名古屋之旅 DAY 3 －海豚島

24 Mar 15 離開鳥羽花真珠，我地直驅車往鳥羽碼頭。晨早趕去碼頭，為的是上九點半船去到海豚島餵海豚同埋摸海豚至走人。點知⋯⋯⋯⋯

呢個碼頭原來都幾僻下。我地係鳥羽駅附近泊好車，都要行過去一邊至到。但碼頭附近係百無。不過，咁好既天氣，影相都幾靚既，唔理佢百無定點LU。

Isaac 見到個海女造形，話要影合照。媽媽同佢既既。

爸爸同兩兄妹影既。邊幅似D呢？媽媽已經特登選呢張似少少，無咁露崩既相POST。

我地雖然黎到鳥羽，不過無去珍珠島睇海女。因為上網睇評語，好似無乜邊個大讚珍珠島值得去。通常係買左PASS又唔想蝕，又或者跟團無得選擇，叫做去埋。所以，我地無PASS既又自由行既，純粹影張海女像算了。

我地係坐呢架船出發往海豚島。外觀好靚。

海景都好靚。只係大約十分鐘就抵達海豚島。

一到海豚島，對下時間表⋯⋯咦，點解同網上做功課睇既差咁遠架。乜活動都無得玩，只係睇表演，我唔制呀～～～我地特登黎呢度，只係想小朋友可以餵下海豚摸下海豚SAY GOODBYE姐。一樣都做唔到⋯⋯嗚嗚，原來話係海豚病左。要休息喎。嗚嗚⋯⋯

唯有係門口隔住玻璃睇海豚。

爸爸聽到有吊車，不過無安全帶。爸爸話梗係要試下。因為安全問題，只係爸爸試。我地唔敢比妹妹試坐。始終山路咁危險，佢中途一郁，我地都救佢唔到。

媽媽就一拖二踩上個條好索氣既山路，上到山頂睇海獅表演。食風食到七彩。凍到變雪條至睇到海獅出場。咁近既海獅又無乜觀眾阻住視線，真係呢度至有。

講吸引度真係唔夠海洋公園 N 年前既表演黎架。不過呢度勝在無乜人，近近地欣賞。

既然上到山頂，睇完海獅又未到海豚表演時間，我地索性留係山頂吹西北風。呢兩兄妹就有得玩都忘記有幾凍。

Claire: 媽咪，一齊玩啦～～

一唔玩，就凍到要帶埋帽。真係勁後悔無帶羽絨黎比一家人著。

Claire: 唔緊要啦，我地呢度都有海豚餵。
Isaac: 係囉，呢D我唔驚呀。

係時候睇海豚表演。原來海豚表演係入口處海豚櫃閣樓架。

又係個句啦，唔算吸引。不過咁近距離睇海豚，對小朋友黎講，真係一件好奇又新鮮既事。所以兩兄妹都好興奮。只係爸爸媽媽呻笨。特登黎呢個荒島乜都無，諗住餵野都無⋯⋯
所以，我地拿拿臨見有回程船就即刻上船走。因為真係凍到無人有，無羽絨頂唔順呀～～～

媽媽： 嘩，上左船暖左好多呀。點解美人魚唔駛著衫架。好凍呀～～
Claire: 我攬實你啦，咁咪唔凍囉。

再見海豚島。下次唔會再黎了。

一落船，嘩，原來碼頭售票座野後邊，有空地有海望，仲靚過海豚島啦。其實唔上海豚島，又唔係咁凍既日子，呢度可以黎抖下氣架喎。

Claire: 係囉，我地係呢度都可以玩得好開心呀。

Isaac: 係囉，呢度一樣有跳躍既海豚既姐。

匆匆忙忙離開左個冰凍大風既海豚島，我地返到鳥羽駅都仲可以食LUNCH。爸爸一句： 都幾嘥時間。萬分認同呀。唔趕黎呢度，我地仲可以HEA 住係鳥羽花真珠再浸多兩次温泉都仲得。唉～～～