童真

我地屋企附近有間爬蟲館. 話說Isaac 歲半時由大肚媽媽同佢去過. 不過太耐又太細了, 梗係忘記左. 而家讀新學校, 學校同屋企之間, 如果行路, 都會經過爬蟲館. 所以爸爸最近都同佢去過一次. 就係呢一次, 令哥哥對爬蟲館念念不忘. 有時婆婆同佢經過, Isaac都要婆婆帶佢入去. 當然婆婆梗係唔理佢啦. 有幾次, Isaac同媽媽撒嬌, 話婆婆唔帶Isaac去爬蟲館. 咁媽媽就應允佢, 好啦, 媽媽放假帶你去啦.

呢日, 媽媽放假忙哂半天行程後, 就趕Isaac去瞓晏覺先, 因為經驗所得, 唔瞓覺, 去完爬蟲館即係要媽媽做苦力, 抱佢行返屋企. 咪搞.

一瞓哂晏覺, 就衝出廳問媽媽: 做乜唔去爬蟲館既~~~~嘩, 媽媽聽到, 即彈出門口啦. 因為妹妹仲未起身, 所以只係得兩母子去.

臨走, 條鱷魚終於游返出黎了. 之前唔知呢左去邊. Isaac 係咁叫媽媽踎低揾....但自己又唔踎低揾喎. 激死.

我地去到爬蟲館已經五點半, 所以只係行左半個鐘. 見仲有時間, 就比哥哥係出面早地hea一陣. 好有童真咁主動要求同烏龜影相.


除左烏龜, 仲有其它爬蟲模型, 但Isaac好精, 見到邊d會桔pat pat, 就唔肯坐上去. 只係肯坐蛇蛇咋.

係草地hea完一輪, 媽媽問要唔要去遊樂場玩. 一聽遊樂場, 即發哂光, 就話要去. 沿途見到個好大既球場, 又走左去通場跑放電. 阿仔你真係好有精力既姐i
 Isaac: 媽咪, 一齊跑吖

 我呢個懶媽媽, 全場係不停咁轉轉轉, 因為視線無離開過通場跑的Isaac. 睇住阿仔咁開心地通場跑, 一臉笑容, 媽媽其實都好開心. 原來開心係咁簡單. 媽媽係Isaac身上學到乜野叫久違的童真.

玩埋附近三個遊樂場, 玩到飽哂. 就去同婆婆公公食飯. 之後Isaac 仲自己點一個甜品. 食到咁上下, 仲無啦啦要媽媽幫佢影相. 仲比婆婆話, 你食到咁核突呀..... 

Isaac: 好好味呀媽媽....

 我兒, 你是我的愛子, 我喜悅你. 你教識媽媽乜野叫童真. 媽媽真係要多謝你.  睇到Isaac 咁滿足笑得咁開心.  可以成日咁開懷大笑既. 真係叫媽媽羨慕.

 

 

食飽飽, 又係時候返屋企沖涼. 比佢爭羸左車車坐, 就一臉開心. 不過媽媽而家話, 要一人一次, 要公平. 所以, 兩兄妹各人都只可以坐一半路程, 就要起身讓坐了.  好在暫時兩兄妹都仲可以受控. 希望以後都係咁好了.