名古屋之旅 DAY 4 － 臨病晚餐。鮨 魯山

25 Mar 15 由奈良坐左兩個鐘車返名古屋。CHECK IN完我地拿拿臨彈出駅上面既鮨魯山本店食晚飯。呢間食店，係向日本食評網揾到，果然係日本人為主。好似唔見有遊客。等左成個鐘，至到我地。入到去，大家又餓又攰。難得大個仔女去旅行，爸爸比佢地一人一客魚生兒童餐。不過，睇下Isaac 就知個晚大家有幾眼瞓啦。

Claire: 嘻嘻，但我唔眼瞓喎。

 雖然話哥哥眼瞓，但其實最攰最眼瞓最病個位，係媽咪本人。呢餐，係臨嘔之前既晚餐。

超濃既麵鼓湯。好記得嘔個刻，係呢種味道嘔返出黎。一句講哂，成餐貴野嘥哂。

呢盒係爸爸既便當。

呢餐食左都唔記得幾錢，不過就好記得，食完已經唔舒服。卒之返酒店獲利回吐。真係無陰公。點解會嘔？就係凍左幾日既後果，嗚嗚嗚～～

名古屋之旅 DAY 4 － 奈良公園

25 Mar 15 屈係呢間松阪酒店住左一晚，真係住多陣都怕怕。呢次旅程終於見識到三重既鄉下特色： 就係伊勢同松阪明明係觀光點，但係酒店卻係好得人驚⋯⋯

可能呢間酒店太時鐘FEEL，又太佬FEEL（好似機器佬入住多）。所以，早餐成本比較低。呢個送既早餐，只係港紙廿幾元。見咁細份，價錢唔貴，我地豪不猶豫就要多一份。反正附近係荒蕪一片，揾唔到食也。

Claire: 好野，我第一次一個人獨霸成份早餐。等我慢慢摵蛋殻先⋯⋯

其實呢間餐廳原來只係開早上。媽媽其實好懷疑究竟佢點揾食。仲要係呢間咁既爛鬼酒店裡邊開喎⋯⋯

食飽飽，我地驅車去奈良。無錯，係由松阪去奈良。因為爸爸話，要帶小朋友去餵下鹿喎。所以，爸爸無視來回四個鐘車程，都要去喎⋯⋯四個鐘，真係坐到屁屁痛呀！明明係名古屋三重好凍⋯⋯點解去到奈良，一落車⋯⋯嘩～～好熱呀。

又一張温馨的兄妹合照。每次旅行都一張，睇住佢地越大越相愛。

幸好Isaac 到而家都仲咁嗲媽咪。唔知下次再去旅行，會唔會仲有呢個情境呢？

嘥兩個鐘坐車，就係為左呢隻通街都係既鹿。

鹿：喂，細路，你有無帶野黎探我呀？
Claire：我地買左好多餅餅黎呀。

Claire: 嗱，食啦。好味架。
鹿：唔⋯⋯咁就乖喇。
爸爸： 阿妹，唔好行咁埋呀。

Isaac: 我又要試下餵⋯⋯不過我好驚呀。我企後D先餵。

鹿：喂，你地行咁後，我食得好辛苦呀。好心你地行埋D餵我啦。

誓估唔到，妹妹Claire 一點都唔驚大隻過佢既奈良鹿。好好笑，仲要追住兩隻鹿去摸同影相，搞到最後鹿都驚左佢。

Claire: 埋黎我度食餅啦。仲有一塊好細塊架。

Claire: 喂，呢度有隻鹿呀，快D埋黎睇下吖。

追鹿追到另一端大草地～～

Claire: 埋黎食啦。

Isaac: 你唔好食左我手指呀～～

Claire: 嘩，你好乖喎，行埋黎比我摸。

嘩，奈良公園另一端，一片草地滿天白雲，好舒服呀。岩哂小朋友狂跑。如果香港有呢種大草地公園，咁就好了。

Claire: 媽咪，我又揾到另一隻鹿合照呀。

Claire： 喂，你唔好走啦，比我摸啦～～

Isaac: 咁好天，我都係影下風景好過。

一望個天，就知同三重縣既天氣差天共地。呢度熱到要不停除衫。

離開奈良公園，我地點都要去返奈良既中谷堂食呢舊當年好回味既草餅。不過，媽媽覺得無想像中咁好味～～～可能口味不同了。

因為無諗到食乜LUNCH，所以，好順其自然咁行到去奈良駅附近既食街，咁岩見到呢間食店做平日LUNCH 特價餐。於是乎入去一人一餐。睇個餐牌就知幾咁抵。四十幾蚊港紙一個日式LUNCH，平過香港好多了。

