎。當媽媽話佢時， Claire 又借口話幫工人姐姐倒左碗水咋嘛～～～暈!！！

三歲既Claire 唔知係咪比爸爸縱慣左。唔識戒口。明知自己病，都仲要偷食一兩啖糖同惹痰既食物。早兩日咳到死死下，媽媽同Claire 講，雪櫃有提子留返佢好返食，枱面個合提子係哥哥的。點知媽媽一走，無幾耐收到哥哥喊住打黎，話Claire 打開佢個食物合拎提子食，叫佢吐返出黎又唔肯吐。哎，真係激死媽媽。明知自己病，媽媽一早講左唔食得。都仲要偷黎食。呢個囡呢，大個點算呀！！咁都忍唔到口。

三歲既Claire 同哥哥好唔同。媽媽未見過Claire 主動畫野。不過成日聽見佢好大聲唱歌。唱完仲會加多句問你：好唔好聽呀？

三歲既Claire 超愛扮大人。出街無論去邊，都會記得帶一樣野：就係手袋。手袋內可能全部都係書，又或者係玩具又或者係紙巾。總之隨手拎到既都有。一起身第一件事唔係去照鏡，而係隨手拎個手袋勾住自己個身，跟住會揹足全日(如果唔駛返學，個手袋會跟到佢瞓覺為止）。真係女仔到暈。

Claire: 講咁耐，開始講生日會未姐？

之前揾左好耐，最後揾到一間叫KAREN 既TAILOR MADE CAKE SHOP。可以比我訂兩磅旦糕。之前諗住Claire 會鐘意公主旦糕啦。點知比佢睇相，乜公主都話唔好。反而見到動物就好開心。所以，按佢所講，鐘意大象，BEAR BEAR 同獅子，卒之呢個CAKE 係有呢三種動物。至於呢個公仔，我估好多人都以為係代表Claire。其實，當日最原始構思，係想做LEGO造型加埋LEGO 有個女仔樣的LEGO的。但KAREN話LEGO太複雜，建議只保留LEGO個女仔頭喎。咁所以，有幾多人認得呢個係LEGO既女仔頭呢？？連媽媽都唔認得囉。哈哈哈。不過， ANYWAY，呢個旦糕係幾好味既。加埋佢可以只接受兩磅，真係好有彈性囉。

呢次生日會，九成食物都係媽媽自製。真係用左好耐時間搞。其中一樣就係最近好HIT 既CAKE POP。睇相又真係幾靚架喎。唔怪得當場各媽媽都大讚啦。哈哈。最緊要大家開心。

雖然無Claire 同學仔參加生日會，不過呢次生日會，都有朋友仔係識Claire 既。所以都算有人同Claire 慶祝架。有Circles 姐姐。

又有鄰居加主內弟兄樂樂。

除左朋友仔，仲有錫佢既三叔。呢日特登請假幫手影相，真係唔話得呀！！

今次生日會有個最失策之處：就係影唔到大合照。因為三叔比班父母迫到好後，埋唔到前影相。而問返出席既父母，都係影自己仔女，所以無一張全體合照。無得留念TIM。唯有留部分人影先啦。

嘩，一齊唱生日歌了。

Claire: 我真係好感動呀～～

感動還感動，兩位可否望下鏡頭呢～～～～難得一張家庭合照喎。

Claire: 其實我好似有少少眼瞓呀！！

Claire: 唔～～咁樣食生果又幾特別喎。

Claire: 喔～～～估下我食左乜生果入口？

Claire: 都係唔好顧形象，摵爛食好似好味D～～個筒。

Claire: 好肚餓呀～～唔好理形象咁多，食左至再講。

Claire: 媽咪把我打扮到公主咁。其實你覺得我似唔似公主吖？

因為今次生日會有兩個主角，媽媽就吩咐兩位小主角，各人分發一份小禮物比來賓。估唔到年紀小小既Claire ，真係做足架。好盡責呀～

Claire: 我等媽媽同哥哥比左，我至再比呢袋先。

Claire: 呢袋你既～

因為媽媽好忙，所以我地今次無每個小朋友都影張留念照。失策失策。希望下次會做好少少啦。不過今次我地21個小朋友出席，訂左五磅旦糕，全部KO哂，無留低呀。勁。因為媽媽出左旦糕分哂每人一碟，至拆開小食既包裝。咁大家真係唯有聽話食旦糕了。呵呵。
食飽哂又去玩。呢個“公主”呢～～～唔單止戴公主帽，仲拎埋個公主波。襯到唔襯。