又去公園

22 Apr 12 呢日周日, 因為之前都成日落雨, 搬左去新屋後, 媽媽都唔得閒點同仔女出去玩. 趁呢日周日, 居然暫停一日落雨, 媽媽興起就捉住工人姐姐, 帶埋仔女出公園玩. 爸爸話要留係屋企喎. 
帶頭陣既係妹妹, 跟住係踩緊單車既哥哥.  

Claire: 我又想踩呀~~~

明明天氣報告話呢週落雨, 點知呢日好好天, 仲好熱又好猛太陽. 真係熱到溶咁滯.
Claire: 好熱呀~~~

本來係玩吹泡泡, 但哥哥玩到厭, 所以我地去左遊樂場玩. 睇下妹妹一玩滑梯, 四萬咁口.

Claire: 哈哈, 再黎過吖

熱到溶. 不過兩兄妹咁好彩一齊輪到有千秋打, 幾大都比妹妹試下啦, 妹妹第一次玩千秋咋. 仲要係兩兄妹一齊玩, 可以黎個大合照.    

Claire: 我坐左落去, 會唔會顯得我好細粒呀?

咁睇又好似有少少肉地喎, 不過以一歲年紀黎講, 都係細左少少.

Claire: 等我學哥哥咁, 自己挨前郁個千秋先

Claire: 都係唔夠哥哥高

臨走, 哥哥又要霸住部單車. 媽媽話, 要一人輪玩一次. 所以回程係妹妹既. 睇下阿妹坐左上去, 幾咁招積.不過妹妹好百厭, 鐘意企係單車上面, 好危險呀 

你睇你睇, 又企.