首次參加普通話比賽

5 Oct 13 幾經游說， Isaac 終於肯踏出第一步：上台表演朗誦。無計， 媽媽都唔係咁想， 不過呢個世代， 真係唔做返D野增值自己迎考小學係唔得。諗黎諗去， 諗唔到憑乜要小學叩門取錄， 唯有靠幾攞奬。攞乜奬都唔知架， 點都要比機會發掘下既。所以， 呢次係第一次大家一齊去試。

今次比賽係文化中心。媽媽特登早D到達， 以免長途車塞車就煩。去到仲有成個鐘， 周圍行下影下相， 不過咁曬。Isaac 只係肯影一張， 之後猛話好曬呀， 好曬呀， 唔影啦。

似唔似文學書生咁款呢？

差唔多時間又未夠鐘入場， Isaac 拎左張紙係門口等， 呢個LOOK， 好成熟囉。

 好緊張呀， 終於出場了， 不過大會唔比錄影， 無得錄黎做紀念TIM。話哂第一次嘛。真可惜。不過， 估唔到第一次參賽， Isaac 出到去無怯場， 有返平時既水準。WELL DONE。

最後， 拎到個第二名。

Isaac 人生第一個奬杯。

Isaac: 阿媽， 我得左啦～～～～

咁開心既日子， 梗係要同今次比賽既指導老師影下相啦。無錯， 呢位指導老師係媽媽。不過， 媽媽仲係覺得 Isaac 仲有好大空間進步， 尤其係感情演譯呢部分。

 因為無怯場， 出到去又肯講， 所以， 媽媽一早講左， 可以去大遊樂場玩。輕鬆下。

Isaac: 媽媽， 我捉到條大魚魚比你呀。

Isaac: 等我抬去比媽媽先

Isaac: 媽咪， 你想食蒸魚定煎魚呀？

呢次處女出場拎到奬， 真係為Isaac 帶來好大信心。所以， 佢肯繼續報名參加第二次比賽。原來拎奬真係對一個無信心的人， 一個好大的肯定黎架喎。Isaac 加油喔。

冒險樂園生日會

1 Oct 13 國慶日節目係去同學仔生日會， 今次唔係會所或M記， 而係冒險樂園。原來蝴蝶村間冒險樂園有一個好似荃灣麗城花園間PLAYHOUSE既玩樂室架喎。不過今次我地係唔駛比錢， 因為生日會包場， 小朋友可以全日任玩。不過我地只係玩左兩個幾鐘咋， 因為之後Isaac 要學野， 加上地點唔方便。之後我地都無再返轉頭玩咯。

一去到， 見到個波波池迎賓咁。Isaac 二話不說唔認得阿媽， 跳左落個波波池到。

無啦啦做乜拎個大網黎執波呢？

好勤力喎， 好似返工咁， 執完一袋又一袋。

Isaac: 係呀， 我發現呢個池係噴波架嘛， 好好玩呀

傻豬仔笑到見牙唔見眼。呢個噴波池對小朋友黎講， 唔通好玩到咁？

跟住成班同學做乜， 舉起哂桶呢？

原來佢地發現呢個係另一個噴波機， 不過噴完出黎既波， 會儲埋一次過跌落黎。跟住小朋友覺得好刺激， 一跌落黎係咁撈， 仲要大叫。

又一個傻豬仔繼續玩緊撈波。

 玩左成個鐘， 開始開餐了。開餐前濟濟一堂影張合照。原來呢日都幾多同學參加架喎。不過食完野又散哂～～各自玩樂去。

 其中一個最快散水既， 咪就係Isaac 囉。食左兩啖同媽媽講， 好飽啦， 我唔食啦， 我去玩啦。明明平時食得多過同學架嘛。好明顯Isaac 個心去左玩囉。

點解Isaac 好似縮水變返BB個時咁架， 哇卡卡。

跟住仲趁人少少， 走左去SIR滑梯。

 玩呢D PLAYHOUSE最明顯見到 Isaac 大個仔左， 唔係佢自己一個去SIR滑梯， 都唔係佢開始自己玩。而係佢射槍， 唔知幾時開始， 變到有模有樣， 紮哂馬咁。好一個男仔呀

