興趣--原來可以培養

一直以來, 某程度上, 都相信:

興趣, 係可以培養出來的.

除了食和睡, 對於我來說, 似乎都沒有什麼嗜好是與生俱來.

兩年多前, 屎忽痕膽粗粗學人去報名學日文, 理直氣壯覺得學曉一門語言, 坐到公司那個位, 都應該夠食力.

上完第一堂日文後, 有人問道: 你對日文有興趣呀?

好清楚記得, 當時是這樣答他的:

無興趣架, 不過, 我覺得興趣係可以培養的.

那時, 同行的兩人, 都嘲笑婆仔這種白痴的性格(其中一個還要是今天的老公大人). 還當頭潑了婆仔泠水.

幸好, 婆仔骨子裡就是很倔強. 越是冷言冷語, 我就越是要做到.

人家一般用起碼兩三年或以上的時間, 才浸到個日文三級能力pass.

很感恩, 渾渾噩噩地用了一年半時間, 由零級衝到三級pass. 中間跳了四級, 所以由四級至三級課程, 是自修的.

然後, 又停了日文接近一年時間, 又是屎忽痕走去報名日本文化協會的入學試.

對著那份入學試卷, 難過登天. listening 百分百的亂撞. 心想會石沈大海.

又很蒙恩, 竟然讓我pass了.

下年開始, 恢復日文上堂的生涯, 向二級進發.

三年前, 屎忽痕學人報名跑馬拉松.

不是為興趣. 而是想臨老時, 有點東西可以回憶和留給孫兒留念.

那時, 沒有跑步的習慣.

屎忽痕地撩人參加跑半馬, 亦即是 21 公里.

身邊的人聽到, 沒有一個不給與嘲笑和睇死你的表情(so sorry既呢, 其中一個, 又是老公大人).

自己其實都沒有信心, 第一次跑半馬可以完成整個路程.

不過, 又是那個話, 越是看不起, 我越要做給你看.

臨跑前夕, 老公大人依然堅信婆仔不能跑足全程. 多謝他, 因為他看不起, 所以, 要做給你看的不死心態, 讓婆仔撐足整個賽事.

最後, 令每個人跌眼鏡.....兩小時廿分, 跑完了21 公里. 同行參加的男性友人, 比婆仔快十多分鐘.

今天, 有人問道, 你平時通常做什麼, 我會想想, 然後答他:

温日文, 和跑步囉.