乜咁好記性

5 July 11 呢日婆婆唔得閒湊妹妹, 所以媽媽請左假, 單拖一個人捉埋 Isaac 出尖咀陪媽媽扮下靚. 未出門口咋, 仔仔已經話唔搭火車, 話黑猛猛喎. 媽媽心諗, 乜你咁好記性呀, 我地十年都唔搭一次西鐵, 一個月前搭過一次你咁都記得.

千里迢迢去到海港城, 一心諗住同 Isaac 食個早餐先, 點知媽媽太耐無行街了, 原來新港個間新加坡餐廳執左笠. 成場都係食炒粉飯面, 咁早但的確真係有內地自由行已經扒緊飯食緊面囉. 媽媽真係食唔落, 但又諗唔到海港城邊度有早餐食, 唯有拖阿仔上海港城citysuper買好貴既面包. 貴到肉都赤埋但食唔出有幾好食既面包囉. 媽媽都係鐘意食 up dump 茶記既cheap cheap 平面包多 d.

一入海港城, 媽媽就好驚覺乜阿仔記性咁好架~~~~話說一個月前仲放緊產假, 媽媽又係拖住仔仔去海港城, 同佢講我地去揾玩具.............一個月後拖佢入海港城, 一入到去佢望到商場環境, 就同媽媽講去揾玩具. BUT SO SORRY呢, 媽媽要趕住返屋企接下半場湊妹妹, 所以今次真係特登出黎陪媽媽扮靚, 無得揾玩具.

第二個驚覺阿仔好記性, 係我地上一次上黎citysuper食野係講緊 Xmas. 半年過去, 但今次阿仔一上到去foodcourt 已經記得某個位係會望到大大個 DHL 既熱汽球. 係咁行埋窗口話去睇波波. 老年既媽媽已經忘記左自己好細個時, 都係咁好記性架囉, 只係大人善忘

Isaac: 好飲

  做媽媽既, 到今日 (梗係到今日, 因為只隔左三日咋嘛,呵呵) 都仲記得阿仔一飲呢樽果汁個反應~~~~雙眼發光好開心咁同媽媽講, 好飲. 然後繼續搏哂命去飲, 仲要好嘆咁擰哂身去望海. 不過阿仔好叻, 好飲都好, 你叫佢分享佢真係會識分享埋比媽媽飲的.

好快食完早餐, 又係時候行去陪媽媽修下眉, 點知行行下做乜阿仔唔係隔離既呢. 原來企左係度話要媽媽幫佢影相喎............嘩, 阿仔, 做乜你咁好記性架, 呢個位好似係一個月前同你黎海港城, 你又係企係度要擺pose影相架喎

Isaac: 你唔覺地下個圈似太陽咩

  媽媽: 你話似咪似囉

Isaac: 再黎多張

  媽媽: 嘩, 呢個pose 正呀, 鎖骨都現埋, 十足瘦版既媽媽咁.

Isaac: 我夠唔夠可愛呀?

第二次陪媽媽去修眉, 修眉姐姐已經認得 Isaac了, 當然又係讚 Isaac 乖啦. 呵, 媽媽心諗, 唔乖我都唔夠胆一個人帶佢黎仲要佢坐咁耐啦.

搞掂又要好趕咁趕返屋企. 企係巴士站熱到溶咁滯, 阿仔見巴士停低都好想衝上去囉, 簡直同阿媽一樣, 怕熱怕到傻.

返到屯門再陪媽媽睇醫生, 一個人坐係度玩等媽媽出黎, 媽媽比十個乖你.

呢日阿仔happy到爆囉, 返到屋企繼續好high咁狂跳舞, 媽媽話佢係咪飲左咖啡, 做乜可以唔駛瞓晏覺仲咁high 狂跳. 跳到咁上下, 爸爸返黎仲同佢落去游水再落公園玩, 開心死......卒之呢日阿仔傍晚六點幾瞓到翌朝六點幾, 足十二個鐘頭. 勁. 做 bb 都無瞓得咁多.