一家貓頭鷹: 2月 2015

2015年2月28日星期六

同學仔新年放電

2 Jan 15 呢日約左哥哥同學仔一齊去YOYO屋企放電。兩兄妹對呢個會所，一D都唔陌生。一入去二話不說即除鞋各自放電。

黎左呢度三次，三次都包場咁滯。呢個會所真好，激少人，應該很乾淨。不過每次都被呢班同學仔喧嘩鬼叫嘈死了。

今次心血來潮，錄低左傻妹妹玩呢架直昇機既傻笑樣（按此進入觀看）

Claire: 媽咪，我轉完走啦，你仲錄？

呢兩兄妹，唔知做乜，成日玩滑梯，都額係鐘意一齊SIR。

成班細路係個密室放左近兩個鐘電。大家都攰到暈哂，已經唔想郁咁滯。咁唯有上YOYO 屋企開餐啦。

Isaac: 哎，我好肚餓呀，食得未架？

成班細路熟哂駕步，其實大家都無乜點食野，扒兩啖個個喊飽，走哂去玩。Isaac 恨左好耐，終於呢日可以一嘗帶超人腰帶既滋味了。

臨走，應其它媽媽要求，大家黎一張例牌合照。

Isaac: 唉，有乜好影姐？？？？
Claire: E⋯⋯笑⋯⋯哥哥，快D笑啦。

呢班同學仔，希望 Isaac 大個仲可以保持聯絡啦。始終兒時好友可以維繫純真感情，真係好難得架。

幸福除夕日

31 Dec 14 呢日我地去左玩充氣嘉年華。Claire 一心去到好多野玩，點知我地去到尚早，乜都未開，以佢年紀，真係等左一個世紀咁耐，至可以玩第一樣野－－就係賽車。皆因呢個玩意係正入口，係人入黎都見到，以細路仔性格，梗係要排餐死玩左先。可惜架車對Claire 黎講，好似有點兒大⋯⋯

Claire: 我覺得頭盔仲大呀！

以Claire 腳仔同腳力黎講，去到某D位，真係卡實左。要人推一把。

Claire: 睇我幾型。

Claire: 我真係好用力去踩架⋯⋯睇我幾叻。

玩左一次賽車，當然進入重頭戲，就係特登為佢黎玩既充氣彈床啦。

睇下Claire 笑得幾咁開心，就知佢勁愛呢個玩意多過賽車。

跌低都要笑得開心過人。

Claire: 媽咪話我跳多D，就可以高D架啦。

Claire 有次曾經同媽咪閒談，話有個小朋友好可憐，因為佢無哥哥，又無爸爸媽媽陪。喔，原來咁細個小朋友，已經知道乜野係幸福了。Claire 真係仔細深得哥哥愛錫。到今日，Claire 仲係哥哥愛護既人黎。睇佢兩個連玩彈床都要一齊就知啦。

Claire: 其實我一個人SIR，都夠膽啦。

呢兩兄妹，正一糖痴豆。睇阿哥去左騎馬，Claire 無得騎，但Claire 個心去哂阿哥到，一心保住阿哥⋯⋯隻馬。

Claire: 唔駛驚，我按住隻馬，你唔會跌落黎架。

短短個零鐘，熱到暈。玩完即走去食飯。哥哥就趕住去返學。原來有兩個小朋友既除夕，就係咁樣渡過。

除夕跳彈床

31 Dec 14 除夕無節目。不過因為媽媽全職湊仔女，加上見到端午節玩過既跳彈床活動，又再ENCORE。點都要幫仔女申請玩多次架啦。我地一早去到，未開始有得玩，但見門口有正賽車玩，Isaac 死都要排隊玩呢味先。等左兩輪，終於到我地啦。嘩，牛高馬大坐左呢架賽車到，好FIT咁喎。

Isaac: 唓，媽咪，你即係笑我姐。

近鏡睇下，真係岩哂 Isaac 身型架。唔會顯得 Isaac 太大件。

今次呢間公司搞既免費充氣嘉年華，媽媽覺得商業味太重。之前明明全部 FREE PLAY，今次就限左某四個只可以跳，仲要係跳滿入場票張格仔，就無得再玩。如果想玩其它望落好似幾好玩既充氣彈床呢？多謝每位小朋友先付一百大元入會費，咁就可以全場任跳⋯⋯⋯⋯WELL，我地咁岩趕下場返英文班，當然唔會比呢兩百蚊幫兩兄妹申請入會啦。加上真係感覺好揾笨，兩百蚊又要排又要等，任跳都係咁話，NO WAY 了。