呢度四十幾蚊，係咪抵到嘩嘩聲。

三個餐，已經飽到上心口。

不過行去拎車時，咁岩見到紅豆燒，媽媽又話要買兩個比兩兄妹試下喎。

Claire: 好好味呀～～～

奈良行程完畢，我地又勁白痴咁坐兩個鐘返名古屋去也～～

名古屋之旅 DAY 3 － 松阪城跡。牛銀松阪牛

24 Mar 15 離開鳥羽後，我地直驅松阪去也。去到松阪，見仲係好早，諗住揾間超巿行下買下生果。點不知，好似去左個荒島咁，好似百無。又無WI-FI CHECK，所以，我地憑記憶，徒步行去阪坂城跡參觀。其實個時已經四點幾五點，天氣越來越凍。真係凍得我騰騰震呀～～

不過見到疑似櫻花，點都要擺下POSE啦。

咁岩遇到個香港中年女人，佢好大聲話係梅花黎。其實我地唔識觀花。所以唔知梅花定櫻花了。只知我地無乜花緣，難得可以係碰碰撞撞裡遇到花，都影一影全家福啦。

城跡好食風，真係呼呼聲，無遮無擋。難得影到一片藍天。

難得兩母子影到咁FRIEND，唔知幾年後，Isaac 入小學後，會唔會仲咁痴媽咪呢？

Isaac: 會架，我成日都話自己唔結婚，會同媽咪一齊住架啦。

松阪城跡望落去的松阪巿。其實唔係咁靚。不過我地早左到松阪，又未到晚飯時間，所以至黎磨下時間。

事緣幾日前，媽媽已經托酒店幫手BOOK松阪名店和田金，點知幾間都話BOOK唔到。我地一直唔信，直到入住松阪巿酒店當日，松阪巿酒店負責人至詳細講比我地知，原來呢日係和田金定休日。唉，我地特登安排呢日黎松阪，就係想食正宗松阪牛，點知定休，無理由翌日又特登就時間返黎食。所以，我地唯有改去另一間都叫做出名既牛銀食松阪牛。點知牛銀又無得臨時BOOK位，我地踏正佢一晚飯時間開始，即入去拎位食牛。

牛銀既餐好特別，一點就要雙份上，所以，我地唯有點個雙人份既特選松阪牛。另外再加個燒牛肉小食。點知，份小食真係好小囉，哈哈。

嘩嘩嘩，雙份松阪牛既份量，就係咁多架咋⋯⋯

話時話，就係呢鑊牛，要二千港元。好貴呀～～～片片一百元。不過兩兄妹食得好滋味。

隨餐附送生雞蛋，可以生撈飯食。咀勺的Claire 食得津津有味，可想而知D牛肉有幾咁好味。

爸爸略略數過，呢餐松阪牛大概只有十幾塊牛肉。即係每塊一百元港紙。

之後，我地係附近超巿仔，買左士多啤梨同布甸返酒店嘆。

嘩，有人好嘆呀～～

Claire: 唔～～好味～～

Claire: D士多啤梨好好味呀～～睇我食得幾咁滋味。

名古屋之旅 DAY 3 －海女小屋 ちさと

24 Mar 15 係鳥羽觀光碼頭落船後，個邊得一個擺明比旅行團水魚購物既商場，上左駅過另一邊，行前少少，原來有一條叫做駅前商店街既物體。其實呢條所謂既商店街，實在唔見有乜商店囉。其實只係一眼望哂既數間食店。

出發前，做定哂功課，TARGET左呢間海女小屋　ちさと。原來間店好細。一入去，全部日本人，好似居酒屋FEEL咁，又食煙又飲酒不過加埋新鮮海鮮而唔係串燒。入到去，得我地有小朋友，可能地方真係好狹窄，日本人帶住小朋友都唔會黎幫襯掛。

超大隻的扇貝。

龍蝦龍蝦，我地今次黎係食你架。

相對香港食海鮮，鳥羽龍蝦同鮑魚，一點都唔貴了。2500YEN有原隻龍蝦刺身或者鮑魚刺身喎。香港呢個價錢邊食到，就算有跳樓價，都驚唔乾淨。

好彈牙鮮甜既龍蝦刺身呀。一生人黎到鳥羽，梗係要試下。

Claire: 影完未呀？我想快D食龍蝦呀。

大過手掌既燒鮮蠔。好味呀。平時我唔食蠔架，但呢度真係好鮮味。

鮮味到，我地再ENCORE⋯⋯不過係新鮮唔再食燒，試下個分別。一樣咁鮮甜。

一入門口見到燒緊既特大扇貝，我地都唔執輸。一人點返一隻。

呢餐海鮮美味餐，新鮮好味過香港多多聲。不過價錢以食海鮮黎計，真係唔算太貴⋯⋯幾錢？睇返MENU慢慢計返咪知。哈哈。