拎住袋彈葯都可以企到咁有型， 瞄準人射咁樣。 

Isaac: 哈哈哈， 我射中左敵人啦。

玩到無野好玩， 索性自己坐左上呢個噴波機到。話想睇下自己會唔會噴出黎喎。

 玩到夠鐘， 兩位老師走先。呢間學校的老師真係超有愛心。私人時間都騰出黎參加同學仔生日會。

Isaac 最愛的老師。成日問媽媽， 升左小學後， 呢位莫老師會唔會同佢一齊入小學教喎。

老師走後， 我地都差唔多時間要走了。臨走， Isaac 玩多轉點心車。又係喎， 入左黎成兩個幾鐘， 都無玩過推車仔。

除左車仔， 呢個轉轉波， 都係 Isaac 未挑戰到架。因為好難坐上去， 一坐左上去， 傻豬 Isaac 就會成個跌落地。唔知係咪關佢太大隻事， 嘻嘻。媽媽見其它同學好似好輕鬆咁坐上去轉既。

媽媽試左N次， 卒之夾到 Isaac 坐到幾秒仲可以影相。

Isaac: 快D趁我未跌， 影返張相比爸爸睇先啦。

去左幾次生日會， 呢次冒險樂園， 係 Isaac 放電放得最開心既一次黎。不過到今日為止， 媽媽仲諗緊去邊度搞生日會好。因為 Isaac 早幾日又提媽媽， 佢生日一定要搞生日會喎～～～～

M記生日會

28 Sep 13 呢日我地又出席同學仔生日會啦。嘩， 呢個世代真係多人搞生日會， 搞到Isaac 成日講， 佢生日都要開生日會。媽媽頭都大埋， 到時都唔知去邊度開好。

呢次， 我地去左M記參加生日會。不過主持人就好不文咁， 玩埋D唔岩細路仔玩既遊戲， 真係想COMPLAIN佢。

未玩前， 先影張合照。

就係呢位M記職員， 玩埋D兒童不宜遊戲。幾組都係女同女， 得Isaac 一個男仔， 居然要玩大HUG HUG。HUG都不特止， 之後仲離譜。

點解兩個笑到咁？ 因為佢兩個夠醒目囉， 知道主持人講既係兒童不宜， 所以兩位以笑遮醜。因為主持人話要咀對咀喎。搞乜呀， 玩結婚新人遊戲咩。

呢個正常D， 手指對手指。

腳對腳。兩個小朋友都肯做。

又黎以笑遮醜。主持淫話要鼻貼鼻。媽媽其實谷住條氣， 好想鬧個主持淫。真係淫到佢不特止， 不停要咀對咀鼻貼鼻。想點姐～～～～

谷住條氣谷到切旦糕環節， 見到個旦糕就下哂火。好靚呀。個旦糕好有心機砌個帆船出黎。後黎問左， 係聖安娜出品。睇唔出喎。

Isaac: 我想同個旦糕影合照呀

同學仔濟濟一堂賀壽。

玩左成場， 走個時至有機會同呢位靚靚主角影返張合照。巧曉同學真係好靚女呀。

旨在食@大美督

20 Sep 13 中秋翌日齊齊放假唔駛返工。我地約埋婆婆姨姨去踩單車。不過年紀仲輕既Claire 帶左私家單車去， 最後都無乜點坐過。走左去有瓦遮頭既家庭單車開餐。

Claire： 其實我鐘意食野多D囉

Claire: 咦，我好似聞到隔離飯又香D喎。

正當大家都釣緊魚時， Claire 又坐埋一邊開餐。似乎呢個大美督活動日， 對兩歲半既Claire 黎講， 都無乜吸引力咁。下次可能要諗下其它動態活動至得。

再戰大美督

20 Sep 13 見呢輪好似涼涼地， 所以， 我地約左姨姨婆婆一齊去大美督玩。點不知就撞正呢日曬正， 熱過之前幾日TIM。真係暴曬住玩， 辛苦到呢。

特登帶埋架單車諗住比Isaac 踩啦， 點知佢唔想踩， 要坐家庭單車喎。激死。好在都叫做踩過姐。

曬到正， 返到屋企變黑炭頭。

不過無損小朋友玩樂心情。同爸爸玩飛碟玩得幾咁開心。

爸爸：喂， 你唔駛咁狼掟過黎喎， 我同你好近架咋。

Isaac: 咁你又飛到咁高咁遠， 我點接姐。

Isaac: 呵～～好眼瞓呀， 都係坐家庭單車舒服D。

黎大美督， 又圓Isaac 再釣魚既心願， 可惜今次坐左成兩個鐘， 都無一條上釣。

Isaac: 我都係食野好D， 你地慢慢釣埋佢啦。

次次黎大美督， 好似都唔係好郁動咁， 但每次返到屋企， 媽媽都好攰呀。真係淨乾曬都攰死人。希望下次再去時，天氣唔好再咁熱， 咁就更好玩了。